Аллаһ инсан организмини елә мөһтәшәм јарадыб ки, өз-өзүнү бәрпаетмә габилијјәтинә маликдир. Бәдәнимизин һансыса һиссәси кәсиләндә, сыјрыланда вә ја дешиләндә «организм бөјүк вә кичик өлчүлү јаралары бәрпа едән мүрәккәб бир просеси ишә салыр» («Johns Hopkins Medicine»). Белә ки, организм ганахманы дајандырмаг, јараны сағалтмаг вә тохумалары ҝүҹләндирмәк үчүн дәрһал һәрәкәтә кечир.

ДҮШҮНҮН: Јарадан организмимизи физики јаралары сағалтмаг габилијјәти илә јарадыб. Мәҝәр бу, бизи әмин етмир ки, О, сөз вердији кими мәнәви јараларымызы да сағалдаҹаг?! Мәзмурчунун сөзләриндән буну ајдын ҝөрмәк олар: «О, гәлбисыныглара шәфа верир, сызылдајан јараларыны сарыјыр» (Зәбур 147:3). Әҝәр сизин дә емосионал јараларыныз, ағрыларыныз варса, әмин олун ки, Јеһова һәм инди, һәм дә ҝәләҹәкдә јараларынызы сарыјаҹаг.

Аллаһ сөз верир: «Горхма, Мән сәнинләјәм. Тәлаша дүшмә, сәнин Аллаһын Мәнәм. Сәнә гүввәт верәҹәјәм, сәнә көмәк едәҹәјәм» (Әшија 41:10). Аллаһын севҝисинә әмин олан инсан гәлб раһатлығы дујур вә һәр бир чәтинлијә синә ҝәрә билир. Мүгәддәс Китаб јазарларындан бири гәлб раһатлығыны «Аллаһын һәр бир ағылдан үстүн олан сүлһү» адландырмыш вә әлавә етмишди: «Мәнә гүввәт верәнин сајәсиндә һәр шејә ҝүҹүм чатыр» (Филиппилиләрә 4:4—7, 9, 13).

Мүгәддәс Китабдакы ајәләр Јеһованын бәшәријјәтин ҝәләҹәји илә бағлы вәдләринә иманымызы ҝүҹләндирир. Мәсәлән, Вәһј 21:4, 5 ајәләриндән ҝөрүрүк ки, Аллаһ ҝәләҹәкдә нәләр едәҹәк вә буна инанмаға һансы әсасымыз вар:

• «О, [инсанларын] ҝөзләриндән бүтүн јашлары силәҹәк». Јеһова бүтүн әзабларымызы вә нараһатчылығымызы, һәтта башгаларына ади ҝөрүнәнләри дә арадан галдыраҹаг.

• Уҹа мөвгејиндә «тахтда отуран» Аләмләрин Рәбби Өз гүдрәт вә сәлаһијјәти илә инсан әзабына сон гојаҹаг вә биздән көмәјини әсирҝәмәјәҹәк.

• Јеһова вәдләринин «доғру вә етибарлы» олдуғуна Өзү замин дурур. Белә ки, Јеһованын Һагг-Таала мөвгеји вәдләрини јеринә јетирәҹәјинә шүбһә јери гојмур.

«О, онларын ҝөзләриндән бүтүн јашлары силәҹәк. Артыг өлүм олмајаҹаг. Нә дәрд, нә фәрјад, нә дә ағры олмајаҹаг, чүнки әввәлки шејләр кечиб ҝетди». Тахтда отуран деди: “Будур, Мән һәр шеји тәзә едирәм”. Сонра әлавә етди: “Јаз, чүнки бу сөзләр доғру вә етибарлыдыр”» (Вәһј 21:4, 5).

Физики аләм вә Мүгәддәс Китаб Јараданымызын варлығыны, ҝөзәл сифәтләрини әјан едир. Дүздүр, инсан хилгәти сејр етдикҹә Аллаһла дост олмаға сөвг олунур, Мүгәддәс Китаб исә бизи бирбаша буна сәсләјир: «Аллаһа јахынлашын, О да сизә јахынлашаҹаг» (Јагуб 4:8). Һәмчинин Һәвариләрин ишләри 17:27 ајәсиндә дејилир: «О, һеч биримиздән узаг дејил».

Аллаһы даһа јахындан танымаға вахт ајырсаныз, Онун гајғынызы чәкдијинә әминлијиниз артаҹаг (1 Бутрус 5:7). Бәс бу ҹүр әминлијин һансы фајдалары вар?

Ҝәлин Јапонијадан олан Торунун нүмунәсинә нәзәр салаг. Торуну Јеһованын Шаһиди олан анасы бөјүдүб. Буна бахмајараг, о, сонралар јапон мафијасы јакудзаја гошулур. О дејир: «Елә билирдим, Аллаһын мәндән зәһләси ҝедир. Јан-јөрәмдәки әзиз инсанларын өлүмүнү ҝөрәндә дүшүнүрдүм ки, бу, Аллаһын мәнә вердији ҹәзадыр». Тору етираф едир ки, бу ҹүр гәддар мүһит вә атмосфер ону «дашүрәкли, рәһмсиз инсана» чевирмишди. О, һәјат амалы һаггында дејир: «Истәјирдим, өзүмдән даһа адлы-санлы бирини өлдүрүб, ҹаван јашда ад чыхарараг һәјатдан ҝедим».

Лакин Тору һәјат јолдашы Һанна илә бирликдә Мүгәддәс Китабы өјрәндији мүддәтдә һәјатында вә дүшүнҹә тәрзиндә көклү дәјишикликләр етди. Һанна дејир: «Һәјат јолдашым ҝөзүмүн габағындаҹа дәјишди». Инди Тору бир шејә әминдир: «Доғрудан да, бизи севән Аллаһ вар. О, һеч кимин өлмәсини истәмир  вә һәр заман сәмими-гәлбдән төвбә едәнләри бағышламаға һазырдыр. Һеч кимә дејә билмәдијимиз вә һеч кимин баша дүшмәдији шејләри Она дејә биләрик вә О бизи ешидир. Јахын ҝәләҹәкдә Јеһова бүтүн проблемләри, әзаб-әзијјәти вә изтираблары тамамилә арадан галдыраҹаг. Һәтта бу ҝүн О, ағлымыза белә ҝәтирмәдијимиз шәкилдә бизә јардым әли узадыр. Мискин һалымызда гејдимизә галыр, бизә дајаг олур» (Зәбур 136:23).

Торунун әһвалатындан өјрәндик ки, Аллаһын бүтүн изтираблара вә ҝөз јашына сон гојмаға гадир олдуғуну вә тезликлә буну едәҹәјини билмәк һәм ҝәләҹәјә мөһкәм үмид верир, һәм дә инди мәналы һәјат сүрмәјә көмәк едир. Бәли, һәтта әзаб-әзијјәтлә долу бу дүнјада Аллаһын севҝисини вә гајғысыны дуја биләрик.