1. Јығынҹагларымыза биринҹи дәфә ҝәлән инсанлара ән чох нә тәсир едир? (Һәмчинин шәклә бахын.)

 ТӘСӘВВҮР ЕДИН, бир әр-арвад илк дәфә Јеһованын Шаһидләринин ибадәт ҝөрүшүндә иштирак едир. Баҹы-гардашларын бу әр-арвады хош гаршыламасы вә јығынҹагда һәр кәсин бир-биринә мәһәббәт ҝөстәрмәси онлара ҝүҹлү тәсир бағышлајыр. Јығынҹагдан евә гајыданда арвад әринә дејир: «Јеһованын Шаһидләри башгаларындан чох фәргләнирләр. Онларын әһатәсиндә олмаг чох хош иди».

2. Бәзиләри нә үчүн Јеһовадан узаглашыб?

² Дүздүр, Аллаһын халгы арасындакы мәһәббәт хүсусидир, амма онлар камил дејил (1 Јәһ. 1:8). Онлары јахындан таныдыгҹа бәзи гүсурларыны даһа габарыг ҝөрүрүк (Ром. 3:23). Тәәссүф ки, бәзиләри башгаларында ҝөрдүјү сәһвләрә ҝөрә Јеһовадан узаглашыблар.

3. Исанын давамчыларыны фәргләндирән ҹәһәт нәдир? (Јәһја 13:34, 35).

³ Ҝәлин мәгаләнин әсас ајәсинә бир даһа нәзәр салаг. (Јәһја 13:34, 35 ајәләрини охујун.) Мәсиһин әсл давамчыларыны фәргләндирән ҹәһәт нәдир? Мәһәббәтдир, камиллик јох. Диггәт јетирин, Иса демәмишди ки, сиз биләҹәксиниз ки, мәним шаҝирдимсиниз. О белә демишди: «Һамы биләҹәк ки, сиз мәним шаҝирдимсиниз». Иса демәк истәјирди ки, тәкҹә давамчылары јох, һәмчинин мәсиһи јығынҹағында олмајанлар да онларын арасында олан бу мәһәббәти ҝөрәҹәк вә онлары бундан таныјаҹаглар.

4. Бәзиләриндә һансы суаллар јарана биләр?

 ⁴ Јеһованын Шаһиди олмајан бәзи инсанлар дүшүнә биләр: «Мәһәббәт Иса Мәсиһин әсл давамчыларыны мүәјјән етмәјә неҹә көмәк едир? Мәсиһ һәвариләринә мәһәббәтини неҹә ҝөстәрмишди? Бу саһәдә ондан неҹә нүмунә ҝөтүрмәк олар?» Јеһованын хидмәтчиси олан бизләр дә бу суалларын үзәриндә дүшүнмәлијик. Бу бизә көмәк едәҹәк ки, бир-биримизә гаршы сәһв едәндә дә мәһәббәт ҝөстәрә биләк (Ефес. 5:2).

5. Јәһја 15:12, 13 ајәләриндә Иса нәји нәзәрдә тутурду?

⁵ Иса шаҝирдләринә билдирмишди ки, онлары башгаларындан фәргләндирән ҹәһәт бир-бириләринә ҝөстәрдикләри хүсуси мәһәббәт олаҹаг. (Јәһја 15:12, 13 ајәләрини охујун.) Ҝөрүн о һансы әмри вермишди: «Бир-биринизи мән сизи севдијим кими севин». Бу нә демәкдир? Исанын даһа сонра изаһ етдији кими, бу, фәдакар мәһәббәтдир. Мәсиһи лазым ҝәләндә һәтта диндашы уғрунда өлмәјә һазырдыр b.

6. Аллаһын Кәламында мәһәббәтин ваҹиблији неҹә вурғуланыр?

⁶ Аллаһын Кәламында дејилир ки, мәһәббәт чох ваҹиб хүсусијјәтдир. Нөвбәти ајәләр бәзиләринин севимли ајәләридир: «Аллаһ мәһәббәтдир» (1 Јәһ. 4:8). «Башгасыны өзүнү севдијин кими сев» (Мәт. 22:39). «Мәһәббәт чохлу ҝүнаһын үстүнү өртүр» (1 Бут. 4:8). «Мәһәббәт һеч вахт түкәнмир» (1 Кор. 13:8). Бу вә диҝәр ајәләр мәһәббәти инкишаф етдирмәјин вә ону ҝөстәрмәјин нә гәдәр ваҹиб олдуғуну баша дүшмәјә көмәк едир.

7. Нәјә ҝөрә Шејтан инсанлары әсл мәһәббәт телләри илә һеч вахт бирләшдирә билмәз?

⁷ Чох адам дејир: «Бүтүн динләр һәгигәти өјрәтдијини иддиа едир, амма  онлар Аллаһ һагда фәргли-фәргли шејләр өјрәдирләр. Белә олан һалда, һәгиги дини неҹә мүәјјән етмәк олар?» Шејтан чохлу јалан дин јарадыб. Она ҝөрә дә инсанлара һәгиги дини мүәјјән етмәк чәтиндир. Амма о, һеч вахт бир-бирини сәмими-гәлбдән севән инсанлардан ибарәт тәшкилат јарада билмәз. Јалныз Јеһова буна гадирдир. Чүнки мәһәббәтин мәнбәји Одур. Она ҝөрә дә бу ҹүр мәһәббәти јалныз Јеһованын мүгәддәс руһуна саһиб олан вә Она хидмәт едән кәсләр тәзаһүр етдирә биләр (1 Јәһ. 4:7). Елә бу сәбәбдән Иса демишди ки, онун давамчылары араларындакы мәһәббәтдән танынаҹаг.

8, 9. Јеһованын Шаһидләринин арасындакы мәһәббәт башгаларына неҹә тәсир едиб?

⁸ Исанын дедији кими, чохлары онун давамчыларыны араларында олан мәһәббәтдән таныјыр. Мәсәлән, Јан адлы бир гардаш евләринин јахынлығындакы стадионда кечирилән бир топлантыја ҝетмишди. О илк дәфә иди ки, топлантыја гатылырды. Топлантыдан бир нечә ај әввәл исә, о һәмин стадиона идман ојунуна бахмаға ҝетмишди. Гардаш дејир: «Бу топланты илә идман ојуну арасында јерлә-ҝөј гәдәр фәрг вар иди. Јеһованын Шаһидләри меһрибан идиләр, сәлигәли ҝејинмишдиләр, ушаглары да өзләрини чох јахшы апарырдылар. Ән әсасы исә, онлар һәјатдан мәмнун ҝөрүнүрдүләр. Мән дә һәјатда елә буну ахтарырдым. Һәмин ҝүн сөјләнилән һеч бир нитги хатырламасам да, Јеһованын Шаһидләринин неҹә даврандығы һәлә дә јадымдадыр» c. Бу ҹүр мүнасибәт бир-биримизә бәсләдијимиз мәһәббәтин нәтиҹәсидир. Биз баҹы-гардашларымызы севирик, она ҝөрә дә онларла меһрибанлыгла вә һөрмәтлә давранырыг.

⁹ Ҹон адлы гардаш да илк дәфә јығынҹаг ҝөрүшүнә ҝәләндә ејни һиссләри кечирмишди. О дејир: «Онларын меһрибанлығы мәнә чох ҝүҹлү тәсир бағышлады. Елә фикирләширдим ки, онлар мүгәддәсдир. Араларындакы мәһәббәт мәни әмин етди ки, һәгиги дини тапмышам» d. Бу кими һадисәләр һәр дәфә сүбут едир ки, Јеһованын халгы әсл мәсиһиләрдир.

10. Һансы вәзијјәтләрдә мәсиһи мәһәббәтини тәзаһүр етдирмәк үчүн әсл имкан јараныр? (Һәмчинин һашијәјә бахын.)

¹⁰ Јухарыда гејд олундуғу кими, һеч бир диндашымыз мүкәммәл дејил. Бәзән онлар сөзләри, јахуд һәрәкәтләри илә хәтримизә дәјә биләрләр e (Јаг. 3:2). Белә вәзијјәтләрдә мәсиһи мәһәббәтини ҝөстәрмәјимиз үчүн әсл имкан јараныр. Бу саһәдә Исадан нә өјрәнирик? (Јәһ. 13:15).

11. Јагуб вә Јәһја һансы мәнфи хүсусијјәтләри тәзаһүр етдирдиләр? (Һәмчинин шәклә бахын.)

¹¹ Иса шаҝирдләриндән мүкәммәллик ҝөзләмирди. О, мәһәббәтлә онлара көмәк едирди ки, мәнфи хүсусијјәтләрини дүзәлдиб Јеһованын рәғбәтини газансынлар. Бир дәфә онун ики һәварисинин, Јагубла Јәһјанын анасы Исадан хаһиш етди ки, оғулларына Падшаһлыгда мөтәбәр јер версин (Мәт. 20:20, 21). Бунунла да Јагубла  Јәһја гүрур вә шөһрәтпәрәстлик кими мәнфи хүсусијјәтләр тәзаһүр етдирдиләр (Мәс. 16:18).

12. Јалныз Јагубла Јәһја дүзҝүн давранмамышды? Изаһ един.

¹² Һәмин вәзијјәтдә дүзҝүн давранмајан тәкҹә Јагубла Јәһја дејилди. Ҝөрүн о бири һәвариләр нә етмишди: «Диҝәр он шаҝирд бу сөһбәти ешидәндә ики гардаша бәрк һирсләнди» (Мәт. 20:24). Тәсәввүр едирсиниз, онлар бир-биринә неҹә кәскин сөзләр демәјә башладылар? Ола билсин, онлар дејирдиләр: «Сиз кимсиниз ки, Падшаһлыгда өзүнүз үчүн мөтәбәр јер истәјирсиниз? Иса илә тәкҹә сиз зәһмәт чәкмисиниз? Бизим сиздән нәјимиз әскикдир?» Һәвариләр даима бир-бириләринә мәһәббәт ҝөстәрмәли олдугларыны мүвәггәти олараг унутмушдулар.

13. Иса һәвариләринин зәифликләринә неҹә јанашды? (Мәтта 20:25—28).

¹³ Һәмин вәзијјәтдә Иса неҹә давранды? О гәзәбләнмәди, демәди ки, даһа тәвазөкар, бир-бири илә һәмишә мәһәббәтлә давранан даһа јахшы һәвариләр јығаҹаг. Әксинә, Иса онларла сәбирлә данышды, чүнки билирди ки, онлар әслиндә дүзҝүн давранмаг истәјирләр. (Мәтта 20:25—28 ајәләрини охујун.) Бу нә биринҹи, нә дә сонунҹу дәфә иди ки, һәвариләр кимин даһа бөјүк олдуғу һагда мүбаһисә едирдиләр. Буна бахмајараг, Иса  онларла мәһәббәтлә давранырды (Марк 9:34; Лука 22:24).

14. Исанын һәвариләри неҹә мүһитдә бөјүмүшдүләр?

¹⁴ Шүбһәсиз, Иса һәвариләринин бөјүдүјү мүһити нәзәрә алырды (Јәһ. 2:24, 25). Онлар дин хадимләринин јүксәк мөвге вә шан-шөһрәтә хүсуси өнәм вердији ҹәмијјәтдә бөјүмүшдүләр. (Мәт. 23:6; «Ҝөзәтчи гүлләси»нин 2010-ҹу ил 1 апрел сајынын 16—18 сәһифәләриндә јерләшән «Синагог. Исанын вә шаҝирдләринин тәблиғ етдији јер» адлы мәгалә илә әлагәләндирин.) Јәһуди дин хадимләри һәмчинин өзләрини башгаларындан үстүн сајырдылар f (Лука 18:9—12). Иса баша дүшүрдү ки, бу ҹүр мүһит һәвариләрин өзләринә вә башгаларына олан бахышына тәсир едә биләр (Мәс. 19:11). Буна ҝөрә дә о, вәзијјәтә реал јанашырды, һәвариләриндән камиллик ҝөзләмирди. Иса билирди ки, һәвариләринин үрәји тәмиздир. Она ҝөрә дә онлара сәбирлә көмәк едирди ки, өзләрини башгаларындан үстүн тутмаг әвәзинә, инсанлара мәһәббәт ҝөстәрсинләр.

15. Јагубла Јәһјанын һадисәсиндән нә өјрәнирик?

¹⁵ Јагубла Јәһјанын һадисәсиндән чох шеј өјрәнә биләрик. Онлар Падшаһлыгда өзләри үчүн јүксәк мөвге истәмәклә сәһвә јол вермишдиләр. Амма диҝәр һәвариләр дә дүз давранмамышдылар. Онлар бу вәзијјәтин бирлији позмасына јол вермишдиләр. Буна бахмајараг, Иса 12 һәваринин һамысы илә меһрибан давранмышды. Бундан нә өјрәнирик? Өнәмли олан инсанларын һансы сәһвләр етмәси јох, бизим буна мүнасибәтимиздир. Бу саһәдә бизә нә көмәк едә биләр? Әҝәр диндашымызын һансыса һәрәкәтинә ҝөрә пис олмушугса, өзүмүздән соруша биләрик: «Онун һәрәкәти нәјә ҝөрә мәнә пис тәсир едиб? Бәлкә, бу, үзәриндә ишләмәли олдуғум һансыса мәнфи ҹәһәтимдән хәбәр верир? Јахуд, ола биләрми ки, хәтримә дәјән шәхсин һансыса ҹидди проблеми вар? Һәтта инҹимәјим үчүн әсасым варса, мәһәббәтдән ирәли ҝәләрәк ону бағышлаја биләрәм?» Башгаларына гаршы мәһәббәт ҝөстәрәндә Исанын давамчысы олдуғумузу сүбут едирик.

16. Исанын нүмунәсиндән даһа нә өјрәнирик?

¹⁶ Исанын нүмунәси һәмчинин бизи өјрәдир ки, баҹы-гардашларымызы баша дүшмәјә чалышаг (Мәс. 20:5). Иса инсанларын үрәјини охуја билирди, амма биз охуја билмирик. Бунунла белә, баҹы-гардашларымыз бизим хәтримизә дәјәндә, бизи инҹидәндә онлара гаршы сәбирли олмалыјыг (Ефес. 4:2; 1 Бут. 3:8). Әҝәр онлары јахындан танысаг, буну етмәк даһа асан олаҹаг. Ҝәлин бир нүмунәјә бахаг.

17. Бир сәјјар нәзарәтчи диндашыны даһа јахындан танымағын хејрини неҹә ҝөрдү?

¹⁷ Бир сәјјар нәзарәтчи Шәрги Африкада хидмәт етдији јығынҹагларын бириндә бир гардашла таныш олмушду. Она елә ҝәлирди ки, о гардаш чох кобуддур. Бәс һәмин сәјјар нәзарәтчи нә етди? О дејир: «Гардашдан ҝен ҝәзмәдим, ону даһа јахындан танымаға чалышдым». Сәјјар нәзарәтчи һәмин гардашын кечмиши барәдә чох шеј өјрәнди вә баша дүшдү ки, јашадыглары онун хасијјәтинә тәсир едиб. О, сөзүнә давам едир: «Баша дүшәндә ки,  хасијјәтини дәјишмәк, баҹы-гардашларла даһа јахшы давранмаг үчүн о артыг өз үзәриндә нә гәдәр ишләјиб, она рәғбәтим артды. Биз онунла јахын дост олдуг». Баҹы-гардашларымызы анламаға чалышсаг, онлара мәһәббәт ҝөстәрмәк даһа асан олаҹаг.

18. Диндашымыз хәтримизә дәјибсә, өзүмүзә һансы суаллары верә биләрик? (Мәсәлләр 26:20).

¹⁸ Бәзән дүшүнә биләрик ки, мәсәләни һәлл етмәк үчүн јахшы оларды, ҝедиб диндашымызла данышаг. Амма буну етмәздән әввәл, өзүмүзә нөвбәти суаллары верә биләрик: «Бүтүн фактлары билирәм? (Мәс. 18:13). Ола биләр ки, о, билмәјәрәкдән хәтримә дәјиб? (Ваиз 7:20). Бәс мән нә вахтса башгаларына гаршы ејни ҹүр давранмышам? (Ваиз 7:21, 22). Хәтримә дәјән инсана јахынлашсам, вәзијјәти дүзәлтмәк әвәзинә, проблеми даһа да шиширтмәрәм?» (Мәсәлләр 26:20 ајәсини охујун.) Вахт ајырыб бу суалларын үзәриндә дүшүнсәк, елә нәтиҹәјә ҝәлә биләрик ки, мәһәббәтин сајәсиндә бу мәсәләнин үзәриндән кечмәк олар.

19. Нәјә гәтијјәтли олмалыјыг?

¹⁹ Јеһованын Шаһидләри Исанын әсл давамчысы олдугларыны артыг сүбут едибләр. Биз диндашларымызын сәһвләринә бахмајараг, онлара мәһәббәт ҝөстәрмәклә ајры-ајрылыгда да Исанын әсл давамчысы олдуғумузу сүбут едирик. Бунунла биз инсанлара һәгиги дини тапмаға вә мәһәббәтли Атамыз Јеһоваја хидмәтдә бизә гошулмаға көмәк едирик. Ҝәлин бундан сонра да әсл мәсиһиләри таныдан мәһәббәт хүсусијјәтини ҝөстәрмәјә давам едәк!