1, 2. Вәфтиз олунмаға һәлә һазыр дејилсинизсә, нәјә ҝөрә руһдан дүшмәмәлисиниз? (Үз габығындакы шәклә бахын.)

 ВӘФТИЗ олунмаг истәјирсиниз? Бу чох ҝөзәл мәгсәддир. Бәс бу аддымы атмаға һазырсыныз? Әҝәр һазыр олдуғунузу дүшүнүрсүнүзсә вә ағсаггалларыныз да ејни фикирдәдирсә, бу аддымы атмаға тәрәддүд етмәјин. Гаршыда сизи Јеһоваја хидмәтдә ҝөзәл һәјат ҝөзләјир.

² Амма ола билсин, сизә дејилиб ки, вәфтиздән әввәл бәзи саһәләрин үзәриндә ишләмәлисиниз вә ја сиз өзүнүз бу гәнаәтә ҝәлмисиниз. Әҝәр үзәриндә ишләмәли олдуғунуз нәләрсә варса, руһдан дүшмәјин. Ҝәнҹ вә ја јашлы олмағыныздан асылы олмајараг, вәфтизә јарарлы олмаг үчүн лазыми дәјишикликләри едә биләрсиниз.

3. Һәбәшистанлы мәмур Филипдән нә сорушмушду вә ортаја һансы суал чыхыр? (Һәвариләрин ишләри 8:36, 38).

³ Һәвариләрин ишләри 8:36, 38 ајәләрини охујун. Һәбәшистанлы мәмур мүждәчи Филипдән сорушмушду: «Вәфтиз олунмағыма нә мане олур?» О, вәфтиз олунмаг истәјирди, амма бу ваҹиб аддымы атмаға һәгигәтән дә һазыр иди?

4. Һәбәшистанлы мәмур даһа чох шеј өјрәнмәк истәдијини неҹә ҝөстәрди?

⁴ Һәбәшистанлы мәмур «Јерусәлимә ибадәтә ҝәлмишди» (Һәв. 8:27). Ҝөрүнүр, о, јәһуди прозелити иди, иудаизми гәбул етмишди. О, Јеһова һагда Төвратдан өјрәнмишди, амма даһа чох шеј өјрәнмәк истәјирди. Филип јолда бу мәмурла гаршылашанда, о нә едирди? Әшија пејғәмбәрин китабыны охујурду (Һәв. 8:28). Бу, бәрк руһани гида иди.  Мәмур садәҹә әсас тәлимләри өјрәнмәклә кифајәтләнмирди, даһа дәрин биликләрә саһиб олмаг истәјирди.

5. Һәбәшистанлы мәмур өјрәндикләринә ујғун даврандығыны неҹә ҝөстәрди?

⁵ Бу мәмур «Һәбәшистан һөкмдары кандакинин… хәзинәдары» иди (Һәв. 8:27). О, чохлу мәсулијјәтләри олан сарај хадими олса да, Јеһоваја ибадәтдән галмырды. Мәмур садәҹә Мүгәддәс Китаб тәлимләрини өјрәнмәклә кифајәтләнмирди, өјрәндикләринә ујғун давранырды. Буна ҝөрә дә о, Јерусәлимдәки мәбәддә Јеһоваја ибадәт етмәк үчүн Һәбәшистандан ораја узун бир јол гәт етмишди. Бу сәјаһәт үчүн чохлу вахт вә пул лазым иди. Амма о, Јеһоваја ибадәт етмәк үчүн гурбанлар вермәјә һазыр иди.

6, 7. Һәбәшистанлы мәмур Јеһоваја мәһәббәтини неҹә артырырды?

⁶ Һәбәшистанлы мәмур Филипдән бәзи ваҹиб јени шејләри, мәсәлән, Мәсиһин ким олдуғуну өјрәнди (Һәв. 8:34, 35). Исанын онун үчүн етдикләри барәдә өјрәндикләри она хош тәсир бағышлады. Бәс бу мәмур даһа сонра нә етди? О истәсә иди, јәһуди прозелити кими гала биләрди, амма онун Јеһоваја, Онун Оғлуна мәһәббәти артды. Бу севҝи ону ваҹиб бир аддым атмаға тәшвиг етди. О, Исанын шаҝирди кими вәфтиз олунмаг гәрарыны верди. Филип онун һазыр олдуғуну ҝөрдү вә ону вәфтиз етди.

⁷ Һәбәшистанлы мәмурдан өрнәк ҝөтүрсәниз, вәфтиз олунмаға һазыр олаҹагсыныз. Онда сиз дә әминликлә дејәҹәксиниз: «Вәфтиз олунмағыма нә мане олур?» Ҝәлин ҝөрәк һәбәшистанлы мәмурдан өрнәк ҝөтүрәрәк нөвбәти саһәләрдә өз үзәриниздә неҹә ишләјә биләрсиниз: о, өјрәнмәјә давам едирди, өјрәндикләринә ујғун давранырды вә Аллаһа мәһәббәтини артырырды.

8. Јәһја 17:3 ајәси бизи нәјә тәшвиг едир?

⁸ Јәһја 17:3 ајәсини охујун. Сиз дә Исанын бу сөзләрини охујандан сонра Мүгәддәс Китабы өјрәнмәјә гәрар вермишдиниз? Бу сөзләр чохларымыза тәсир едиб. Бәс ејни сөзләр бизи өјрәнмәјә давам етмәјә тәшвиг едир? Бәли. Биз «тәк ҝерчәк Аллаһы» һәмишә, әбәдијјәт боју танымаға давам едәҹәјик (Ваиз 3:11). Нә гәдәр чох өјрәнсәк, Јеһоваја бир о гәдәр јахын олаҹағыг (Зәб. 73:28).

9. Мүгәддәс Китабын әсас тәлимләрини өјрәндикдән сонра нә етмәлисиниз?

⁹ Ајдындыр ки, Јеһованы танымаг әсас тәлимләри өјрәнмәкдән башлајыр. Ибраниләрә јаздығы мәктубунда һәвари Булус  бу тәлимләри «ибтидаи тәлимләр» адландырмышды. Бунунла о демәк истәмирди ки, «ибтидаи тәлимләр» ваҹиб дејил. О, бу тәлимләри јени доғулмуш ушағын гидаландығы сүдә бәнзәтмишди (Ибр. 5:12; 6:1). Бунунла белә, Булус бүтүн мәсиһиләри тәшвиг етмишди ки, ибтидаи тәлимләрлә кифајәтләнмәсинләр, Аллаһын Кәламынын дәринлијинә варсынлар. Бәс сиз Мүгәддәс Китабын дәринлијинә вармаг истәјирсиниз? Даһа да јеткинләшмәји, Јеһова Аллаһ вә Онун нијјәти барәдә даһа дәрин биликләрә јијәләнмәји гаршыныза мәгсәд гојмусунуз?

10. Нәјә ҝөрә бәзи инсанлар үчүн өјрәнмәк чәтиндир?

¹⁰ Чохлары үчүн нәјисә арашдырмаг вә өјрәнмәк асан дејил. Бәс сизин үчүн неҹә? Мәктәбдә охумағы, арашдырма апармағы хошлајырдыныз? Даһа чох шеј өјрәнмәјә ҹан атырдыныз, јохса дүшүнүрдүнүз ки, китабдан өјрәнмәк сизлик дејил? Әҝәр беләдирсә, сиз тәк дејилсиниз. Амма Јеһова сизә көмәк едә биләр. О, ән мүкәммәл вә ән јахшы Мүәллимдир.

11. Јеһова «Бөјүк Нәсиһәтчи» олдуғуну неҹә сүбут едир?

¹¹ Јеһова Өзүнү «Бөјүк Нәсиһәтчи» адландырыр (Әшј. 30:20, 21). О, сәбирли, меһрибан, анлајышлы Мүәллимдир. Шаҝирдләриндә јахшы ҹәһәтләрә фикир верир (Зәб. 130:3). О биздән ҝүҹүмүздән артыг нәјисә етмәји тәләб етмир. Бир дүшүнүн, О, бејнимизи еҹазкар шәкилдә јарадыб (Зәб. 139:14). Јеһова бизи өјрәнмәк тәләбаты илә јарадыб. Јараданымыз истәјир ки, биз әбәдијјән өјрәнәк, бундан зөвг алаг. Она ҝөрә дә Мүгәддәс Китаб тәлимләринә иштаһа ојатмаг мүдрик һәрәкәт оларды (1 Бут. 2:2). Наил ола биләҹәјиниз мәгсәдләр гојун. Мүгәддәс Китабын мүталиәсинә мүнтәзәм вахт ајырын (Јуш. 1:8). Јеһованын көмәји илә сиз охумагдан вә өјрәнмәкдән ҝет-ҝедә даһа чох зөвг алаҹагсыныз.

12. Нәјә ҝөрә Иса барәдә мүталиә етмәлијик?

¹² Иса Мәсиһин һәјаты вә хидмәти барәдә дүшүнмәк үчүн һәмишә вахт ајырын. Јеһоваја хидмәт етмәк истәјириксә, Исанын нүмунәсини јахындан изләмәк чох ваҹибдир, хүсусилә дә бу чәтин ҝүнләрдә (1 Бут. 2:21). Иса шаҝирдләринә сынагларла үзләшәҹәкләрини демишди (Лука 14:27, 28). Бунунла белә, о әмин иди ки, онун әсл давамчылары онун кими сонадәк Јеһоваја садиг галаҹаглар (Јәһ. 16:33). Она ҝөрә дә Исанын јер үзүндәки хидмәти барәдә әтрафлы өјрәнин вә ҝүндәлик һәјатынызда онун нүмунәсини изләмәји гаршыныза мәгсәд гојун.

13. Јеһовадан нә диләмәлисиниз вә нә үчүн?

¹³ Тәкҹә билик кифајәт дејил. Билик алмагда әсас мәгсәд Јеһова һагда даһа чох өјрәнмәк вә мәһәббәт, иман кими хүсусијјәтләр јетишдирмәкдир (1 Кор. 8:1—3). Өјрәнмәјә давам етдикҹә Јеһовадан дәрин имана саһиб олмаг үчүн көмәк истәјин (Лука 17:5). О, бу ҹүр дуалара ҹаваб верир. Дәгиг билијә әсасланан әсл иман диҝәр аддымлары атмаға көмәк едәҹәк (Јаг. 2:26).

14. Һәвари Бутрус өјрәндикләримизә ујғун давранмағын ваҹиблијини неҹә вурғуламышды? (Һәмчинин шәклә бахын.)

¹⁴ Һәвари Бутрус гејд етмишди ки, Мәсиһин давамчыларынын өјрәндикләринә ујғун давранмалары чох ваҹибдир. О, Нуһун һадисәсини нүмунә ҝәтирмишди. Јеһова Нуһа демишди ки, дашгын васитәсилә һәмин дөврдә јашајан бүтүн пис инсанлары  мәһв едәҹәк. Садәҹә дашгынын олаҹағыны билмәк Нуһу вә аиләсини хилас етмәјәҹәкди. Бутрус Дашгындан әввәлки вә ҝәми тикилән дөвр һагда данышырды (1 Бут. 3:20). Бәли, Нуһ вә аиләси Аллаһдан өјрәндикләринә ујғун давранараг бөјүк бир ҝәми тикдиләр (Ибр. 11:7). Сонра Бутрус Нуһун етдикләрини вәфтизлә мүгајисә едәрәк белә демишди: «Инди дә буна охшар бир шеј, вәфтиз мөвҹуддур. Вәфтиз... сизи... хилас едир» (1 Бут. 3:21). Сизин вәфтизә јарарлы олмаг үчүн етдикләринизи Нуһун вә аиләсинин илләрлә ҝәмини тикмәк үчүн ҝөрдүјү ишә бәнзәтмәк олар. Бәс вәфтизә јарарлы олмаг үчүн нә етмәлисиниз?

15. Әсл төвбә нәдир?

¹⁵ Атмалы олдуғумуз илк аддымлардан бири ҝүнаһларымыздан төвбә етмәкдир (Һәв. 2:37, 38). Үрәкдән төвбә етмишиксә, лазыми дәјишикликләр дә едәҹәјик. Әхлагсыз һәјат тәрзи, түтүндән истифадә, кобуд вә налајиг данышыг кими Јеһованын бәјәнмәдији пис әмәлләрә сон гојмусунуз? (1 Кор. 6:9, 10; 2 Кор. 7:1; Ефес. 4:29). Гојмамысынызса, бу вәрдишләри тәрҝитмәк үчүн әлиниздән ҝәләни етмәјә давам един. Сизә дәрс кечән тәблиғчидән вә ја јығынҹағынызын ағсаггалларындан көмәк истәјин. Әҝәр ҝәнҹсинизсә вә валидејнләринизлә бирҝә јашајырсынызса, онлардан хаһиш един ки, сизә вәфтизинизә мане олан пис вәрдишләрдән јаха гуртармаға көмәк етсинләр.

16. Јахшы руһани графикә нәләр дахилдир?

¹⁶ Јахшы руһани графикин олмасы чох ваҹибдир. Буна јығынҹаг ҝөрүшләринә гатылмаг, орада иштирак етмәк дә дахилдир (Ибр. 10:24, 25). Тәблиғчи олан кими тәблиғ хидмәтини дә бу графикә дахил един. Һәјатлары хилас едән бу ишдә иштирак етдикҹә ону даһа чох севәҹәксиниз (2 Тим. 4:5). Әҝәр ҝәнҹсинизсә вә аиләнизлә бирҝә јашајырсынызса, өзүнүздән сорушун: «Јығынҹаға вә тәблиғә ҝетмәји валидејнләрим јадыма салыр, јохса өзүм тәшәббүс ҝөстәрирәм?» Бу ишләри өзүнүз ҝөрмәклә иманынызы тәзаһүр етдирирсиниз вә Јеһоваја мәһәббәтинизи, миннәтдарлығынызы ҝөстәрирсиниз. Бу ҹүр мөмин әмәлләриниз Јеһоваја тәгдим етдијиниз бәхшишдир  (2 Бут. 3:11; Ибр. 13:15). Тәмәннасыз, үрәкдән вердијимиз бүтүн бәхшишләр Јеһова үчүн чох гијмәтлидир. (2 Коринфлиләрә 9:7 ајәси илә әлагәләндирин.) Јеһоваја әлимиздән ҝәләнин ән јахшысыны вермәк бизи хошбәхт едир.

17, 18. Һансы әсас хүсусијјәт сизә вәфтизә доғру ирәлиләмәјә көмәк едәҹәк вә неҹә? (Мәсәлләр 3:3—6).

¹⁷ Вәфтизә доғру ирәлиләдикҹә бәзи чәтинликләрлә үзләшәҹәксиниз. Ола билсин, бәзиләри сизи иманыныза ҝөрә лаға гојаҹаг, тәгиб едәҹәк (2 Тим. 3:12). Пис вәрдишләрлә мүбаризә апараркән бәзән уғурсузлугла үзләшәҹәксиниз. Вәфтизә һәлә дә јарарлы олмадығынызы дүшүнәрәк сәбирсизләнә вә мәјус ола биләрсиниз. Бу заман тәслим олмамаға вә вәфтизә доғру ирәлиләмәјә сизә нә көмәк едә биләр? Ән ваҹиб хүсусијјәт олан Јеһоваја мәһәббәт.

¹⁸ Јеһоваја мәһәббәт сиздә олан ән ҝөзәл хүсусијјәтдир. (Мәсәлләр 3:3—6 ајәләрини охујун.) Бу ҹүр ҝүҹлү мәһәббәт чәтинликләрлә үзләшәндә онларын өһдәсиндән ҝәлмәјә бизә көмәк едә биләр. Мүгәддәс Китабда Јеһованын хидмәтчиләринә бәсләдији мәһәббәтдән тез-тез данышылыр. Јеһованын хидмәтчиләрини севмәси о демәкдир ки, О, сәдагәтлидир, онлары һеч вахт атмајаҹаг (Зәб. 100:5). Сиз Аллаһын бәнзәриндә јарадылмысыныз (Јар. 1:26). Бу ҹүр мәһәббәти неҹә әкс етдирә биләрсиниз?

19. Јеһованын сизин үчүн етдикләринә ҝөрә миннәтдарлығынызы неҹә артыра биләрсиниз? (Галатијалылара 2:20).

¹⁹ Миннәтдар олун (1 Салон. 5:18). Һәр ҝүн өзүнүздән сорушун: «Јеһова мәнә мәһәббәтини неҹә ҝөстәрир?» Дуада сизин үчүн етдији конкрет шејләрә ҝөрә Јеһоваја миннәтдарлығынызы билдирин. Һәвари Булусдан өрнәк ҝөтүрүн: Јеһованын мәһәббәтдән ирәли ҝәләрәк етдикләрини шәхсән сизин үчүн едирмиш кими гијмәтләндирин. (Галатијалылара 2:20 ајәсини охујун.) Өзүнүздән сорушун: «Бәс мән Она өз севҝими ҝөстәрмәк истәјирәм?» Јеһоваја мәһәббәт сынаглар гаршысында мөһкәм дурмаға вә чәтинликләрдән үзүағ чыхмаға көмәк едәҹәк. Һәмчинин бу сизи Јеһоваја ибадәтдән галмамаға, Она олан севҝинизи һәр ҝүн ҝөстәрмәјә тәшвиг едәҹәк.

20. Өзүнү Јеһоваја һәср етмәк нә демәкдир вә нәјә ҝөрә бу, ваҹиб гәрардыр?

 ²⁰ Заманла Јеһоваја мәһәббәтиниз сизи хүсуси бир дуа етмәјә тәшвиг едәҹәк. Өзүнүзү Аллаһа һәср едәҹәксиниз. Јадда сахлајын ки, өзүнүзү Јеһоваја һәср етдикдән сонра гаршынызда ҝөзәл бир имкан ачылыр: сиз әбәдијјән Она мәхсус ола биләрсиниз. Өзүнүзү дуада Јеһоваја һәср едәндә сөз верирсиниз ки, һәјатын һәм јахшы, һәм дә пис анларында Она хидмәт едәҹәксиниз. Вердијиниз бу сөзү јениләмәјә һеч вахт еһтијаҹ олмајаҹаг. Һәср олунмагла чох ваҹиб бир аддым атырсыныз. Бу фикри јадда сахлајын: һәјатда чохлу гәрарлар верәҹәксиниз. Онлардан бәзиләри чох јахшы гәрарлар олаҹаг. Амма һеч бир гәрарыныз өзүнүзү Јеһоваја һәср етмәк гәрарындан јахшы олмајаҹаг (Зәб. 50:14). Шејтан Јеһоваја мәһәббәтинизи сојутмаға чалышаҹаг, әлиндән ҝәләни едәҹәк ки, Она садиг галмајасыныз. Гојмајын Шејтан галиб ҝәлсин! (Әјј. 27:5). Јеһоваја олан ҝүҹлү мәһәббәтиниз һәср олунмағыныза ујғун јашамаға вә сәмави Атаныз Јеһоваја даһа да јахын олмаға көмәк едәҹәк.

21. Нәјә әсасән дејә биләрик ки, вәфтиз сон дејил, башланғыҹдыр?

²¹ Өзүнүзү Јеһоваја һәср етдикдән сонра јығынҹағынызын ағсаггалларына вәфтиз олунмаг истәдијинизи дејин. Амма унутмајын, вәфтиз сон дејил, бу садәҹә башланғыҹдыр. Бу, Јеһоваја әбәди хидмәтин башланғыҹыдыр. Она ҝөрә дә Јеһоваја мәһәббәтинизи индидән мөһкәмләндирин. Гаршыныза елә мәгсәдләр гојун ки, мәһәббәтиниз ҝүнбәҝүн артсын. Беләҹә, вәфтизә доғру ити аддымларла ирәлиләјәҹәксиниз. Бу, унудулмаз бир ҝүн олаҹаг. Амма бу, һәлә башланғыҹдыр. Гој Јеһоваја вә Онун Оғлуна мәһәббәтиниз әбәдијјән артдыгҹа артсын!