Әввәлки мәгаләдә бәһс етдијимиз Софија дәрддән ичкијә гуршанмышды. Мүгәддәс Китаб ичкидән гәдәриндә истифадәни гадаған етмир. Лакин орада јазылыб: «Шәраб дүшкүнләринә гошулма» (Мәсәлләр 23:20). Ичкидән суи-истифадә әтрафдакыларла мүнасибәтләри корлајыр, сағламлыға ҹидди зәрәр вурур вә һәр ил милјонларла инсанын вахтсыз өлүмүнә сәбәб олур. Әҝәр инсанлар Мүгәддәс Китабын һикмәтли мәсләһәтинә әмәл етсәјдиләр, бу проблемләрин чоху олмазды.

Софија мәһз белә давранды. О дејир: «Баша дүшдүм ки, ички дәрдимә әлаҹ гылмыр. Филиппилиләрә 4:6, 7 ајәсиндәки һикмәтли сөзләрә ујғун даврандым. Орада дејилир: “Һеч нәјә ҝөрә нараһат олмајын. Һәр мәсәлә барәдә диләјинизи дуа вә јалварышла... Аллаһа билдирин”. Ҝеҹәләр гәһәр мәни боғанда Јеһоваја јалварырдым. Гәлбимин губарыны, һиддәтими, кәдәрими, аҹизлијими Онунла бөлүшүрдүм. Јалварырдым мәнә бәдбин һиссләрдән гуртулмағын јолуну өјрәтсин. Сәһәриси ҝүн дуама ујғун давранараг бу һиссләрлә мүбаризәни давам етдирирдим. Дуанын сајәсиндә диггәтими итирдикләримә јох, саһиб олдуғум шејләрә ҹәмләмәји өјрәндим. Бир даһа ички ичмәмәк гәрарына ҝәлдим. Дујдуғум гәлб раһатлығыны ичкијә гурбан верә билмәздим!»

Инсана әзаб вә аҹы јашадан башлыҹа сәбәбләрдән бири дә әхлагсызлыгдыр. Лакин Мүгәддәс Китаб принсипләри әхлагсызлыға ҝәтириб чыхаран мејилләрдән, мәсәлән, флирт вә порнографијадан гачмаға көмәк едир. Самуил адлы бир ҝәнҹ дејир: «Флирт етмәк мәним үчүн елә асан иди ки, бәзән мәни ҹәлб етмәјән бир гызын мәндән хошу ҝәлдијини ҝөрүб онунла флирт едирдим». Самуил ҝөрәндә ки, һәтта белә нијјәти олмадығы һалда, ону тез-тез флирт етмәкдә ҝүнаһландырырлар, гәсдән флирт етмәјә башлајыр. Сонралар бу мејил ону нараһат едир. О дејир: «Баша дүшдүм ки, бу вәрдиш чох тәһлүкәлидир, инсанын худбин олмасына ҝәтириб чыхарыр».

Самуил jw.org сајтында ҝәнҹләрә үнванланан бир мәгалә охујур. Мәсәлләр 20:11 ајәсиндә јазылан сөзләр ону дүшүндүрүр: «Һәтта ушаг да әмәлләриндән таныныр, отурушу-дурушу тәмизми, дүрүстмү бәлли олур». Самуил флирт етмәјин тәмиз вә дүрүст һәрәкәт олмадығы гәнаәтинә ҝәлир. О дејир: «Анладым ки, флирт инсанда пис хүсусијјәтләр јетишдирир вә белә инсан јахшы һәјат јолдашы олмајаҹаг. Ҝәләҹәк һәјат јолдашым мәним башга гадынла флирт етдијими ҝөрсә, һансы һиссләри кечирәр? Бу суалын үзәриндә дүшүнмәк флиртин зәрәрли вәрдиш олдуғуну анламаға көмәк етди. Флирт етмәјин асан олмасы һеч дә дүзҝүн олмасы демәк дејил». Самуил флирт етмәјә сон гојду вә бу, ону әхлагсызлыгдан горуду.

Антонио адлы бир нәфәр исә әхлагсызлығын бир аддымлығында иди. О, порнографијаја алудә олмушду. Севдији гадынла аилә гурмасына бахмајараг, бу вәрдиш ону һәр дәфә үстәләјирди. Антониоја 1 Бутрус 5:8 ајәси үзәриндә дүшүнмәк көмәк етди. Орада јазылыб: «Ајыг дурун, сәрвахт олун. Дүшмәниниз Иблис нәрилдәјән шир кими ҝәзиб удмаға адам ахтарыр». Антонио дејир: «Јан-јөрәмиз порнографик шәкилләрлә долудур вә бу тәсвирләр истәр-истәмәз инсанын јаддашына һәкк олунур. Ајә мәнә бүтүн бу тәсирләрин һарадан гајнагландығы үзәриндә дүшүнмәјә көмәк етди. Бу налајиг шәкилләрә бахан кими онларын архасында Шејтанын дурдуғуну өзүмә јаддашлыг етмәлијдим. Баша дүшдүм ки, зеһнимә, үрәјимә вә никаһыма һәдәфләнән бу һүҹумларла мүбаризәдә ајыг дуруб, сәрвахт олмаға мәнә јалныз Јеһова көмәк едә биләр». Антонио еһтијаҹ дујдуғу көмәји гәбул етди вә пис вәрдишини ҝеридә гојду. Бу, ону даһа бетәр проблемләрдән горуду.

Ҝөрүндүјү кими, Мүгәддәс Китабдакы мәсләһәтләр бизи бир чох ҹидди проблемләрдән горумаға гадирдир. Бәс артыг көк салмыш вә јаха гуртара билмәдијимиз проблемләр һагда нә демәк олар? Ҝәлин ҝөрәк Аллаһын Кәламы бизә бу ҹүр проблемләрин өһдәсиндән ҝәлмәјә неҹә көмәк едир.