1, 2. Ағсаггалларын ҝөрдүјү ишләрә нәләр дахилдир?

 ӘҜӘР сиз артыг бир мүддәтдир јығынҹаг хидмәтчиси кими хидмәт едирсинизсә, онда гаршыныза ағсаггал олмағы мәгсәд гоја биләрсиниз. Бәс ағсаггал кими баҹы-гардашларыныза даһа чох хидмәт етмәк истәјәрсиниз? (1 Тим. 3:1).

² Ағсаггаллар һансы ишләри ҝөрүрләр? Онлар тәблиғ ишиндә фәалдырлар, баҹы-гардашлары руһландырырлар, тәлим верирләр, јығынҹағы сөздә вә әмәлдә мөһкәмләндирирләр. Буна ҝөрә дә Мүгәддәс Китаб чалышган ағсаггаллары «инсан тимсалында һәдијјәләр» адландырыр (Ефес. 4:8).

3. Гардашлар ағсаггал олмаг үчүн һансы тәләбләрә ҹаваб вермәлидир? (1 Тимутијә 3:1—7; Титуса 1:5—9).

³ Ағсаггал кими хидмәт етмәк үчүн нә едә биләрсиниз? Ағсаггал тәјинатыны алмаг һансыса ишә дүзәлмәјә бәнзәмир. Иш үчүн тәләб олунан мүәјјән баҹарыглара саһибсинизсә, онда бөјүк еһтимал, сизи ишә ҝөтүрәҹәкләр. Амма ағсаггал олмаг истәјирсинизсә, тәкҹә тәблиғ етмәк вә тәлим вермәк баҹарығынын олмасы кифајәт дејил. Сиз 1 Тимутијә 3:1—7 вә Титуса 1:5—9 ајәләриндәки тәләбләрә ујғун ҝәлмәлисиниз. (Ајәләри охујун.) Бу мәгаләдә ағсаггал ола билмәјиниз үчүн һансы үч ваҹиб саһәдә тәләбләрә ҹаваб вермәли олдуғунузу мүзакирә едәҹәјик: һәм јығынҹагда, һәм дә јығынҹагдан кәнарда јахшы ада саһиб олмаг, аилә башчысы кими јахшы нүмунә гојмаг вә баҹы-гардашлара хидмәт етмәкдән севинҹ дујмаг.

 ЈАХШЫ АДА САҺИБ ОЛУН

4. «Гүсурсуз олмаг» нә демәкдир?

⁴ Ағсаггал олмаг үчүн сиз «гүсурсуз» олмалысыныз. Јәни јығынҹагда јахшы ада саһиб олмалысыныз. Киминсә сизи иттиһам етмәси үчүн әсаслы сәбәби олмамалыдыр. Бундан әлавә, кәнар адамлар да сизин һаггынызда јахшы фикирдә олмалыдырлар. Јеһованын Шаһиди олмајан кәсләр сизин әгидәнизи тәнгид едә биләрләр. Амма сизин дүрүстлүјүнүзә вә јахшы инсан олдуғунуза шүбһә етмәк үчүн тутарлы сәбәбләри олмамалыдыр (Дән. 6:4, 5). Өзүнүздән сорушун: «Һәм баҹы-гардашлар, һәм дә диҝәр инсанлар арасында јахшы ада саһибәм?»

5. Јахшылығы севдијинизи неҹә ҝөстәрә биләрсиниз?

⁵ Јахшылығы севирсинизсә, демәли, диггәтинизи башгаларынын јахшы хүсусијјәтләринә ҹәмләјир вә буна ҝөрә онлары тәрифләјирсиниз. Һәмчинин хејирхаһ ишләр ҝөрмәк вә сиздән тәләб олунандан да артығыны етмәк сизә севинҹ ҝәтирир (1 Салон. 2:8). Нәјә ҝөрә ағсаггалын јахшылығы севмәси ваҹибдир? Чүнки онлар өз дәјәрли вахтларынын чохуну јығынҹағын гајғысына галмаға вә тапшырыгларыны јеринә јетирмәјә сәрф едирләр (1 Бут. 5:1—3). Ағсаггаллар чох иш ҝөрүрләр, амма башгаларына хидмәт етмәк онлара севинҹ ҝәтирир (Һәв. 20:35).

6. «Гонагпәрвәр олмаг» нә демәкдир? (Ибраниләрә 13:2, 16; һәмчинин шәклә бахын.)

⁶ Тәкҹә достларыныза дејил, башга инсанлара да јахшылыг етмәклә сиз «гонагпәрвәр» олдуғунузу ҝөстәрирсиниз (1 Бут. 4:9). Бир мәнбәдә гонагпәрвәр инсан белә тәсвир олунур: «Онун евинин вә үрәјинин гапысы гәрибләр үчүн ачыг олмалыдыр». Өзүнүздән сорушун: «Баҹы-гардашлар мәни јығынҹаға јени ҝәләнләри вә гонаглары һәмишә саламлајан бири кими таныјырлар?» (Ибраниләрә 13:2, 16 ајәләрини охујун.) Гонагпәрвәр инсан һамыја гаршы әлиачыгдыр. Мәсәлән, о, касыблара, еләҹә дә рајон нәзарәтчиләринә, гонаг ҝәлән натигләрә вә Рәббин ишиндә чох чалышан диҝәр гардашлара јахшылыг едир (Јар. 18:2—8; Мәс. 3:27; Лука 14:13, 14; Һәв. 16:15; Ром. 12:13).

7. «Пулпәрәст олмамаг» нә демәкдир?

⁷ Пулпәрәст олмамалысыныз. Бу о демәкдир ки, сиз диггәтинизи мадди шејләрә ҹәмләмәмәлисиниз. Варлы вә ја касыб  олмағыныздан асылы олмајараг, сиз Падшаһлығын марагларыны һәјатынызын бүтүн саһәләриндә биринҹи јерә гојмалысыныз (Мәт. 6:33). Вахтынызы, ҝүҹүнүзү, мадди вәсаитләринизи Јеһоваја ибадәт етмәјә, аиләнизин гајғысына галмаға вә јығынҹаға хидмәт етмәјә сәрф етмәлисиниз (Мәт. 6:24; 1 Јәһ. 2:15—17). Өзүнүздән сорушун: «Мән пула неҹә јанашырам? Һәјат үчүн зәрури олан шејләрлә кифајәтләнирәм? Јохса диггәтими пул газанмаға вә даһа чох вар-дөвләтә саһиб олмаға јөнәлдирәм?» (1 Тим. 6:6, 17—19).

8. «Һәр шејдә һәдди билән» вә «өзүнә һаким олан» бири олдуғунузу һансы саһәләрдә ҝөстәрә биләрсиниз?

⁸ Әҝәр сиз һәр шејдә һәдди билирсинизсә вә өзүнүзә һаким олурсунузса , демәли, һәјатын һәр бир саһәсиндә таразлығы горумағы баҹарырсыныз. Һәмчинин јемәк, ичмәк, ҝејим, хариҹи ҝөрүнүш, истираһәт мәсәләләриндә ифрата вармырсыныз вә бу дүнјанын дәбинин гулу дејилсиниз (Лука 21:34; Јаг. 4:4). Кимсә сизи өзүнүздән чыхармаға чалышанда тәмкининизи горујурсунуз. Ејни заманда сиз сәрхошлуг етмәмәлисиниз вә ја һәддән артыг чох ичән бири кими танынмамалысыныз. Өзүнүздән сорушун: «Һәјат тәрзимдән һәр шејдә һәдди билән вә өзүнә һаким олан бири олдуғум ҝөрүнүр?»

9. «Сағлам дүшүнҹәли» вә «низам-интизамлы» олмаг нә демәкдир?

⁹ Әҝәр сиз сағлам дүшүнҹәлисинизсә, һәјатын мүхтәлиф саһәләриндә Мүгәддәс Китаб принсипләрини рәһбәр тутараг нәтиҹә чыхарырсыныз. Сиз Мүгәддәс Китаб принсипләри үзәриндә дәриндән дүшүнүр вә бунун сајәсиндә анлајыш вә һикмәтлә давранырсыныз. Тез-тәләсик нәтиҹә чыхармырсыныз. Әксинә, бүтүн ваҹиб фактлары билдијинизә әмин олмаға чалышырсыныз (Мәс. 18:13). Беләҹә, сиз Јеһованын дүшүнҹәсини әкс етдирән гәрарлар гәбул едирсиниз. Әҝәр низам-интизамлысынызса, демәли, пунктуал инсансыныз вә бүтүн ишләриниз јерли-јериндәдир. Инсанлар сизи етибарлы вә бүтүн ҝөстәришләрә әмәл едән бири кими таныјырлар. Бу кејфијјәтләр сизә јахшы ад газанмаға көмәк едәҹәк. Инди исә ҝәлин ҝөрәк ағсаггал олмаг истәјән аилә башчылары Мүгәддәс Китабда јазылмыш һансы тәләбләрә ҹаваб вермәлидирләр.

АИЛӘ БАШЧЫСЫ КИМИ ЈАХШЫ НҮМУНӘ ГОЈУН

10. Аилә башчысы өз аиләсини јахшы идарә етдијини неҹә ҝөстәрә биләр?

¹⁰ Әҝәр сиз аилә башчысысынызса вә ағсаггал олмаг истәјирсинизсә, аиләниз дә нүмунәви олмалыдыр. Сиз аиләнизи јахшы идарә етмәлисиниз. Севән вә мәсулијјәтли аилә башчысы кими танынмалысыныз. Бүтүн руһани ишләрдә мәсулијјәти өз үзәринизә ҝөтүрмәлисиниз. Бу нәјә ҝөрә ваҹибдир? Һәвари Булус демишди: «Ахы инсан өз аиләсини идарә едә билмирсә, Аллаһын јығынҹағынын гајғысына неҹә галаҹаг?» (1 Тим. 3:5).

11, 12. Ағсаггал олмаг истәјән гардашын өвладларынын давранышы онун тәјинатына неҹә тәсир едә биләр? (Һәмчинин шәклә бахын.)

¹¹ Әҝәр јеткинлик јашына чатмамыш өвладларыныз варса, онлар итаәткар вә тәрбијәли олмалыдырлар. Сиз өвладларыныза мәһәббәтлә тәлим вермәлисиниз, онлары өјрәтмәлисиниз. Әлбәттә, сиз истәјирсиниз ки, онлар да диҝәр ушаглар кими хошбәхт олсунлар, дејиб-ҝүлсүнләр, ојнасынлар. Вердијиниз јахшы тәрбијә сајәсиндә исә онлар итаәткар вә һөрмәтҹил олаҹаглар. Һәмчинин чалышмалысыныз ки, өвладларынызын Јеһова илә јахшы мүнасибәтләри олсун, Мүгәддәс Китаб принсипләрини севсинләр вә вәфтизә доғру аддымлар атсынлар.

¹² «Ушаглары позғун һәјат сүрмәкдә вә итаәтсизликдә иттиһам олунмамалы»дыр. Јеткинлик  јашына чатмајан ушаг ҹидди ҝүнаһа јол верәрсә, бу, атанын тәјинатына неҹә тәсир едәҹәк? Әҝәр ата өвладынын тәлим-тәрбијәсиндә сәһләнкарлыға јол верибсә, чох ҝүман ки, о, ағсаггал кими хидмәт едә билмәз. («Ҝөзәтчи гүлләси»нин 1996-ҹы ил 15 октјабр сајында 21-ҹи сәһифә 6 вә 7-ҹи абзаслара (түрк.) бахын.)

ЈЫҒЫНҸАҒА ХИДМӘТ ЕДИН

13. «Дәрракәли» олдуғунузу вә «инадкар» олмадығынызы неҹә ҝөстәрә биләрсиниз?

¹³ Ҝөзәл мәсиһи хүсусијјәтләри тәзаһүр етдирән гардашлар јығынҹаг үчүн чох дәјәрлидир. «Дәрракәли» инсан сүлһә ҹан атыр. Әҝәр һамынын сизи дәрракәли бири кими танымасыны истәјирсинизсә, јахшы динләјиҹи олун вә башгаларынын фикирләрини, һиссләрини баша дүшмәјә чалышын. Ағсаггал оландан сонра Мүгәддәс Китаб принсипи вә ја гануну позулмурса, ағсаггаллар шурасында чохлуғун вердији гәрары дәстәкләјәҹәксиниз? «Инадкар олмамаг» о демәкдир ки, һәр шејин сиз дејән кими олмасына исрар етмирсиниз. Сиз баша дүшүрсүнүз ки, башгаларынын фикрини өјрәнмәк ваҹибдир (Јар. 13:8, 9; Мәс. 15:22). Сиз «давакар» вә ја «тез өзүндән чыхан» инсан дејилсиниз. Бу о демәкдир ки, сиз инсанларла сәрт давранмырсыныз, мүбаһисә етмирсиниз, әксинә, онлара гаршы мүлајим, нәзакәтлисиниз. Әҝәр сүлһпәрвәр инсансынызса, демәли, ҝәрҝин вәзијјәтләрдә белә тәшәббүс ҝөстәриб сүлһү горујурсунуз (Јаг. 3:17, 18). Унутмурсунуз ки, хош сөзләринизлә одун үстүнә су төкә вә һәтта иманымыза гаршы чыханларын белә үрәјини јумшалда биләрсиниз (Һак. 8:1—3; Мәс. 20:3; 25:15; Мәт. 5:23, 24).

14. «Имана тәзә ҝәләнләрдән олмамалыдыр» вә «сәдагәтли» олмалыдыр нә демәкдир?

¹⁴ Ағсаггал олмаг истәјән гардаш «имана тәзә ҝәләнләрдән олмамалыдыр». Узун илләрдир вәфтиз олунмуш Јеһованын Шаһиди олмағыныз тәләб олунмаса да, јеткин мәсиһи олмағыныз үчүн мүәјјән вахт тәләб олунур. Ағсаггал тәјин олунмаздан әввәл  сиз ҝөстәрмәлисиниз ки, Иса Мәсиһ кими тәвазөкарсыныз вә Јеһованын бу тәјинаты сизә нә вахт верәҹәјиндән асылы олмајараг, сәбирлә ҝөзләмәјә һазырсыныз (Мәт. 20:23; Филип. 2:5—8). Сиз Јеһованын гојдуғу нормалара ујғун јашамагла вә Онун тәшкилаты васитәсилә вердији ҝөстәришләрә әмәл етмәклә «сәдагәтли» олдуғунузу ҝөстәрирсиниз (1 Тим. 4:15).

15. Ағсаггал мүкәммәл натиг олмалыдыр? Изаһ един.

¹⁵ Мүгәддәс Китабда ајдын јазылыб ки, нәзарәтчиләр «тәлим вермәкдә сәриштәли» олмалыдырлар. Бу о демәкдир ки, сиз мүкәммәл натиг олмалысыныз? Хејр. Бир чох сәриштәли ағсаггаллар ән јахшы натигләр олмасалар да, тәблиғдә вә баҹы-гардашлары зијарәт едәркән Мүгәддәс Китаб васитәсилә јахшы тәлим верир вә диндашларыны руһландырырлар (1 Тим. 3:2; 1 Коринфлиләрә 12:28, 29 вә Ефеслиләрә 4:11 ајәләри илә әлагәләндирин). Буна ҝөрә дә сиз јахшы мүәллим олмаг үчүн даима үзәриниздә ишләмәлисиниз. Буна неҹә наил ола биләрсиниз?

16. Бир мүәллим кими даһа сәриштәли олмаг үчүн нә едә биләрсиниз? (Һәмчинин шәклә бахын.)

¹⁶ «Аллаһын етибара лајиг сөзүнә» бағлы галмалысыныз. Даһа јахшы мүәллим олмаг үчүн әмин олун ки, тәлим вә мәсләһәт верәндә дедикләриниз Мүгәддәс Китаба әсасланыр. Мүгәддәс Китабы вә нәшрләримизи дәриндән арашдырын (Мәс. 15:28; 16:23). Мүталиә заманы нәшрләримиздә Мүгәддәс Китаб ајәләринин неҹә изаһ олундуғуна фикир верин. Бу сизә ајәләри дүзҝүн тәтбиг етмәјә көмәк едәҹәк. Тәлим верәндә исә чалышын динләјиҹиләрин үрәјинә јол тапасыныз. Тәҹрүбәли ағсаггаллардан мәсләһәт алсаныз, бу сизә бир мүәллим кими пүхтәләшмәјә көмәк едәҹәк (1 Тим. 5:17). Ағсаггаллар баҹы-гардашлары үрәкләндирмәлидирләр. Бунунла белә, лазым ҝәләндә тәнбеһ етмәји дә баҹармалыдырлар. Истәнилән һалда ағсаггаллар һәмишә меһрибан давранмалыдырлар. Әҝәр сиз мүлајим, севҝи долу олсаныз вә тәлимләринизи Аллаһын Кәламына әсасландырсаныз, бөјүк мүәллимимиз Исадан өрнәк  ҝөтүрдүјүнүз үчүн сәриштәли олаҹагсыныз (Мәт. 11:28—30; 2 Тим. 2:24).

МӘГСӘДИНИЗӘ ДОҒРУ ИРӘЛИЛӘЈИН

17. а) Јығынҹаг хидмәтчиләринә мәгсәдләринә доғру ирәлиләмәјә нә көмәк едә биләр? б) Ағсаггаллар гардашларын тәләбләрә ҹаваб вериб-вермәдијини мүәјјән едәндә нәләри нәзәрә алмалыдырлар? (« Тәләбләри нәзәрдән кечирәркән тәвазөкар олун» адлы чәрчивәјә бахын.)

¹⁷ Ағсаггаллар үчүн олан тәләбләри нәзәрдән кечирәндән сонра бәзи јығынҹаг хидмәтчиләри дүшүнә биләрләр ки, бу тәләбләрә һеч вахт ҹаваб вермәјәҹәкләр. Амма унутмајын ки, нә Јеһова, нә дә Онун тәшкилаты сиздән бу кејфијјәтләри мүкәммәл шәкилдә тәзаһүр етдирмәјинизи ҝөзләмир (Јаг. 3:2). Бундан әлавә, бу кејфијјәтләри өзүнүздә инкишаф етдирмәјә көмәк едән Јеһованын мүгәддәс руһудур (Филип. 2:13). Һансыса конкрет кејфијјәтләри өзүнүздә инкишаф етдирмәк истәјирсиниз? Бу барәдә Јеһоваја дуа един. Мөвзу илә бағлы арашдырма апарын, тәҹрүбәли ағсаггаллардан мәсләһәт алын.

18. Бүтүн јығынҹаг хидмәтчиләри нәјә ҹан атмалыдырлар?

¹⁸ Бүтүн гардашлар, о ҹүмләдән артыг ағсаггал кими хидмәт едәнләр дә бу мәгаләдә мүзакирә олунан кејфијјәтләри јетишдирмәјә давам етмәлидирләр (Филип. 3:16). Јығынҹаг хидмәтчисисиниз? Ағсаггал олмаға ҹан атын! Јеһовадан диләјин ки, Она вә јығынҹаға хидмәтдә сәриштәли олмағыныз үчүн сизә тәлим версин (Әшј. 64:8). Гој Јеһова сизә ағсаггал олмаг мәгсәдинизә чатмаға көмәк етсин!