1, 2. Нәјә ҝөрә «Ромалылара мәктуб»ун 8-ҹи фәсли мәсһ олунмуш мәсиһиләр үчүн бөјүк мәна кәсб едир?

ЈӘГИН Мәсиһин өлүмүнү анма мәрасими әрәфәси Ромалылара 8:15—17 ајәләрини охумусунуз. Бу парчада мәсиһинин руһла мәсһ олундуғуну һарадан билдији изаһ олунур. Орада јазыланлара әсасән, буну она руһ тәлгин едир. Бу фәслин әввәлиндә «Мәсиһ Иса илә вәһдәтдә оланлар» һаггында данышылыр. Бәс неҹә дүшүнүрсүнүз, «Ромалылара мәктуб»ун 8-ҹи фәсли анҹаг мәсһ олунмуш мәсиһиләрә аиддир? Јохса јердә јашамаға үмид едән мәсиһиләр дә ордан нә исә өјрәнә биләр?

² Дүздүр, бу фәсил, илк нөвбәдә мәсһ олунмуш мәсиһиләрә үнванланыб. Ҹисмани бәдәндән «азад едилиб оғуллуға ҝөтүрүлмәји» ҝөзләјән бу инсанлар Аллаһдан руһ алырлар (Ром. 8:23). Онлар ҝөјә галханда Аллаһын оғуллары олурлар. Бу нәјин сајәсиндә мүмкүн олур? Бу инсанлар вәфтиз олунараг мәсиһи олур вә Аллаһ фидјәнин әсасында онларын ҝүнаһларыны бағышлајараг онлары салеһ сајыр. Беләҹә, бу мәсиһиләр Аллаһын оғуллары олурлар (Ром. 3:23—26; 4:25; 8:30).

3. Нәјә әсасән демәк олар ки, «Ромалылара мәктуб»ун 8-ҹи фәсли јердә јашамаға үмид едән мәсиһиләр үчүн дә әһәмијјәт дашыјыр?

³ «Ромалылара мәктуб»ун 8-ҹи фәсли јердә јашамаға үмид едән мәсиһиләр үчүн дә мараглыдыр, чүнки онлар да, мүәјјән  мәнада, Аллаһын ҝөзүндә салеһдирләр. Буна әсас кими һәмин мәктубун 4-ҹү фәслини ҝәтирмәк олар. Орада Булус Ибраһим пејғәмбәрдән сөз ачыр. Ибраһим пејғәмбәр Јеһова Аллаһ исраиллиләрә ганун вермәздән вә Мәсиһ ҝүнаһларымыз уғрунда өлмәздән әсрләр өнҹә јашајыб. Бунунла белә, Јеһова бу пејғәмбәри мөһкәм иман саһиби олдуғу үчүн салеһ сајды. (Ромалылара 4:20—22 ајәләрини охујун.) Јердә јашамаға үмид едән мәсиһиләри дә Јеһова ејни сәбәбдән салеһ сајыр. Буна ҝөрә дә демәк олар ки, «Ромалылара мәктуб»ун 8-ҹи фәслиндәки мәсләһәт онлар үчүн дә фајдалыдыр.

4. Ромалылара 8:21 ајәси илә бағлы һансы суал јараныр?

⁴ Ромалылара 8:21 ајәси бизә әминлик верир ки, ҝәләҹәкдә дүнја мүтләг ҹәннәт олаҹаг. Бу ајәдә хилгәтин «чүрүклүк әсарәтиндән гуртулуб Аллаһын өвладларынын шанлы азадлығына» говушаҹағы вәд олунур. Ҹәннәт мүтләг олаҹаг, амма ортаја бир суал чыхыр: биз орада олаҹағыг, јохса јох? Шәхсән сиз орада олаҹағыныза әминсиниз? «Ромалылара мәктуб»ун 8-ҹи фәслиндәки мәсләһәт сизә бу әминлијә саһиб олмаға көмәк едә биләр.

5. Ромалылара 8:4—13 ајәләриндә Булус һансы ҹидди мәсәләјә тохунур?

⁵ Ромалылара 8:4—13 ајәләрини охујун. «Ромалылара мәктуб»ун 8-ҹи фәслиндә ики груп инсан һаггында данышылыр: ҹисмани истәкләрин далынҹа дүшәнләр вә руһа ујғун јашајанлар. Кимсә дүшүнә биләр ки, бунлардан бири иманда олмајанлар, о бири исә мәсиһиләрдир. Лакин Булус бу мәктубу «Аллаһын мүгәддәс олмаг үчүн чағырылмыш Ромадакы... севимли бәндәләринә» үнванламышды (Ром. 1:7). Бурадан белә нәтиҹәјә ҝәлмәк олар ки, ҹисмани истәкләрин далынҹа дүшәнләр дә, руһа ујғун јашајанлар да мәсиһиләр иди. Ҝәлин ҝөрәк бу ики груп арасында һансы фәрг вар.

6, 7. а) Мүгәддәс Китабда «ҹисим» сөзү һансы мәналарда ишләнир? б) Ромалылара 8:4—13 ајәләриндә Булус «ҹисим» сөзүнү һансы мәнада ишләтмишди?

⁶ Әввәлҹә «ҹисим» сөзүнү нәзәрдән кечирәк. «Ҹисим» дејәндә Булус нәји нәзәрдә тутурду? Мүгәддәс Китабда «ҹисим» сөзү мүхтәлиф мәналарда ишләнир. Бәзи ајәләрдә һәрфи мәна дашыјыр (Ром. 2:28; 1 Кор. 15:39, 50). Бәзи ајәләрдә исә гоһумлуг бағлары илә әлагәдар ишләдилир. Мәсәлән,  Булус јәһудиләрин ҹисмән она гоһум олдуғуну демишди (Ром. 9:3).

⁷ «Ромалылара мәктуб»ун 7-ҹи фәсли 8-ҹи фәслин 4—13 ајәләриндә «ҹисим» сөзүнүн һансы мәнада ишләндијини анламаға көмәк едир. Булус Ромалылара 7:5 ајәсиндә бәдәнин истәкләри илә јашамағы бәдәндә фәалијјәт ҝөстәрән ҝүнаһлы еһтирасларла әлагәләндирир. Бу, Булусун «ҹисмани истәкләрин далынҹа дүшәнләрин фикри-зикри ҹисмани шејләрдәдир» дејәндә нәји нәзәрдә тутдуғуну баша дүшмәјә көмәк едир. Булус бурада фикри-зикри ҝүнаһлы арзуларын јанында олан, онларын гулуна чеврилмиш инсанлар барәдә данышыр. Онларын әксәријјәти өз еһтирасларыны, истәкләрини тәмин етмәк үчүн јашајырдылар.

8. Нәјә ҝөрә һәвари Булус һәтта мәсһ олунмуш мәсиһиләри бәдәнин истәкләри илә јашамаг тәһлүкәси барәдә хәбәрдар етмишди?

⁸ Сиз соруша биләрсиниз, нәјә ҝөрә Булус мәсһ олунмуш мәсиһиләри бәдәнин истәкләри илә јашамағын тәһлүкәли олдуғу барәдә хәбәрдар етмишди? Һәмчинин сиздә суал јарана биләр, бәс бу хәбәрдарлыг Аллаһын Өзүнә дост сечдији вә салеһ сајдығы буҝүнкү мәсиһиләрә дә аиддир? Аҹы һәгигәтдир ки, һәр бир мәсиһи ҹисмин ҝүнаһлы арзуларынын тәсири алтына дүшә биләр. Мәсәлән, Булусун јаздыгларына әсасән, Ромадакы бәзи мәсиһиләр «өз нәфсләринин» — еһтирасын, јејиб-ичмәјин вә саирә шејләрин гулу идиләр. Онлардан бәзиләри исә садәлөвһ адамлары јолдан чыхарырдылар (Ром. 16:17, 18; Филип. 3:18, 19; Јһд. 4, 8, 12). Һәмчинин јадыныздадырса, Коринф јығынҹағында бир гардаш атасынын арвады илә јашајырды (1 Кор. 5:1). Бу шејләри нәзәрә алсаг, баша дүшмәк олар, нәјә ҝөрә Јеһова Аллаһ Булус васитәсилә мәсиһиләри даима ҹисмани истәкләр һаггында дүшүнмәјин тәһлүкәли олдуғу барәдә хәбәрдар етмишди (Ром. 8:5, 6).

9. Ромалылара 8:6 ајәсиндәки хәбәрдарлыг һансы һаллара аид дејил?

⁹ Бу хәбәрдарлыг бу ҝүн дә актуалдыр. Узун илләр Аллаһа хидмәт етсә дә, мәсиһи еһтијатлы олмаса, бәдәнин истәкләри илә јашамаға башлаја биләр. Һәрдән јемәк, әјләнҹә, истираһәт вә аилә дахили романтик мүнасибәтләр барәдә дүшүнмәк нормалдыр. Булусун сөзләри бу һаллара аид дејил. Бу шејләр һәјатын ајрылмаз һиссәсидир. Мәсәлән, Иса Мәсиһ дә јемәк јемәк, башгаларыны једиздирмәк вә истираһәт үчүн вахт ајырырды. Һәмчинин Булус никаһда ҹинси мүнасибәтләрин ваҹиб јер тутдуғуну вурғуламышды.

10. «Даима ҹисмани истәкләр һаггында дүшүнмәк» дејиләндә нә нәзәрдә тутулур?

 ¹⁰ Бәс онда Булус «даима ҹисмани истәкләр һаггында дүшүнмәк» дејәндә нәји нәзәрдә тутурду? Онун истифадә етдији јунан сөзү бүтүн диггәти бир шејә ҹәмләмәјә, бүтүн ишләри она әсасән планлашдырмаға аиддир. Ҹисмани истәкләрин далынҹа дүшәнләрин һәјатда әсас мәгсәди ҝүнаһлы ҹисмин арзуларыны һәјата кечирмәкдир. Ромалылара 8:5 ајәсиндә јазылан бу сөзләрлә бағлы бир алим дејир: «Даим ҹисмани истәкләр барәдә дүшүнән инсанлар анҹаг бу шејләрлә марагланыр, сөзләри, сөһбәтләри анҹаг бу һагда олур вә бу шејләрдән һәзз алырлар».

11. Еһтијатлы олмасаг, һәјатымызда әсас јери нәләр тута биләр?

¹¹ Ромадакы мәсиһиләрә һәјатда нәјә үстүнлүк вердикләри барәдә дүшүнмәк лазым иди. Ола билсин, онларын һәјаты «ҹисмани истәкләр» әтрафында дөвр едирди. Биз дә һәјатымызда нәјә өнәм вердијимиз барәдә дүшүнмәлијик. Бизи һәјатда әсасән нә марагландырыр, ән чох нә барәдә данышырыг? Һәјатда ән чох нәдән зөвг алырыг? Бәлкә дә кимсә тез-тез шәрабын мүхтәлиф нөвләрини дадмаг барәдә дүшүнүр, кимсә евинин декорасијасы һаггында фикирләшир, кимсә јени палтар, һансыса ишә сәрмајә гојмаг, сәјаһәт вә саир шејләр һаггында дүшүнүр. Дүздүр, бунлар өзү-өзлүјүндә зәрәрли шејләр дејил. Мисал үчүн, Иса Мәсиһ бир дәфә мөҹүзә ҝөстәриб сују шәраба дөндәрмишди. Һәвари Булус Тимутијә «бир аз шәраб» ичмәји тапшырмышды (1 Тим. 5:23; Јәһ. 2:3—11). Амма демәк олмаз ки, Иса Мәсиһин вә Булусун сөзләри, сөһбәтләри анҹаг шәраб һагда иди, һәззи анҹаг шәрабда тапырдылар. Бәс бизим һаггымызда нә демәк олар? Биз һәјатда нәјә үстүнлүк веририк?

12, 13. Нәјә ҝөрә демәк олар ки, нә һагда дүшүнмәјимиз ҹидди мәсәләдир?

¹² Инсанын ара-сыра өзүнү јохламасы чох ваҹибдир. Бунун сәбәбини һәвари Булусун нөвбәти сөзләриндә тапа биләрик: «Даима ҹисмани истәкләр һаггында дүшүнмәк өлүм... ҝәтирир» (Ром. 8:6). Бу, чох ҹидди мәсәләдир. Бу мәсләһәти гулагардына вурсаг, биз инди руһани ҹәһәтдән, ҝәләҹәкдә исә һәрфи мәнада өләҹәјик. Анҹаг Булус демәк истәмирди ки, инсанын ҹисмани истәкләр һаггында дүшүнмәси мүтләг өлүмлә нәтиҹәләнәҹәк. О, дүшүнҹә тәрзини дәјишсә, нәтиҹә тамам башга ҹүр ола биләр. Буна мисал олараг, Коринф јығынҹағындакы бир нәфәри чәкмәк олар. О, ҹисмани истәкләрин далынҹа дүшәрәк әхлагсызлыг едирди вә нәтиҹәдә, јығынҹагдан кәнар олунмушду. Лакин о дәјишди, дүз јола гајытды вә артыг пис арзуларын ардынҹа ҝетмәди (2 Кор. 2:6—8).

¹³ Бу инсан јолуну чох азмышды. Әҝәр о, дәјишә билдисә, буну һәр бир мәсиһи едә биләр, хүсусилә дә, ҝүнаһы елә дә ҹидди олмајанлар. Даим ҹисмани истәкләр барәдә дүшүнмәјин өлүмә апардығыны фикирләшәндә, инсан ән хырда шејдә белә, һәјатында дәјишиклик етмәк истәјир.

14, 15. а) Булус нә барәдә дүшүнмәји мәсләһәт ҝөрмүшдү? б) «Даима... руһани шејләр барәсиндә дүшүнмәк» дејәндә нә нәзәрдә тутулмур?

¹⁴ «Даима ҹисмани истәкләр һаггында» дүшүнмәјин һансы нәтиҹәләр ҝәтирдијини дејәндән сонра Булус «руһани шејләр барәсиндә» дүшүнмәјин һәјат вә сүлһ ҝәтирдијини вурғуламышды. Бәс бу ҝөзәл мүкафаты неҹә әлдә едә биләрик?

¹⁵ «Даима... руһани шејләр барәсиндә дүшүнмәк» о демәк дејил ки, инсан реаллыгдан узаг олмалы, онун фикри-зикри вә сөһбәти јалныз вә јалныз Мүгәддәс Китаб, Аллаһа мәһәббәт вә ҝәләҹәклә бағлы үмид әтрафында дөвр етмәлидир. Мисал олараг, Булусу вә биринҹи әсрдә јашамыш диҝәр мәсиһиләри  ҝөтүрәк. Онлар нормал һәјат тәрзи сүрүрдүләр: јејир, ичир, евләнир вә өзләрини тәмин етмәк үчүн ишләјирдиләр (Марк 6:3; 1 Салон. 2:9).

16. Һәвари Булус мүхтәлиф ишләрлә мәшғул олса да, онун әсас иши нә иди?

¹⁶ Амма биринҹи әсрдә јашамыш садиг мәсиһиләр јол вермирдиләр ки, һәјатын ајрылмаз һиссәси олан бу шејләр һәјатларында әсас јери тутсун. Мүгәддәс Китабда Булусун чадыр тикмәклә мәшғул олдуғу јазылыб. Ејни заманда орада гејд олунур ки, Булусун әсас иши тәблиғ етмәк вә тәлим вермәк иди. (Һәвариләрин ишләри 18:2—4; 20:20, 21, 34, 35 ајәләрини охујун.) Булус Ромадакы баҹы-гардашлары да мәһз буна тәшвиг едирди. Һәгигәтән дә, һәваринин фикри ибадәтинә ҹәмләнмишди. Ромадакы диндашлары ону өрнәк ҝөтүрмәли идиләр, биз дә һәмчинин (Ром. 15:15, 16).

17. Даима руһани шејләр барәсиндә дүшүнсәк, неҹә һәјат јашајаҹағыг?

¹⁷ Бәс даима руһани шејләр барәсиндә дүшүнмәклә нә әлдә едәҹәјик? Ромалылара 8:6 ајәсиндә дејилир: «Даима... руһани шејләр барәсиндә дүшүнмәк... һәјат вә сүлһ ҝәтирир». Руһани шејләр барәсиндә дүшүнмәк мүгәддәс руһун дүшүнҹәмизә һаким кәсилмәсинә јол вермәк вә Јеһованын дүшүнҹә тәрзинә јијәләнмәк демәкдир. Руһани шејләр һәјатымызда әсас јери тутса, әмин ола биләрик ки, мүкафатымыз ҝөзәл олаҹаг: инди мәмнунедиҹи, мәналы һәјат сүрәҹәк, ҝәләҹәкдә исә кимимиз јердә, кимимиз ҝөјдә әбәди һәјатдан һәзз алаҹағыг.

18. «Даима... руһани шејләр барәсиндә дүшүнмәк» сүлһә неҹә сәбәб олур?

¹⁸ Ҝәлин ҝөрәк Булус «даима... руһани шејләр барәсиндә дүшүнмәк... сүлһ ҝәтирир» сөзләри илә нә демәк истәјирди. Бу ҝүн инсанларын чоху өзүнү ора-бура вурур, амма һеч ҹүр гәлб раһатлығы тапа билмир. Онлардан фәргли олараг, биз бу раһатлығы, јәни сүлһү тапмышыг. Бу сүлһә наил олмағын үсулларындан бири һәм аилә үзвләримизлә, һәм дә јығынҹагдакы баҹы-гардашларла јахшы мүнасибәт сахламагдыр. Биз ҝөзәл баша дүшүрүк ки, һамымыз гејри-камилик вә буна ҝөрә дә һәрдән арамызда проблемләр јараныр. Бу ҹүр һалларда биз Иса Мәсиһин «ҝет онунла барыш» мәсләһәтинә риајәт едирик (Мәт. 5:24). Нәзәрә аланда ки, һәмин баҹы вә ја гардаш да «сүлһ мәнбәји олан Аллаһ»а ибадәт едир бу мәсләһәтә әмәл етмәк даһа асан олур (Ром. 15:33; 16:20).

19. «Руһани шејләр барәсиндә дүшүнмәк»лә һансы сүлһү әлдә едә биләрик?

¹⁹ «Даима... руһани шејләр барәсиндә дүшүнмәк» јалныз аилә үзвләримизлә, баҹы-гардашларла дејил, Јараданымызла да сүлһдә олмаға көмәк едир. Әшија пејғәмбәрин нөвбәти сөзләри тәкҹә онун дөврүнә јох, бизим ҝүнләрә дә аиддир: «Сәнә там бел бағлајанлары һифз едәрсән, онлара түкәнмәз сүлһ бәхш едәрсән, чүнки Сәнә ҝүвәнирләр» (Әшј. 26:3; Ромалылара 5:1 ајәсини охујун).

20. «Ромалылара мәктуб»ун 8-ҹи фәслиндәки мәсләһәт үчүн Јеһоваја нәјә ҝөрә миннәтдарсыныз?

²⁰ Һәр биримиз, һәм мәсһ олунмуш мәсиһиләр, һәм дә јер үзүндә әбәди јашамаға үмид едәнләр «Ромалылара мәктуб»ун 8-ҹи фәслиндәки мәсләһәтә ҝөрә Јеһоваја үрәкдән миннәтдарыг. Она миннәтдарыг ки, бизә нәсиһәт верир, бизи ҹисмин истәкләринә гул олмаға гојмур! Әминик ки, «руһани шејләр барәсиндә дүшүнмәк... һәјат вә сүлһ ҝәтирир» нәсиһәтинә ујғун јашамаг хејримизәдир. Булусун да јаздығы кими, бунун сонсуз мүкафаты вар: «Ҝүнаһын өдәдији һагг өлүмдүр, Аллаһын вердији әнам исә Ағамыз Мәсиһ Иса сајәсиндә әбәди һәјатдыр» (Ром. 6:23).