1, 2. Ҝөзүмүзү Јеһоваја дикмәк дејиләндә нә нәзәрдә тутулур?

БИЗ «сон дәрәҹә чәтин» бир вахтда јашајырыг. Јеһова бу пис системи мәһв едиб јер үзүндә сүлһү бәргәрар едәҹәји вахта гәдәр һәјатымыз даһа да чәтинләшәҹәк (2 Тим. 3:1). Одур ки, өзүмүзә нөвбәти суалы вермәк јеринә дүшәр: «Мәсләһәт вә көмәк үчүн ҝөзүмү кимә дикмишәм?» Әҝәр биз дәрһал «Јеһоваја» дејә ҹаваб веририксә, демәли, доғру јолдајыг.

² Ҝөзүмүзү Јеһоваја дикмәк дејиләндә нә нәзәрдә тутулур? Чәтин сынагларла үзләшән заман ҝөзүмүзү Јеһовадан чәкмәдијимизә неҹә әмин ола биләрик? Әсрләр өнҹә јашамыш бир мәзмурчу чәтин анларда көмәк үчүн Јеһоваја үз тутмағын ваҹиблијини вурғуламышды. (Зәбур 123:1—4 ајәләрини охујун.) О гејд етмишди ки, нөкәр ағасына бахдығы кими, биз дә Аллаһымыз Јеһоваја бахмалыјыг. Мәзмурчу бу сөзләрлә нәји нәзәрдә тутурду? Адәтән, нөкәр мүдафиә олунмаг вә доланышыг үчүн ҝөзүнү ағасына дикир. Һәмчинин ағасынын нә истәдијини билмәк вә бу истәји јеринә јетирмәк үчүн дә нөкәрин диггәти даима онда олмалыдыр. Ејнилә, биз дә һәр ҝүн Мүгәддәс Китабы охујараг Јеһованын биздән нә ҝөзләдијини өјрәнмәли вә Онун ҝөстәрдији јолла ҝетмәлијик. Јалныз бу тәгдирдә Јеһованын чәтин анларымызда бизә лүтф ҝөстәрәҹәјинә әмин ола биләрик (Ефес. 5:17).

3. Нәләр ҝөзүмүзү Јеһоваја дикмәјә мане ола биләр?

 ³ Ҝөзүмүзү Јеһоваја дикмәли олдуғумузу билсәк дә, бәзән диггәтимиз јајына биләр. Иса Мәсиһин јахын досту Марта белә бир вәзијјәтлә үзләшмишди. Онун «башы биш-дүшә бәрк гарышмышды» (Лука 10:40—42). Иса Мәсиһ јанында ола-ола Марта кими иманлы гадынын фикри јајындыса, бизимлә дә белә бир шејин баш вермәси истисна дејил. Нәләр ҝөзүмүзү Јеһоваја дикмәјә мане ола биләр? Бу мәгаләдә башгаларынын давранышларынын бизи неҹә јајындыра биләҹәјини арашдыраҹағыг. Һәмчинин өјрәнәҹәјик ки, ҝөзүмүзү даим Јеһоваја дикмәк үчүн нә едә биләрик.

4. Муса пејғәмбәрин Вәд едилмиш дијара ҝирә билмәмәси бизә нә үчүн тәәҹҹүблү ҝәлә биләр?

⁴ Муса пејғәмбәр мәсләһәт үчүн һәмишә Јеһоваја үз тутурду. Мүгәддәс Китабда дејилир ки, о, «Ҝөзәҝөрүнмәзи ҝөрүрмүш кими мәтин иди». (Ибраниләрә 11:24—27 ајәләрини охујун.) Һәмчинин јазылыб ки, «Исраилдә даһа һеч вахт Муса кими, Јеһованын үзбәсурәт таныдығы пејғәмбәр пејда олмады» (Ган. 34:10). Јеһова илә бу гәдәр јахын мүнасибәтләринин олмасына рәғмән, Муса пејғәмбәр Вәд едилмиш дијара ајаг баса билмәди (Сај. 20:12). Ҝөрәсән, о, һансы сәһвә јол вермишди?

5—7. Исраиллиләр Мисирдән чыхандан гыса мүддәт сонра һансы проблем јаранды вә Муса пејғәмбәр проблеми неҹә һәлл етди?

⁵ Исраиллиләрин Мисирдән чыхмасындан ики ај кечмәмиш ҹидди бир проблем јараныр. Сина дағына чата-чатда халг су гытлығындан ҝилејләнмәјә башлајыр. Онлар Муса пејғәмбәрә гаршы дејинирләр. Вәзијјәт о һәддә чатыр ки, пејғәмбәр Јеһоваја фәрјад едир: «Мән бу адамларла нејләјим? Бир аз да кечсә, мәни дашгалаг едәҹәкләр!» (Чых. 17:4). Јеһова она ајдын ҝөстәриш верәрәк дејир ки, әсасыны әлинә ҝөтүрүб Һурибдәки гајаја вурсун, бу заман гајадан су чыхаҹаг. «Муса Исраил ағсаггалларынын ҝөзү гаршысында» белә дә едир. Исраиллиләр дојунҹа су ичир вә проблем беләҹә һәлл олунур (Чых. 17:5, 6).

⁶ Мүгәддәс Китабдан охујуруг ки, Муса пејғәмбәр һәмин јерин адыны «сынаг» вә «мүнагишә» мәнасыны верән «Масаһ вә Мәриба гојду, чүнки исраиллиләр онунла далашмыш вә: “Јеһова бизим арамыздадыр, ја јох?” — дејәрәк Јеһованы сынамышдылар» (Чых. 17:7).

⁷ Мәрибада баш верәнләр Јеһоваја неҹә тәсир едир? Јеһова буну Муса пејғәмбәрә јох, Өзүнә вә һакимијјәтинә гаршы үсјан кими гәбул едир. (Зәбур 95:8, 9 ајәләрини охујун.) Исраиллиләр ачыг-ајдын сәһвә јол вермишдиләр. Лакин Муса пејғәмбәр дүзҝүн давранмыш, үзүнү Јеһоваја тутуб Ондан ҝәлән ҝөстәришә дәгигликлә әмәл етмишди.

8. Исраиллиләрин сәһрадакы гырхиллик сәјаһәтләринин сонуна јахын нә баш верди?

⁸ Бәс тәхминән гырх ил сонра ејни вәзијјәт јаранан заман нә баш верир? Будур, исраиллиләр сәһрадакы сәјаһәтләрини баша вурмаг үзрәдирләр. Онлар Вәд едилмиш дијарын сәрһәдјаны әразисиндә јерләшән Гәдисин јахынлығындадырлар. Ҹамаат јенә дә су гытлығындан ҝилејләндији үчүн бу әрази дә Мәриба адланыр * (Сај.  20:1—5). Лакин бу һадисә заманы Муса пејғәмбәр ҹидди сәһвә јол верир.

9. Јеһова Муса пејғәмбәрә һансы ҝөстәришләри вермишди, бәс о, нә етди? (Мәгаләнин әввәлиндәки шәклә бахын.)

⁹ Муса пејғәмбәр исраиллиләрин үсјанына неҹә јанашыр? О, јенә дә мәсләһәт үчүн Јеһоваја үз тутур. Лакин бу дәфә Јеһова она әсаны гајаја вурмағы бујурмур. Пејғәмбәрә әсасыны әлинә алмағы, ҹамааты гајанын өнүнә топламағы, сонра исә гајаја «су вер» демәји тапшырыр (Сај. 20:6—8). Лакин Муса пејғәмбәр белә етмир. Гајаја «су вер» демәкдәнсә, әсәбиләшәрәк орада топлашанларын үстүнә гышгырыр: «Ешидин, еј асиләр! Инди дејирсиниз биз сизин үчүн бу гајадан су чыхардаг?» Сонра о, бир јох, дүз ики дәфә әсаны гајаја вурур (Сај. 20:10, 11).

10. Јеһова Муса пејғәмбәрин һәрәкәтини неҹә гаршылады?

¹⁰ Јеһованын пејғәмбәрә аҹығы тутур, һәтта она гәзәбләнир (Ган. 1:37; 3:26). Аллаһ нә үчүн онун бу һәрәкәтини белә гаршылајыр? Бир нечә сәбәбә ҝөрә. Ола билсин, сәбәбләрдән бири пејғәмбәрин Јеһованын вердији ҝөстәришә итаәт етмәмәси иди.

11. Муса пејғәмбәрин әсаны гајаја вурмасы Јеһованын мөҹүзәсини һансы мәнада пуч едә биләрди?

¹¹ Диҝәр бир еһтимал да вар. Илк һадисәнин баш вердији Мәриба әразисиндәки гајалар мөһкәм гранитдән иди. Бу гранитләрә нә гәдәр мөһкәм зәрбә илә вурулса да, су чыхма еһтималы јох иди. Лакин икинҹи Мәрибанын әтрафындакы сылдырым гајалар олдугҹа фәргли иди. Онлар әсасән көврәк әһәнҝдашындан ибарәт иди. Әһәнҝдашы мәсамәли олдуғу үчүн онун алтында јералты су һөвзәләри јығылыр вә бу гајаларда ојуг ачмагла су әлдә етмәк олур. Бәлкә дә, Муса пејғәмбәр гајаја ики дәфә вурдуғуна ҝөрә исраиллиләр сујун Јеһованын көмәјилә јох, тәбии јолла чыхдығыны иддиа едә биләрдиләр. Демәк олармы ки, гајаја су вермәсини демәк әвәзинә, она әсајла вурмагла Муса бир нөв мөҹүзәни пуч етди? * Бәлкә дә. Амма буну дәгиг дејә билмәрик.

12. Јеһова Муса пејғәмбәрә вә Һаруна башга һансы сәбәбә ҝөрә гәзәбләнмишди?

¹² Јеһованын Муса пејғәмбәрә вә гардашы Һаруна гәзәбләнмәсинин даһа бир сәбәби вар. Ҝөрүн пејғәмбәр ҹамаата нә дејир: «Инди дејирсиниз биз сизин үчүн бу гајадан су чыхардаг?» Муса пејғәмбәр «биз» дејәркән, еһтимал ки, Һарунла өзүнү нәзәрдә тутурду. Онун бу сөзләри мөҹүзәнин мәнбәји олан Јеһоваја гаршы бөјүк һөрмәтсизлик иди. Зәбур 106:32, 33 ајәләриндә јазылыб: «Мәриба суларында Ону һирсләндирдиләр, онларын уҹбатындан Муса зәрәр чәкди. Ону әсәбиләшдирдиләр, о да дүшүнмәдән данышды» * (Сај. 27:14). Бу давранышы илә Муса пејғәмбәр Јеһоваја лајиг олдуғу шәрәфи вермәди. Јеһова Муса илә Һаруна деди: «Икиниз дә Мәним әмримә гаршы чыхдыныз» (Сај. 20:24). Бу, чох ҹидди сәһв иди!

13. Нәјә әсасән дејә биләрик ки, Јеһованын Муса пејғәмбәрә чыхардығы һөкм әдаләтли иди?

 ¹³ Муса пејғәмбәр вә гардашы Һарун Јеһованын халгына рәһбәрлик етдији үчүн онларын үзәринә бөјүк мәсулијјәт дүшүрдү (Лука 12:48). Исраиллиләр илләр өнҹә үсјанкарлыг етдикләринә ҝөрә Јеһова онларын бүтөв бир нәслинин Кәнан дијарына дахил олмасына изин вермәмишди (Сај. 14:26—30, 34). Одур ки, асилијинә ҝөрә Муса пејғәмбәр һагда да ејни гәрары чыхармаг әдаләтли иди. Беләҹә, диҝәр үсјанкарлар кими, о да Вәд едилмиш дијара дахил олмаг имканындан мәһрум олду.

14, 15. Муса пејғәмбәрин асилијинә сәбәб нә иди?

¹⁴ Муса пејғәмбәрин асилик етмәсинә нә сәбәб олду? Зәбур 106:32, 33 ајәләринә бир даһа диггәт јетирәк: «Мәриба суларында Ону һирсләндирдиләр, онларын уҹбатындан Муса зәрәр чәкди. Ону әсәбиләшдирдиләр, о да дүшүнмәдән данышды». Исраиллиләр Јеһоваја гаршы дејинсәләр дә, әсәбиләшән Муса пејғәмбәр олду. О, тәмкинини горумадығы үчүн дүшүнмәдән данышды.

¹⁵ Муса пејғәмбәр илк һадисәдә дүзҝүн давранса да, еһтијаты әлдән верди, башгаларынын сәһви онун диггәтини Јеһовадан јајындырды (Чых. 7:6). Бәлкә дә, о, узун илләр әрзиндә бу үсјанкар гөвмүн әлиндән безиб, тәнҝә ҝәлдији үчүн белә давранды. Ола билсин, бу дәфә о, Јеһованы неҹә шәрәфләндирәҹәји барәдә јох, өз һиссләри барәдә дүшүнмүшдү.

16. Муса пејғәмбәрин һәрәкәти нә үчүн бизә ибрәт олмалыдыр?

¹⁶ Әҝәр Муса пејғәмбәр кими сәдагәтли бир шәхсин диггәти јајындыса вә о, сәһвә јол вердисә, бизимлә дә белә бир шеј асанлыгла баш верә биләр. Муса пејғәмбәр Вәд едилмиш дијарын бир аддымлығында иди. Бу ҝүн биз дә Јеһованын вәд етдији јени дүнјаја дахил олмаг үзрәјик (2 Бут. 3:13). Әлбәттә, һеч биримиз бу имкандан мәһрум олмаг истәмәздик. Одур ки, амалымыза чатмаг үчүн ҝөзүмүзү Јеһоваја дикмәли, даим Онун истәдији кими давранмалыјыг (1 Јәһ. 2:17). Бәс Муса пејғәмбәрин сәһвиндән һансы ибрәти ҝөтүрмәлијик?

17. Чәтин вәзијјәтдә тәмкинимизи горумаға нә көмәк едәҹәк?

¹⁷ Тәмкининизи позмајын. Ејни проблемлә дәфәләрлә үзләшсәк дә, «ҝәлин јахшы иш ҝөрмәкдән јорулмајаг, чүнки тагәтдән дүшмәсәк, вахтында бичәҹәјик» (Гал. 6:9; 2 Салон. 3:13). Хошаҝәлмәз вәзијјәтлә үзләшәндә, ејни адамла дәфәләрлә арамызда мүбаһисә јарананда дилимизи вә һиссләримизи нәзарәтдә сахлајырыгмы? (Мәс. 10:19; 17:27; Мәт. 5:22). Киминсә һәрәкәти бизи әсәбиләшдирәндә «Аллаһын гәзәбинә» јер вермәји өјрәнмәлијик. (Ромалылара 12:17—21 ајәләрини охујун.) Сәбирлә ҝөзләмәлијик ки, Јеһова лазым биләндә мәсәләни јолуна гојсун. Бунунла Јеһоваја һөрмәт етдијимизи, Онун гәзәбинә јер вердијимизи ҝөстәрәҹәјик. Бунун әксинә давраныб, һәр һансы јолла гисасы өзүмүз алмаға чалышсаг, Јеһоваја гаршы һөрмәтсизлик едәҹәјик.

18. Ҝөстәришләрә әмәл етмәклә бағлы нәји јадда сахламалыјыг?

¹⁸ Ән сон ҝөстәришләрә дәгигликлә әмәл един. Јеһованын бизә вердији  ән сон ҝөстәришләрә әмәл едирик? Әҝәр итаәткарлыг ҝөстәририксә, онда әввәлки гајда илә ҝетмәјәҹәјик. Әксинә, Јеһованын тәшкилаты васитәсилә вердији јени ҝөстәришләрә дәрһал ујғунлашаҹағыг (Ибр. 13:17). Һәмчинин еһтијатлы олмалыјыг ки, «јазыланлардан кәнара чыхма»јаг (1 Кор. 4:6). Белә етмәклә ҝөзүмүзү Јеһоваја дикдијимизи ҝөстәрәҹәјик.

19. Башгаларынын сәһвинин Јеһова илә достлуг мүнасибәтләримизи корламамасы үчүн нә едә биләрик?

¹⁹ Башгаларынын сәһвинин Јеһова илә достлуғунузу позмасына имкан вермәјин. Ҝөзүмүзү Јеһовадан чәкмәсәк, башгаларынын һәрәкәтләринин бизи әсәбиләшдирмәсинә вә Јеһова илә мүнасибәтләримизи позмасына изин вермәјәҹәјик. Бу, хүсусилә Муса пејғәмбәр кими Аллаһын тәшкилатында мүәјјән мәсулијјәтләри олан инсанлара аиддир. Дүздүр, һәр биримиз «горху вә еһтирамла хиласа јетишмәјә» чалышмалыјыг (Филип. 2:12). Амма ејни заманда унутмамалыјыг ки, Јеһова сабит, дәјишмәз бир ганун тәјин едәрәк һамыны бу ганун әсасында мүһакимә етмир. Мәсулијјәтимиз нә гәдәр чохдурса, ҹавабдеһлијимиз дә бир о гәдәр чохдур (Лука 12:48). Лакин әҝәр Јеһоваја бөјүк мәһәббәтимиз варса, һеч нә бизи бүдрәтмәјәҹәк вә һеч бир шеј бизи Онун мәһәббәтиндән ајырмајаҹаг (Зәб. 119:165; Ром. 8:37—39).

20. Нәјә гәтијјәтли олмалыјыг?

²⁰ Биз чох чәтин зәманәдә јашајырыг. Буна ҝөрә ҝөзүмүзү «ҝөјләрдә тахт гуран» Јеһова Аллаһа дикмәлијик ки, даима Онун ирадәсинә ујғун даврана биләк. Гој башгаларынын давранышы Јеһова илә мүнасибәтләримизи корламасын. Муса пејғәмбәрлә баш верәнләр бизә бунун нә гәдәр ваҹиб олдуғуну бир даһа хатырлатды. Башгаларынын гејри-камиллијинә чох һәссас јанашмаг әвәзинә, ҝәлин ҝөзүмүзү Аллаһымыз Јеһоваја дикиб Ондан лүтф ҝөзләјәк (Зәб. 123:1, 2).