«Еј Јеһова, нә вахтадәк имдад диләјәҹәјәм, Сәнсә ешитмәјәҹәксән? Нә вахтадәк зүлм әлиндән дад едәҹәјәм, Сәнсә гуртармајаҹагсан?» (Һәбгуг 1:2, 3). Бу сөзләри Аллаһын лүтфүнү газанмыш Һәбгуг пејғәмбәр демишди. Онун бу јалварышы иманынын аз олдуғуну ҝөстәрирди? Хејр! Аллаһ Һәбгуг пејғәмбәри бир даһа архајын етди ки, әзаб-әзијјәтә сон гојаҹағы вахты артыг тәјин едиб (Һәбгуг 2:2, 3).

Өзүнүз, ја да әзиз адамыныз әзаб чәкәндә дүшүнә биләрсиниз ки, Аллаһ нәјә ҝөрә һәлә дә бу мәсәләјә бир әнҹам чәкмәјиб. Амма ҝөрүн Мүгәддәс Китабда нә дејилир: «Јеһова бәзиләринин дүшүндүјү кими, Өз вәдини јеринә јетирмәјә ҝеҹикмир. Хејр! О, сизә сәбир едир, чүнки һеч кәсин мәһв олмасыны истәмир, әксинә, истәјир ки, һамы төвбәјә ҝәлсин» (2 Бутрус 3:9).

Чох тезликлә! Иса пејғәмбәр бир нәсилдән сөз ачмышды. О демишди ки, бу нәсил ахырзаманы сәҹијјәләндирән вә мүхтәлиф һадисәләри өзүндә бирләшдирән әламәтин шаһиди олаҹаг (Мәтта 24:3—42). Пејғәмбәрин сөз ачдығы ахырзаман * әламәтинин бизим ҝүнләримиздә габарыг шәкилдә ҝөрүнмәси ону ҝөстәрир ки, Аллаһ мүтләг јер үзүндәки һадисәләрә мүдахилә едәҹәк.

Бәс Аллаһ буну неҹә едәҹәк? Иса пејғәмбәр јер үзүндә оланда ҝөстәрди ки, Аллаһ бәшәријјәтин әзабларыны арадан галдырмаға гадирдир. Ҝәлин онун ҝөстәрдији бәзи мөҹүзәләрә бахаг.

Тәбии фәлакәт. Иса пејғәмбәр шаҝирдләри илә бирҝә Ҹәлилә дәнизиндә гајыгла үзәркән ҝүҹлү фыртына гопду, гајыг аз галды батсын. Иса пејғәмбәр фыртынаны рам едәрәк ҝөстәрди ки, һәм о, һәм дә Аллаһ тәбии гүввәләр үзәриндә ихтијар саһибидир (Колослулара 1:15, 16). Пејғәмбәрин «Дајан! Сакит ол!» кәлмәси илә «күләк јатды, әтрафа дәрин сүкут чөкдү» (Марк 4:35—39).

Хәстәлик. Иса пејғәмбәри кор вә топал инсанлары, епилептикләри, ҹүзамлылары вә һәр ҹүр хәстәни сағалдан инсан кими таныјырдылар. Аллаһын Кәламында дејилир: «Иса... бүтүн хәстәләри сағалтды» (Мәтта 4:23, 24; 8:16; 11:2—5).

Гытлыг. Иса пејғәмбәр Аллаһын она вердији гүдрәтлә аз мигдарда гиданы чохалтмышды. Мүгәддәс Китабда дејилир ки, о, ики дәфә минләрлә инсаны дојурмушду (Мәтта 14:14—21; 15:32—38).

Өлүм. Мүгәддәс Китабда Иса пејғәмбәрин Аллаһдан алдығы гүдрәтлә үч нәфәри дирилтдијиндән данышылыр. Бу, ачыг-ашкар ҝөстәрир ки, Јеһова Аллаһ өлүмү јох етмәк гүдрәтиндәдир. Иса пејғәмбәр һәтта дөрд ҝүнүн өлүсүнү һәјата гајтармышды (Марк 5:35—42; Лука 7:11—16; Јәһја 11:3—44).