Ҝәлин ҝөрәк белә дүшүнмәк бизә неҹә тәсир едә биләр. Оғлу интиһар едән бир гардаш демишди: «Јәгин Јеһова билирди ки, һәјат јолдашымла мән оғлумузун өлүмүнә таб ҝәтирә биләҹәјик, она ҝөрә бу һадисәнин башымыза ҝәлмәсинә изин верди». Доғруданмы, Јеһова Аллаһ һәјатымызда баш верән һадисәләри идарә едир?

Һәвари Булусун 1 Коринфлиләрә 10:13 ајәсиндә дедији сөзләри дәриндән арашдырмагла нөвбәти нәтиҹәјә ҝәлирик: Јеһованын бизим һансыса сынаға таб ҝәтирә биләҹәјимизи габагҹадан мүәјјән етдијини вә сонра һәмин сынағы јашамағымыза изин вердијини Мүгәддәс Китаб тәсдигләмир. Бу гәнаәтә ҝәлмәјә дөрд әсаслы сәбәб вар. Ҝәлин онлары бир-бир нәзәрдән кечирәк.

Биринҹиси, Јеһова инсана ирадә азадлығы вериб. Јеһова Аллаһ истәјир ки, инсан һәјаты илә бағлы гәрарлары өзү версин (Ган. 30:19, 20; Јуш. 24:15). Әҝәр һәјатда дүзҝүн гәрар веририксә, Јеһованын көмәјинә архалана биләрик (Мәс. 16:9). Јанлыш гәрарларын исә аҹы нәтиҹәсини јашамалы олаҹағыг (Гал. 6:7). Әҝәр Аллаһ үзләшдијимиз сынаглары габагҹадан мүәјјән едирсә, онда бизә ирадә азадлығы вермәсинин нә мәнасы вар?!

Икинҹиси, Јеһова Аллаһ бизи «вахт вә тәсадүф» нәтиҹәсиндә јаранан һадисәләрдән мүдафиә етмир (Ваиз 9:11). Инсан лазым олмајан вахтда, лазым олмајан јердә олдуғу үчүн бәзи һалларда ҹидди фәсадларла нәтиҹәләнән бәдбәхт һадисә илә үзләшә биләр. Бир дәфә Иса Мәсиһ гүлләнин учмасы нәтиҹәсиндә баш верән бәдбәхт һадисәдән, 18 нәфәрин вәфатындан сөз ачмышды вә гејд етмишди ки, бу һадисәјә Аллаһ сәбәбкар дејилди (Лука 13:1—5). Аллаһын бәдбәхт һадисә нәтиҹәсиндә кимин сағ галаҹағыны, кимин өләҹәјини габагҹадан мүәјјән етдијини дүшүнмәк нә дәрәҹәдә мәнтиглидир?!

Үчүнҹүсү, һәр биримиз нөгсансызлыгла бағлы мүбаһисәли мәсәләдә өз мөвгејимизи ҝөстәрмәлијик. Билдијимиз кими, Шејтан Јеһова Аллаһа ибадәт едән бүтүн инсанларын нөгсансызлығыны суал алтына алыб, о иддиа едир ки, онлар сынаға дүшәндә Аллаһдан үз дөндәрәҹәкләр (Әјј. 1:9—11; 2:4; Вәһј 12:10).  Әҝәр Јеһова мүәјјән сынағын ҝүҹүмүздән артыг олдуғуну билдији үчүн һәмин сынагдан бизи горусајды, онда бу, Шејтанын һаглы олдуғуну, бизим Аллаһа худбин нијјәтлә ибадәт етдијимизи сүбут етмәзди?!

Дөрдүнҹүсү, Јеһова Аллаһ башымыза нәләрин ҝәләҹәјини габагҹадан билмәјә еһтијаҹ ҝөрмүр. Әҝәр Аллаһ үзләшдијимиз сынаглары габагҹадан мүәјјән етсәјди, онда белә чыхыр ки, О, бизим ҝәләҹәјимиз барәдә һәр шеји билир. Амма Мүгәддәс Китабда белә фикир јазылмајыб. Тәбии ки, Аллаһ ҝәләҹәји ҝөрә билир (Әшј. 46:10). Лакин Аллаһын Кәламында ҝөстәрилдији кими Јеһова Аллаһ лазым билдији һадисәләри габагҹадан ҝөрүр (Јар. 18:20, 21; 22:12). Јеһова Аллаһын ҝәләҹәји ҝөрмә габилијјәти олса да, бизим ирадә азадлығымыза һөрмәт едир. Аллаһ азадлығымыза һөрмәтлә јанашдығы вә хүсусијјәтләрини мүкәммәл шәкилдә тәзаһүр етдирдији үчүн мәһз белә давраныр (Ган. 32:4; 2 Кор. 3:17).

Бәс онда Булусун «Аллаһ... гојмаз ки, сиз ҝүҹүнүз чатмајан сынаглара мәруз галасыныз» сөзләрини неҹә баша дүшмәк олар? Булус бурада Јеһованын сынаглардан әввәл јох, сынаглар заманы нә етдијиндән бәһс едир. Һәвари бизи әмин едир ки, һансы сынагла үзләшириксә үзләшәк Аллаһа бел бағлајырыгса, О, һәмин чәтинликләрин өһдәсиндән ҝәлмәјә көмәк едәҹәк (Зәб. 55:22). Булусун сөзләри ики әсас һәгигәтә әсасланыр.

Биринҹиси, «һамы белә сынагларла үзләшир». Үзләшдијимиз сынагларда гејри-ади бир шеј јохдур. Јеһованын көмәји илә онлара дөзә биләрик (1 Бут. 5:8, 9). 1 Коринфлиләрә 10:13 ајәсинин контекстинә нәзәр саланда ҝөрүрүк ки, һәвари Булус Исраил халгынын сәһрада үзләшдији сынаглар барәдә данышыр (1 Кор. 10:6—11). Исраиллиләрин үзләшдији сынагларын һеч бири онларын таб ҝәтирә билмәјәҹәји гәдәр чәтин дејилди. Орижинал мәтнә әсасән, Булус дүз дөрд дәфә «онлардан бәзиләри»нин садиг галмадыгларыны дејиб. Әфсуслар олсун ки, бәзи исраиллиләр Аллаһа ҝүвәнмәдикләри үчүн ҝүнаһлы арзуларын далынҹа дүшдүләр.

Икинҹиси, «Аллаһ вәфалы Аллаһдыр». Мүгәддәс Китабда Аллаһын Өз халгы илә рәфтары барәдә јазыланлардан ҝөрмәк олар ки, Јеһова «Ону севиб әмрләринә риајәт» едәнләрә мәһәббәт ҝөстәрир (Ган. 7:9). Орадан һәмчинин ҝөрүрүк ки, Аллаһ һәмишә сөзүнүн үстүндә дурур (Јуш. 23:14). Аллаһы севән вә итаәткар бәндәләр Мүгәддәс Китабдан Јараданларынын нә гәдәр вәфалы олдуғуну охујанда әмин олурлар ки, О, сынагларла бағлы вердији нөвбәти ики сөзүн үстүндә дураҹаг: 1) гојмајаҹаг ки, сынаг ҝүҹүмүзү ашан дәрәҹәјә чатсын; 2) сынаг заманы «чыхыш јолу... ҝөстәрәҹәк».

Јеһова Аллаһ Она бел бағлајанлара сынаг заманы чыхыш јолуну неҹә ҝөстәрир? Сөзсүз ки, Аллаһ сынағы арадан галдыра биләр, амма әҝәр бу, Онун ирадәсинә зидд дејилсә. Лакин ҝәлин Булусун сөзләрини јадымыза салаг: «Сынаг вахты дөзә биләсиниз дејә, [Јеһова] сизә чыхыш јолу да ҝөстәрәҹәк». Бәли, чох вахт Јеһова сынаг гаршысында бизи дөзүмлү едән көмәји тәгдим етмәклә чыхыш јолу ҝөстәрир. Ҝәлин ҝөрәк Јеһова һансы васитәләрлә бизә чыхыш јолу ҝөстәрир:

• «Һәр дәрдимиздә бизә тәсәлли верир» (2 Кор. 1:3, 4). Јеһова Аллаһ Мүгәддәс Китаб, мүгәддәс руһ, һәмчинин садиг вә ағыллы нөкәрин тәгдим етдији билик васитәсилә бизә дүшүнҹәмизи, үрәјимизи вә һиссләримизи әлә алмаға көмәк едир (Мәт. 24:45; Јәһ. 14:16, һаш.; Ром. 15:4).

• Јеһова Аллаһ мүгәддәс руһ васитәсилә бизә јол ҝөстәрир (Јәһ. 14:26). Сынагла үзләшәндә мүгәддәс руһ Аллаһын Кәламында јазылан һадисәләри вә принсипләри јадымыза салыр, сонра исә дүзҝүн гәрар вермәјә көмәк едир.

• Јеһова Аллаһ мәләкләри васитәсилә бизә көмәк едир (Ибр. 1:14).

• Јеһова Аллаһ баҹы-гардашлар васитәсилә бизә көмәк едир. Онлар сөзләри вә әмәлләри илә бизә дајаг олурлар (Кол. 4:11).

Һәвари Булусун 1 Коринфлиләрә 10:13 ајәсиндә јазылан сөзләрини арашдырандан сонра һансы нәтиҹәјә ҝәлдик? Чәкдијимиз сынаглары Јеһова мүәјјәнләшдирмир. Амма сынагла үзләшәндә бир шејә әмин ола биләрик: әҝәр Јеһоваја ахыра кими ҝүвәнсәк, О, гојмајаҹаг ки, сынаг ҝүҹүмүзү ашан һәддә чатсын вә дөзә билмәјимиз үчүн, бизә чыхыш јолу ҝөстәрәҹәк. Бу фикир инсана гәлб раһатлығы верир!