Иса Мәсиһин пејғәмбәрлик етдији кими, бу ҝүн Аллаһын Падшаһлығы һагда хош хәбәр бүтүн дүнјада тәблиғ едилир (Мәтта 24:14). Мүгәддәс Китабын Дәнјал бөлмәсинә әсасән, бу Падшаһлыг Аллаһын идарә етдији һөкумәтдир. Һәмин бөлмәнин икинҹи фәслиндә гәдим Бабилин дөврүндән бу ҝүнә кими мөвҹуд олмуш бәзи апарыҹы һөкумәтләрин бир-бирини әвәзләмәси илә бағлы пејғәмбәрлик гәләмә алыныб. Һәмин фәслин 44-ҹү ајәсиндә исә ҝәләҹәклә бағлы белә сөзләр јазылыб:

«О падшаһларын дөврүндә ҝөјләрин Аллаһы һеч вахт дағылмајаҹаг бир падшаһлыг гураҹаг. Бу падшаһлыг башга халга кечмәјәҹәк. О, бүтүн бу падшаһлыглары әзиб јох едәҹәк, өзү исә әбәди дураҹаг».

Мүгәддәс Китабда јазылмыш бу вә диҝәр пејғәмбәрликләр хәбәр верир ки, ҝәләҹәкдә бүтүн инсан һөкумәтләринин јерини Аллаһын Падшаһлығы тутаҹаг вә бу һөкумәт дүнјада әмин-аманлыг вә гајда-ганун јарадаҹаг. Бәс Аллаһын Падшаһлығынын идарәчилији алтында һәјат неҹә олаҹаг? Бурада тезликлә јеринә јетәҹәк мөһтәшәм вәдләрдән бир нечәси гејд олунуб.

• МҮҺАРИБӘЛӘР ОЛМАЈАҸАГ

  Зәбур 46:9 ајәсиндә јазылыб: «[Аллаһ] јерин бир уҹундан о бири уҹунадәк дөјүшләри кәсир, каманы гырыр, низәни сындырыр, ҹәнҝ арабаларыны ода атыр».

  Бир тәсәввүр един, бу ҝүн силаһ-сурсат һазырламаг үчүн сәрф олунан бүтүн вәсаит вә ҝүҹ инсанлары мәһв етмәк үчүн јох, онларын фајдасы үчүн истифадә едилсә, дүнја неҹә олар! Аллаһын Падшаһлығы идарә едәндә бүтүн бунлар реал олаҹаг.

• ХӘСТӘЛИКЛӘР ОЛМАЈАҸАГ

  Әшија 33:24 ајәсиндә јазылыб: «Һеч бир сакин “хәстәјәм” демәјәҹәк».

  Хәрчәнҝ, малјарија, үрәк хәстәликләри вә сәһһәтимизлә бағлы бу кими проблемләрин олмадығы бир дүнја тәсәввүр един. Артыг хәстәханалара, дава-дәрмана еһтијаҹ галмајаҹаг. Бәли, инсанлары ҝәләҹәкдә мүкәммәл сағламлыг ҝөзләјир.

• ГИДА ГЫТЛЫҒЫ ОЛМАЈАҸАГ

  Зәбур 72:16 ајәсиндә јазылыб: «Јердә чөрәк бол олаҹаг, дағ башында зәмиләр ашыб-дашаҹаг».

  Торпаг һәр кәсә јетәҹәк гәдәр бәһрә верәҹәк вә һамы ондан фајдалана биләҹәк. Аҹлыг вә јетәринҹә гидаланмама проблеминә бирдәфәлик сон гојулаҹаг.

• АҒРЫ-АҸЫ ВӘ ӨЛҮМ ОЛМАЈАҸАГ

  Вәһј 21:4 ајәсиндә јазылыб: «[Аллаһ] онларын ҝөзләриндән бүтүн јашлары силәҹәк. Артыг өлүм олмајаҹаг. Нә дәрд, нә фәрјад, нә дә ағры олмајаҹаг, чүнки әввәлки шејләр кечиб ҝетди».

   Бу исә о демәкдир ки, ҝәләҹәкдә инсанлар јерүзү Ҹәннәтдә әбәди јашајыб мүкәммәл һәјат сүрәҹәк! Бу, гајғыкеш Јараданымызын, Јеһова Аллаһын вәдидир!

Бу дејиләнләр сизин үчүн реаллыгдан узаг сәсләнир? Чох јәгин ки, һамы Мүгәддәс Китабда вәд олунмуш һәјаты јашамаг истәјәрди, лакин мүхтәлиф сәбәбләр уҹбатындан чохларына әбәди јашамаг вәди ағласығмаз ҝәлир. Бу, тәәҹҹүблү дејил, чүнки биз бу ҹүр һәјат сүрән бир нәфәрә дә раст ҝәлмәмишик.

Ҝүнаһ вә өлүмүн әсарәтиндә олан инсанлар һәјаты боју о гәдәр әзаб-әзијјәт, бәдбәхтлик ҝөрүр ки, артыг бу ҹүр һәјат онлара нормал ҝәлир вә әзабсыз һәјаты тәсәввүр едә билмирләр. Лакин јашадығымыз һәјат Јараданымыз Јеһова Аллаһын бәшәријјәтлә бағлы нијјәтиндән чох-чох узагдыр.

Аллаһ вәд етдији һәр шејин мүтләг јеринә јетәҹәјинә әмин олмағымыз үчүн нөвбәти сөзләри дејир: «Ағзымдан чыхан сөз... јаныма әлибош гајытмајаҹаг, әксинә, истәјими һөкмән һәјата кечирәҹәк, ону ҝөндәрдијим мәгсәдә мүтләг наил олаҹаг» (Әшија 55:11).

Мүгәддәс Китабда дејилир ки, Јеһова «һеч вахт јалан данышмајан» Аллаһдыр (Титуса 1:2). Аллаһын ҝәләҹәклә бағлы вердији ҝөзәл вәдләри нәзәрә алараг, мәнтигли оларды ки, өзүмүздән сорушаг: Аллаһын вәд етдији Ҹәннәтдә әбәди јашамаг, инсан үчүн нә дәрәҹәдә әлчатандыр? Ҹәннәтдә јашамаг үчүн биздән нә тәләб олунур? Нөвбәти сәһифәләрдә бу суаллара ҹаваб тапа биләрсиниз.