1, 2. а) Өлүмүндән өнҹә Иса Мәсиһ шаҝирдләринә нә сөјләмишди? (Мәгаләнин әввәлиндәки шәклә бахын.) б) Тәблиғ етмәјимизин сәбәбини нә үчүн унутмамалыјыг? ҹ) Бу мәгаләдә нә мүзакирә олунур?

ИСА МӘСИҺ һәвариләри илә кечирдији сонунҹу ҝеҹә онларла узун-узады сөһбәт етмиш, онлары чох севдијини демишди. Һәмчинин өтән мәгаләдә бәһс етдијимиз мејнә мәсәлини чәкмишди. Мәсиһ бу мәсәл васитәсилә һәвариләрини бундан сонра да чохлу бар вермәјә, јәни Аллаһын Падшаһлығы һагда хош хәбәри дөзүмлә тәблиғ етмәјә тәшвиг етмишди (Јәһ. 15:8).

² Бунунла белә, Иса Мәсиһ һәвариләринә тәкҹә нә етмәли олдугларыны јох, буну нә үчүн етмәли олдугларыны да сөјләмишди. Һәвариләринин бундан сонра да тәблиғ едә билмәләри үчүн әсаслы сәбәбләр ҝәтирмишди. Бу сәбәбләри биз дә јадда сахласаг, халгларын һамысына дөзүмлә шәһадәт вермәјә тәшвиг олунаҹағыг (Мәт. 24:13, 14). Одур ки, ҝәлин ҝөрәк Мүгәддәс Китабда тәблиғ етмәјимизин һансы дөрд сәбәби ҝөстәрилир вә Јеһова һансы дөрд әнам васитәсилә бизә дөзүмлә бәһрә вермәјә көмәк едир.

3. а) Јәһја 15:8 ајәсиндә тәблиғ етмәјимизин һансы сәбәби гејд олунуб? б) Иса Мәсиһин мејнә һагда мәсәлиндә үзүм нәјин тимсалыдыр вә нә үчүн бу, јериндә олан мүгајисәдир?

³ Тәблиғ етмәјимизин башлыҹа сәбәби инсанлар гаршысында Јеһоваја шәрәф ҝәтирмәк вә Онун адыны мүгәддәс тутмагдыр. (Јәһја 15:1, 8 ајәләрини охујун.) Иса Мәсиһ мејнә һагда мәсәлиндә демишди ки, бағбан Јеһованын, мејнә (үзүм тәнәји) өзүнүн, будаглар исә онун давамчыларынын тимсалыдыр (Јәһ. 15:5). Демәли, үзүмләр Мәсиһин давамчыларынын ҝәтирдији бәһрәнин, јәни тәблиғ ишинин тимсалыдыр. Мәсиһ һәвариләринә демишди: «Сиз чохлу бар верәндә... Атам шәрәфләнир». Јахшы мәһсул вермиш мејнә бағбана башуҹалығы ҝәтирдији кими, биз дә әлимиздән ҝәләни едиб Падшаһлыг мүждәсини ҹар чәкәндә Аллаһа шәрәф ҝәтиририк (Мәт. 25:20—23).

4. а) Аллаһын адыны неҹә мүгәддәс тута биләрик? б) Аллаһын адыны мүгәддәс тутмаг шәрәфи сиздә һансы һиссләр доғурур?

⁴ Бәс тәблиғ иши илә Аллаһын адынын мүгәддәс тутулмасы арасында һансы әлагә вар? Аллаһын ады мүтләг мәнада мүгәддәсдир вә биз Онун адыны даһа да мүгәддәсләшдирә билмәрик. Бунунла белә, Әшија пејғәмбәрин дедикләринә диггәт јетирәк: «Сиз ордулар Аллаһы Јеһова[ны]... мүгәддәс тутун!» (Әшј. 8:13). Аллаһын адыны мүгәддәс тутдуғумузу ҝөстәрмәјин бир јолу бу ады бүтүн адлардан уҹа тутмаг вә инсанлара бу ады мүгәддәс тутмаға көмәк етмәкдир (Мәт. 6:9). Мәсәлән, Јеһова Аллаһын үлви сифәтләри, бәшәријјәтлә бағлы дәјишмәз нијјәти барәдә һәгигәти бәјан едәндә Онун адыны Шејтанын бөһтанларындан мүдафиә едирик (Јар. 3:1—5). Һәмчинин әразимиздәки инсанлара Јеһованын «шана, шәрәфә, гүдрәтә» лајиг олдуғуну ҝөстәрмәклә дә Онун адыны мүгәддәс тутмуш олуруг (Вәһј 4:11). 16 илдир өнҹүл олан Руне адлы гардашымыз дејир: «Дүшүнәндә ки, мәнә Каинатын Јараданы барәдә данышмаг шәрәфи нәсиб олуб, гәлбим шүкранла долур. Бу һисс тәблиғ етмәк истәјими даһа да артырыр».

5. а) Јәһја 15:9, 10 ајәләриндә тәблиғ етмәјимизин һансы сәбәби ҝөстәрилир? б) Иса Мәсиһ давамчыларынын дөзүм ҝөстәрмәли олаҹағыны неҹә вурғуламышды?

⁵ Јәһја 15:9, 10 ајәләрини охујун. Тәблиғ етмәјимизин диҝәр ваҹиб сәбәби Јеһоваја вә Иса Мәсиһә дујдуғумуз дәрин мәһәббәтдир (Марк 12:30; Јәһ. 14:15). Иса Мәсиһ шаҝирдләринә демишди ки, онун мәһәббәтини горујуб-сахласынлар. О, нәјә ҝөрә белә демишди? Чүнки илләр боју Исанын давамчысы олараг јашамаг үчүн дөзүм лазымдыр. Мәсиһ шаҝирдләринә дөзүмүн лазым олаҹағыны вурғуламаг үчүн Јәһја 15:4—10 ајәләриндә «галын», «итирмәјин», «горујуб-сахлајын» кими сөзләр истифадә етмишди.

6. Мәсиһин мәһәббәтини горујуб-сахламаг истәјимиз нәдән ҝөрүнәҹәк?

⁶ Мәсиһин мәһәббәтини вә рәғбәтини горујуб-сахламаг истәјимиз нәдән ҝөрүнәҹәк? Онун ҝөстәришләринә итаәт етмәјимиздән. Иса «мән Атамын әмрләрини јеринә јетирәрәк Онун мәнә олан мәһәббәтини горудуғум кими» сөзләри илә ҝөстәрир ки, о, бизә бујурдуғу шеји өзү дә едирди. Мәсиһ бизим үчүн ҝөзәл нүмунә гојуб (Јәһ. 13:15).

7. Итаәткарлыг вә мәһәббәт бир-бирилә неҹә әлагәлидир?

⁷ Иса Мәсиһ шаҝирдләринә итаәткарлығын вә мәһәббәтин бир-бирилә бағлы олдуғуну нөвбәти сөзләрлә ҝөстәрмишди: «Мәни севән адам мәним әмрләрими гәбул едиб онлара әмәл едир» (Јәһ. 14:21). Иса Мәсиһин  тәблиғ етмәк ҝөстәришинә итаәт едәндә биз һәм дә Аллаһа мәһәббәтимизи ҝөстәрмиш олуруг, чүнки Исанын ҝөстәришләри Атасынын нијјәтини әкс етдирир (Мәт. 17:5; Јәһ. 8:28). Бизим Јеһоваја вә Иса Мәсиһә ҝөстәрдијимиз мәһәббәтин гаршылығында онлар да бизә олан мәһәббәтләрини горујуб-сахлајырлар.

8, 9. а) Тәблиғ етмәјимизин даһа һансы сәбәби вар? б) Һизгијал 3:18, 19 вә 18:23 ајәләриндәки сөзләр тәблиғ хидмәтимизи давам етдирмәјә неҹә тәкан верир?

⁸ Тәблиғ етмәјимизин башга бир сәбәби Јеһованын јахынлашан ҝүнү барәдә инсанлары хәбәрдар етмәкдир. Мүгәддәс Китабда «салеһлик ҹарчысы» адланан Нуһ пејғәмбәр шүбһәсиз ки, Дашгындан өнҹә инсанлары јахынлашан фәлакәт барәдә хәбәрдар едирди. (2 Бутрус 2:5 ајәсини охујун.) Буну һарадан билирик? Исанын дедији сөзләрә диггәт јетирәк: «О вахт, дашгындан әввәл, Нуһ ҝәмијә минәнә гәдәр ҹамаат јејир, ичир, евләнир, әрә ҝедирди. Дашгын ҝәлиб онларын һамысыны апармајынҹа һеч нәјә мәһәл гојмурдулар. Инсан Оғлунун һүзуру заманы да белә олаҹаг» (Мәт. 24:38, 39). Инсанлар Нуһ пејғәмбәрин ҹар чәкдији хәбәрә лагејд мүнасибәт ҝөстәрсәләр дә, о, усанмадан тәблиғ етмәјә давам едирди.

⁹ Бу ҝүн Аллаһын Падшаһлығы һагда мүждәни бәјан етмәјимизин сајәсиндә инсанларын Аллаһын бәшәријјәтлә бағлы нијјәтини өјрәнмәк имканы јараныр. Јеһова Аллаһын истәјинә ујғун олараг, биз дә инсанларын хош хәбәрә һај вериб әбәди јашамасыны истәјирик (Һизг. 18:23). Һәмчинин ев-ев вә иҹтимаи јерләрдә тәблиғ етмәклә мүмкүн гәдәр чох инсаны Аллаһын Падшаһлығынын тезликлә бу аллаһсыз дүнјаны мәһв едәҹәји барәдә хәбәрдар едирик (Һизг. 3:18, 19; Дән. 2:44; Вәһј 14:6, 7).

10. а) Мәтта 22:39 ајәсиндә тәблиғ етмәјимизин һансы сәбәби ҝөстәрилир? б) Филиппи шәһәриндә Булус вә Силанын ҝөзәтчијә неҹә көмәк етдијини нәгл един.

¹⁰ Тәблиғ етмәјимизин даһа бир ваҹиб сәбәби башгаларыны севмәјимиздир (Мәт. 22:39). Мәһәббәт бизи бундан сонра да дөзүмлә тәблиғ етмәјә тәшвиг едир. Чүнки шәраит дәјишәндә инсанын мүнасибәтинин дә дәјишә биләҹәјини билирик. Һәвари Булусун вә әмәкдашы Силанын башына ҝәләнләри јадымыза салаг. Филиппи шәһәриндә оланда әлејһдарлары онлары һәбсә атыр. Ҝеҹәјарысы гәфил зәлзәлә баш верир, һәбсхана силкәләнир вә гапылар тајбатај ачылыр. Ҝөзәтчи дустагларын гачдығыны саныб өзүнү өлдүрмәјә ҹәһд едир. Бу заман Булус гышгырыр: «Ҹанына гыјма». Сонра ҝөзәтчи тәшвиш ичиндә сорушур: «Нә едим ки, хилас олум?» Онлар ҝөзәтчијә дејирләр: «Исаја иман ет, онда сән дә, евиндәкиләр дә хилас олаҹагсыныз» (Һәв. 16:25—34).

11, 12. а) Һәбсхана ҝөзәтчиси илә бағлы һадисәни хидмәтимизә неҹә тәдбиг етмәк олар? б) Һансы иши ҝөрмәјә һазыр олмаг истәјирик?

¹¹ Һәбсхана ҝөзәтчиси илә бағлы һадисәни хидмәтимизә неҹә тәдбиг етмәк олар? Диггәт јетирин ки, ҝөзәтчи зәлзәлә баш верәндән сонра фикрини дәјишәрәк көмәк истәмишди. Ејнилә, бу ҝүн хош хәбәрә һај  вермәјән бәзи инсанлар онлары гәфил силкәләјән һадисәләрлә үзләшәндә фикирләрини дәјишиб көмәк ахтара биләрләр. Мисал үчүн, ола билсин, кимсә узун мүддәт ишләдији иши итирдији үчүн сарсылыб, кимисинин тәзәликҹә аиләси дағылыб. Бир башгасы ағыр хәстәлијә тутулдуғуну өјрәниб вә ја әзизини итирдији үчүн пәришандыр. Бу кими һадисәләрлә үзләшәндә бәзиләри һәјатын мәнасы үзәриндә дүшүнмәјә башлајыр. Бәлкә дә, кимсә һәбсхана ҝөзәтчиси кими, «Нә едим ки, хилас олум?» суалыны верир. Белә инсанларла гаршылашанда, ола билсин, онлар өмүрләриндә илк дәфә хош хәбәрә гулаг асмаг истәсинләр.

¹² Бу сәбәбдән, хидмәт ишимизи сәдагәтлә давам етдирсәк, инсанларын бизи динләмәјә һазыр олдуғу вахт онлара тәсәлли верә биләҹәјик (Әшј. 61:1). 38 илдир тамвахтлы хидмәтдә олан Шарлотта баҹы дејир: «Бу ҝүн инсанлар чох чарәсиздир. Онлар хош хәбәри ешитмәјә мөһтаҹдырлар». 34 илдир өнҹүл кими хидмәт едән Ејвор баҹы дејир: «Инсанлар һеч вахт бу гәдәр сыхынты ичиндә олмајыблар. Онлара көмәк етмәји чох истәјирәм. Бу, мәни тәблиғ етмәјә тәшвиг едир». Инсанлара дујдуғумуз севҝи тәблиғ хидмәтини давам етдирмәјимиз үчүн чох ҝүҹлү сәбәбдир!

13, 14. а) Јәһја 15:11 ајәсиндә һансы әнамдан бәһс олунур? б) Иса Мәсиһин дујдуғу севинҹи неҹә дуја биләрик? ҹ) Севинҹ һисси хидмәтимизә неҹә тәсир едир?

¹³ Иса Мәсиһ һәвариләри илә кечирдији сонунҹу ҝеҹә онлара алаҹаглары әнамлардан данышмышды. Бу әнамлар сајәсиндә онлар дөзүмлә бәһрә верә биләҹәкдиләр. Сөһбәт һансы әнамлардан ҝедир? Бу әнамлардан биз неҹә јарарлана биләрик?

¹⁴ Севинҹ әнамы. Иса Мәсиһин тәблиғ етмәк тапшырығыны јеринә јетирмәји јүк һесаб етмәлијик? Гәтијјән. Мејнә һаггында мәсәли чәкдикдән сонра о, Аллаһын Падшаһлығынын ҹарчыларынын севинҹ әлдә едәҹәкләрини демишди. (Јәһја 15:11 ајәсини охујун.) Иса Мәсиһ бизи әмин едир ки, онун дујдуғу севинҹи биз дә дуја биләрик. Бу, неҹә мүмкүндүр? Јухарыда гејд олундуғу кими, Мәсиһ өзүнү мејнәјә, шаҝирдләрини исә будаглара бәнзәтмишди. Нә гәдәр ки будаг мејнәјә бағлыдыр, о, мејнәдән су вә гидалы маддәләр алыр. Буна бәнзәр шәкилдә, Мәсиһин изләри илә ҝедиб онунла вәһдәтдә галсаг, онун Аллаһын ирадәсини јеринә јетирмәкдән дујдуғу севинҹи биз дә дујаҹағыг (Јәһ. 4:34; 17:13; 1 Бут. 2:21). 40 илдән чохдур өнҹүл кими хидмәт едән Һанни баҹы дејир: «Һәр дәфә тәблиғ едәндән сонра дујдуғум севинҹ һисси мәнә Јеһоваја хидмәтими давам етдирмәјә стимул верир». Доғрудан да, дујдуғумуз севинҹ бизә һәтта лагејдликлә үзләшдијимиз әразиләрдә белә, тәблиғ етмәјә ҝүҹ верир (Мәт. 5:10—12).

15. а) Јәһја 14:27 ајәсиндә һансы әнамдан бәһс олунур? б) Нә үчүн сүлһ әнамы бәһрә вермәјә көмәк едир?

¹⁵ Сүлһ әнамы. (Јәһја 14:27 ајәсини охујун.) Һәвариләри илә кечирдији сонунҹу ҝеҹә Иса демишди: «Өз сүлһүмү сизә бағышлајырам». Мәсиһин бағышладығы бу сүлһ әнамы бәһрә вермәјә неҹә көмәк едир? Дөзүмлә тәблиғ едәндә биз дахилимиздә сүлһ һисси, гәлб раһатлығы дујуруг, чүнки билирик ки, Јеһова вә Мәсиһ биздән разыдыр (Зәб. 149:4; Ром. 5:3, 4; Кол. 3:15). Өмрүнүн 45 илини тамвахтлы хидмәтдә кечирән Улф гардаш дејир: «Тәблиғ хидмәти һәјатыма әсл мәна вә мәмнунлуг бәхш едир, бахмајараг ки, чох јорулурам». Бизә һәгиги гәлб раһатлығы бәхш едән Аллаһымыз Јеһоваја шүкүрләр олсун!

16. а) Јәһја 15:15 ајәсиндә һансы әнамдан данышылыр? б) Һәвариләр Мәсиһин достлары олараг галмаг үчүн нә етмәли идиләр?

 ¹⁶ Достлуг әнамы. Гәлбиндәки севинҹи һәвариләринин дә там дујмасыны истәдијини дедикдән сонра Иса Мәсиһ онлара фәдакар мәһәббәт ҝөстәрмәјин ваҹиблијини баша салмышды (Јәһ. 15:11—13). Даһа сонра о гејд етмишди: «Мән сизә дост дејирәм». Иса Мәсиһин досту олмаг неҹә дә бөјүк шәрәфдир! Һәвариләр бу достлуғу горумаг үчүн нә етмәли идиләр? Онлар даима бар ҝәтирмәли идиләр. (Јәһја 15:14—16 ајәләрини охујун.) Бундан тәхминән ики ил әввәл Иса һәвариләринә бујурмушду: «Ҝетдијиниз јерләрдә: “Сәмави Падшаһлыг јахынлашыб”, — дејәрәк тәблиғ един» (Мәт. 10:7). Инди, о, һәвариләри илә кечирдији сонунҹу ҝеҹә онлары башладыглары иши давам етдирмәјә тәшвиг едир (Мәт. 24:13; Марк 3:14). Мәсиһин бу тапшырығыны иҹра етмәк асан дејилди, амма һәвариләр бунун өһдәсиндән ҝәлә вә беләҹә, Мәсиһин досту олараг гала биләрдиләр. Неҹә? Башга бир әнамын көмәји сајәсиндә.

17, 18. а) Јәһја 15:16 ајәсиндә һансы әнамдан данышылыр? б) Бу әнам Исанын давамчыларына неҹә көмәк етмишди? ҹ) Бизи һансы әнамлар мөһкәмләндирир?

¹⁷ Дуалара ҹаваб әнамы. Иса Мәсиһ демишди: «Атам мәним адымла диләдијиниз һәр шеји сизә [верәҹәк]» (Јәһ. 15:16). Сөзсүз ки, бу вәд һәвариләри мөһкәмләндирмишди! * Һәвариләр Мәсиһин тезликлә өләҹәјини там дәрк етмирдиләр. Буна ҝөрә дә Ағалары өлән заман онлар өзләрини көмәксиз һисс едә биләрдиләр, лакин онлар тәк дејилдиләр. Һәвариләр Падшаһлыг мүждәсини тәблиғ етмәк үчүн еһтијаҹ дујдуглары истәнилән көмәк барәдә Јеһоваја дуа едә биләрдиләр. Јеһова һәмишә онларын дуаларына ҹаваб вермәјә һазыр иди. Чох кечмәдән һәвариләр дуаларына алдыглары ҹавабы өз ҝөзләри илә ҝөрдүләр (Һәв. 4:29, 31).

¹⁸ Бу ҝүн дә беләдир. Дөзүмлә бәһрә ҝәтирсәк, Мәсиһлә достлуғумузу горујаҹағыг. Бундан әлавә, әмин ола биләрик ки, Јеһова Падшаһлыг һагда мүждәни тәблиғ едән заман гаршылашдығымыз истәнилән манеәни ашмаг үчүн диләдијимиз дуалара ҹаваб вермәјә һазырдыр (Филип. 4:13). Дуаларымыза ҹаваб алмаг вә Иса Мәсиһин досту олмаг бизим үчүн бөјүк шәрәфдир! Јеһовадан алдығымыз бу әнамлар бундан сонра да бәһрә вермәк үчүн бизи мөһкәмләндирир (Јаг. 1:17).

19. а) Нә үчүн тәблиғ хидмәтини давам етдиририк? б) Аллаһын тапшырығыны баша чатдырмаға бизә нә көмәк едир?

¹⁹ Бу мәгаләдә тәблиғ ишини давам етдирмәјин 4 сәбәбини арашдырдыг. Өјрәндик ки, тәблиғ етмәклә 1) Јеһоваја шәрәф ҝәтирир вә адынын мүгәддәс тутулмасына вәсилә олуруг, 2) Јеһоваја вә Иса Мәсиһә мәһәббәтимизи ҝөстәририк, 3) инсанлары Аллаһын ҝүнүн јахынлашмасы барәдә хәбәрдар едирик, 4) инсанлара севҝимизи ҝөстәририк. Һәмчинин севинҹ, сүлһ, достлуг вә дуалара ҹаваб әнамлары һаггында өјрәндик. Бу әнамлар Аллаһын тапшырығыны иҹра етмәк әзмимизи даһа да мөһкәмләндирир. Дөзүмлә бәһрә вермәк үчүн әлимиздән ҝәләни етмәјимиз Јеһова Аллаһ үчүн чох хошдур!