1, 2. Һәвари Булус лүтфүнә ҝөрә Аллаһа миннәтдар олдуғуну неҹә ҝөстәрмишди?

ҺӘВАРИ Булус демишди: «[Аллаһын] мәнә ҝөстәрдији лүтф әбәс дејилдир». (1 Коринфлиләрә 15:9, 10 ајәләрини охујун.) Булус чох ҝөзәл баша дүшүрдү ки, о, Аллаһын мәрһәмәтини нәинки газанмамышды, һеч буна лајиг дә дејилди, чүнки о, әввәлләр мәсиһиләри тәгиб едирди.

² Өмрүнүн сонуна јахын Булус әмәкдашы Тимутијә јазмышды: «Мәнә ҝүҹ верән Ағамыз Мәсиһ Исаја миннәтдарам, чүнки о, мәни садиг биләрәк мәнә хидмәт һәвалә едиб» (1 Тим. 1:12—14). Сөһбәт һансы хидмәтдән ҝедир? Булус Ефес јығынҹағынын ағсаггалларына бу хидмәтин нәдән ибарәт олдуғуну демишди: «Мән гәтијјән өзүмү дүшүнмүрәм, тәки Аллаһын лүтфү барәсиндәки мүждә һаггында әтрафлы шәһадәт вериб Ағамыз Исанын мәнә һәвалә етдији хидмәти баша чатдырым, јолуму баша вурум» (Һәв. 20:24).

3. Булуса һансы хүсуси хидмәт тапшырылмышды? (Мәгаләнин әввәлиндәки шәклә бахын.)

 ³ Булус Аллаһын лүтфү илә бағлы олан һансы мүждәни тәблиғ едирди? О, Ефесдәки мәсиһиләрә демишди: «Сиз, шүбһәсиз, ешитмисиниз ки, мәнә Аллаһын лүтфүндән јарарланмағыныз үчүн сизә көмәк етмәк тапшырылыб» (Ефес. 3:1, 2). Булуса гејри-јәһудиләрә мүждә чатдырмаг тапшырығы верилмишди. Бунун сајәсиндә онлар да Мәсиһин Падшаһлығында һакимијјәт сүрәҹәк кәсләрин сырасында ола биләрдиләр. (Ефеслиләрә 3:5—8 ајәләрини охујун.) Булус она тапшырылан хидмәти ҹанла-башла јеринә јетирмәклә буҝүнкү мәсиһиләрә ҝөзәл нүмунә гојуб вә сүбут едиб ки, Аллаһын она ҝөстәрдији лүтф әбәс дејилди.

4, 5. Нәјә ҝөрә демәк олар ки, Падшаһлыг һаггындакы мүждә вә «Аллаһын лүтфү барәсиндәки мүждә» ејни мүждәдир?

⁴ Јеһованын ахырзаманда јашајан хидмәтчиләринә халгларын һамысына шәһадәт олсун дејә, Падшаһлыг һаггындакы мүждәни бүтүн јер үзүндә тәблиғ етмәк тапшырылыб (Мәт. 24:14). Падшаһлыг һаггында мүждә һәмчинин «Аллаһын лүтфү барәсиндәки мүждә»дир. Нәјә ҝөрә белә демәк олар? Чүнки мәһз Аллаһын Мәсиһ васитәсилә ҝөстәрдији лүтфүн сајәсиндә Падшаһлыг ҝәләҹәкдә инсанлара ҝөзәл немәтләр бәхш едәҹәк (Ефес. 1:3). Бәс биз Булусдан нүмунә ҝөтүрәрәк лүтфүнә ҝөрә Аллаһа миннәтдар олдуғумузу ҝөстәририк, хидмәтдә ҹан-дилдән иштирак едирик? (Ромалылара 1:14—16 ајәләрини охујун.)

⁵ Өтән мәгаләдә өјрәндик ки, ҝүнаһлы олсаг да, Аллаһ мүхтәлиф јолларла бизә лүтф ҝөстәрир. Буна ҝөрә дә үзәримизә мәсулијјәт дүшүр ки, вар ҝүҹүмүзлә чалышыб бүтүн инсанлара Аллаһын мәһәббәти вә бу мәһәббәтин онларын гаршысында ачдығы имканлар барәдә данышаг. Биз инсанлара Аллаһын лүтфүндән доған һансы немәтләри гијмәтләндирмәјә көмәк етмәлијик?

6, 7. Нәјә ҝөрә демәк олар ки, инсанлара фидјә барәдә данышанда Аллаһын лүтфү һаггында мүждәни јајмыш олуруг?

⁶ Һеч нәјә јох демәјән бу дүнјада артыг ҝүнаһлы һәрәкәтләрә ҝүнаһ кими бахылмыр. Буна ҝөрә дә әксәр инсанлар фидјәјә еһтијаҹ дујдугларыны дәрк етмирләр. Амма ҝет-ҝедә чохлары ҝөрүр ки, өз кефи үчүн јашамаг хошбәхтлик ҝәтирмир. Јеһованын Шаһидләри илә таныш олмаздан әввәл чохлары ҝүнаһын нә демәк олдуғуну, онун инсана неҹә тәсир етдијини баша дүшмүрдүләр вә билмирдиләр, ҝүнаһын көләлијиндән неҹә чыхмаг олар. Сәмими инсанлар биләндә ки, Аллаһ бөјүк мәһәббәтиндән вә лүтфүндән ирәли ҝәләрәк инсанлары ҝүнаһ вә өлүмдән хилас етмәк үчүн Оғлуну јер үзүнә ҝөндәриб гәлб раһатлығы тапырлар (1 Јәһ. 4:9, 10).

⁷ Аллаһын севимли Оғлу һаггында Булус јазмышды: «Биз Аллаһын лүтфүнүн боллуғуна әсасән, Оғлунун ганы илә өдәнмиш фидјә васитәсилә азадлыға, бәли, ҝүнаһларымызын әфвинә јетишмишик» (Ефес. 1:7). Мәсиһин фидјә гурбанлығы Јеһованын бизә бәсләдији мәһәббәтин ән бариз нүмунәсидир вә Онун лүтфүнүн бол олдуғуну сүбут едир. Инсан Мәсиһин төкүлән ганына иман едәндә, ҝүнаһлары бағышланыр вә виҹданы тәмиз  олур. Буну биләндә инсанын үрәјинә су сәпилир! (Ибр. 9:14). Бу ҹүр ҝөзәл хәбәри неҹә тәблиғ етмәјәсән?!

8. Нәјә ҝөрә инсанлар Аллаһла барышмалыдырлар?

⁸ Биз инсанлара чатдырмалыјыг ки, онларын Јараданла дост олмаг имканы вар. Нә гәдәр ки, инсан Мәсиһин фидјә гурбанлығына иман ҝәтирмәјиб, Аллаһын дүшмәни сајылыр. Һәвари Јәһја јазмышды: «Оғула иман едән әбәди һәјата говушаҹаг. Оғула итаәт етмәјәнсә һәјата говушмајаҹаг, Аллаһын гәзәбинә дүчар олаҹаг» (Јәһ. 3:36). Нә јахшы ки, Мәсиһин гурбанлығы бизи Аллаһла барышдырыр. Булус демишди: «Бир вахтлар ағлыныз пис ишләрә мејилли олдуғундан сиз Аллаһа гаршы јадлашмыш вә дүшмән олмушдунуз. Инди исә О, ҹаныны гурбан вермиш Оғлунун өлүмү васитәсилә сизи Өзү илә барышдырды» (Кол. 1:21, 22).

9, 10. а) Иса Мәсиһ мәсһ олунмуш гардашларынын үзәринә һансы мәсулијјәти гојуб? б) «Башга гојунлар» мәсһ олунмуш гардашларына неҹә көмәк едирләр?

⁹ Иса Мәсиһ јердәки мәсһ олунмуш гардашларына «барышыг хидмәтини» һәвалә едиб. Булус биринҹи әсрдә јашајан мәсһ олунмуш мәсиһиләрә бу хидмәтин мәғзини изаһ едәрәк демишди: «Һәр шеј Аллаһдандыр. Аллаһ Мәсиһ васитәсилә бизи Өзү илә барышдырды вә бизә барышыг хидмәтини һәвалә етди, јәни Аллаһ бәшәријјәтин ҝүнаһларынын һесабыны тутмадан Мәсиһ васитәсилә дүнјаны Өзү илә барышдырды. Бу барышыг хәбәрини дә бизә һәвалә етди. Беләликлә, биз Мәсиһин адындан хидмәт едән сәфирләрик. Санки, Аллаһ бизим васитәмизлә инсанлардан риҹа едир. Биз Мәсиһин адындан јалварырыг: “Аллаһла барышын”» (2 Кор. 5:18—20).

¹⁰ «Башга гојунлар» мәсһ олунмуш гардашлары илә чијин-чијинә бу хидмәтдә иштирак етмәји өзләринә шәрәф билирләр (Јәһ. 10:16). Бу хидмәтин әсас һиссәсини Мәсиһин елчиләри олан бу инсанлар һәјата кечирирләр: инсанлара һәгигәти өјрәдир вә Јеһова Аллаһла достлуг мүнасибәти гурмаға көмәк едирләр. Бу, Аллаһын лүтфү һаггындакы мүждәни тәблиғ етмәк ишинин ајрылмаз һиссәсидир.

11, 12. Нәјә ҝөрә демәк олар ки, Аллаһын дуалары ешитмәси инсанлар үчүн хош хәбәрдир?

¹¹ Бир чох инсан садәҹә раһатлыг тапмаг үчүн дуа едир, әслиндә исә Аллаһын онларын дуасыны ешитдијинә инанмырлар. Онлар билмәлидир ки, Јеһова «дуалары ешидән» Аллаһдыр. Давуд пејғәмбәр јазмышды: «Еј дуалары ешидән, һәр ҹүр инсан һүзуруна ҝәләҹәк. Ҝүнаһларым мәни үстәләди. Лакин Сән тәгсирләримизи әфв едирсән» (Зәб. 65:2, 3).

¹² Иса Мәсиһ шаҝирдләринә демишди: «Мәним адымла нә исә диләсәниз, јеринә јетирәҹәјәм» (Јәһ. 14:14). Тәбии ки, «нә исә» дејәндә Јеһованын ирадәсинә ујғун шејләр нәзәрдә тутулур. Һәвари Јәһјанын нөвбәти сөзләри бизә әминлик верир: «Аллаһын өнүндә әминлијимиз будур: Онун ирадәсинә мүвафиг нә диләјириксә, О ешидир» (1 Јәһ. 5:14). Инсанлара дуанын садәҹә раһатлыг ҝәтирмәдијини, һәм дә инсана «Аллаһын лүтф тахтына» јахынлашмаға имкан вердијини  өјрәтмәк бизә мәмнунлуг ҝәтирир (Ибр. 4:16). Онлара өјрәтмәлијик ки, дүзҝүн шәкилдә, мүнасиб шејләр барәдә вә һәгиги Аллаһа дуа етсинләр. Бунун сајәсиндә онлар Јеһоваја јахынлашар вә чәтин анларында раһатлыг тапарлар (Зәб. 4:1; 145:18).

13, 14. а) Мәсһ олунмуш мәсиһиләр ҝәләҹәкдә һансы шәрәфә лајиг ҝөрүләҹәкләр? б) Мәсһ олунмуш мәсиһиләр бәшәријјәт үчүн нә едәҹәкләр?

¹³ Јеһова јалныз Армаҝеддона кими инсанлара лүтф ҝөстәрмәјәҹәк. Мәсиһлә бирҝә сәмави Падшаһлыгда һакимијјәт сүрмәк үчүн сечилмиш 144 000 нәфәрә Аллаһын нәсиб етдији шәрәфлә бағлы Булус јазмышды: «Мәрһәмәти бол олан Аллаһ бизә дујдуғу бөјүк мәһәббәтинә ҝөрә биз һәлә тәгсирләримиздә өлү икән, бизи Мәсиһлә бирликдә һәјата гајтарды. (Бәли, сиз лүтф сајәсиндә хилас олдунуз.) Үстәлик, Мәсиһ Иса илә вәһдәтдә олан бизләри онунла бирликдә дирилтди вә ҝөјләрдә отуртду ки, ҝәләҹәкдә лүтфүнүн мисилсиз зәнҝинлијини Мәсиһ Иса илә вәһдәтдә олан бизләрә сәхавәтлә нүмајиш етдирсин» (Ефес. 2:4—7).

¹⁴ Мәсһ олунмуш мәсиһиләр ҝөјдә Мәсиһлә бирҝә тахтда отуранда Јеһованын онлара нәләр бәхш едәҹәјини ағлымыза белә ҝәтирә билмәрик (Лука 22:28—30; Филип. 3:20, 21; 1 Јәһ. 3:2). Јеһова «лүтфүнүн мисилсиз зәнҝинлијини» онлара хүсуси шәкилдә нүмајиш етдирәҹәк. «Јени Јерусәлим», јәни Мәсиһин нишанлысы бу инсанлардан ибарәтдир (Вәһј 3:12; 17:14; 21:2, 9, 10). Онлар халгларын шәфа тапмасы үчүн Мәсиһлә бирҝә итаәткар инсанлары ҝүнаһ вә өлүмүн буховундан азад едәҹәк, онлары камиллијә говушдураҹаглар. (Вәһј 22:1, 2, 17 ајәләрини охујун.)

15, 16. Јеһова «башга гојунлар»а ҝәләҹәкдә неҹә лүтф ҝөстәрәҹәк?

¹⁵ Ефеслиләрә 2:7 ајәсиндә дејилир ки, Аллаһ ҝәләҹәкдә дә инсанлара лүтф ҝөстәрәҹәк. Һәмин вахт јер үзүндә јашајан һәр бир кәс Аллаһын «лүтфүнүн мисилсиз зәнҝинлијини»н шаһиди олаҹаг (Лука 18:29, 30). Јеһова Аллаһын лүтфүндән доған мөһтәшәм әнамлардан бири өлүләрин дирилмәси олаҹаг (Әјј. 14:13—15; Јәһ. 5:28, 29). Һәм Иса Мәсиһ һәјатыны гурбан вермәздән әввәл јашамыш мөмин инсанлар, һәм дә ахырзаманда вәфат етмиш «башга гојунлара» аид инсанлар дирилиб јенидән Јеһоваја ибадәт едәҹәкләр.

¹⁶ Аллаһы танымаг имканы олмадан бу һәјата ҝөзүнү јуммуш милјонларла инсан да дирилиб һәјата говушаҹаг. Онлара Јеһованын һакимијјәтинә табе олмаг сечими вериләҹәк. Јәһја јазмышды: «Мән... тахтын өнүндә дурмуш өлүләри — бөјүкләри вә кичикләри ҝөрдүм. Тумарлар ачылмышды. Башга бир тумар да ачылды, бу тумар һәјат китабыдыр. Өлүләр тумарларда јазылмыш әмәлләринә мүвафиг мүһакимә едилди. Дәниз онда олан өлүләри гајтарды, өлүм вә Мәзар да онларда олан өлүләри гајтардылар вә һәр бири өз әмәлләринә ҝөрә мүһакимә едилди» (Вәһј 20:12, 13). Тәбии ки, дириләнләрдән Аллаһын Мүгәддәс Китабда гәләмә алынмыш принсипләринә ујғун јашамаг тәләб олунаҹаг. Бундан әлавә, онлар Јеһованын јени дүнјада јашамаг истәјәнләр үчүн «тумарларда» вердији јени тәләбләрә дә әмәл етмәли олаҹаглар. Бу јени  тәләбләр дә Јеһованын мүхтәлиф јолларла ифадә олунан лүтфүнүн даһа бир тәзаһүрү олаҹаг.

17. Тәблиғ едәндә нәји јадда сахламалыјыг?

¹⁷ Сона чох аз галдығы үчүн Падшаһлыг һагдакы мүждәни тәблиғ етмәк һәлә бу дәрәҹәдә тәҹили олмамышды! (Марк 13:10). Сөзсүз ки, бу мүждә Аллаһын лүтфүндән хәбәр верир. Биз шаһидлик верәндә буну јадда сахламалыјыг. Тәблиғ етмәкдә мәгсәдимиз Јеһоваја шәрәф ҝәтирмәкдир. Бунун үчүн биз хидмәтдә Јеһованын вәд етдији немәтләрин Онун лүтфүнүн тәзаһүрү олдуғуну вурғуламалыјыг.

18, 19. Јеһованы лүтфкар Аллаһ кими неҹә уҹалда биләрик?

¹⁸ Шаһидлик верәндә инсанлара изаһ етмәлијик ки, Мәсиһин һакимијјәти алтында јашајанда инсанлар фидјә гурбанлығынын хејрини там шәкилдә дадаҹаглар вә тәдриҹән камиллијә јетишәҹәкләр. Мүгәддәс Китабда јазылыб: «Хилгәт чүрүклүк әсарәтиндән гуртулуб Аллаһын өвладларынын шанлы азадлығына» говушаҹаг (Ром. 8:21). Бу, јалныз вә јалныз Јеһованын мисилсиз лүтфү сајәсиндә мүмкүн олаҹаг.

¹⁹ Бизә бүтүн инсанлара Вәһј 21:4, 5 ајәләриндә јазылмыш мөһтәшәм хәбәри чатдырмаг шәрәфи верилиб: «[Аллаһ] онларын ҝөзләриндән бүтүн јашлары силәҹәк. Артыг өлүм олмајаҹаг. Нә дәрд, нә фәрјад, нә дә ағры олмајаҹаг, чүнки әввәлки шејләр кечиб ҝетди». Сонра тахтда отуран Јеһова Аллаһ дејир: «Будур, Мән һәр шеји тәзә едирәм». Сонра әлавә едир: «Јаз, чүнки бу сөзләр доғру вә етибарлыдыр». Биз хош хәбәри шөвглә тәблиғ едәндә Јеһованы лүтфкар Аллаһ кими уҹалдырыг.