1. Јеһоваја дуа етмәк әнамына неҹә јанашмалыјыг?

 БИЗИМ һејрәтамиз бир әнамымыз вар — јерин вә ҝөјүн Јараданына дуа едә биләрик. Бир дүшүнүн: биз истәнилән вахт, истәнилән дилдә үрәјимизи Аллаһа бошалда биләрик, бунун үчүн нөвбәјә јазылмаг лазым дејил. Истәр хәстәханада, истәр һәбсханада дуа едәк, биз әминик ки, һарада олсаг да, сәмави Атамыз бизи ешидир. Биз бу әнама әһәмијјәтсиз јанашмырыг.

2. Давуд падшаһ дуа әнамыны гијмәтләндирдијини неҹә ҝөстәрмишди?

² Давуд падшаһ дуа әнамыны чох гијмәтләндирирди. О, Јеһоваја һәмд сөјләјәрәк белә демишди: «Гој Сәнин өнүндә дуам һазырланмыш бухур кими... олсун» (Зәб. 141:1, 2). Давудун дөврүндә каһинләрин ибадәт заманы истифадә етдикләри мүгәддәс бухур чох диггәтлә һазырланырды (Чых. 30:34, 35). Давудун бухурдан данышмасы ҝөстәрир ки, сәмави Атасына дуада дејәҹәји сөзләри диггәтлә сечирди. Биз дә буна ҹан атырыг. Истәјирик ки, дуаларымыз Аллаһа хош ҝетсин.

3. Јеһоваја дуа едәркән нәји унутмамалыјыг вә нәјә ҝөрә?

³ Биз Јеһоваја дуа едәндә буну дәрин еһтирам һисси илә етмәлијик. Унутмамалыјыг ки, Онунла тај-тушумузла данышдығымыз кими данышмамалыјыг. Бир анлыг Әшијаја, Һизгијала, Дәнјала вә Јәһјаја назил олан һејрәтамиз вәһјләр һаггында дүшүнүн. Бу вәһјләр бир-бириндән фәргли олса да, онларын ортаг ҹәһәти вар. Онларын һамысында Јеһова әзәмәтли бир Падшаһ кими тәсвир олунуб. Әшија пејғәмбәр Јеһованын «мөһтәшәм, уҹа  бир тахтда» отурдуғуну ҝөрмүшдү (Әшј. 6:1—3). Һизгијал пејғәмбәр Јеһованын сәмави арабасында отурдуғуну вә «әтрафында... ҝөј гуршағына охшар парылты» олдуғуну ҝөрмүшдү (Һизг. 1:26—28). Дәнјал «Әзәлдән Вар Олан»ын «гартәк бәјаз» либасда олдуғуну вә тахтындан алов дилләри чыхдығыны ҝөрмүшдү (Дән. 7:9, 10). Јәһја исә Јеһованы «зүмрүдә бәнзәр ҝөј гуршағы илә» дөврәләнмиш тахтда отуран ҝөрмүшдү (Вәһј 4:2—4). Јеһованын мөһтәшәм әзәмәти һаггында дүшүнмәк бизә бир даһа хатырладыр ки, Она дуа етмәк мисилсиз шәрәфдир вә буну бөјүк еһтирамла етмәлијик. Бәс Аллаһа нә барәдә дуа етмәјимиз мәгбулдур?

4. Мәтта 6:9, 10 ајәләриндә Исанын нүмунә үчүн дедији дуанын илк сөзләриндән нә өјрәнирик?

⁴ Мәтта 6:9, 10 ајәләрини охујун. Иса Мәсиһ Дағүстү вәзиндә шаҝирдләринә Јеһоваја мәгбул шәкилдә дуа етмәји өјрәтмишди. Иса Мәсиһ «бу ҹүр дуа един» дејәндән сонра илк нөвбәдә Јеһованын нијјәти илә бағлы олан ваҹиб мәгамлары вурғуламышды. Бура Јеһованын адынын мүгәддәс тутулмасы, Падшаһлығынын ҝәлмәси нәтиҹәсиндә бүтүн дүшмәнләринин мәһв едилмәси, һәмчинин ҝәләҹәкдә Јер күрәси вә бәшәријјәтлә бағлы немәтләр дахилдир. Бу шејләр һаггында дуа етмәклә Аллаһын ирадәсинин бизим үчүн ваҹиб олдуғуну ҝөстәририк.

5. Јеһоваја шәхси мәсәләләр һагда дуа етмәк олар?

⁵ Иса дуанын нөвбәти һиссәсиндә ҝөстәрди ки, шәхси мәсәләләрлә бағлы дуа етмәк олар. Мәсәлән, биз Јеһовадан ҝүндәлик рузимизи вермәсини, ҝүнаһларымызы бағышламасыны, јолумузу азмамаға көмәк етмәсини, бизи Шәрирдән хилас етмәсини хаһиш едә биләрик (Мәт. 6:11—13). Биз бунлар һагда Јеһоваја дуа едәндә Ондан асылы олдуғумузу гәбул етмиш олуруг вә Онун рәғбәтини газанмаг истәдијимизи ҝөстәририк.

6. Биз јалныз Исанын дедији мөвзуларда дуа етмәлијик? Изаһ един.

⁶ Иса бу дуаны нүмунә олараг өјрәтмишди. Шаҝирдләринин ону сөзбәсөз тәкрарламасыны истәмирди. О диҝәр дуаларында  ону һәмин ан нараһат едән мөвзулар һаггында дуа етмишди (Мәт. 26:39, 42; Јәһ. 17:1—26). Биз дә ејнилә бизи нараһат едән истәнилән мөвзу барәдә Јеһоваја дуа едә биләрик. Әҝәр гәрар гаршысындајыгса, Јеһовадан һикмәт вә дәрракә диләјә биләрик (Зәб. 119:33, 34). Чәтин бир тәјинат иҹра етмәлијиксә, Аллаһдан бәсирәт истәјә биләрик (Мәс. 2:6). Валидејнләр ушаглары үчүн, ушаглар валидејнләри үчүн дуа едә биләр вә һәр биримиз шаҝирдләримиз вә тәблиғ етдијимиз инсанлар үчүн дуа едә биләрик вә етмәлијик дә. Амма дуаларымыз јалныз хаһишләрдән ибарәт олмамалыдыр.

7. Нәјә ҝөрә Јеһованы дуаларымызда мәдһ етмәлијик?

⁷ Дуаларымызда Јеһованы мәдһ етмәји әсла унутмамалыјыг. Онун гәдәр тәрифә лајиг икинҹи варлыг јохдур. Јеһова кәрамәтли вә бағышлајан Аллаһдыр. Рәһмлидир, мәрһәмәтлидир, сәбирлидир, мәһәббәти, сәдагәти болдур (Зәб. 86:5, 15). Бәли, Јеһованы мөвгејинә вә ҝөрдүјү ишләрә ҝөрә мәдһ етмәк үчүн әсасымыз вар.

8. Нәләр үчүн Јеһоваја миннәтдарлығымызы билдирә биләрик? (Зәбур 104:12—15, 24).

⁸ Биз дуаларымызда Јеһованы мәдһ етмәклә јанашы, бизә бәхш етдији еҹазкар немәтләрә ҝөрә миннәтдарлығымызы билдирмәлијик. Мәсәлән, ал-әлван ҝүлләрә, чешид-чешид ләзиз тәамлара, әтрафымызда ҝөзәл достларын олдуғуна ҝөрә Јеһоваја шүкүр етмәлијик. Јеһова бүтүн бунлары вә диҝәр сајсыз немәтләри һәјатдан севинҹ дујмағымыз үчүн вериб. (Зәбур 104:12—15, 24 ајәләрини охујун.) Ән әсасы исә Јеһоваја миннәтдарыг ки, бизә бол руһани гида вә ҝәләҹәјә даир һејрәтамиз үмид бәхш едиб.

9. Јеһоваја миннәтдарлығымызы билдирмәји унутмамаға бизә нә көмәк едә биләр? (1 Салоникилиләрә 5:17, 18).

⁹ Јеһованын бизим үчүн етдикләринә ҝөрә миннәтдарлығымызы билдирмәји асанлыгла унуда биләрик. Бәс буну унутмамаға бизә нә көмәк едә биләр? Јеһоваја етдијимиз конкрет диләкләримизи сијаһыја јаза биләрик вә вахташыры олараг сијаһыја нәзәр салыб, Јеһованын диләјимизи  неҹә јеринә јетирдијинә баха биләрик. Сонра исә бу шејләрә ҝөрә Јеһоваја миннәтдарлығымызы билдирә биләрик. (1 Салоникилиләрә 5:17, 18 ајәләрини охујун.) Кимсә бизә миннәтдарлығыны билдирәндә бизә чох хош олур. Биз дә Јеһоваја дуаларымыза ҹаваб вердијинә ҝөрә миннәтдарлығымызы билдирәндә Онун гәлби севинир (Кол. 3:15). Бәс даһа һансы сәбәбә ҝөрә Јеһоваја миннәтдарлығымызы билдирмәк ваҹибдир?

10. 1 Бутрус 2:21 ајәсинә әсасән, нәјә ҝөрә Јеһоваја Иса Мәсиһи јер үзүнә ҝөндәрдијинә ҝөрә миннәтдар олмалыјыг?

¹⁰ 1 Бутрус 2:21 ајәсини охујун. Јеһоваја миннәтдарлығымызы билдирмәлијик ки, бизә тәлим вермәси үчүн Өз әзиз Оғлуну јер үзүнә ҝөндәрмишди. Исанын һәјаты һаггында мүталиә етмәјин сајәсиндә Јеһованы даһа јахындан таныјырыг вә Ону разы салмағын јолуну өјрәнирик. Исанын фидјә гурбанлығына иман етсәк, Јеһова илә арамызда сүлһ вә мөһкәм достлуг мүнасибәти олаҹаг (Ром. 5:1).

11. Јеһоваја етдијимиз дуаларда Исанын һансы ролу вар?

¹¹ Јеһоваја шүкүрләр олсун ки, Оғлу васитәсилә Она дуа едә билирик. Јеһова дуаларымыза ҹаваб вермәк үчүн Исадан истифадә едир. Исанын ады илә етдијимиз дуалары Јеһова динләјир вә ҹавабландырыр. Иса буну белә изаһ етмишди: «Мәним адымла нә истәсәниз, диләјинизи јеринә јетирәҹәјәм ки, Ата Оғул васитәсилә шәрәфләнсин» (Јәһ. 14:13, 14).

12. Јеһоваја Иса Мәсиһә ҝөрә миннәтдар олмағымызын башга һансы сәбәби вар?

¹² Јеһова бизим ҝүнаһларымызы Иса Мәсиһин фидјә гурбанлығы әсасында бағышлајыр. Мүгәддәс Китабда дејилир ки, «баш каһинимиз [Иса Мәсиһ]... ҝөјләрдә Әзәмәт Саһибинин тахтынын сағында әјләшиб» (Ибр. 8:1). О, Атанын јанында бизим «јардымчымыз»дыр (1 Јәһ. 2:1). Јеһоваја миннәтдарыг ки, бизим зәифликләримизи баша дүшән, бизә «һавадарлыг» едән шәфгәтли Баш каһинимиз вар (Ром. 8:34; Ибр. 4:15). Биз ҝүнаһлы инсанларыг. Буна ҝөрә дә Исанын гурбанлығы олмаса иди, Јеһоваја үз тутуб дуа едә билмәздик. Јәгин, разылашарсыныз ки, Иса Мәсиһ кими гијмәтли һәдијјә бәхш етдијинә ҝөрә Јеһоваја нә гәдәр миннәтдар олсаг аздыр!   

13. Өлүмүндән өнҹәки ҝеҹә Иса шаҝирдләринә мәһәббәтини неҹә ҝөстәрмишди?

¹³ Өлүмүндән өнҹәки ҝеҹә Иса шаҝирдләриндән өтрү Јеһоваја хејли дуа етди вә хаһиш етди ки, онлары Шәрирдән горусун (Јәһ. 17:15). Исанын өзүнү гаршыда чох ағыр бир сынаг ҝөзләдији һалда, о, һәвариләринин фикрини чәкирди. Мәһәббәтин бөјүклүјүнә бир бахын!

14. Баҹы-гардашларымызы севдијимизи неҹә ҝөстәрә биләрик?

¹⁴ Биз Исадан өрнәк алараг тәкҹә өз тәләбатларымыз һаггында дүшүнмүрүк, мүнтәзәм олараг баҹы-гардашлар үчүн дә дуа едирик. Бунунла һәм Исанын «бир-биринизи севин» әмринә итаәт едирик, һәм дә Јеһова диндашларымызы нә гәдәр чох севдијимизи ҝөрүр (Јәһ. 13:34). Баҹы-гардашлар үчүн дуа етмәк вахт иткиси дејил. Чүнки Аллаһын Кәламында јазылыб ки, «салеһин һәрарәтли дуасынын бөјүк тәсири вар» (Јаг. 5:16).

15. Нәјә ҝөрә диндашларымызын дуаларымыза еһтијаҹы вар?

 ¹⁵ Диндашларымыз чохлу чәтинликләрлә үзләшдији үчүн онлардан өтрү дуа етмәјимизә еһтијаҹлары вар. Јеһовадан хаһиш едә биләрик ки, онлара хәстәликләрә, тәбии фәлакәтләрә, мүһарибәләрә, тәгибләрә вә диҝәр чәтинликләрә дөзмәјә көмәк етсин. Һәмчинин тәбии фәлакәтдән зәрәрчәкәнләрә јардым ишиндә көмәк едән фәдакар баҹы-гардашлар үчүн дә дуа едә биләрик. Ола билсин, бу ҹүр чәтинликләрлә үзләшән диндашларымыздан кимләрисә шәхсән таныјырыг. Мәҝәр дуаларымызда онларын адыны чәкмәјимиз јахшы олмазды? Јеһовадан онлара көмәк етмәсини хаһиш етмәклә әсл гардашлыг мәһәббәтини ҝөстәрмиш олуруг.

16. Нәјә ҝөрә мәсул гардашлардан өтрү дуа етмәлијик?

¹⁶ Јығынҹағымыздакы мәсул гардашлар онлар үчүн етдијимиз дуалара ҝөрә миннәтдардырлар. Онлар бу дуаларын бөјүк көмәјини ҝөрүрләр. Һәвари Булус да анлајырды ки, башгаларынын дуасына еһтијаҹы вар. О белә демишди: «Мәндән өтрү... дуа един ки, данышмаға башлајанда нә демәк лазымдырса, мәнә билдирилсин вә мән мүждәнин мүгәддәс сиррини ҹәсарәтлә бәјан едим» (Ефес. 6:19). Бу ҝүн дә Јеһованын ишиндә зәһмәт чәкән чохлу мәсул гардашларымыз вар. Јеһовадан онлара көмәк етмәсини хаһиш едәндә онлара мәһәббәтимизи ҝөстәририк.

17, 18. Һансы һалларда башгаларынын адындан дуа етмәк лазым ҝәлир вә биз нәји нәзәрә алмалыјыг?

¹⁷ Бәзән бизә башгаларынын адындан дуа етмәк лазым ҝәлир. Мәсәлән, баҹы шаҝирдинин дәрсини кечмәк үчүн дәвәт етдији әмәкдашындан дуа етмәји хаһиш едә биләр. Дәвәт олунан баҹы, ола билсин, шаҝирди јахшы танымадығы үчүн дәрсин әввәлиндә јох, сонунда дуа етмәјә үстүнлүк версин. Беләҹә, о, шаҝирд үчүн дуада нә демәли олдуғуну даһа јахшы биләҹәк.

¹⁸ Гардашлар јығынҹагда вә тәблиғ ҝөрүшүндә һамынын адындан дуа едирләр. Белә бир шәрәфә лајиг ҝөрүлән гардаш ҝөрүшүн мәгсәдини нәзәрә алараг дуа етмәлидир.  Дуа јығынҹаға мәсләһәт вермәк вә ја еланлар етмәк үчүн дејил. Адәтән јығынҹагда дуа илә нәғмәјә ҹәми беш дәгигә вахт ајрылыр. Буна ҝөрә, хүсусилә дә ҝөрүшүн әввәлиндә дуа едән гардаш «чох сөз» демәмәлидир (Мәт. 6:7).

19. Нәјин сајәсиндә Јеһованын һөкм ҝүнүнә һазыр ола биләрик?

¹⁹ Јеһованын һөкм ҝүнү јахынлашдығы үчүн дуа һәјатымызда һәмишәкиндән дә ваҹиб јери тутмалыдыр. Бунунла бағлы Иса Мәсиһ демишди: «Ојаг дурун вә һәр заман Аллаһа јалварын ки, баш верәҹәк бу һадисәләрдән гуртуласыныз» (Лука 21:36). Бәли, даима дуа етмәк бизә көмәк едәҹәк ки, руһән ојаг галаг вә Аллаһын ҝүнү бизи гәфил јахаламасын.

20. Дуаларымызын «хош әтирли бухур» кими олмасы үчүн нә едә биләрик?

²⁰ Биз бу мәгаләдән нә өјрәндик? Јеһоваја дуа етмәк бизим үчүн бөјүк шәрәфдир. Биз буну чох гијмәтләндиририк. Дуамызда бирбаша Јеһованын нијјәти илә бағлы мөвзулара әсас јери вермәлијик. Һәмчинин Јеһоваја дуамызда Оғлуна вә онун Падшаһлығы идарә етдијинә ҝөрә миннәтдарлығымызы билдирмәлијик. Еләҹә дә, диндашларымыз үчүн дуа етмәји унутмамалыјыг вә әлбәттә ки, өзүмүзүн физики вә руһани тәләбатлары үчүн дуа едә биләрик. Биз дуада дејәҹәјимиз сөзләри диггәтлә сечәндә бу һејрәтамиз әнамы гијмәтләндирдијимизи ҝөстәририк. Онда дуаларымыз «әтирли бухур» кими Јеһоваја хош ҝедәҹәк (Мәс. 15:8).