Дон вә Маргарет * гызынын өз аиләси илә онлара гонаг ҝәлдијинә ҝөрә чох севинирдиләр. Артыг тәгаүдә чыхан пешәкар ашпаз Маргарет нәвәләринин ән севдији јемәк олан пендирли макарон * һазырламышды.

Һамы сүфрә архасына әјләшәндә Маргарет јемәји ҝәтириб масанын ортасына гојур. Гапағы ачанда ҝөрүр ки, габда анҹаг гајнар пендир соусу вар. Маргарет әсас шеји, макарону унутмушду.

Јашдан вә тәҹрүбәдән асылы олмајараг һәр кәс сәһвә јол верир. Бу, дүшүнүлмәдән дејилән сөз вә ја јерсиз һәрәкәт ола биләр. Јахуд ола билсин нәјисә унуда, нәзәримиздән гачыра биләрик. Бәс сәһвә неҹә бахмалыјыг? Сәһв етмәмәк үчүн нә едә биләрик? Сәһвә дүзҝүн бахыш бу суаллара ҹаваб тапмаға көмәк едә биләр.

Нәјисә јахшы едәндә ешитдијимиз тәриф сөзләринә лајиг олдуғумузу дүшүнүрүк. Еләҹә дә сәһв едән заман, һәтта буну истәмәдән етмиш олсаг вә ја һеч кимин хәбәри олмаса белә, сәһвимизи бојнумуза алмаг һагда дүшүнмәли дејилик? Буну баҹармаг үчүн ҝәрәк гүрурлу олмајаг.

Әҝәр өзүмүз һагда јүксәк фикирдә олсаг, сәһвләримизи кичилдә, башгасынын үстүнә ата, јахуд үмумијјәтлә сәһв етдијимизи дана биләрик. Анҹаг бу, јахшы шејлә нәтиҹәләнмир. Чүнки проблем һәлл олунмамыш галыр вә кимсә әсассыз јерә иттиһам олунур. Һәтта бу ҝүн етдијимиз сәһвин нәтиҹәсиндән гача билсәк дә, унутмамалыјыг ки, ахырда «һәр биримиз өзүмүзә ҝөрә Аллаһа ҹаваб верәҹәјик» (Ромалылара 14:12).

Бәс Аллаһ сәһвләримизә неҹә јанашыр? Зәбур китабында дејилир ки, Јараданымыз «мәрһәмәт, шәфгәт саһибидир... даим нөгсан ахтармаз, әбәдијјән аҹыглы галмаз». Аллаһ бизим ҝүнаһлы, сәһв етмәјә мејилли олдуғумузу билир. О бизим неҹә јарандығымызы, «торпаг олдуғумузу унутмур» (Зәбур 103:8, 9, 14).

Рәһмли Аллаһымыз бизим дә сәһвләрә Онун кими јанашмағымызы истәјир (Зәбур 130:3). Онун Кәламы һәм өз сәһвләримизә, һәм дә башгаларынын сәһвинә дүзҝүн бахмаға көмәк едән мәсләһәтләрлә долудур.

Адәтән, инсан нәјисә дүз етмәјәндә сәһви башгасынын үстүнә атмаг, јахуд өзүнә бәраәт газандырмаг үчүн дәридән-габыгдан чыхыр. Мәҝәр киминсә хәтринә дәјәндә садәҹә үзр истәјиб сәһвимизи дүзәлтмәк вә мүнасибәтләри горумаг даһа јахшы олмаз? Сәһв һәрәкәтинизлә өзүнүзү вә ја кимисә пис вәзијјәтдә гојдуғунуз, јахуд даһа ҹидди проблемләрә сәбәб олдуғунуз һаллар олубму? Бу заман өзүнүзү гынамаг вә ја ҝүнаһы башгасынын үстүнә атмаг јеринә, бәлкә садәҹә вәзијјәти дүзәлтмәјә чалышасыныз? Сәһвин биздә олмадығыны дејиб-дурмаг ҝәрҝинлији артыра  вә проблеми чәтинләшдирә биләр. Онданса вәзијјәтә дүзҝүн јанашмағы өјрәнин, лазыми дүзәлишләр един вә мәсәләни унудун ҝетсин.

Башгасы сәһв едәндә ону иттиһам етмәк чох асандыр. Лакин бу заман Аллаһын Кәламындакы «инсанларын сизинлә неҹә рәфтар етмәсини истәјирсинизсә, сиз дә онларла елә рәфтар един» мәсләһәтинә әмәл етмәк даһа јахшы олар (Мәтта 7:12). Инсан өзү сәһв едәндә, һәтта бу кичик бир шеј олса белә, истәјир ки, башгалары она анлајыш ҝөстәрсин, јахуд үз вурмасын. Нијә дә өзүмүз башгаларына гаршы бу ҹүр давранмајаг? (Ефеслиләрә 4:32).

Инсанлар нә үчүн сәһвләрә јол верир? Бир лүғәтә әсасән, сәһвләр «јанлыш нәтиҹә чыхармаг, мәлумат азлығы, јахуд диггәтсизлик» уҹбатындан олур. Сөзсүз ки, бу проблем һамымызда вар. Амма јенә дә, сәһвләримизи азалтмаг мүмкүндүр. Аллаһын Кәламындакы принсипләр бизә бу саһәдә көмәк едә биләр.

Принсипләрдән бири Мәсәлләр 18:13 ајәсиндә гејд олунуб. Орада дејилир: «Динләмәдән ҹаваб вермәк сәфеһлик вә рәзилликдир». Доғрудан да, гаршы тәрәфин сөзүнү ахыра кими динләмәк вә ҹаваб вермәздән өнҹә дүшүнмәк тез өзүндән чыхмағын вә дүшүнүлмәмиш сөзләр ишләтмәјин гаршысыны алыр. Диггәтҹил олмағын сајәсиндә әлдә етдијиниз мәлумат сизи јанлыш нәтиҹә чыхармагдан вә сәһвә јол вермәкдән сахлајаҹаг.

Башга бир Мүгәддәс Китаб принсипи беләдир: «Имкан дахилиндә, әлиниздән ҝәлән гәдәр һамы илә сүлһдә олмаға чалышын» (Ромалылара 12:18). Хош мүнасибәти вә сүлһү горумаг үчүн әлиниздән ҝәләни един. Бирҝә ишләдијиниз шәхсләрә гаршы һөрмәтҹил, диггәтҹил олун, онлары тәрифләјин вә үрәкләндирин. Бу ҹүр аб-һавада дүшүнүлмәдән дејилән сөзүн, јахуд јерсиз һәрәкәтин үстүндән кечмәк вә ја бағышламаг, ҹидди инҹиклик јарананда исә мүнасибәтләри сүлһ јолу илә һәлл етмәк даһа асандыр.

Сәһвләриниздән дәрс чыхармағы өјрәнин. Өзүнүзә бәраәт газандырмаға чалышмаг әвәзинә, мөвҹуд вәзијјәтә өзүнүздә ҝөзәл хүсусијјәтләр јетишдирмәк имканы кими бахын. Бәлкә сизә даһа сәбирли, даһа хејирхаһ, даһа тәмкинли олмағы өјрәнмәк лазымдыр? Бәс мүлајим, сүлһпәрвәр вә ја мәһәббәтли олмаг неҹә? (Галатијалылара 5:22, 23). Ән азындан, ҝәлән дәфә бу кими вәзијјәтләрдә неҹә дүзҝүн давранмалы олдуғунузу биләҹәксиниз. Бивеҹ олмамаг шәртилә, чалышын һәр шеји чох ҹиддијә алмајасыныз. Ҝәрҝинлији азалтмағын ән јахшы үсулу јумор һиссидир.

Сәһвә дүзҝүн мүнасибәт бизә көмәк едәҹәк ки, бу ҹүр вәзијјәт јарананда проблеми хошлугла һәлл едәк. Беләҹә, һәм гәлбимиз раһат олаҹаг, һәм дә башгалары илә хош мүнасибәтдә олаҹағыг. Сәһвләримиздән нәтиҹә чыхармағы өјрәнмәк даһа дәрракәли олмаға вә инсанларын севҝисини газанмаға көмәк едәҹәк. Белә етсәк, нә өзүмүзү гынајар, нә дә руһдан дүшәрик. Башгаларынын да өз сәһвләри илә мүбаризә апардығыны нәзәрә алмаг онлара гаршы мүнасибәтимизи јахшылашдыраҹаг. Ән әсасы исә Аллаһын мәһәббәтини тәзаһүр етдирмәјин вә Онун кими бағышламаға һазыр олмағын бәһрәләрини дадаҹағыг (Колослулара 3:13).

Мәгаләнин әввәлиндә һаггында данышдығымыз Маргаретин сәһви уҹбатындан аиләнин кефи позулдуму? Јох, әлбәттә ки! Һамы, әләлхүсус да Маргарет о ки вар ҝүлдү. Онлар пендирли макаронун дадына макаронсуз бахдылар! Илләр сонра онун ики нәвәси бу унудулмаз гонаглығы өз өвладларына данышараг нәнә-бабалары илә бағлы хош хатирәләри јада салырдылар. Ахы бу, ади бир сәһв иди!