Иса Мәсиһ инсанларын бир-бири илә сүлһдә олмасыны тәблиғ едирди. Амма бир дәфә о, һәвариләринә белә демишди: «Елә билмәјин ки, мән јер үзүнә сүлһ ҝәтирмәјә ҝәлмишәм. Мән јер үзүнә сүлһ јох, гылынҹ ҝәтирмәјә ҝәлмишәм. Мән оғулу атадан, гызы анадан, ҝәлини гајынанадан ајырмаға ҝәлмишәм» (Мәт. 10:34, 35). Иса Мәсиһ бу сөзләрлә нәји нәзәрдә тутурду?

О, аилә үзвләрини бир-бириндән ајырмаг истәмирди, амма билирди ки, тәлимләри бәзи аиләләрдә парчаланма јарадаҹаг. Буна ҝөрә дә вәфтиз олунуб Мәсиһин шаҝирди олмаг истәјән инсан ҝөзә алмалыдыр ки, иманда олмајан һәјат јолдашы вә ја диҝәр аилә үзвү она гаршы чыха биләр вә бу заман Мәсиһин тәлимләринә садиг галмаг асан олмаја биләр.

Мүгәддәс Китаб мәсиһиләри «һамы илә сүлһдә олмаға» сәсләјир (Ром. 12:18). Амма бәзи аиләләрдә Исанын тәлимләри «гылынҹ» кими олур: аиләнин бир үзвү Мәсиһин тәлимләрини гәбул едир, диҝәрләри исә буна гаршы чыхыр. Бу заман һәгигәти өјрәнән инсанын гоһумлары, јәни өз евиндәкиләр онун «дүшмәни» олур (Мәт. 10:36).

Дини ҹәһәтдән бөлүнмүш аиләдә јашајан мәсиһиләр бәзән Јеһоваја вә Исаја сәдагәтләрини сынајан вәзијјәтләрлә үзләширләр. Мәсәлән, мәсиһинин иманына шәрик олмајан гоһумлары ону дини бајрамлары гејд етмәјә тәшвиг едә биләр. Бу заман о кими разы салаҹаг? Иса Мәсиһ демишди: «Атасыны ја анасыны мәндән чох истәјән мәнә лајиг дејил» (Мәт. 10:37). Әлбәттә, о демәк истәмирди ки, она лајиг олмаг үчүн шаҝирдләри валидејнләрини даһа аз севмәлидирләр. Онун сөзүнүн ҹаны о иди ки, шаҝирдләри һәјатда нәјә үстүнлүк вермәли олдугларыны билмәлидирләр. Иманымыза шәрик олмајан аилә үзвләримиз бизим Јеһоваја ибадәт етмәјимизә мане олса да, биз онлары јенә дә севирик, амма баша дүшүрүк ки, Аллаһа севҝимиз һәр шејдән үстүндүр.

Сөз јох ки, аилә тәрәфиндән тәгиблә үзләшмәк инсана чох ағыр ҝәлир. Амма Исанын сөзләрини унутмамалыјыг: «Ишҝәнҹә дирәјини ҝөтүрүб мәним ардымҹа ҝәлмәјән мәнә лајиг дејил» (Мәт. 10:38). Башга сөзлә, мәсиһиләр аилә тәрәфиндән үзләшдикләри тәгибләрә Мәсиһин давамчыларынын дөзмәли олдуғу сынаглардан бири кими бахырлар. Ејни заманда онлар үмид едирләр ки, ҝөзәл давранышлары иманларына шәрик олмајан аилә үзвләринин үрәјини јумшалдаҹаг вә онларын да Мүгәддәс Китаба марағы јаранаҹаг (1 Бут. 3:1, 2).