1937-ҸИ ил март ајынын 26-сы иди. Ики јорғун јолчу тоз ичиндә олан јүк машыны илә Австралијанын Сиднеј шәһәринә дахил олду. Онлар Сиднеји бир ил әввәл тәрк етмишдиләр. Бу вахт әрзиндә онлар уҹгар әразиләрдән кечәрәк, енишли-јохушлу јоллары ашараг 19 300 километр јол гәт едибләр. Артур Вилис вә Бил Нјулендс адлы бу јолчулар нә маҹәрачы дејилдиләр, нә тәдгигатчы. Онлар ади өнҹүл идиләр. Бу гардашларын мәгсәди Аллаһын Падшаһлығы һаггында мүждәни Австралијанын уҹгар әразиләринә чатдырмаг иди.

Австралијадакы бир нечә Мүгәддәс Китаб Тәдгигатчысы * 1920-ҹи илләрин сонларына гәдәр, әсас етибары илә, саһилјаны шәһәрләрдә вә онларын әтрафында тәблиғ едирди. Австралијанын ичәриләриндә әһали сејрәк мәскунлашмышды. Өлкәнин Бирләшмиш Штатларын јарысы гәдәр саһәсини сәһралыг тәшкил едир. Лакин гардашлар дәрк едирдиләр ки, Мәсиһин давамчылары «јерин уҹгарларынадәк», һәмчинин Австралијанын уҹгарларынадәк онун һаггында шәһадәт вермәлидирләр (Һәв. 1:8). Бәс, ҝөрәсән, онлар бу бөјүк иши неҹә јеринә јетирдиләр? Онлар әмин идиләр ки, Јеһованын көмәји илә чәкдикләри зәһмәт бәһрә ҝәтирәҹәк, буна ҝөрә дә бу ишә ҹан гојурдулар.

1929-ҹу илдә Квинсленд вә Гәрби Австралија штатларында јерләшән ики јығынҹаг гитәнин ичәриләриндәки әразиләрдә тәблиғ етмәк мәгсәди илә ваҹиб шејләрлә тәҹһиз олунмуш машынлар дүзәлтдирир. Бу сәјаһәтә чәтин шәраитә давам ҝәтирә билән вә машында јаранан насазлыглары арадан галдырмағы баҹаран өнҹүлләр чыхырды. Бу өнҹүлләр тәблиғчиләрин ајағы дәјмәдији әразиләрдә мүждәни јајмышдылар.

Уҹгар әразиләрә машынла ҝетмәјә имканы јол вермәјән өнҹүлләр ораја велосипедлә ҝедирдиләр. Мәсәлән, 1932-ҹи илдә 23 јашлы Бенет Брикел Квинсленд штатынын Рокһемптон шәһәриндән чыхыб беш ај әрзиндә штатын шималындакы уҹгар әразиләрдән велосипедлә кечәрәк ораларда тәблиғ етмишди. О, велосипединә әдјал, пал-палтар, әрзаг вә чохлу китаб јүкләмишди. Сәфәрин сонунда велосипедин тәкәри јарарсыз һала дүшсә дә, гардаш јолундан галмады. О әмин иди ки, Јеһова бир јол ҝөстәрәҹәк. Беләҹә, Бенет 320 километр јолу велосипедини инсанларын сусузлугдан һәјатыны итирдији әразиләрдән  сүрә-сүрә апармышды. Бенет гардаш 30 ил әрзиндә велосипедлә, мотосиклетлә вә машынла јүз минләрлә километрлик јолу гәт едәрәк бүтүн Австралијаны бојдан-боја долашмышды. Абориҝенләрә мүждәни илк чатдыран инсан бу гардаш олуб. Онун әмәји сајәсиндә орада јени јығынҹаглар јаранды. Уҹгар әразиләрдә јашајан инсанлар Бенет гардашы јахшы таныјыр вә она һөрмәт едирди.

Әһали сыхлығына ҝөрә Австралија сонунҹу јери тутан өлкәләрдән биридир. Гитәнин уҹгар әразиләриндә әһали чох сејрәк мәскунлашыб. Буна ҝөрә дә Јеһованын халгы бу әразиләрдәки һәр бир инсана мүждәни чатдырмаг үчүн гәтијјәт ҝөстәрмишди.

Стјуарт Келти вә Вилјәм Торингтон адлы гардашлар бу ҹүр гәтијјәт ҝөстәрән өнҹүлләрдән идиләр. Онлар 1933-ҹү илдә гитәнин мәркәзиндә јерләшән Алис-Спрингс шәһәриндә тәблиғ етмәк үчүн бөјүк гум сәһрасы олан Симпсон сәһрасыны кечмишдиләр. Бир дәфә онларын машыны сыныр вә онлар машыны јолда гојуб јолларына давам едирләр. Ајағынын бири тахтадан олан Стјуарт гардаш галан јолу дәвәнин белиндә ҝедир. Бу өнҹүлләрин зәһмәти јердә галмады. Онлар Вилјәм Крик дәмир јол стансијасында Чарлз Бернһарт адлы бир меһманхана саһибинә тәблиғ едирләр. О, сонралар мәсиһи олур, меһманхананы сатыб сәһрада вә Австралијанын уҹгар әразиләриндә он беш ил тәкбашына өнҹүл кими хидмәт едир.

Австралијанын илк өнҹүлләринә манеәләри ашмаг үчүн ҹәсарәт вә гәтијјәт лазым иди. Мәгаләнин әввәлиндә адлары чәкилән Артур Вилис вә Бил Нјулендс Австралијанын уҹгарларында тәблиғ етмәк үчүн чыхдыглары һәмин сәфәрдә бир дәфә 32 километрлик јолу ики һәфтәјә ҝетмишдиләр, чүнки јағыш сәһраны палчыг дәнизинә дөндәрмишди. Онлар дашлы-гајалы вадиләрдән вә чај јатагларындан кечирдиләр, һәрдән ҝүнәшин гызмар шүалары алтында ган-тәрин ичиндә машыны итәләјә-итәләјә гум тәпәләрини ашырдылар. Машынлары сынанда, бу һал чох тез-тез баш верирди, онлар јахынлыгдакы шәһәрә ҝүнләрлә пијада јол ҝедир, сонра отуруб һәфтәләрлә еһтијат һиссәләринин ҝәлмәсини ҝөзләјирдиләр. Амма бу чәтинликләр онларын әһвал-руһијјәсинә тәсир етмирди. Артур Вилис «Гызыл әср» журналында јазылан бир ифадәни өз сөзләри илә сөјләјәрәк дејирди: «Јеһованын хидмәтчиси үчүн ашылмаз јол јохдур!»

Узун илләр өнҹүл кими хидмәт едән Чарлз Һарис демишди ки, уҹгар әразиләрдә хидмәт етмәк вә јашадығы чәтинликләр ону Јеһоваја даһа да јахын едиб. О һәмчинин гејд етмишди: «Инсанын әшјасы нә гәдәр аз олса, јашамаг бир о гәдәр раһат олар. Әҝәр јери ҝәләндә Иса Мәсиһин өзү ачыг һавада јатырдыса, биз дә, хидмәтимиз тәләб едәрсә, ејни шеји етмәји өзүмүзә шәрәф билмәлијик». Бир чох өнҹүл мәһз бу ҹүр давранмышды. Онларын фәдакар әмәји сајәсиндә мүждә гитәнин һәр јанына јајылмыш вә сонсуз сајда инсан Аллаһын Падшаһлығынын тәбәәси олмушду.