1, 2. а) Һансы мәнада бу дүнја өлүмә мәһкум олмуш ҹинајәткара бәнзәјир? (Мәгаләнин әввәлиндәки шәклә бахын.) б) Дүнјаја кәсилмиш һөкм иҹра олунанда бүтүн шүурлу варлыглар һансы һиссләри кечирәҹәк?

НӨВБӘТИ сәһнәни тәсәввүр един: бир гаты ҹинајәткара өлүм һөкмү кәсилиб. Кешикчи ону едам јеринә апарыр. Бу инсан там сағлам олса да, онун өлүм сааты јахынлашыр.

² Бу дүнја һәјатынын сон дәгигәләрини јашајан һәмин ҹинајәткара бәнзәјир. Бу залым дүнјанын һөкмү чохдан верилиб, онун «едам ҝүнүнә» аз галыб. Аллаһын Кәламында јазылыб: «Дүнја... кечиб ҝедир» (1 Јәһ. 2:17). Онун сону һөкмән ҝәләҹәк. Лакин мисалдакы ҹинајәткарла бу дүнја арасында мүһүм бир фәрг вар. Кимсә ҹинајәткара чыхарылмыш һөкмүн әдаләтсиз олдуғуну иддиа едәрәк вә ја һөкмүн сон анда ләғв олунаҹағына үмид едәрәк гәрара гаршы чыха биләр. Дүнјанын исә һөкмүнү Каинатын Һөкмдары вериб (Ган. 32:4). Бу һөкм ләғв олунмајаҹаг вә һеч ким онун әдаләтсиз олдуғуну иддиа едә билмәз. Дүнја мәһв оланда һагг-әдаләт бәргәрар олдуғу үчүн бүтүн шүурлу варлыглар үрәкдән севинәҹәк. Онда һамы раһат нәфәс алаҹаг.

3. Аллаһын Падшаһлығы ҝәләндә нәләр кечиб ҝедәҹәк?

 ³ Бәс кечиб ҝедән дүнја дејәндә нә нәзәрдә тутулур? Һәјатын ајрылмаз һиссәсинә чеврилән шејләр. Бир ҝүн бунлар јох олаҹаг. Бәлкә дә бу, бәд хәбәр кими сәсләнир. Амма бу хәбәр Падшаһлыг һаггындакы мүждәнин ајрылмаз һиссәсидир (Мәт. 24:14). Бәс Аллаһын Падшаһлығы ҝәләндә нәләр кечиб ҝедәҹәк? Ҝениш мәнада ҝөтүрсәк, шәр инсанлар, мәнфур тәшкилатлар, һарам әмәлләр вә әзаб-әзијјәтли һәјат. Ҝәлин бу амилләри бир-бир арашдыраг вә ҝөрәк 1) онлар бизә неҹә тәсир едир, 2) Јеһова онларла нә едәҹәк вә 3) Јеһова онлары нә илә әвәз едәҹәк.

4. Шәр инсанлар бизә неҹә тәсир едир?

⁴ Шәр инсанлар бизә неҹә тәсир едир? Һәвари Булус јазмышды ки, бизим зәманә сон дәрәҹә чәтин зәманә олаҹаг. Сонра о демишди: «Пис адамлар вә фырылдагчылар... ҝет-ҝедә даһа бетәр ишләр ҝөрәҹәкләр» (2 Тим. 3:1—5, 13). Сиз бу сөзләрин ҝерчәк олдуғуну ҝөрүрсүнүз? Чохларымыз шәр инсанларын әлиндән әзијјәт чәкирик. Бу инсанларын бәзиләри ачыг шәкилдә, бәзиләри исә мәләк ҹилдинә ҝириб ҝизлинҹә шәр әмәлләр төрәдир. Һәрдән бу шәр инсанларын шәхсән гурбаны олмасаг да, онларын әмәлләри бизә дә тәсир едир. Онларын төрәтдији вәһшиликләр барәдә ешидәндә дәһшәтә ҝәлирик. Ҹисмани вә шејтани руһ әкс етдирән залым инсанларын ушаглара, гоҹалара, көмәксиз инсанлара зүлм етдијини ҝөрәндә үрәјимиз ган ағлајыр (Јаг. 3:15). Амма бу гәдәр пис хәбәрин ичиндә Јеһова Аллаһ Кәламы васитәсилә бизә ҝөзәл хәбәр чатдырыр.

5. а) Јеһова шәр инсанлара һансы имканы верир? б) Јолларындан дөнмәк истәмәјән шәр инсанларын агибәти неҹә олаҹаг?

⁵ Јеһова шәр инсанларла нә едәҹәк? Бу ҝүн Јеһова шәр инсанлара јолларындан дөнмәк үчүн имкан верир (Әшј. 55:7). Бу дүнјанын һөкмү артыг верилиб, амма инсанлара ајры-ајрылыгда һәлә ки һөкм кәсилмәјиб. Бәс бөјүк мүсибәтә гәдәр дәјишмәк истәмәјән вә бу дүнјанын ишләриндән әл чәкмәјән инсанларла нә баш верәҹәк? Јеһова сөз вериб ки, пис инсанлары јер үзүндән јерли-дибли јох едәҹәк. (Зәбур 37:10 ајәсини охујун.) Бу ҝүн шәр инсанлар төрәтдији әмәлләри өрт-басдыр едир вә чох вахт ҹәзасыз галыр. Онлар дүшүнә биләр ки, Аллаһ һөкмүнү иҹра едәндә дә ҹанларыны гуртара биләҹәкләр (Әјј. 21:7, 9). Лакин Мүгәддәс Китабда јазылыб: «Аллаһ инсанын јолларына бахыр, атдығы һәр аддымы ҝөрүр. Елә бир гаранлыг, елә бир зүлмәт јохдур ки, бәдәмәл адам орада ҝизләнә билсин» (Әјј. 34:21, 22). Јеһова Аллаһдан ҝизлин һеч нә јохдур. Инсан нә гәдәр һијләҝәр олса да, Ону алдада билмәз. Елә бир гаты гаранлыг вә зүлмәт јохдур ки, Аллаһын ҝөзләри орада баш верәнләри ҝөрә билмәсин. Армаҝеддондан сонра шәр инсанлары ахтарсаныз да, тапа билмәјәҹәксиниз. Онлар әбәдилик мәһв олаҹаглар! (Зәб. 37:12—15).

6. Шәр инсанларын јерини кимләр тутаҹаг вә нәјә ҝөрә буну шад хәбәр адландырмаг олар?

⁶ Шәр инсанларын јерини кимләр тутаҹаг? Јеһова Аллаһ вәд едир: «Һәлимләр јер үзүнә саһиб олаҹаг, әмин-аманлығын  боллуғундан һәзз алаҹаглар». Елә һәмин мәзмурда јазылыб: «Салеһләр јерә саһиб олаҹаг, орада әбәди јашајаҹаглар» (Зәб. 37:11, 29). «Һәлимләр» вә «салеһләр» кимләрдир? Һәлимләр Јеһовадан елм алыб Онун әмрләринә бојун әјән, салеһләр исә ҹан-дилдән Аллаһа хош ҝедән ишләри ҝөрән инсанлардыр. Бу ҝүн дүнјада шәр инсанлар салеһләрдән гат-гат чохдур. Амма јени дүнјада јалныз салеһ инсанлар јашајаҹаг. Бу инсанлар Јер күрәсини ҹәннәтә чевирәҹәкләр.

7. Мәнфур тәшкилатлар инсанлара неҹә тәсир едир?

⁷ Мәнфур тәшкилатлар бизә неҹә тәсир едир? Дүнјада төрәнән шәр әмәлләрин чоху ајры-ајры инсанларын јох, мүәјјән тәшкилатларын башынын алтындан чыхыр. Мисал үчүн, дини тәшкилатлар милјонларла инсана Аллаһ, Мүгәддәс Китабын сәһиһлији, дүнјанын вә бәшәријјәтин ҝәләҹәји барәдә вә бир чох башга саһәләрдә мин-бир јалан данышырлар. Јахуд ҝөтүрәк сијаси тәшкилатлары. Онлар инсанлары саваша, етник чәкишмәләрә тәһрик едир, касыб-кусубу, фәгир-фүгәраны сыхышдырыр, рүшвәтхорлуғу дәстәкләјир, әдаләтсиз гәрарлар верирләр. Бу сијаһыја тәбиәти чиркләндирән, тәбии сәрвәтләри чапыб-талајан, милјонларла инсанын диләнчи вәзијјәтиндә јашадығы һалда мәсум инсанларын һесабына бир нечә нәфәрин ҹибини долдуран ширкәтләри дә аид етмәк олар. Ҝөрүндүјү кими дүнјанын бу ҹүр аҹынаҹаглы вәзијјәтә дүшмәсиндә әсас мәсулијјәти бу мәнфур тәшкилатлар дашыјыр.

8. Инсанларын ҝөзүндә сарсылмаз кими ҝөрүнән тәшкилатларла нә баш верәҹәк?

⁸ Јеһова мәнфур тәшкилатларла нә едәҹәк? Сијаси гүввәләр бүтүн сахта дини тәшкилатлара һүҹум едәндә бөјүк мүсибәт башлајаҹаг. Бу тәшкилатлар «Вәһј» китабында Бөјүк Бабил адлы фаһишә кими тәсвир олунур (Вәһј 17:1, 2, 16; 18:1—4). Онларын јер үзүндә изи-тозу галмајаҹаг. Бәс галан тәшкилатларын вә гурулушларын агибәти неҹә олаҹаг? Инсанларын ҝөзүндә сарсылмаз ҝөрүнән тәшкилат вә гурулушлар Мүгәддәс Китабда дағлара вә адалара бәнзәдилир. (Вәһј 6:14 ајәсини охујун.) Анҹаг Аллаһын Кәламында әсрләр әввәл дејилмишди ки, бүтүн һөкумәтләр вә онларын табелијиндә олан тәшкилатлар тәмәлиндән сарсылаҹаг. Бу дүнјанын һөкумәтләри вә онларла бирҝә Аллаһын Падшаһлығына гаршы чыханлар тамамилә мәһв олаҹаг, бунунла да бөјүк мүсибәт өз зирвә нөгтәсинә чатаҹаг (Әрм. 25:31—33). Даһа јер үзүндә мәнфур тәшкилатлар олмајаҹаг.

9. Нәјә ҝөрә әмин ола биләрик ки, јени ҹәмијјәтдә гајда-ганун һөкм сүрәҹәк?

⁹ Мәнфур тәшкилатларын јерини нә тутаҹаг? Бәс Армаҝеддондан сонра јер үзүндә һеч бир тәшкилат олмајаҹаг? Мүгәддәс Китабда дејилир: «Онун вәдинә ҝөрә јени бир ҝөј вә јени јер ҝөзләјирик, орада салеһлик мәскунлашаҹаг» (2 Бут. 3:13). Әввәлки ҝөј, јәни мәнфур һөкумәтләр вә әввәлки јер, јәни онларын идарә етдији ҹәмијјәт мәһв олаҹаг. Онларын јерини јени ҝөј вә јени јер, јәни јени һөкумәт вә онун идарәси алтында олан јени инсан ҹәмијјәти тутаҹаг. Иса Мәсиһин идарә  етдији бу һөкумәт низам-интизамы севән Јеһова Аллаһы мүкәммәл шәкилдә тәглид едәҹәк (1 Кор. 14:33). Буна ҝөрә дә јени ҹәмијјәтдә гајда-ганун һөкм сүрәҹәк. Бу гајда-гануна салеһ кишиләр нәзарәт едәҹәк (Зәб. 45:16). Бу кишиләр Мәсиһин вә идарәчилик ишиндә она көмәк едән 144 000 нәфәрин табелијиндә олаҹаглар. Буҝүнкү чохсајлы мәнфур тәшкилатларын јерини бир һөкумәт тутаҹаг. Бу һөкумәтлә онун тәбәәләри арасында бирлик һөкм сүрәҹәк вә бу һөкумәт һагг-әдаләтлә идарә едәҹәк. Тәсәввүр едирсиниз, онда дүнјада шәраит неҹә олаҹаг?!

10. Сизин әразидә инсанлар һансы һарам әмәлләрә гуршаныб? Бу, сизә вә аиләнизә неҹә тәсир едир?

¹⁰ Дүнјада төрәнән һарам әмәлләр бизә неҹә тәсир едир? Дүнја һарам әмәлләрин ичиндә итиб-батыр. Әхлагсызлыг, әдаләтсизлик, гәддарлыг дүнјаны бүрүјүб. Әјләнҹә саһәси бу ҹүр әмәлләри јахшы бир шеј кими тәгдим етмәклә Јеһованын јахшы илә писи фәргләндирән ганунларыны тапдалајыр (Әшј. 5:20). Валидејнләр ушагларыны бу әмәлләрдән горумаг үчүн мүбаризә апарырлар. Һәгиги мәсиһиләр Аллаһын ганунларыны дәјәрдән салан бу дүнјада Аллаһын гаршысында тәмиз адларыны горумаг үчүн вар-ҝүҹләри илә чалышырлар.

11. Јеһованын Сәдум вә Әмурәни дағытмасы бизә нәји сүбут едир?

¹¹ Јеһова һарам әмәлләрә гаршы һансы тәдбири ҝөрәҹәк? Ҝәлин ҝөрәк Јеһова Аллаһ Сәдум вә Әмурәдә төрәнән ҝүнаһлы әмәлләри ҝөрәндә нә етди. (2 Бутрус 2:6—8 ајәләрини охујун.) Лут вә аиләси мурдар әмәлләрин ичиндә итиб-батан инсанларын арасында јашајырды. Бу вәзијјәтә ҝөрә онун салеһ үрәји ағрыјырды. Јеһова Аллаһ бүтүн о әразини дармадағын етди. Бунунла Јеһова јалныз орадакы ганунсузлуғун көкүнү кәсмәди, һәм дә «аллаһсызлара башларына ҝәләҹәк шејләри әјани шәкилдә ҝөстәрди». Неҹә ки о дөврдә Аллаһ Сәдум вә Әмурәдәки әхлагсызлыға сон гојду, бу ҝүн дә дүнјаја кәсдији һөкмү иҹра едәндә мурдар әмәлләрин көкүнү кәсәҹәк.

12. Јени дүнјада һансы ишләрлә мәшғул олмаг истәјирсиниз?

¹² Һарам әмәлләрин јерини нә тутаҹаг? Јер үзү ҹәннәт оланда инсанлар фајдалы ишләрлә мәшғул олаҹаг. Ҝәлин бир анлыг Јерин ҹәннәтә чеврилдији о ҝөзәл дөвраны тәсәввүр едәк: өзүмүз вә доғмаларымыз үчүн ев тикирик, өлүмүн буховундан азад олан милјонларла инсаны гаршылајырыг, онлара Јеһованын гајда-ганунларыны өјрәдир, Онун бәшәријјәтә етдији јахшылыглар барәдә данышырыг (Әшј. 65:21, 22; Һәв. 24:15). Онда дүнјада јалныз инсана севинҹ ҝәтирән вә Јараданы шәрәфләндирән ишләр ҝөрүләҹәк!

13. Шејтанын, Адәмин вә Һәвванын уҹбатындан бу ҝүн нәләр јашајырыг?

¹³ Бу әзаб-әзијјәтли һәјат бизә неҹә тәсир едир? Шәр инсанлар, мәнфур тәшкилатлар вә һарам әмәлләр үзүндән һәјат дөзүлмәз олуб. Мүһарибә, јохсуллуг, милләтчилик, хәстәлик вә өлүмүн һансымыза тәсири олмајыб?! Бу шејләрин һамысы Јеһоваја гаршы үсјан едән үч варлығын — Шејтанын, Адәмин вә  Һәвванын уҹбатындан башымыза ҝәлир. Дүнјада елә бир инсан јохдур ки, бу үсјанын аҹысыны дадмасын!

14. Әзаб-әзијјәтләрә ҝәлинҹә Јеһова нә едәҹәк?

¹⁴ Әзаб-әзијјәтләрә ҝәлинҹә Јеһова нә едәҹәк? Ҝөтүрәк мүһарибәләри. Јеһова Аллаһ вәд едир ки, «јерин бир уҹундан о бири уҹунадәк дөјүшләри» кәсәҹәк. (Зәбур 46:8, 9 ајәләрини охујун.) Аллаһ бүтүн хәстәликләри јох едәҹәк (Әшј. 33:24). О сөз вериб ки, өлүмү әбәдилик мәһв едәҹәк (Әшј. 25:8). Һәмчинин јер үзүндә бир нәфәр дә олсун касыб инсан олмајаҹаг (Зәб. 72:12—16). Јеһова Аллаһ бизи тәкҹә бунлардан јох, һәмчинин һәјатымызы дөзүлмәз едән диҝәр шејләрдән, Шејтан вә онун ҹинләринин тәсириндән азад едәҹәк (Ефес. 2:2).

15. Армаҝеддондан сонра нәләр јох олаҹаг?

¹⁵ Ҝәлин мүһарибәсиз, хәстәликсиз, өлүмсүз һәјаты тәсәввүр едәк: орду, силаһ, хәстәхана, һәким, гәбиристанлыг јохдур; пис инсанлар олмадығы үчүн артыг мүһафизә системинә, полисә, һәтта гыфыла белә, еһтијаҹ јохдур. Бу ҝүн бизә динҹлик вермәјән проблемләрдән азадыг.

16, 17. а) Армаҝеддондан сағ чыхан инсанлары неҹә һәјат ҝөзләјир? б) Бу дүнја илә бир јердә мәһв олмамаг үчүн нә етмәлијик?

¹⁶ Һәјатымызы дөзүлмәз едән шејләр јох оланда һәјат неҹә олаҹаг? Әслиндә, буну тәсәввүр етмәк чәтиндир, чүнки ҝөзүмүзү ачандан әзаб-әзијјәт ҝөрүрүк вә бүтүн бунлар бизә артыг ади ҝәлир. Мисал үчүн, дәмирјол стансијасынын јанында јашајан инсанлар орадакы сәс-күјә өјрәширләр. Јахуд зибиллијин јанында јашајанлар артыг зибилин ијинә алышырлар. Јеһова буҝүнкү әзаб-әзијјәти тамамилә јох едәндә әсл һәјатын нә демәк олдуғуну баша дүшәҹәјик.

¹⁷ Бәс ҝөрәсән, буҝүнкү нараһатчылыглары нәләр әвәз едәҹәк? Зәбур 37:11 ајәсиндә дејилир ки, инсанлар «әмин-аманлығын боллуғундан һәзз алаҹаглар». Мәҝәр бу сөзләр үрәјинизи риггәтә ҝәтирмир?! Јеһова Аллаһ бизә мәһз белә ҝөзәл һәјат вәд едир. Буна ҝөрә дә чәтинликләрлә долу бу сон ҝүнләрдә Јеһовадан вә Онун тәшкилатындан ајры дүшмәмәк үчүн әлиниздән ҝәләни един! Үмидинизи итирмәјин, даима бу барәдә дүшүнүн, о ҝөзәл һәјаты хәјалынызда ҹанландырын, һисс един вә башгаларына да бу мүждәни чатдырын! (1 Тим. 4:15, 16; 1 Бут. 3:15). Јалныз бу һалда бу дүнја кечиб ҝедәндә сағ галаҹагсыныз вә әбәдијјән һәјатдан зөвг алаҹагсыныз!