1, 2. а) Әлифәзин вә Билдадын сөзләринә әсасән, Аллаһ бизим ибадәтимизә неҹә јанашыр? б) Бәс, әслиндә, Јеһова бу мәсәләјә неҹә јанашыр?

«ИНСАНДАН Аллаһа нә фајда? Ағыллы адамын Она нә хејри? Мәҝәр сәнин салеһлијин Гүдрәт Саһибинә лазымдыр? Јохса тәмиз һәјатынын Она хејри вар?» (Әјј. 22:1—3). Ола билсин, сиздә нә вахтса бу ҹүр суаллар јараныб. Бу суаллары Әјјуб пејғәмбәрә досту тәһмани Әлифәз вермишди. Әлифәзин фикринҹә, инсандан Аллаһа һеч бир фајда јохдур. Әлифәзин досту шуһи Билдад да онунла ејни фикирдә иди. О, гәти шәкилдә демишди ки, инсан Аллаһын гаршысында һаглы чыха билмәз. (Әјјуб 25:4 ајәсини охујун.)

² Әјјуба тәсәлли вермәјә ҝәлән бу дырнагарасы достлар дејирдиләр ки, бәндәнин ибадәтинин Аллаһа һеч бир хејри јохдур, инсан Аллаһын ҝөзүндә ҝүвә, гурд вә сохулҹан кими бир шејдир (Әјј. 4:19; 25:6). Илк бахышдан елә тәәссүрат јарана биләр ки, Әлифәзлә Билдад тәвазөкарлыгдан ирәли ҝәләрәк белә дејирләр (Әјј. 22:29). Белә баханда, биз, доғрудан да, Аллаһын јанында аҹизик. Мәсәлән, дағын башындан вә ја тәјјарәнин пәнҹәрәсиндән ашағы бојлананда инсанын неҹә ҹылыз вә әһәмијјәтсиз олдуғуну баша дүшүрүк. Бәс демәк олармы ки, Јеһова Аллаһ Өз уҹа дәрҝаһындан бизә нәзәр саланда  Падшаһлыг уғрунда ҝөрдүјүмүз ишләр Онун ҝөзүндә бу ҹүр кичик вә ади ҝөрүнүр? Хејр. Она ифтира атдыглары үчүн Јеһованын Әлифәзи, Билдады вә Сөфәри тәнбеһ етмәјиндән, Әјјубу исә «гулум» адландырмағындан ҝөрүнүр ки, Јеһова хидмәтчиләринин зәһмәтини гијмәтләндирир (Әјј. 42:7, 8). Ҝөрүндүјү кими, инсандан Аллаһа фајда вар.

3. Әлиһу Аллаһа ибадәтлә бағлы нә демишди вә онун сөзләри һансы мәнаны дашыјыр?

³ Әјјубун Әлиһу адлы диҝәр бир досту демишди: «Салеһ олсан, Она [Аллаһа] нә вермиш оларсан? О, сәндән нә алар?» (Әјј. 35:7). Амма Аллаһ Әлиһуну бу сөзләрә ҝөрә данламады. Чүнки Әлиһу инсанын хидмәтинин Аллаһын ҝөзүндә дәјәрсиз олдуғуну иддиа етмирди. О, демәк истәјирди ки, Јеһова бизим ибадәтимизә мөһтаҹ дејил. Онун һеч нәјә еһтијаҹы јохдур. Бәндәнин етдији һеч бир шеј Аллаһы варлы вә имканлы етмәз, Онун ҝүҹүнә-ҝүҹ гатмаз. Әксинә, нәјимиз варса, О, бизә бәхш едиб, биздә олан ҝөзәл немәтләр, баҹарыг вә хүсусијјәтләр Онун һәдијјәсидир. Онлардан неҹә истифадә етмәјимиз Јараданымыз үчүн әһәмијјәтлидир.

4. Инсанлара етдијимиз јахшылыглар Јеһова Аллаһ үчүн нә дәрәҹәдә дәјәрлидир?

⁴ Кимсә Јеһованын хидмәтчисинә јахшылыг едәндә Јеһова буну Она едилән јахшылыг кими гәбул едир. Мәсәлләр 19:17 ајәсиндә јазылыб: «Фағыра лүтф еләјән Јеһоваја борҹ верир, Аллаһ да она әвәзини верәр». Бу ајәдән ҝөрүнүр ки, Јеһова фағыра едилән бүтүн јахшылыглары ҝөрүр. Бундан әлавә, Јеһова Аллаһ Каинатын Јараданы олса да, етдијимиз јахшылыглара ҝөрә Өзүнү биз фани инсанларын гаршысында борҹлу сајыр вә бизә чохлу немәт вермәклә бу борҹу гајтарыр. Бу фикри Јеһованын Оғлу Иса Мәсиһ дә тәсдигләмишди. (Лука 14:13, 14 ајәләрини охујун.)

5. Нөвбәти абзасларда һансы суалларын ҹавабыны нәзәрдән кечирәҹәјик?

⁵ Јеһова Аллаһ Әшија пејғәмбәри Өз елчиси олмаға дәвәт етди. Бу ҝөстәрир ки, Јеһова садиг хидмәтчиләри Онун ирадәсини јеринә јетирәндә мәмнунлуг дујур (Әшј. 6:8—10). Әшија пејғәмбәр бу дәвәти бөјүк мәмнунијјәтлә гәбул етди. Бу ҝүн Јеһованын минләрлә хидмәтчиси чәтин тапшырыглары ҹанла-башла јеринә јетирмәклә Әшија кими һазырлыг руһу тәзаһүр етдирир. Лакин, кимдәсә суал јарана биләр: «Тәк мәним ҝөрдүјүм ишдән нә асылыдыр? Мәним үчүн Јеһоваја хидмәт етмәк шәрәфдир. Амма мәҝәр мән бу иши ҝөрмәсәм, Онун нијјәти јеринә јетмәјәҹәк ки?» Бу суаллара ҹаваб тапмаг үчүн ҝәлин гадын пејғәмбәр Дәбурә илә һаким Бәрәгин ҝүнләриндә баш вермиш һадисәјә нәзәр салаг.

6. Исраиллиләрлә Јавинин ордусу арасында һансы фәрг вар иди?

⁶ Кәнан падшаһы Јавин «дүз ијирми ил исраиллиләрә ган уддурду». Кәнд ҹамааты күчәјә чыхмаға белә горхурду. Исраиллиләрин нә дөјүшмәк, нә мүдафиә олунмаг үчүн силаһлары јох иди. Дүшмән ордусунун исә «900 дәрјазлы ҹәнҝ арабасы вар иди» (Һак. 4:1—3, 13; 5:6—8) *.

7, 8. а) Јеһова Бәрәгә һансы тапшырығы вермишди? б) Исраиллиләр Јавинин ордусуну неҹә мәһв етди? (Мәгаләнин әввәлиндәки шәклә бахын.)

⁷ Јавинин ордусу илә мүгајисәдә исраиллиләр аҹиз ҝөрүнүрдү. Буна бахмајараг, Јеһова Дәбурә васитәсилә  Бәрәгә тапшырды: «Галх, Табур дағына јүрүш ет. Өзүнлә Нифталы вә Зәбулундан 10 000 нәфәр ҝөтүр. Мән Јавинин ордусунун башчысы Сисары ҹәнҝ арабалары вә гошунлары илә бирҝә Гишон чајына — сәнин јанына ҝәтириб сәнә тәслим едәҹәјәм» (Һак. 4:4—7).

⁸ Бу чағырыш тез бир заманда бүтүн Исраилә јајылды вә көнүллүләр Табур дағына топлашды. Бәрәг вахт итирмәдән Јеһованын тапшырығыны иҹра етди. (Һакимләр 4:14—16 ајәләрини охујун.) Танагда ҝедән дөјүш заманы гәфләтән башлајан лејсан јағышы әразинин торпағыны лил-палчыға чевирди. Бәрәг Сисарла ордусуну 24 километр аралыда јерләшән Һарошет-Гуимәдәк тәгиб етди. Арабасы палчыға батыб галдығы үчүн Сисар пијада Сәнаннимә гачды. О, гәни Һабирин арвады Јаилин чадырына ҝәлиб орада ҝизләнди. Јорулуб әлдән дүшдүјү үчүн Сисар дәрин јухуја ҝетди. О, јатан вахт Јаил ҝөзүнү гырпмадан ону өлдүрдү (Һак. 4:17—21). Беләҹә, Исраиллин дүшмәнләри мәғлуб олду! *

9. Һакимләр 5:20, 21 ајәләриндә Сисара гаршы ҝедән дөјүшлә бағлы һансы тәфсилатлар јазылыб?

⁹ «Һакимләр» китабынын 4-ҹү фәслиндә јазылан һадисәләри баша дүшмәк үчүн 5-ҹи фәсли дә охумаг лазымдыр. Мәсәлән, Һакимләр 5:20, 21 ајәләриндә дејилир: «Улдузлар асимандан дөјүшдү, өз јерләриндән Сисара гаршы вурушду. Гишон чајы дүшмәнләри јујуб апарды». Мүгәддәс Китабда дәгиг дејилмир дөјүшән улдузлар мәләкләр иди, јохса метеор јағышы. Лакин вәзијјәти бир аз тәһлил етсәк, ҝөрәрик ки, бу, Аллаһын иши иди. 900 арабаны мәһв етмәк үчүн лејсан лазым олан вахтда, лазым олан јердә јағды. Аллаһын әли олмасајды, бу, неҹә мүмкүн оларды?! Һакимләр 4:14, 15 ајәләриндә дүз үч дәфә гәләбәнин Јеһова Аллаһдан олдуғу вурғуланыр. 10 000 көнүллү дөјүшчүдән һеч бири гәләбәни өз ҝүҹү илә газандығыны дејә билмәзди.

10, 11. Мәруз нә иди вә нәјә ҝөрә о, ләнәтләнмишди?

¹⁰ Дәбурә илә Бәрәгин һејрәтамиз гәләбәјә ҝөрә Јеһоваја уҹалтдығы һәмд нәғмәсиндә мараглы бир мәгам вар. Нәғмәдә онлар дејирләр: «Мәруза ләнәт олсун! Гој онун сакинләринә ләнәт олсун! Чүнки Јеһоваја көмәјә ҝәлмәдиләр, Јеһованын иҝидләринә гошулуб көмәјә ҝәлмәдиләр» (Һак. 5:23).

¹¹ Бу ләнәт Мәрузу елә тутмушду ки, онун шәһәр, кәнд, јахуд гәсәбә олдуғу һеч кимә мәлум дејил. Ола билсин, бу, шәһәр олуб вә онун сакинләри дүшмәнлә дөјүшмәк чағырышына һај вермәјибләр. Бәлкә дә, Сисар дөјүшдән гачанда бу шәһәрин ичиндән кечмишди, амма шәһәр сакинләри ону тутмамышдылар. Ола билмәз ки, онлар Јеһованын чағырышыны ешитмәсинләр, чүнки һәмин бөлҝәдән 10 000 көнүллү бу чағырыша һај вермишди. Јәгин Мәруз сакинләри залым Сисарын бу шәһәрин күчәләри илә тәк-тәнһа вә тәлаш ичиндә гачдығыны ҝөрмүшдүләр. Бу, бир фүрсәт иди ки, онлар Јеһованын ирадәсини јеринә јетирсинләр вә Ондан хејир-дуа алсынлар. Онлар бу фүрсәтдән истифадә едиб Јеһованын јолунда нә исә едә биләрдиләр, амма һеч нә етмәдиләр. Онлар ҹәсарәтли Јаилдән неҹә дә фәргләнирдиләр! (Һак. 5:24—27).

12. Һакимләр 5:9, 10 ајәләриндә һансы тәзад тәсвир олунур вә бу, бизи нәјә тәшвиг едир?

¹² Һакимләр 5:9, 10 ајәләриндән Бәрәглә бирҝә дөјүшә атыланларла бундан бојун гачыран инсанлар арасындакы кәскин  фәрги ҝөрмәк олар. Бу парчада Дәбурә илә Бәрәг халга гошулуб ҝедән Исраил әмирләринә тәриф дејир. Бу әмирләр «боз улаглара минәнләр»дән, јәни гүрурундан дөјүшә гатылмајанлардан вә «баһалы халылар үстдә отуранлар»дан, јәни дәбдәбәли һәјат јашајанлардан јерлә-ҝөј гәдәр фәргләнирдиләр. Онлар «јолларла ҝедәнләр»дән, јәни раһатлыг ахтаранлардан фәргли олараг, Бәрәглә бирҝә дашлы-кәсәкли Табур дағында вә лилли-палчыглы Гишон вадисиндә дөјүшмәјә һазыр идиләр. Јухарыдакы ајәләрдә раһатлығыны дүшүнәнләрә хитабән дејилир: «Фикир верин!» Онлар баша дүшмәли идиләр ки, Јеһованын јолунда нә исә едә биләрдиләр, амма бу фүрсәти әлдән вердиләр. Бу ҝүн Јеһоваја там шәкилдә хидмәт етмәкдән бојун гачыранлар да буну нәзәрә алмалыдырлар.

13. Рубән, Дан, Ашир вә Зәбулунла Нифталы гәбиләләри Јеһованын ишинә һансы фәргли мүнасибәти ҝөстәрмишдиләр?

¹³ Дөјүшә ҝедәнләр Јеһова Аллаһын Али Һөкмдар кими ҝөстәрдији әзәмәтли ишләрин шаһиди олдулар. Буна ҝөрә дә онлар башгаларына Јеһованын һагг ишләрини нәгл едә биләрдиләр (Һак. 5:11). Рубән, Дан вә Ашир гәбиләләрини исә Јеһованын иши јох, өз вар-дөвләтләри, јәни сүрүләри, ҝәмиләри вә лиманлары марагландырырды (Һак. 5:15—17). Амма Зәбулунла Нифталы гәбиләси «һәјатыны өлүмүн пәнҹәсинә» атараг Дәбурә илә Бәрәги дәстәкләди (Һак. 5:18). Јеһованын ишинә ҝөстәрилән бу тәзадлы мүнасибәтдән өзүмүзә дәрс ҝөтүрә биләрик.

14. Јеһованын һакимијјәтини дәстәкләдијимизи неҹә ҝөстәрә биләрик?

¹⁴ Бу ҝүн биз Јеһованын һакимијјәтини дәстәкләмәк үчүн дөјүшә чағырылмырыг, амма буну тәблиғ ишиндә ҹанла-башла вә ҹәсарәтлә иштирак етмәклә едирик. Әввәлки илләрә нисбәтән һазырда Јеһова Аллаһын тәшкилатында көнүллүләрә тәләбат даһа бөјүкдүр. Милјонларла баҹы-гардаш фәдакарлыг ҝөстәриб таммүддәтли хидмәтин  мүхтәлиф нөвләриндә иштирак едирләр. Онларын сырасында өнҹүлләрин, бејтеллиләрин, ибадәт евләринин тикинтисиндә иштирак едән көнүллүләрин адыны чәкмәк олар. Топлантыларла бағлы ишләрдә көмәк едән јашлы вә ҹаван диндашларымыз да ејни фәдакарлыг руһу ҝөстәрирләр. Хәстәханаларла әлагә комитәсинин үзвү олан вә топлантыларын тәшкилиндә иштирак едән ағсаггаллар да чох зәһмәт чәкирләр. Әмин ола биләрик ки, Јеһова Онун јолунда фәдакарлыг ҝөстәрән инсанларын зәһмәтини унутмур (Ибр. 6:10).

15. Јеһованын ишинә мүнасибәтимизи неҹә јохлаја биләрик?

¹⁵ Һәр биримиз нөвбәти суалларын үзәриндә дүшүнмәлијик: «Еһтијаҹ јарананда өһдәмә иш ҝөтүрүрәм, јохса ҝөзләјирәм башгалары буну етсин? Даһа чох хидмәтә ҹан атырам, јохса мадди шејләрә? Бәрәг, Дәбурә, Јаил вә 10 000 дөјүшчү кими Јеһова Аллаһын тапшырығыны јеринә јетирмәк үчүн өз тәрәфимдән әлимдән ҝәләни едирәм?» Пул газанмаг үчүн башга шәһәрә вә ја өлкәјә көчмәји планлашдырырсынызса, дуа едиб бунун аиләнизә вә јығынҹаға неҹә тәсир едәҹәји барәдә дүшүнүрсүнүз? *

16. Јеһованын һеч нәјә еһтијаҹы олмадығы һалда биз Она нә верә биләрик?

¹⁶ Јеһова бәндәләринә Онун һакимијјәтини дәстәкләмәк имканы вериб вә бунунла бизә шәрәф ҝөстәриб. Шејтан Адәмлә Һәвванын вахтындан башлајараг инсанлары өз тәрәфинә чәкмәк истәјир. Аллаһын һакимијјәтини дәстәкләмәклә биз Јеһованын тәрәфини тутдуғумузу сүбут етмиш олуруг. Јеһоваја иманымыз вә сәдагәтимиз бизи Онун јолунда фәдакар олмаға тәшвиг едир, бу исә, өз нөвбәсиндә, Јеһованын көнлүнү шад едир (Мәс. 23:15, 16). Бунун әсасында Јеһова Аллаһ Шејтанын иттиһамларына лајигли ҹаваб верир (Мәс. 27:11). Беләҹә, биз Јеһованын дәјәр вердији итаәткарлыг хүсусијјәтини тәзаһүр етдирәрәк Она севинҹ ҝәтиририк.

17. Һакимләр 5:31 ајәсинә әсасән, ҝәләҹәкдә нәләр баш верәҹәк?

¹⁷ Тезликлә дүнјада јалныз Јеһованын тәрәфини тутан инсанлар јашајаҹаг. Биз о ҝүнүн һәсрәти илә јашајырыг! Дәбурә илә Бәрәгин нөвбәти сөзләринә гошулараг дејирик: «Еј Јеһова, гој бүтүн дүшмәнләрин мәһв олсун, Сәни севәнләр исә әзәмәтлә доған ҝүнәш кими парласын!» (Һак. 5:31). Јеһова Шејтанын шәр дүнјасыны мәһв едәндә бу диләјимиз чин олаҹаг. Армаҝеддон савашында дүшмәнлә дөјүшмәк үчүн бизә еһтијаҹ олмајаҹаг. Онда биз дуруб ҝөзләјәҹәјик, Јеһованын бизи неҹә хилас едәҹәјинә бахаҹағыг (2 Салн. 20:17). Амма о ҝүнә кими биз Јеһоваја ҹәсарәтлә вә ҹан-дилдән хидмәт едәрәк Онун тәрәфини тутмалыјыг.

18. Јеһованын јолунда ҝөстәрдијиниз фәдакарлыг башгаларына неҹә тәсир едә биләр?

¹⁸ Дәбурә илә Бәрәг һәмд нәғмәсини Јараданы уҹалтмагла башлајыр: «Халг шөвглә дөјүшә атылды, Јеһоваја алгыш един!» (Һак. 5:1, 2). Гој сизин дә Јеһованын јолунда ҝөстәрдијиниз фәдакарлыг башгаларыны Она алгыш демәјә тәшвиг етсин!