1. Бу ҝүн Јеһованын ирадәси нәдир?

 БУ ҜҮН Јеһова Падшаһлыг һаггындакы мүждәнин бүтүн дүнјада тәблиғ едилмәсини истәјир (Марк 13:10; 1 Тим. 2:3, 4). Бу иш Јеһоваја мәхсусдур вә Онун үчүн чох ваҹибдир. Буна ҝөрә дә О, тәблиғ ишинә нәзарәти севимли Оғлуна тапшырыб. Әмин ола биләрик ки, тәблиғ ишинә Иса рәһбәрлик етдији үчүн сон ҝәлмәмишдән әввәл бу иш Јеһованын истәдији кими тамамланаҹаг (Мәт. 24:14).

2. Бу мәгаләдә нә һагда данышаҹағыг?

² Бу мәгаләдә Иса Мәсиһин «садиг вә ағыллы нөкәр» васитәсилә руһани гида вермәсиндән вә тарихдә ән бөјүк тәблиғ ишини тәшкил етмәсиндән данышаҹағыг (Мәт. 24:45). Ҝөрәҹәјимиз кими, һәр биримиз һәм Исаја, һәм дә садиг вә ағыллы нөкәрә дәстәк ола биләрик.

3. Исаја һансы сәлаһијјәт верилиб?

³ Иса Мәсиһин тәблиғ ишинә рәһбәрлик етдијини һарадан билирик? О, ҝөјә галхмаздан бир аз әввәл Ҹәлиләдә дағда бәзи садиг давамчылары илә ҝөрүшмүшдү. Иса онлара демишди: «Ҝөјдә вә јердә бүтүн һакимијјәт мәнә верилиб». Ҝөрүн о, даһа сонра нә демишди: «Буна ҝөрә дә ҝедин вә бүтүн халгларын ичиндә шаҝирд һазырлајын» (Мәт. 28:18, 19). Демәли, тәблиғ ишинә рәһбәрлик етмәк дә Иса Мәсиһә һәвалә олунуб.

4. Исанын тәблиғ ишинә һәлә дә нәзарәт етдијинә нәјә ҝөрә әминик?

 ⁴ Иса Мәсиһ гејд етмишди ки, тәблиғ вә шаҝирд һазырламаг иши «бүтүн халглары» әһатә едәҹәк вә о, «бу дөврүн јекунуна кими һәмишә» давамчылары илә олаҹаг (Мәт. 28:20). Бу сөзләр ајдын ҝөстәрир ки, тәблиғ иши Исанын нәзарәти алтында бизим дөврүмүзә гәдәр давам едир.

5. Зәбур 110:3 ајәсинин јеринә јетмәсиндә бизим һансы пајымыз вар?

⁵ Иса Мәсиһ нараһат дејилди ки, бирдән, дөврүн сонунда кифајәт гәдәр ишчи олмаз. О билирди ки, мәзмурчунун дедији пејғәмбәрлик јеринә јетәҹәк: «Сән ордуларыны топладығын ҝүн халгын һазыр дураҹаг» (Зәб. 110:3). Тәблиғ ишиндә иштирак етмәклә сиз һәм Иса Мәсиһә, һәм дә садиг нөкәрә дәстәк олурсунуз, үстәлик, бу пејғәмбәрлијин јеринә јетмәсиндә иштирак едирсиниз. Иш ирәли ҝедир, амма бәзи чәтинликләрлә үзләширик.

6. Бу ҝүн мүждәчиләрин үзләшдији чәтинликләрдән бири һансыдыр?

⁶ Падшаһлығын мүждәчиләринин үзләшдији чәтинликләрдән бири тәгибләрдир. Дөнүкләр, дини вә сијаси хадимләр фәалијјәтимизлә бағлы јанлыш тәәссүрат јарадыблар. Ола билсин, гоһумларымыз, дост-танышымыз, иш јолдашларымыз бу јаланлара инансынлар вә бизи мәҹбур етсинләр ки, Јеһоваја хидмәти дајандыраг, даһа тәблиғ етмәјәк. Бәзи өлкәләрдә дүшмәнләр диндашларымыза һәдә-горху ҝәлирләр, онлары тәһдид едирләр, һәтта һәбс ҹәзасы кәсирләр. Белә мүнасибәтлә үзләшмәјимиз бизи тәәҹҹүбләндирмир, чүнки Иса Мәсиһ демишди: «Мәним адыма ҝөрә бүтүн халглар сизә нифрәт едәҹәк» (Мәт. 24:9). Әслиндә, инсанларын бизә нифрәт етмәси сүбут едир ки, биз Мәсиһин нүмунәсини изләјирик вә Јеһова биздән разыдыр (Мәт. 5:11, 12). Чүнки бүтүн бу тәгибләрин архасында Шејтан Иблис дурур. Амма билирик ки, Иса Мәсиһ ондан гат-гат ҝүҹлүдүр! Буна ҝөрә дә Исанын көмәји илә хош хәбәр бүтүн халглара тәблиғ олунур.

7. Вәһј 14:6, 7 ајәләринин јеринә јетдијинә даир һансы сүбутлары ҝөрүрсүнүз?

⁷ Бу ҝүн бизим үзләшдијимиз диҝәр чәтинлик дил сәддидир. Иса Мәсиһ һәвари Јәһјаја вердији вәһјдә ҝөстәрмишди ки, бизим дөврүмүздә мүждә бу сәдди ашаҹаг. (Вәһј 14:6, 7 ајәләрини охујун.) Бу сөзләр неҹә јеринә јетир? Биз мүмкүн гәдәр чох инсана Падшаһлыг һагда хәбәри ешитмәк имканы јарадырыг. Бу ҝүн jw.org сајтымызда 1000-дән чох дилдә мәлумат јер алыр! Бунун сајәсиндә дүнјанын һәр јериндә инсанлар Мүгәддәс Китаба әсасланан мәлуматлары охуја биләр. Рәһбәрлик Шурасы шаҝирд һазырламаг үчүн әсас дәрс вәсаитимиз олан «Әбәди хошбәхт һәјат!» китабынын 700-дән чох дилә тәрҹүмә олунмасына иҹазә вериб! Һәмчинин ҝөздән әлил инсанлар үчүн видеојазылар, ешитмә гүсурлу инсанлар үчүн Брајл әлифбасы илә нәшрләр һазырланыр. Бунун сајәсиндә онлар руһани гидасыз галмырлар. Биз Мүгәддәс Китабдакы пејғәмбәрликләрин јеринә јетдијинин шаһидијик. «Бүтүн халглардан олан, мүхтәлиф дилләрдә данышан» инсанлар «саф дил»дә данышмағы өјрәнир (Зәк. 8:23; Сәф. 3:9). Бүтүн бу наилијјәтләр Иса Мәсиһин сәриштәли рәһбәрлији сајәсиндә әлдә олунуб.

8. Бу ҝүнә гәдәр ҝөрдүјүмүз тәблиғ ишинин сајәсиндә нәләрә наил олмушуг?

⁸ Бу ҝүн Јеһованын 240 өлкә вә әразидә јашајан 8 000 000-дан чох хидмәтчиси вар вә һәр ил он минләрлә инсан вәфтиз олунур! Амма бу рәгәмләрдән  даһа өнәмли олан јени шаҝирдләрин илаһи кејфијјәтләрә јијәләнәрәк «јени шәхсијјәти» ҝејинмәләридир (Кол. 3:8—10). Чохлары даһа әхлагсызлыг, зоракылыг етмир, дахилләриндәки гәрәзә вә милләтчилијә сон гојублар. Әшија 2:4 ајәсиндә пејғәмбәрлик олундуғу кими, онлар «артыг мүһарибә етмәји» өјрәнмирләр. Бизим јени шәхсијјәти ҝејинмәјимиз инсанлары Јеһованын тәшкилатына ҹәлб едир, үстәлик, бунунла Рәһбәримиз Иса Мәсиһин нүмунәсини изләдијимизи сүбут едирик (Јәһ. 13:35; 1 Бут. 2:12). Бүтүн бунлар тәсадүфән јох, Иса Мәсиһин көмәји сајәсиндә мүмкүн олур.

9. Мәтта 24:45—47 ајәләриндә дөврүн сону илә бағлы нә пејғәмбәрлик олунмушду?

⁹ Мәтта 24:45—47 ајәләрини охујун. Иса Мәсиһ демишди ки, руһани гида вермәк үчүн дөврүн сонунда «садиг вә ағыллы нөкәр» тәјин едәҹәк. Демәли, бу нөкәр бизим дөврүмүздә чох иш ҝөрмәлидир. Бу, белә дә олду. Рәһбәримиз мәсһ олунмуш кишиләрдән ибарәт кичик груп тәјин етди вә онлара Аллаһын халгыны вә мараглананлары «вахтлы-вахтында» руһани гида илә тәмин етмәк тапшырығы верди. Бу кишиләр башгаларынын иманы үзәриндә ағалыг етмирләр, әксинә, баша дүшүрләр ки, халгын үзәриндә «өндәр вә сәрдар» Иса Мәсиһдир (Әшј. 55:4; 2 Кор. 1:24).

10. Шәкилдә ҝөстәрилән һансы нәшр сизә Јеһоваја ибадәтә башламаға көмәк едиб?

¹⁰ Садиг вә ағыллы нөкәрин 1919-ҹу илдән бәри һазырладығы ҹүрбәҹүр нәшрләр мараглананлара илк дәфә руһани тәамлары дадмаға имкан јарадыб. 1921-ҹи илдә бу нөкәр мараглананларын Мүгәддәс Китабын әсас тәлимләрини өјрәнмәләри үчүн «Аллаһын арфасы» китабыны дәрҹ етди. Заман дәјишдикҹә диҝәр нәшрләр дә ишыг үзү ҝөрдү.  Бәс Јеһова һаггында билик алмаға вә Ону севмәјә сизә һансы нәшр көмәк едиб? Ола билсин, сизә бу нәшрләрдән бири көмәк едиб: «Аллаһ һагдыр», «Әбәди һәјата апаран һәгигәт», «Јер үзүндәки Ҹәннәтдә әбәдијјән јашаја биләрсиниз», «Әбәди һәјата апаран билик», «Мүгәддәс Китаб әслиндә нә өјрәдир?», «Мүгәддәс Китаб тәлимләри» вә ја јени нәшримиз «Әбәди хошбәхт һәјат!» китабы. Шаҝирд һазырламаг үчүн нәзәрдә тутулан бу нәшрләрин һәр бири өз дөврүнүн тәләбатларына ујғун тәртиб олунмушду.

11. Нәјә ҝөрә һамымызын руһани гиданы гәбул етмәси ваҹибдир?

¹¹ Бәрк руһани гидаја јалныз һәгигәтә јени ҝәләнләрин јох, һамымызын еһтијаҹы вар. Һәвари Булус јазмышды: «Бәрк гида... јеткин адам үчүндүр». Һәмчинин о гејд етмишди ки, өјрәндикләримизә әмәл етмәк «јахшыны писдән ајырмаға» бизә көмәк едәҹәк (Ибр. 5:14). Биз ағыр бир дөврдә јашајырыг, әхлаг дәјәрләри һәлә һеч вахт бу дәрәҹәдә корланмамышды. Буна ҝөрә дә Јеһованын нормаларына ујғун јашамаг бизим үчүн чох чәтин ола биләр. Анҹаг Иса иманымызы мөһкәм сахламаг үчүн лазым олан руһани гида илә бизи тәмин едир. Бу гиданын мәнбәји Аллаһын Кәламыдыр. Садиг нөкәр бу гиданы Исанын нәзарәти алтында һазырлајыр вә пајлајыр.

12. Иса Мәсиһ кими бизим дә Аллаһын адына еһтирам бәсләдијимиз нәдән ҝөрүнүр?

¹² Иса Мәсиһ кими, биз дә Аллаһын адыны лајигинҹә уҹалдырыг (Јәһ. 17:6, 26). Мәсәлән, биз 1931-ҹи илдән Мүгәддәс Китаба әсасән, Јеһованын Шаһидләри адланмаға башладыг. Бунунла биз ҝөстәрдик ки, сәмави Атамызын ады бизим үчүн чох әзиздир вә биз бу адла танынмаг истәјирик (Әшј. 43:10—12). Һәмчинин һәмин илин октјабрындан башлајараг, бу журналын  һәр сајынын үз габығында Аллаһын ады әкс олунур. Үстәлик, Мүгәддәс Китабын «Јени Дүнја Тәрҹүмәси»ндә Аллаһын ады өз гануни јериндә бәрпа олунуб. Бу, христиан килсәләринин етдијинин там әксидир. Онлар Мүгәддәс Китабын бир чох тәрҹүмәләриндән Јеһованын адыны чыхарыблар!

13. Бу ҝүн Исанын «садиг вә ағыллы нөкәр» васитәсилә идарә етдијинә сизи нә әмин едир? (Јәһја 6:68).

¹³ Иса Мәсиһ «садиг вә ағыллы нөкәр» васитәсилә јер үзүндә мөһтәшәм бир тәшкилат тәсис едиб. Бу тәшкилат пак ибадәтин ирәлиләмәсинә хидмәт едир. Сиз бу тәшкилат һагда нә фикирләширсиниз? Јәгин, бу суалын ҹавабы һагда дүшүнәркән һәвари Бутрусун Исаја дедији сөзләр јадыныза дүшдү: «Аға, кимин јанына ҝедәк? Әбәди һәјатын сөзләри сәндәдир» (Јәһ. 6:68). Доғрудан да, әҝәр биз Јеһованын тәшкилатыны танымасајдыг, инди һарада олардыг? Мәсиһ бу тәшкилат васитәсилә бизи бол-бол руһани гида илә тәмин едир. Һәмчинин хидмәтимизи јахшы иҹра етмәјимиз үчүн бизә тәлим верир. Бундан әлавә, о, Јеһованын разылығыны газанмағымыз үчүн «јени шәхсијјәтә» бүрүнмәјимизә көмәк едир (Ефес. 4:24).

14.COVID-19 пандемијасы заманы Јеһованын тәшкилатында олмағын һансы хејрини ҝөрдүнүз?

¹⁴ Иса јашадығымыз бу ағыр зәманәдә бизә һикмәтли ҝөстәришләр верир. COVID-19 пандемијасы башлајанда онун ҝөстәришләринин хејри ҝөз габағында иди. Чохлары чашбаш галмышды, билмирди нә етсин. Амма Исанын нәзарәти алтында биз һәјатымызын тәһлүкәсизлији үчүн ајдын ҝөстәришләр алдыг. Биз иҹтимаи јерләрдә тибби маска тахмаға, физики мәсафә  сахламаға тәшвиг олундуг. Ағсаггаллара мәсләһәт ҝөрүлдү ки, мүнтәзәм олараг јығынҹагдакы һәр кәслә әлагә сахласынлар, онларын физики вә руһани вәзијјәти илә мараглансынлар (Әшј. 32:1, 2). Рәһбәрлик Шурасы өз мүраҹиәтләри васитәсилә бизә әлавә ҝөстәришләр верирди вә үрәкләндирирди.

15. Пандемија дөврүндә јығынҹагларын кечирилмәси вә тәблиғ иши илә бағлы һансы ҝөстәришләри алдыг вә бу һансы бәһрәләри ҝәтирди?

¹⁵ Биз һәмчинин пандемија дөврүндә јығынҹагларын кечирилмәси вә тәблиғ иши илә бағлы ајдын ҝөстәришләр алдыг. Демәк олар ки, бир ҝеҹәнин ичиндә ибадәт ҝөрүшләринин вә топлантыларын видеоконфранс васитәсилә кечирилмәси тәшкил олунду. Еләҹә дә әсас етибарилә мәктуб вә телефон васитәсилә тәблиғ етмәјә башладыг. Јеһова бизим ишимизи аванд етди. Бир чох филиалларын әразисиндә тәблиғчиләрин сајында бөјүк артым олуб. Һәмчинин бу вахт әрзиндә чохлу руһландырыҹы һадисәләр баш вериб. (« Јеһова тәблиғ ишимизи аванд едир» адлы чәрчивәјә бахын.)

16. Биз нәјә әмин ола биләрик?

¹⁶ Ола билсин, кимләрсә дүшүнүрдү ки, тәшкилат пандемија илә бағлы һәддән артыг еһтијат тәдбирләри ҝөрүр. Амма дәфәләрлә шаһид олдуг ки, верилән ҝөстәришләр әсассыз дејилди (Мәт. 11:19). Исанын өз давамчыларына истигамәт вермәси һаггында дүшүнәндә биз әмин олуруг ки, ҝәләҹәкдә нә олурса олсун, Јеһова вә севимли Оғлу бизимлә олаҹаг. (Ибраниләрә 13:5, 6 ајәләрини охујун.)

17. Иса Мәсиһин рәһбәрлији алтында хидмәт етдијиниз үчүн һансы һиссләри кечирирсиниз?

¹⁷ Исанын рәһбәрлији алтында хидмәт етдијимизә ҝөрә чох хошбәхтик! Биз милләтчилик, иргчилик вә дил сәддини ашан бир тәшкилата мәхсусуг. Биз боллуҹа руһани гида илә тәмин олунмушуг вә тәблиғ ишини јеринә јетирмәк үчүн јахшы тәлим алмышыг. Һәмчинин Јеһованын тәшкилаты һәр биримизә јени шәхсијјәтә бүрүнмәји вә бир-биримизи севмәји өјрәдир. Доғрудан да, Рәһбәримиз Иса илә өјүнмәк үчүн сәбәбләримиз чохдур!