1. Адәмлә Һәвванын ҝүнаһ ишләмәсиндән чох кечмәмиш Јеһова нә етди? (Јарадылыш 3:15).

 АДӘМЛӘ Һәвванын ҝүнаһ ишләмәсиндән чох кечмәмиш Јеһова онларын нәслинә үмид вермәк үчүн ваҹиб бир пејғәмбәрлик сөјләди. Бу, Јарадылыш 3:15 ајәсиндә јазылыб. (Ајәни охујун.)

2. Бу пејғәмбәрлији хүсуси едән нәдир?

² Бу пејғәмбәрлик Мүгәддәс Китабын илк бөлмәсиндә јазылыб. Бу, хүсуси пејғәмбәрликдир, чүнки Мүгәддәс Китабын диҝәр бөлмәләри бу вә ја диҝәр јолла онунла әлагәлидир. Спираллы дәфтәрләрдә спирал бүтүн сәһифәләри бир јердә бирләшдирдији кими, Јарадылыш 3:15 ајәси дә Мүгәддәс Китабын бүтүн бөлмәләрини бир мөвзуда бирләшдирир. Бу мөвзу одур ки, Хиласкар зүһур едәҹәк, Иблиси вә онун бүтүн бәдхаһ тәрәфдарларыны мәһв едәҹәк *. Јеһованы севәнләр үчүн бу, әсл бајрам олаҹаг!

3. Бу мәгаләдә нә һагда данышаҹағыг?

³ Бу мәгаләдә биз Јарадылыш 3:15 ајәсиндәки пејғәмбәрликлә бағлы бу суаллары арашдыраҹағыг: «Ајәдәки персонажлар кимләри тәмсил едир? Бу пејғәмбәрлик неҹә јеринә јетиб? Бу бизим үчүн һансы әһәмијјәти дашыјыр?»

4. «Илан» кимдир вә буну һарадан билирик?

⁴ Јарадылыш 3:14, 15 ајәләриндә һансы персонажлар вар?  Бу, «илан», иланын «өвлады», «гадын» вә гадынын «өвлады»дыр. Мүгәддәс Китаб онларын һәр биринин кимлијини мүәјјән етмәјә көмәк едир *. Ҝәлин «иландан» башлајаг. Шүурсуз ҹанлы олан илан Јеһованын Әдән бағында дедикләрини баша дүшә билмәзди. Демәли, бурада Јеһованын һөкмүнә дүчар олаҹаг шүурлу варлыгдан сөһбәт ҝедир. Кимдән? Вәһј 12:9 ајәси онун кимлијинә даир шүбһә јери гојмур. Орада ајдын дејилир ки, «гәдим илан» Шејтан Иблисдир. Бәс иланын өвлады кимдир?

5. Иланын өвлады кимдир?

⁵ Мүгәддәс Китабда өвлад мәҹази мәнада ишләнәндә киминсә өз дүшүнҹәси вә һәрәкәти илә мәҹази атасына бәнзәдији нәзәрдә тутулур. Демәли, иланын өвлады Шејтан кими, Аллаһа вә Онун халгына гаршы чыхан руһани варлыглар вә инсанлардан ибарәтдир. Бура һәм Нуһ пејғәмбәрин дөврүндә ҝөјдәки мәскәнләрини тәрк едиб јер үзүнә ҝәлән мәләкләр, һәм дә аталары Иблис кими давранан шәр инсанлар дахилдир (Јар. 6:1, 2; Јәһ. 8:44; 1 Јәһ. 5:19; Јһд. 6).

6. Нәјә ҝөрә пејғәмбәрликдәки «гадын» Һәвва ола билмәз?

⁶ Инди ҝәлин пејғәмбәрликдәки «гадынын» кимлијини мүәјјән едәк. Бу, Һәвва ола билмәзди. Нәјә ҝөрә? Ҝәлин ҹәми бир сәбәби нәзәрдән кечирәк. Пејғәмбәрликдә дејилир ки, гадынын өвлады иланын башыны «әзәҹәк». Бир аз өнҹә дә мүзакирә етдијимиз кими, илан руһани варлыг Шејтандыр. Һәвванын гејри-камил өвладларындан һеч бири Шејтаны мәһв етмәјә гадир дејил. Демәли, сөһбәт башга бир варлыгдан ҝедир.

7. Вәһј 12:1, 2, 5, 10 ајәләринә әсасән, Јарадылыш 3:15 ајәсиндәки «гадын» кимдир?

 ⁷ Јарадылыш 3:15 ајәсиндәки гадынын кимлији Мүгәддәс Китабын сонунҹу бөлмәсиндә ачыгланыр. (Вәһј 12:1, 2, 5, 10 ајәләрини охујун.) Бу, ади гадын дејил! Онун ајағы алтында ај, башында исә 12 улдуздан ибарәт таҹ вар. О, гејри-ади бир өвлад дүнјаја ҝәтирир. Бу, Аллаһын Падшаһлығыдыр. Аллаһын Падшаһлығы ҝөјдә олдуғу үчүн «гадын» да ҝөјдәдир. «Гадын» Јеһованын тәшкилатынын садиг руһани варлыглардан ибарәт сәмави һиссәсини тәмсил едир (Гал. 4:26).

8. Ким вә нә вахтдан гадынын өвладынын әсас һиссәсидир? (Јарадылыш 22:15—18).

⁸ Мүгәддәс Китаб һәмчинин бизә гадынын өвладынын әсас һиссәсини мүәјјән етмәјә көмәк едир. О, Ибраһим пејғәмбәрин нәслиндән ҝәлмәли иди. (Јарадылыш 22:15—18 ајәләрини охујун.) Белә дә олду, Иса Мәсиһ Ибраһим пејғәмбәрин нәслиндән ҝәлди (Лука 3:23, 34). Лакин өвлад ади инсандан даһа гүдрәтли олмалы иди ки, Шејтан Иблиси әзиб тамамилә мәһв етсин. Белә ки, Исанын тәхминән 30 јашы оланда о, Аллаһын мүгәддәс руһу илә мәсһ олунду. Мәсһ олунанда Иса гадынын өвладынын әсас һиссәси олду (Гал. 3:16). Иса дириләндән сонра Аллаһ онун башына «шәрәф вә иззәт таҹы гојду» вә она «ҝөјдә вә јердә бүтүн һакимијјәт»и верди. Онун сәлаһијјәтинә «Иблисин ишләрини дағытмаг» да дахилдир (Ибр. 2:7; Мәт. 28:18; 1 Јәһ. 3:8).

9, 10. а) Кимләр вә нә вахтдан гадынын өвладынын бир һиссәси олур? б) Инди нәји арашдыраҹағыг?

⁹ Амма бу өвладын икинҹидәрәҹәли һиссәси дә вар. Онун кимлији һәвари Булусун јәһуди вә гејри-јәһуди мәсһ олунмуш мәсиһиләрә дедији сөзләрдән мәлум олур. О демишди: «Әҝәр Мәсиһә мәхсуссунузса, онда, һәгигәтән, Ибраһимин өвладысыныз вә вәдә ҝөрә вариссиниз» (Гал. 3:28, 29). Јеһова мәсиһини мүгәддәс руһла мәсһ едәндә о, гадынын өвладынын бир һиссәси олур. Демәли, «өвлад» Иса Мәсиһдән вә онун 144 000 һәмварисиндән ибарәтдир (Вәһј 14:1). Онларын һамысы Аталары Јеһова Аллаһын хүсусијјәтләрини әкс етдирир.

¹⁰ Биз Јарадылыш 3:15 ајәсиндә бәһс олунан персонажларын кимлијини мүәјјән етдик. Инди ҝәлин ҝөрәк Јеһова мәрһәләли шәкилдә бу пејғәмбәрлији неҹә јеринә јетирди вә буну билмәјин бизим үчүн һансы әһәмијјәти вар.

11. Һансы мәнада гадынын өвладынын «дабаны» зәдәләнди?

¹¹ Јарадылыш 3:15 ајәсиндә јазылан пејғәмбәрлијә әсасән, илан гадынын өвладынын «дабанындан» чалмалы иди. Шејтан јәһудиләри вә ромалылары Мәсиһи өлдүрмәјә сөвг едәндә бу пејғәмбәрлик јеринә јетди (Лука 23:13, 20—24). Инсанын дабаны јаралананда бир мүддәт ајағыны јерә басыб ҝәзә билмәдији кими, Мәсиһин өлүмү дә онун фәалијјәтини бир мүддәт дајандырды; онун ҹансыз бәдәни үч ҝүнә јахын мәзарда галды (Мәт. 16:21).

12. Иланын башы неҹә вә нә вахт әзиләҹәк?

¹² Јарадылыш 3:15 ајәсиндәки пејғәмбәрлијин јеринә јетмәси үчүн Иса мәзарда һәмишәлик гала билмәзди. Нәјә ҝөрә? Чүнки пејғәмбәрликдә дејилирди ки, өвлад иланын башыны әзәҹәк. Демәли, Исанын дабанынын јарасы сағалмалы иди. Бу, белә дә олду! Өлүмүнүн үчүнҹү ҝүнү Иса өлмәз руһани варлыг кими дирилди. Аллаһын  тәјин етдији вахтда о, Шејтаны мәһв едәҹәк (Ибр. 2:14). Мәсиһин һәмварисләри онунла бирҝә иланын өвладынын, башга сөзлә, Аллаһын бүтүн дүшмәнләринин көкүнү јер үзүндән кәсәҹәк (Вәһј 17:14; 20:4, 10) *.

13. Нәјә ҝөрә бу пејғәмбәрлијин јеринә јетмәси бизим үчүн әһәмијјәтлидир?

¹³ Әҝәр сиз Аллаһын һәср олунмуш хидмәтчисисинизсә, бу пејғәмбәрлијин јеринә јетмәси сизин үчүн дә әһәмијјәтлидир. Иса јер үзүнә ҝәлди, Атасынын хүсусијјәтләрини мүкәммәл сурәтдә әкс етдирди (Јәһ. 14:9). Беләҹә, онун васитәсилә биз Јеһова Аллаһы таныдыг вә севдик. Һәмчинин онун өјрәтдији тәлимләрин, јығынҹаға вердији ҝөстәришләрин бөјүк хејрини ҝөрүрүк. О бизә Аллаһын бәјәндији кими јашамағы өјрәтди. Исанын дабанынын санҹылмасы, јәни өлмәси һамымызын хејринә олду. Иса дириләндән сонра камил гурбанлығы, фидјәни Јеһоваја тәгдим етди, беләҹә, онун ганы бизи бүтүн ҝүнаһлардан тәмизләјир (1 Јәһ. 1:7).

14. Әдән бағындакы пејғәмбәрлик нәјә ҝөрә дәрһал јеринә јетә билмәзди?

¹⁴ Јеһованын Әдән бағында дедији пејғәмбәрликдән ајдын иди ки, бу сөзләрин јеринә јетмәси үчүн мүәјјән вахт кечмәли иди. Гадынын вәд едилмиш өвладынын дүнјаја ҝәлмәси, Иблисин өз тәрәфдарларыны топламасы вә бу ики груп арасында дүшмәнчилијин јаранмасы үчүн вахт лазым иди. Бу пејғәмбәрлији баша дүшмәјимиз чох ваҹибдир. Чүнки бу пејғәмбәрликдән Шејтанын идарә етдији дүнјанын Јеһованын хидмәтчиләринә нифрәт едәҹәјини өјрәнирик. Сонралар Иса да шаҝирдләрини бу барәдә хәбәрдар етмишди (Марк 13:13; Јәһ. 17:14). Биз хүсусилә дә сон 100 ил әрзиндә пејғәмбәрлијин бу һиссәсинин јеринә јетдијини ајдын ҝөрүрүк. Ҝәлин бахаг.

15. Нәјә ҝөрә дүнјанын бизә нифрәти артыб, бәс Шејтандан горхмамағымыз үчүн һансы сәбәбимиз вар?

¹⁵ Иса Мәсиһ 1914-ҹү илдә падшаһ тәјин едиләндән гыса мүддәт сонра Шејтан јер үзүнә атылды. Инди о, јер үзүнүн һүдудларындан кәнара чыха билмир вә мәһвини ҝөзләјир (Вәһј 12:9, 12). Амма о, әл-голуну јанына салыб ҝөзләмир. Шејтан чарәсиздир, гәзәбдән алышыб-јаныр вә бүтүн гәзәбини Аллаһын халгынын үзәринә төкүр (Вәһј 12:13, 17). Елә бу сәбәбдән дүнјанын Аллаһын халгына нифрәти даһа да артыб. Бунунла белә, Шејтандан вә онун тәрәфдарларындан горхмаг үчүн һеч бир сәбәбимиз јохдур. Әксинә, биз дә һәвари Булус кими әминликлә дејә биләрик: «Аллаһ бизимләдирсә, ким бизә гаршы чыха биләр?» (Ром. 8:31). Биз Јеһоваја тамамилә ҝүвәнә биләрик, чүнки ҝөрдүјүмүз кими, Јарадылыш 3:15 ајәсиндә јазылан пејғәмбәрлијин чох һиссәси артыг јеринә јетиб.

16—18. Јарадылыш 3:15 ајәсини баша дүшмәјин Көртис, Урсула вә Ҹесикаја һансы фајдасы олуб?

¹⁶ Јеһованын Јарадылыш 3:15 ајәсиндәки вәди үзләшдијимиз истәнилән сынағын өһдәсиндән ҝәлмәјә бизә көмәк едә биләр. Гуамда хүсуси тәјинатлы мүждәчи кими хидмәт едән Көртис гардаш дејир: «Һәјатымда чәтинликләрлә, мәни мәјус едән һадисәләрлә үзләшмишәм вә бунлар мәним Јеһоваја сәдагәтими сынајыб. Лакин Јарадылыш  3:15 ајәсиндәки пејғәмбәрлијин үзәриндә дүшүнмәк сәмави Атама етибарымы мөһкәм сахламағыма көмәк едиб». Көртис Јеһованын бүтүн сынагларымыза сон гојаҹағы ҝүнү сәбирсизликлә ҝөзләјир.

¹⁷ Баваријада јашајан Урсула адлы баҹы дејир ки, Јарадылыш 3:15 ајәсини баша дүшмәси сајәсиндә Мүгәддәс Китабын Аллаһдан илһам алдығына әмин олуб. Һәмчинин баҹы бүтүн пејғәмбәрликләрин бу пејғәмбәрликлә бағлы олдуғуну ҝөрдү вә бу, ону һејран гојду. Баҹы дејир: «Бәшәријјәтин үмидсиз галмамасы үчүн Јеһованын дәрһал һәрәкәтә кечдијини биләндә Она мәһәббәтим даһа да артды».

¹⁸ Микронезијада јашајан Ҹесика дејир: «Һәгигәти тапдығымы анлајанда кечирдијим һиссләр һәлә дә јадымдадыр! Јарадылыш 3:15 ајәсиндә јазылан пејғәмбәрлијин јеринә јетдијини ҝөрүрдүм. Дәрк етдим ки, Аллаһ бизим бу ҹүр әзаблы һәјат јашамағымызы һеч вахт истәмәјиб. Бу пејғәмбәрлик мәним бир шејә дә иманымы артырыб: Јеһоваја хидмәт етдијим үчүн мән инди мүмкүн олан ән ҝөзәл һәјаты јашајырам, ҝәләҹәкдә исә мәни бундан да ҝөзәл һәјат ҝөзләјир».

19. Пејғәмбәрлијин сонунҹу һиссәсинин дә јеринә јетәҹәјинә нәјә ҝөрә әмин ола биләрик?

¹⁹ Ҝөрдүјүмүз кими, Јарадылыш 3:15 ајәси һал-һазырда јеринә јетир. Гадынын өвладынын вә иланын өвладынын кимлији бәллидир. Гадынын өвладынын әсас һиссәси олан Иса Мәсиһ алдығы дабан јарасындан сағалыб вә әзәмәтли, өлмәз падшаһ кими һакимијјәт сүрүр. Өвладын икинҹидәрәҹәли һиссәсини тәшкил едән кәсләрин сечими битмәк үзрәдир. Пејғәмбәрлијин биринҹи һиссәси јеринә јетдији үчүн әмин ола биләрик ки, икинҹи һиссәси дә мүтләг јеринә јетәҹәк, иланын башы әзиләҹәк. Бир тәсәввүр един, Шејтан мәһв олунанда садиг инсанлар неҹә раһат нәфәс алаҹаглар! Һәмин вахт јетишәнә гәдәр исә тәслим олмајын. Јеһоваја етибар един, О, етибара лајигдир! Јеһова гадынын өвлады васитәсилә «јер үзүнүн бүтүн халглары»на сајсыз-һесабсыз немәтләр бәхш едәҹәк (Јар. 22:18).