ХОШБӘХТ, шад-хүррәм һәјат сүрмәк һәр бир инсанын арзусудур. Амма јашадығымыз бу зәманә о дәрәҹәдә чәтиндир ки, һәјатдан севинҹ дујмаг елә дә асан дејил (2 Тим. 3:1). Бәзән һагсызлыг, хәстәлик, ишсизлик, дәрд-сәр вә раһатлығымызы әлимиздән алан диҝәр проблемләр уҹбатындан севинҹимиз кәдәрә дөнүр. Һәтта Јеһованын хидмәтчиләри белә, һәрдән руһдан дүшүр вә севинҹләринин јаваш-јаваш сөндүјүнү һисс едирләр. Ола билсин, сиз дә һал-һазырда бу вәзијјәтдәсиниз. Ҝәлин ҝөрәк әввәлки севинҹинизи неҹә гајтара биләрсиниз.

Әввәла ҝәлин әсл севинҹин нә олдуғуну вә чәтинликләрә бахмајараг, севинҹини итирмәјән инсанларын нүмунәсини нәзәрдән кечирәк. Сонра исә бизә севинҹимизи горумаға вә севинҹимизә севинҹ гатмаға көмәк едән амилләр барәдә данышаг.

Ола билсин, кимсә дүшүнүр ки, севинмәк шән олмаг вә дејиб-ҝүлмәк демәкдир. Амма бу фикрин јанлыш олдуғуну нөвбәти нүмунә әсасында ҝөрә биләрик. Елә инсан вар ки, чохлу ичәндә дејиб-ҝүлмәјә башлајыр. Амма ичкинин тәсири ҝедәндән сонра дәрди јенә јадына дүшүр вә о шән инсандан әсәр-әламәт галмыр. Бәли, бу, ани севинҹдир, буна әсл севинҹ демәк олмаз (Мәс. 14:13).

Әсл севинҹ үрәкдә јува гурмуш һиссдир. Инсан ҝөзәл бир шеји ҝөзләјәндә вә әлдә едәндә бу һисси јашајыр. Әсл севинҹ хариҹи факторлардан асылы дејил, о, инсанын дахилиндә олур. Бу ҹүр инсан һәр вәзијјәтдә, һәм јахшы, һәм пис ҝүндә хошбәхт олмағы баҹарыр (1 Салон. 1:6). Нә исә ону нараһат етсә дә, ичиндәки севинҹ сөнмүр. Һәвариләр буна ҝөзәл мисалдыр. Онлар Мәсиһ һагда шәһадәт вердикләри үчүн дөјүлсәләр дә, «Исанын ады наминә тәһгирә лајиг ҝөрүлдүкләринә ҝөрә Синедриондан севинә-севинә чыхдылар» (Һәв. 5:41). Тәбии ки, онлары севиндирән алдыглары көтәкләр дејилди. Бу мөмин инсанлар Аллаһа вәфалы галдыглары үчүн севинирдиләр.

Әлбәттә, һеч ким севинҹ хүсусијјәти илә доғулмур вә бу хүсусијјәт һеч кимдә өз-өзүнә јаранмыр. Нә үчүн белә иддиа едирик? Чүнки әсл севинҹ мүгәддәс руһун бәһрәсидир. Бу руһун көмәји илә биз өзүндә севинҹ хүсусијјәтини дә јашадан «јени шәхсијјәтә» бүрүнә биләрик (Ефес. 4:24; Гал. 5:22). Беләҹә, севинҹимиз артаҹаг вә һәјатын чәтинликләриндән мәтанәтлә кечә биләҹәјик.

Јеһова Аллаһ Јер күрәсини ҝөзәл мәгсәдләр үчүн јаратмышды. Әслиндә, дүнја бу ҝүн бизим ҝөрдүјүмүз кими олмамалы иди. Бу ҝүн инсанлар чох шәр әмәлләр төрәдир. Бунунла белә, Јеһова севинҹини итирмир. Мүгәддәс Китабда дејилир ки, «гүдрәт вә севинҹ [Онун] дәрҝаһындадыр» (1 Салн. 16:27). Шүбһәсиз, салеһ бәндәләринин ҝөрдүјү саваб ишләр дә Јеһованын гәлбини севиндирир (Мәс. 27:11).

Һәјатда һәр шеј истәдијимиз кими ҝетмәјәндә Јеһованы јадымыза салмагла сакитләшә биләрик. Ҝәлин Јараданымыздан нүмунә ҝөтүрүб севинҹимизи итирмәјәк, диггәтимизи инди саһиб  олдуғумуз ҝөзәл немәтләрә ҹәмләјәк вә сәбирлә ҝөзәл ҹәннәт һәјатыны ҝөзләјәк *.

Кешмәкешли һәјат јашаса да, гәм дәрјасына батмајан инсанлар да аз олмајыб. Бу инсанлар һагда Мүгәддәс Китабдан мәлумат ала биләрик. Онлардан бири Ибраһим пејғәмбәрдир. О, өлүмлә үз-үзә дурмуш, кимләринсә уҹбатындан башы чох бәлалар чәкмишди (Јар. 12:10—20; 14:8—16; 16:4, 5; 20:1—18; 21:8, 9). Бүтүн бунлара рәғмән, о, севинҹини итирмәди. Бәс о, буну неҹә баҹармышды? Она бу түкәнмәз севинҹи јашадан Мәсиһин һакимијјәти алтында өмүр сүрмәк үмиди иди (Јар. 22:15—18; Ибр. 11:10). Иса Мәсиһ дә буну тәсдиг едәрәк демишди: «Атаныз Ибраһим мәним ҝүнүмү ҝөрәҹәји үчүн чох севинирди» (Јәһ. 8:56). Ҝәлин биз дә Ибраһим пејғәмбәри өрнәк ҝөтүрәрәк ҝәләҹәјин ҝәтирәҹәји севинҹә көкләнәк (Ром. 8:21).

Ибраһим пејғәмбәр кими һәвари Булус вә онун тәблиғ әмәкдашы Сила да диггәтләрини Аллаһын вәдинә ҹәмләмишдиләр. Онлар чох ҝүҹлү иман саһиби идиләр. Һәјатда чохлу хошаҝәлмәз һаллар јашасалар да, севинҹләрини итирмирдиләр. Мәсәлән, бир дәфә онлары о ки вар дөјүб зиндана атмышдылар. Амма ҝөрүн бу гардашлар нә етмишди. Мүгәддәс Китабда јазылыб: «Ҝеҹә јарысы оларды. Булусла Сила дуа едиб маһны охујур, Аллаһы тәрәннүм едирдиләр» (Һәв. 16:23—25). Онлар һәм Аллаһын вәдинә бәсләдикләри үмиддән ҝүҹ алыр, һәм дә Мәсиһ уғрунда әзаб чәкдикләри үчүн севинирдиләр. Биз дә Јеһоваја сәдагәтлә хидмәт етмәјин ҝәтирдији ҝөзәл бәһрәләр барәдә дүшүнмәклә Булус вә Сила кими севинҹимизи горуја биләрик (Филип. 1:12—14).

Бу ҝүн дә чәтинликләр гаршысында севинҹини горујан диндашларымыз аз дејил. Мәсәлән, 2013-ҹү илин нојабр ајында Филиппинин мәркәзиндә баш верән Һаијан тајфуну 1000-дән артыг баҹы-гардашымызы евсиз-ешиксиз гојмушду. Таклобан шәһәриндә јашајан вә гасырға заманы еви дармадағын олан Ҹорҹ гардаш демишди: «Олуб-кечәнләрә бахмајараг, баҹы-гардашлар хошбәхтдирләр. Дујдуғумуз севинҹ һиссини билмирәм һансы сөзләрлә ифадә едим». Ҝөрүндүјү кими, чох ағыр чәтинликләр јашасаг да, севинҹимизи горуја биләрик. Бунун үчүн Јеһова Аллаһын бизә етдији јахшылыглары јадымыза салмаг вә шүкр етмәк лазымдыр. Ҝәлин ҝөрәк Јеһованын бәхш етдији башга һансы немәтләр бизә һәјатдан севинҹ дујмаға әсас верир.

Разылашарсыныз ки, һәјатдан севинҹ дујмаға әсас верән ән бөјүк сәбәб Улу Јараданла достлугдур. Һеч тәсәввүр едирсиниз, бизә неҹә бөјүк шәрәф нәсиб олуб: јерин-ҝөјүн Саһиби бизә Өзүнү таныдыб! О, бизим һәм Атамыз, һәм Аллаһымыз, һәм дә Достумуздур. Мәҝәр бундан бөјүк хошбәхтлик вар?! (Зәб. 71:17, 18).

Јараданымыз бизә һәјат кими ҝөзәл немәт вә бу һәјатдан һәзз алмаг кими бир габилијјәт бәхш едиб (Ваиз 3:12, 13). Јеһова бизи Өзүнә ҹәлб етдији үчүн Онун бизимлә бағлы ирадәсини дәрк едә билирик (Кол. 1:9, 10). Беләҹә, мәналы һәјат јашајыр вә һәјатда һара ҝедәҹәјимиздән хәбәрдарыг. Амма дүнјадакы әксәр инсанлар һәјатда мәна тапа билмир. Һәвари Булус бунун сәбәбини белә вурғуламышды: «“Аллаһын Ону севән бәндәләри үчүн һазырладығы шејләри нә ҝөз ҝөрүб, нә гулаг ешидиб, нә дә онлар кимсәнин хәјалына ҝәлиб”. Аллаһ Өз руһу илә бунлары бизә ачыб» (1 Кор. 2:9, 10). Мәҝәр Аллаһын ирадәсини вә нијјәтини дәрк етмәјимиз севинмәјимиз үчүн сәбәб дејил?!

Бизә севинмәјә әсас верән даһа бир сәбәб Јеһованын бизә мәрһәмәт ҝөстәриб ҝүнаһларымызы бағышламасыдыр (1 Јәһ. 2:12). Еләҹә дә Аллаһымыз лүтфүндән ирәли ҝәләрәк бизә јени дүнјада јашамаг үмиди вериб (Ром. 12:12). Индинин өзүндә исә Јеһова бизи ҝөзәл диндашларымыздан ибарәт гардашлығын үзвү едиб (Зәб. 133:1). Һәмчинин Мүгәддәс Китаб бизи әмин едир ки, Јеһова халгыны Шејтандан вә онун ҹинләриндән горујур (Зәб. 91:11). Әҝәр саһиб  олдуғумуз бүтүн бу немәтләрин үзәриндә дәриндән дүшүнәриксә, севинҹ гәлбимиздә јува гурар (Филип. 4:4).

Бәс севинҹ сарыдан касадлыг дујмајан мәсиһијә дә севинҹи артырмаг лазымдыр? Ҹавабы Иса Мәсиһин сөзләриндән тапа биләрик: «Бунлары сизә она ҝөрә дејирәм ки, гәлбимдәки севинҹи сиз дә там дујасыныз» (Јәһ. 15:11). Бу сөзләр ҝөстәрир ки, һәр биримиз гәлбимиздәки севинҹи артырмалыјыг. Севинҹи бир оҹаға бәнзәтмәк олар. Бу оҹағын ҝур јанмасы үчүн ора даим одун атмаг лазымдыр. Јадда сахлајын ки, севинҹ мүгәддәс руһун һасил етдији хүсусијјәтдир. Буна ҝөрә дә биз һәмишә Јеһовадан мүгәддәс руһ диләмәли, мүгәддәс руһун илһамы илә јазылмыш Кәламы диггәтлә охумалы вә охудугларымыздан нәтиҹә чыхармалыјыг (Зәб. 1:1, 2; Лука 11:13).

Севинҹи артырмағын даһа бир јолу Јеһованы разы салан ишләрдә фәал олмагдыр (Зәб. 35:27; 112:1). Аллаһ бизи елә јарадыб ки, биз јалныз Онун ирадәсини јеринә јетирмәклә әсл хошбәхтлији дуја биләрик. Бу һәгигәти нөвбәти ајә чох ҝөзәл ачыглајыр: «Аллаһдан горх, Онун әмрләрини јеринә јетир. Инсанын вәзифәси будур» * (Ваиз 12:13).

Севинҹимиз артдыгҹа ҝөрәҹәјик ки, бу, бизә јалнызҹа хошбәхтлик һисси јашатмыр, бунун башга фајдалары да вар. Мәсәлән, чәтинликләрә бахмајараг, Јеһоваја севинҹлә хидмәт едәндә Она даһа чох хош ҝедәҹәк (Ган. 16:15; 1 Салон. 5:16—18). Һәмчинин әсл севинҹин дадыны билдијимиз үчүн маддијјат далынҹа гачмајаҹаг, әксинә, Падшаһлыг уғрунда даһа бөјүк гурбанлар вермәк үчүн фүрсәт ахтараҹағыг (Мәт. 13:44). Јеһованын ишиндә фәал олмағын ҝәтирдији фајдалары ҝөрәндә севинҹимиз даһа да артаҹаг, өзүнәәминлик дујаҹаг вә бу хошбәхтликдән башгаларына да пај верәҹәјик (Һәв. 20:35; Филип. 1:3—5).

«Бу ҝүн һәјатыныз сизә мәмнунлуг вә хошбәхтлик ҝәтирирсә, сабаһ сағламлыг бәхш едәҹәк». Бу сөзләри АБШ-ын Небраска Университетиндә чалышан вә сәһијјә саһәсиндә бир сыра тәдгигатлар апаран бир алим демишди. Мүгәддәс Китаб да «шад үрәк ҹана мәлһәмдир» сөзләри илә бу һәгигәти тәсдиг едир (Мәс. 17:22). Ҝөрүндүјү кими, нә гәдәр чох севинсәк, бир о гәдәр сағлам оларыг.

Хүласә, һәјат нә гәдәр ағыр олса да, биз әсл, түкәнмәз севинҹә саһиб ола биләрик. Бунун үчүн Аллаһдан дуада мүгәддәс руһ истәмәк, Мүгәддәс Китабы дәриндән мүталиә етмәк ваҹибдир. Һәмчинин ҝөрдүк ки, севинҹимизи артырмаг үчүн алдығымыз немәтләр барәдә дүшүнмәли, иманлы инсанлары өрнәк алмалы вә Аллаһын ирадәсини јеринә јетирмәлијик. Бу мәсләһәтләрә әмәл едәриксә, Зәбур 64:10 ајәсиндәки сөзләрин һәгигилијини өз үзәримиздә һисс едәҹәјик: «Салеһ инсанын севинҹи Јеһова олаҹаг, Она сығынаҹаг».