1. Севинмәјимиз вә гүрур дујмағымыз үчүн һансы сәбәбимиз вар?

БИЗ Јеһованын Шаһиди олдуғумуз үчүн севинирик вә бунунла фәхр дујуруг! Чүнки биз Јеһованын адыны дашыјырыг вә тәблиғ етмәклә, шаҝирд һазырламагла дашыдығымыз ада лајиг давранырыг. «Әбәди һәјата апаран јолда јеримәјә мејли» олан инсана Аллаһын хидмәтчиси олмаға көмәк едәндә чох севинирик (Һәв. 13:48). Иса Мәсиһ дә бу ҹүр һиссләр кечирирди. Шаҝирдләри тәблиғдән гајыдыб ағыздолусу данышанда о, «мүгәддәс руһла долду вә севинҹдән ҹуша» ҝәлди (Лука 10:1, 17, 21).

2. Тәблиғ ишинә ҹидди јанашдығымызы неҹә ҝөстәрә биләрик?

² Биз тәблиғ ишинә чох ҹидди јанашырыг. Һәвари Булус Тимутини тәшвиг едирди: «Өзүнә вә вердијин тәлимә һәмишә диггәт јетир... Чүнки бу јолла һәм өзүнү, һәм дә сәнә гулаг асанлары хилас едәҹәксән» (1 Тим. 4:16). Демәли, тәблиғ ишимиздән инсанларын һәјаты асылыдыр. Аллаһын Падшаһлығынын бир вәтәндашы кими, биз даима давранышымыза диггәт јетиририк. Биз һәмишә һәрәкәтләримизлә Јеһованын адына шәрәф ҝәтирмәјә вә тәблиғ етдијимиз мүждәјә ујғун давранмаға чалышырыг (Филип. 1:27). Бундан әлавә, тәблиғә јахшыҹа һазырлашмагла вә хидмәтә чыхмаздан габаг Јеһовадан көмәк истәмәклә вердијимиз тәлимә диггәт јетирдијимизи ҝөстәририк.

3. Хош хәбәрә һәр кәс һај верәҹәк? Нүмунә чәкин.

³ Һәтта хош хәбәри тәблиғ етмәк үчүн әлимиздән ҝәләни етсәк дә, ола биләр ки, чох аз адам вә ја үмумијјәтлә һеч ким һај вермәсин. Мәсәлән, Ҝеорг Линдал гардаш 1929—1947-ҹи илләр әрзиндә Исландијада тәк тәблиғ едирди. О, бу әразиләри долашыб он минләрлә нәшр пајласа да, һеч ким һәгигәти гәбул етмәди. Гардаш белә јазмышды: «Бәзиләри, ҝөрүнүр, һәгигәтә гәти шәкилдә гаршыдыр, амма әксәријјәт  үмумијјәтлә лагејд јанашыр». Сонралар һәмин әразијә Ҝилад мәзунлары тәјин олунду. Онлар Исландијаны гарыш-гарыш ҝәзсә дә, јалныз доггуз ил сонра бир нечә нәфәр өзүнү Јеһоваја һәср едиб вәфтиз олунду *.

4. Инсанлар хош хәбәри гәбул етмәјәндә һансы һиссләри кечиририк?

⁴ Инсанлар хош хәбәри гәбул етмәјәндә биз мәјус олуруг. Ола билсин, Булусун кечирдији һиссләри кечиририк. Әксәр јәһудиләр Исанын вәд олунмуш Мәсиһ олдуғуну гәбул етмәјәндә о, үрәјиндә «дәрин кәдәр вә кәсилмәјән бир ағры» дујурду (Ром. 9:1—3). Ола билсин, кимәсә Мүгәддәс Китаб дәрси кечирик. Амма нә гәдәр ҹан јандырсаг да, онун үчүн дуалар етсәк дә, о, руһани ҹәһәтдән инкишаф етмир вә дәрси дајандырмаг лазымдыр. Һәтта, ола биләр, индијә кими дәрс кечдијиниз һеч бир инсан вәфтиз олунмајыб. Бу мәгаләдә ики суала ҹаваб тапаҹағыг: 1) Јеһова нә заман хидмәтимиздән разы галыр? 2) Хидмәт едәркән һансы реаллығы нәзәрә алмалыјыг?

5. Нәјә ҝөрә хидмәтимиз һәмишә истәдијимиз нәтиҹәни вермир?

⁵ Мүгәддәс Китабда Аллаһы разы салан инсан һаггында белә дејилир: «О,.. һәр ишиндә уғур газанар» (Зәб. 1:3). Амма бу, о демәк дејил ки, Јеһованын јолунда ҝөрдүјүмүз бүтүн ишләримиз үрәјимиз истәјән кими ҝедәҹәк. Һәм өзүмүз, һәм дә әтрафымыздакы инсанлар гејри-камил олдуғу үчүн һәјатымыз «әзаб-әзијјәтлә долудур» (Әјј. 14:1). Бундан әлавә, тәблиғ ишинә гаршы чыханлар мүвәггәти олараг бу иши әввәлки гајдада ҝөрмәјимизә мане ола биләр (1 Кор. 16:9; 1 Салон. 2:18). Бәс Јеһова бизим хидмәтимиздән нә заман разы галыр? Бу суалын ҹавабыны тапмаг үчүн бәзи Мүгәддәс Китаб принсипләринә бахаг.

6. Јеһова нә заман хидмәтимиздән разы галыр?

⁶ Јеһова чәкдијимиз зәһмәтә вә ҝөстәрдијимиз дөзүмә өнәм верир. Инсанларын неҹә һај вермәсиндән асылы олмајараг, Јеһоваја мәһәббәтдән ирәли ҝәләрәк вә шөвглә тәблиғ едириксә, Јеһова бундан разы галыр. Булус јазмышды: «Аллаһ әдаләтсиз дејил ки, кечмишдә вә инди мүгәддәсләрә хидмәт едәрәк Онун адына ҝөстәрдијиниз мәһәббәти вә чәкдијиниз зәһмәти унутсун» (Ибр. 6:10). Һәтта зәһмәтимиз бир нәтиҹә вермәсә дә, Јеһова бу әмәјимизи вә ҝөстәрдијимиз мәһәббәти гијмәтләндирир. Одур ки, истәдијимиз нәтиҹәни әлдә етсәк дә, етмәсәк дә, һәвари Булусун коринфлиләрә дедији сөзләри өзүмүзә аид едә биләрик: «Онун јолунда  чәкдијиниз зәһмәт һәдәр дејил» (1 Кор. 15:58).

7. Һәвари Булусун өз хидмәти илә бағлы дедикләриндән нә өјрәнирик?

⁷ Һәвари Булус чох баҹарыглы мүждәчи иди, мүхтәлиф шәһәрләрдә јени јығынҹагларын јаранмасында бөјүк әмәји олмушду. Амма Мәсиһин хидмәтчиси кими сәриштәли олдуғуну мүдафиә едәндә имана нә гәдәр инсан ҝәтирдијини вурғуламамышды, әксинә, белә јазмышды: «Мән даһа чох иш ҝөрмүшәм» (2 Кор. 11:23). Булус кими, биз дә унутмамалыјыг ки, Јеһова үчүн дәјәрли олан чәкдијимиз зәһмәт вә ҝөстәрдијимиз дөзүмдүр.

8. Хидмәтимизлә бағлы нәји унутмамалыјыг?

⁸ Хидмәтимиз Јеһованын гәлбини севиндирир. Иса Мәсиһ јетмиш шаҝирдини хош хәбәри тәблиғ етмәјә ҝөндәрәндә онлар «севинҹ ичиндә» гајытмышдылар. Шаҝирдләри севиндирән нә иди? Онлар Исаја белә дедиләр: «Сәнин адыны чәкәндә ҹинләр дә бизә бојун әјирләр!» Амма Иса онларын дүшүнҹәсинә дүзәлиш едәрәк белә деди: «Ҹинләрин сизә бојун әјдијинә ҝөрә јох, адынызын ҝөјләрдә јазылдығына ҝөрә севинин» (Лука 10:17—20). Иса билирди ки, онлар һеч дә һәмишә хидмәтдә белә ҝөзәл нәтиҹәләр әлдә едә билмәјәҹәк. Доғрудан да, биз билмирик, онларын тәблиғ етдикләри инсанлардан нечә нәфәр имана ҝәлди. Буна ҝөрә дә шаҝирдләр тәкҹә әлдә етдикләри наилијјәтләрә ҝөрә јох, ән әсасы, Јеһованы разы салдыгларына ҝөрә севинмәли идиләр.

9. Галатијалылара 6:7—9 ајәләринә әсасән, тәблиғ етмәјә давам етсәк, һансы мүкафаты алаҹағыг?

⁹ Дөзүмлә тәблиғ етсәк, әбәди һәјат мүкафатыны алаҹағыг. Биз Падшаһлыг тохумуну әкәндә вә суваранда «руһ үчүн» дә әкмиш олуруг. Чүнки хидмәтимизлә ҝөстәририк ки, мүгәддәс руһун бизә истигамәт вермәсини истәјирик. Јеһова зәманәт верир ки, биз јорулмасаг, «тагәтдән дүшмәсәк», әбәди һәјаты бичәҹәјик. Һәтта индијә гәдәр һеч кимә вәфтиз олунмаға көмәк едә билмәмишиксә белә. (Галатијалылара 6:7—9 ајәләрини охујун.)

10. Инсанларын хош хәбәрә гулаг асыб-асмамасы нәдән асылыдыр?

¹⁰ Һәгигәти гәбул едиб-етмәмәкдә инсанын үрәји әсас рол ојнајыр. Иса әкинчи һаггында мәсәлиндә буну ајдын изаһ етмишди. Әкинчи тохуму мүхтәлиф торпаглара әкир вә јалныз онлардан бири бәһрә ҝәтирир (Лука 8:5—8). Иса демишди ки, мүхтәлиф нөв торпаглар Аллаһын сөзүнә мүхтәлиф ҹүр јанашан инсанларын үрәјини тәмсил едир (Лука 8:11—15). Әкинчи кими, биз дә билмирик, әкдијимиз тохум һансы бәһрәни ҝәтирәҹәк. Бу биздән асылы дејил. Бу, тәблиғ етдијимиз инсанларын үрәјиндән асылыдыр. Бизим өһдәмизә дүшән Падшаһлыг һаггында тохуму әкмәјә давам етмәкдир. Һәвари Булус демишди ки, һәр кәс «зәһмәтинә ҝөрә мүкафатыны алаҹаг», зәһмәтинин бәһрәсинә ҝөрә јох (1 Кор. 3:8).

11. Инсанлар Нуһун дедикләринә гулаг асмаса да, нәјә ҝөрә Јеһова Нуһдан разы иди? (Үз габығындакы шәклә бахын.)

¹¹ Гәдимдә Јеһованын хидмәтчиләри тәблиғ едәндә инсанлар онлара гулаг асмырды. Мәсәлән, Нуһ пејғәмбәр «салеһлик ҹарчысы» иди. О, 50 илә јахын тәблиғ етмишди (2 Бут. 2:5). Шүбһәсиз, о, үмид едирди ки, инсанлар онун дедикләринә һај верәҹәк. Амма Јеһова белә бир шејин олаҹағыны демәмишди. Әксинә, ҝәми тикмәји  бујурдуғу вахт Нуһа белә демишди: «Сән, оғулларын, арвадын вә ҝәлинләринлә бирҝә ҝәмијә минәрсән» (Јар. 6:18). Һәмчинин Нуһ, јәгин, ҝәминин өлчүләриндән дә анламышды ки, онун дедикләрини аз адам гәбул едәҹәк (Јар. 6:15). Амма нәтиҹәдә елә олду ки, бир нәфәр дә олсун, она һај вермәди (Јар. 7:7). Бәс Јеһова Нуһун бу ишин өһдәсиндән ҝәлмәдијини дүшүндү? Хејр! Јеһова ондан разы иди, чүнки о, Јеһованын тапшырдығы иши сәдагәтлә баша чатдырды (Јар. 6:22).

12. Лагејд мүнасибәтә вә тәгибләрә рәғмән, Әрәмја пејғәмбәрә севинҹини горумаға нә көмәк етди?

¹² Ејнилә Әрәмја пејғәмбәр дә тәблиғ етдији узун илләр әрзиндә лагејд мүнасибәтлә вә тәгибләрлә үзләшмишди. Әлејһдарлары ону тәһгир едир, әлә салырдылар. Һәтта о гәдәр руһдан дүшмүшдү ки, Јеһованын бујурдуғу иши даһа ҝөрмәк истәмирди (Әрм. 20:8, 9). Она бу ҹүр мәнфи һиссләрин өһдәсиндән ҝәлмәјә вә хидмәтини севинҹлә иҹра етмәјә нә көмәк етди? Әрәмја фикрини ики ваҹиб амилә ҹәмләди. Биринҹиси, Әрәмја инсанлара «ҝөзәл ҝәләҹәк, үмид» бәхш едән хәбәри чатдырырды (Әрм. 29:11). Икинҹиси, о, Јеһованын адыны дашыјырды (Әрм. 15:16). Ејнилә биз дә инсанлара үмид хәбәрини чатдырырыг вә Јеһованын Шаһиди кими Онун адыны дашыјырыг. Диггәтимизи бу ики амилә ҹәмләмәк бизә дә көмәк едә биләр ки, инсанларын мүнасибәтиндән асылы олмајараг, севинҹимизи горујаг.

13. Иса Мәсиһин Марк 4:26—29 ајәләриндә јазылмыш мәсәлиндән нә өјрәнирик?

¹³ Руһани инкишаф тәдриҹән баш верир. Иса Мәсиһ буну изаһ етмәк үчүн әкинчи һаггында башга бир мәсәл чәкмишди. (Марк 4:26—29 ајәләрини охујун.) Әкинчинин әкдији тохум тәдриҹән бөјүјүр. О, буна һеч ҹүр мүдахилә едә билмәз. Бизә дә шаҝирдимизин инкишафыны ҝөрмәк үчүн мүәјјән мүддәт ҝөзләмәк лазым ҝәлә биләр. Әкинчи мәһсулун истәдији сүрәтлә јетишмәсинә тәсир ҝөстәрә билмәдији кими, биз дә шаҝирдимизин истәдијимиз сүрәтлә инкишаф етмәсинә тәсир едә билмәрик. Она ҝөрә дә шаҝирдинизин инкишафы ҝөзләдијиниздән даһа узун чәкирсә, руһдан дүшмәјин. Әкинчилик иши кими, шаҝирд һазырламаг иши дә сәбир тәләб едир (Јаг. 5:7, 8).

14. Һансы нүмунә ҝөстәрир ки, хидмәтимиз узун мүддәт сонра бәһрә верә биләр?

¹⁴ Елә әразиләр вар ки, хидмәтимизин бәһрәсини узун илләр сонра ҝөрүрүк. Гледис вә Руби Ален адлы ики доғма баҹынын нүмунәсинә бахаг. 1959-ҹу илдә онлар Канаданын Квебек әјаләтиндәки бир шәһәрә өнҹүл кими тәјин олунмушдулар *. Орадакы инсанлар гоншуларын вә католик килсәсинин горхусундан Јеһованын Шаһидләринә гулаг асмырды. Гледис хатырлајыр: «Биз ики ил әрзиндә һәр ҝүн 8 саат ев-ев тәблиғ етдик вә бу мүддәт әрзиндә бир нәфәр дә олсун, бизә гулаг асмады. Инсанлар гапыја јахынлашыб ҝөрәндә ки, бизик, чыхыб ҝедирдиләр. Амма биз руһдан дүшмәдик». Вахт кечдикҹә инсанларын мүнасибәти јумшалды вә гулаг асмаға башладылар. Һал-һазырда һәмин шәһәрдә үч јығынҹаг вар (Әшј. 60:22).

15. 1 Коринфлиләрә 3:6, 7 ајәләриндән шаҝирд һазырламаг иши һаггында нә өјрәнирик?

¹⁵ Шаҝирд һазырламаг иши бирҝә әмәјин нәтиҹәсидир. Бир нәфәрин вәфтиз олунмасында бүтүн јығынҹағын пајы вар. (1 Коринфлиләрә 3:6, 7 ајәләрини охујун.)  Мәсәлән, тәблиғчи марагланан инсана буклет вә ја журнал верир. Амма һәмин инсанла тәкрар сөһбәт етмәјә вахты әл вермәдији үчүн башга бир тәблиғчидән буну хаһиш едир. Һәмин тәблиғчи марагланан инсанла тәкрар сөһбәт едир вә Мүгәддәс Китаб дәрсинә башлајыр. Сонра о, дәрсә мүхтәлиф баҹы-гардашлары дәвәт едир вә һәрә фәргли тәрәфдән шаҝирди руһландырыр. Бу баҹы-гардашларын һәр бири, бир нөв, тохуму сувармаға көмәк едир. Беләликлә, Исанын дедији кими, әкән дә, бичән дә бирҝә севинир (Јәһ. 4:35—38).

16. Тәблиғ ишиндә истәдијимиз гәдәр иштирак едә билмәсәк дә, нәјә ҝөрә севинә биләрик?

¹⁶ Ола билсин, сәһһәтинизә вә ја ҝүҹүнүз чатмадығына ҝөрә тәблиғ ишиндә үрәјиниз истәјән гәдәр иштирак едә билмирсиниз. Буна бахмајараг, бичин ишинә вердијиниз төһфәјә ҝөрә севинә биләрсиниз. Мәсәлән, ҝөтүрәк Давуд падшаһын вә адамларынын әмалигәләрлә дөјүшдүјү һадисәни. Давудҝил басгынчыларын әлиндән арвад-ушагларыны вә талан едилмиш малларыны гуртармышдылар. Ики јүз нәфәр дөјүшмәјә тагәти олмадығы үчүн јүкләрин јанында галмышды. Бу дөјүшдә галиб ҝәләндән сонра Давуд әмр етди ки, гәнимәт һамынын арасында бәрабәр бөлүнсүн (1 Ишм. 30:21—25). Ејни шеји үмумдүнја шаҝирд һазырламаг ишимиз барәдә дә демәк олар. Кимсә һәгигәт јолуна гәдәм гојанда тәблиғ ишиндә әлиндән ҝәләни едән һәр бир тәблиғчи һамы илә бәрабәр дәрәҹәдә севинә биләр.

17. Јеһоваја шүкүр етмәк үчүн һансы сәбәбләримиз вар?

¹⁷ Јеһоваја шүкүрләр олсун ки, хидмәтимизә бу ҹүр анлајышла јанашыр. О билир ки, инсанларын хош хәбәри гәбул етмәси биздән асылы дејил. Амма бизим үрәкдән вә ҹанла-башла хидмәт етмәјимиз Онун нәзәриндән јајынмыр вә буну мүкафатсыз гојмур. О һәмчинин бичин ишиндә нә гәдәр пајымызын олмасындан асылы олмајараг, бундан севинҹ дујмағымызы өјрәдир (Јәһ. 14:12). Әҝәр сиз әзмлә бу ишдә иштирак едирсинизсә, Јеһованын сиздән разы галдығындан архајын ола биләрсиниз!