1, 2. а) Инсанларын һәгигәтә етинасыз јанашдығы әразиләрдә сәдагәтлә хидмәт едәнләр биздә һансы һиссләр доғурур? (Мәгаләнин әввәлиндәки шәклә бахын.) б) Иса Мәсиһ өз јурдунда тәблиғ едәнләр барәдә нә демишди? (Һашијәјә бахын.)

СЕРЖО ВӘ ОЛИНДА Бирләшмиш Штатларда јашајан 80 јашлы өнҹүлләрдир. Тәзәликҹә јаранан ајаг ағрыларына ҝөрә онлар чох јеријә билмирләр. Буна рәғмән, онлар илләр әввәл олдуғу кими, һәлә дә сәһәрләр саат 7-дә шәһәр мејданына ҝәлирләр. Онлар автобус дајанаҹағы јахынлығында дајаныб, ҝәлиб-ҝедәнләрә Мүгәддәс Китаба әсасланан нәшрләримизи тәклиф едирләр. Инсанларын әксәријјәти онлара етинасыз јанашыр. Бунунла белә, Сержо вә Олинда орада дајаныб онлара тәрәф баханлара ҝүлүмсәјирләр. Ҝүнорта саатларында исә ҝәзә-ҝәзә евә гајыдырлар. Нөвбәти ҝүн сәһәр саат 7-дә јенә мејдана ҝәлирләр. Беләҹә, онлар ил боју һәфтәнин алты ҝүнү хош хәбәри мүждәләјирләр.

² Сержо вә Олинда кими бир чох баҹы-гардашларымыз инсанларын хош хәбәрә биҝанә јанашдығы әразиләрдә узун илләрдир тәблиғ  едир. Әҝәр сиз дә белә әразиләрдә хидмәт едирсинизсә, дөзүмүнүзә ҝөрә сизи үрәкдән тәрифләмәк истәјирик *. Сизин Јеһоваја хидмәтдә әзминиз баҹы-гардашлара, һәтта тәҹрүбәли диндашларыныза да гол-ганад верир. Ҝөрүн бәзи рајон нәзарәтчиләри нә дејир: «Бу ҹүр сәдагәтли баҹы-гардашларла тәблиғ етмәк мәнә стимул верир», «Онларын садиглији мәни хидмәтимдә гәтијјәтли вә ҹәсарәтли олмаға тәшвиг едир», «Белә баҹы-гардашларын нүмунәси гәлбими риггәтә ҝәтирир».

3. Һансы үч суалы нәзәрдән кечирәҹәјик вә нәјә ҝөрә?

³ Бу мәгаләдә үч суала ҹаваб тапаҹағыг: Бизи нә руһдан сала биләр? Бәһрә ҝәтирмәк нә демәкдир? Дөзүмлә бәһрә ҝәтирмәјә бизә нә көмәк едәҹәк? Бу суаллары арашдырмаг Иса Мәсиһин һәвалә етдији тәблиғ ишини тамамламаг гәтијјәтимизи мөһкәмләндирәҹәк.

4. а) Јәһудиләрин мәнфи мүнасибәти Булуса неҹә тәсир едирди? б) Булус нә үчүн белә һиссләр кечирирди?

⁴ Тәблиғ етдијиниз әразидә инсанлар хош хәбәрә һај вермирсә, чох ҝүман ки, һәвари Булусун һиссләрини јахшы баша дүшүрсүнүз. Тәхминән 30 иллик хидмәти боју Булус чох инсана Мәсиһин давамчысы олмаға көмәк етмишди (Һәв. 14:21; 2 Кор. 3:2, 3). Бунунла белә, о, јәһудиләри һәгигәтә ҝәтирмәкдә о гәдәр дә мүвәффәгијјәт газанмамышды. Һәтта чохлары она гәти гаршы чыхыр вә тәгиб едирдиләр (Һәв. 14:19; 17:1, 4, 5, 13). Јәһудиләрин бу гәрәзли мүнасибәти Булуса неҹә тәсир едирди? О дејир: «Мәсиһин давамчысы кими дүзүнү дејирәм... үрәјимдә дәрин кәдәр вә кәсилмәјән бир ағры дујурам» (Ром. 9:1—3). Булус нә үчүн белә һиссләр кечирирди? Чүнки о, инсанлары севирди вә онлара тәблиғ етмәк истәјирди. Она ҝөрә дә јәһудиләр Аллаһын мәрһәмәтини рәдд едәндә онун үрәји ағрыјырды.

5. а) Бизи тәблиғ етмәјә тәшвиг едән нәдир? б) Нәјә ҝөрә бәзән руһдан дүшмәјимиз тәбиидир?

⁵ Һәвари Булус кими, биз дә инсанлара дујдуғумуз мәһәббәтдән долајы тәблиғ едирик (Мәт. 22:39; 1 Кор. 11:1). Чүнки өз тәҹрүбәмиздән билирик ки, Јеһоваја ибадәт етсәләр, онлары нә гәдәр немәтләр ҝөзләјир. Бәзән әразимиздәки инсанлар барәдә: «Каш онлара нәләр итирдикләрини баша сала биләрдим!» — дејә дүшүнүрүк. Мәһз бу сәбәбдән онлара Јеһова һагда вә Онун бәшәријјәт үчүн нијјәти барәдә данышмагдан ваз кечмирик. Биз, санки онлара дејирик: «Сизә дәјәрли һәдијјә ҝәтирмишик. Хаһиш едирик, гәбул един». Инсанлар бу һәдијјәни гәбул етмәк истәмәјәндә, тәбии ки, үрәјимиздә «ағры» дујуруг. Бу ҹүр һиссләр кечирмәјимиз иманымызын зәиф олмасыны јох, әксинә, инсанлары севдијимизи, онлары дүшүндүјүмүзү ҝөстәрир. Одур ки, бәзән руһдан дүшсәк дә, тәблиғ етмәјә давам едирик. Артыг 25 илдән чохдур ки, өнҹүл олан Елена дејир: «Тәблиғ етмәк мәнә чәтин ҝәлсә дә, она чатан башга иш дә јохдур».

6. Һансы суалы мүзакирә едәҹәјик вә нәјин әсасында?

⁶ Һансы әразидә хидмәт етмәјимиздән асылы олмајараг, бәһрә ҝәтирә биләҹәјимизә нә үчүн әмин ола биләрик? Бу ваҹиб суала ҹаваб тапмаг үчүн ҝәлин Иса Мәсиһин бар вермәјин ваҹиблијини изаһ етдији ики нүмунәјә бахаг (Мәт. 13:23).  Илк мүзакирә едәҹәјимиз нүмунә мејнә барәдәдир.

7. а) «Мејнә», «бағбан» вә «будаглар» кимләрин тимсалыдыр? б) Бизи һансы суалын ҹавабы марагландырыр?

⁷ Јәһја 15:1—5, 8 ајәләрини охујун. Иса бу мәсәлдә Јеһованы бағбана, өзүнү мејнәјә, шаҝирдләрини исә будаглара бәнзәдир *. Сонра һәвариләринә дејир: «Сиз чохлу бар верәндә вә мәним шаҝирдим олдуғунузу сүбут едәндә Атам шәрәфләнир». Бәс онда Мәсиһин давамчылары һансы бәһрәни ҝәтирмәлидир? Мәсиһ һансы бәһрәдән данышдығыны ачыг сөјләмәсә дә, онун вурғуладығы ваҹиб бир мәгамын сајәсиндә ҹавабы тапа биләрик.

8. а) Нүмунәдәки бәһрәнин јени шаҝирдләрин тимсалы олмадығы нәдән ҝөрүнүр? б) Јеһованын тәләбләринин өзәллији нәдир?

⁸ Сәмави Атасы барәдә данышаркән Иса демишди: «О, мәндәки бар ҝәтирмәјән будаглары кәсиб атыр». Башга сөзлә, биз јалныз бар ҝәтирдијимиз тәгдирдә Јеһова бизи Өз хидмәтчиси һесаб едир (Мәт. 13:23; 21:43). Демәли, бу мәсәлдә һәр мәсиһинин ҝәтирмәли олдуғу бар дејиләндә онун јени шаҝирд һазырламалы олдуғу нәзәрдә тутула билмәз (Мәт. 28:19). Әкс һалда, инсанларын һәгигәтә лагејд јанашдығы әразиләрдә тәблиғ едән Јеһованын Шаһидләри шаҝирд һазырлаја билмәдикләри үчүн «бар ҝәтирмәјән будаглар» һесаб олунарды. Лакин бу, мүмкүн дејил! Чүнки биз инсанлары шаҝирд олмаға мәҹбур едә билмәрик. Үстәлик, мәһәббәтли Аллаһымыз Јеһова һеч вахт хидмәтчиләриндән онларын баҹармајаҹағы шејләр истәмир. Онун бизә бујурдуғу һәр шеј бизим ҝүҹүмүз дахилиндәдир (Ган. 30:11—14).

9. а) Биз һансы иши ҝөрәндә бәһрә ҝәтиририк? б) Арашдыраҹағымыз икинҹи нүмунә һансыдыр?

⁹ Бәс онда биз һансы бәһрәни ҝәтирмәлијик? Ајдындыр ки, бу, һәр биримизин едә биләҹәји бир шејдир. Јеһова бүтүн хидмәтчиләринә һансы иши тапшырыб? Аллаһын Падшаһлығы һагда хош хәбәри мүждәләмәк ишини * (Мәт. 24:14). Буну Иса Мәсиһин әкинчи илә бағлы чәкдији нүмунә дә ҝөстәрир. Ҝәлин бу нүмунәни нәзәрдән кечирәк.

10. а) Мәсәлдәки тохум вә торпаг нәјин тимсалыдыр? б) Сүнбүл һансы бәһрәни верир?

¹⁰ Лука 8:5—8, 11—15 ајәләрини охујун. Әкинчи һагда мәсәлдә тохум «Аллаһын сөзүдүр», јәни Падшаһлыг һагда хәбәрдир. Торпаг инсан үрәјидир. Мүнбит торпаға дүшән тохум көк атыр, ҹүҹәрир вә бөјүјүб сүнбүл олур. О, «јүзгат бар» верир. Бәс «бар» дејәндә нә нәзәрдә тутулур? Сүнбүлдән јени сүнбүлҹүкләр јараныр? Хејр, сүнбүлдә јени тохумлар әмәлә ҝәлир вә бу тохумлардан да јенә сүнбүл јетишир. Бу мәсәли хидмәтимизә неҹә тәтбиг етмәк олар?

11. а) Әкинчи һагда мәсәли хидмәтимизә неҹә тәтбиг етмәк олар? б) Биз јени тохуму неҹә јетишдирә биләрик?

¹¹ Валидејнләримиз, јахуд да Јеһованын Шаһидләри Падшаһлыг һаггында мүждәни бизә өјрәдәндә, санки «мүнбит торпаға» «тохум» сәпмишдиләр. Бизим хош хәбәри гәбул етдијимизи ҝөрәндә чох севинмишдиләр. Нәтиҹәдә «тохум» үрәјимиздә көк атды вә бөјүјүб сүнбүл олду. Сүнбүлдән јени сүнбүлҹүкләр јох, тохум әмәлә ҝәлдији кими, бизим дә вердијимиз бар јени шаҝирдләр јох, јени тохумдур *.  Бәс биз јени тохуму неҹә јетишдиририк? Һәр дәфә мүхтәлиф үсулларла Падшаһлыг хәбәрини бәјан едәндә, санки үрәјимизә сәпилмиш бу тохуму чохалдырыг (Лука 6:45; 8:1). Беләликлә, бу мәсәл ҝөстәрир ки, «дөзүмлә бәһрә» ҝәтирмәк елә Аллаһын Падшаһлығы һагда хош хәбәри тәблиғ етмәкдир.

12. а) Иса Мәсиһин мејнә вә әкинчи һагда чәкдији мәсәлләрдән нә өјрәнирик? б) Бу нүмунәләрдән өјрәндикләринизлә бағлы тәәссүратларынызы бөлүшүн.

¹² Иса Мәсиһин мејнә вә әкинчи һагда чәкдији мәсәлләрдән нә өјрәнирик? Өјрәнирик ки, бизим бәһрә ҝәтирмәјимиз әразимиздәки инсанларын хош хәбәрә мүнасибәти илә јох, бизим сәдагәтлә хидмәт етмәјимизлә өлчүлүр. Булус демишди: «Әкән вә сулајан бирҝә чалышыр, һәрәси зәһмәтинә ҝөрә мүкафатыны алаҹаг» (1 Кор. 3:8). Јеһова бизә чәкдијимиз зәһмәтә ҝөрә мүкафат верәҹәк, онун нәтиҹәсинә ҝөрә јох. 20 илдир өнҹүл кими хидмәт едән Матилда адлы баҹымыз дејир: «Јеһованын чәкдијимиз зәһмәти гијмәтләндирмәси мәнә бөјүк севинҹ бәхш едир».

13, 14. Ромалылара 10:1, 2 ајәләринә әсасән, Булус нәјин сајәсиндә Падшаһлыг һагда хәбәрә етинасыз јанашанлара тәблиғ етмәкдән усанмырды?

¹³ Дөзүмлә бәһрә ҝәтирмәјә бизә нә көмәк едәҹәк? Гејд етдијимиз кими, Булус јәһудиләрин хош хәбәри гәбул етмәк истәмәдикләринә ҝөрә чох кәдәрләнирди. Бунунла белә, о, тәслим олмурду. Сонралар Булус Ромадакы мәсиһиләрә јәһудиләрлә бағлы јазмышды: «Онларын хиласыны сидги-үрәкдән арзу едирәм, бундан өтрү ҝеҹә-ҝүндүз Аллаһа јалварырам. Аллаһын гејрәтини чәкдикләринә өзүм шаһидәм, анҹаг буну дәгиг билијә әсасланараг етмирләр» (Ром. 10:1, 2). Булуса хидмәтини давам етмәјә нә көмәк едирди?

 ¹⁴ Илк олараг, Булус нә үчүн јәһудиләрә тәблиғ етдијини гејд едир. О, буну сидги-үрәкдән арзу едирди вә чох истәјирди ки, һеч олмаса, јәһудиләрдән бәзиләри хиласа јетишсин (Ром. 11:13, 14). Икинҹиси, Булус онлардан өтрү Аллаһа јалварырды. О, бәзи јәһудиләр үчүн ајры-ајрылыгда дуа едирди ки, онлар һәгигәти гәбул етсинләр. Үчүнҹүсү, Булус онларын «Аллаһын гејрәтини чәкдикләринә» шаһид олдуғуну гејд едир. О, инсанлардакы ҝөзәл кејфијјәтләри вә Аллаһа хидмәт етмәк потенсиалыны ҝөрүрдү. Булус билирди ки, сәмими инсанларын Аллаһа ибадәтдә дујдуглары гејрәт һисси дүзҝүн сәмтә јөнәлдилсә, онлар Мәсиһин гејрәтли шаҝирди ола биләр.

15. Булусдан неҹә өрнәк ала биләрик? Нүмунә чәкин.

¹⁵ Булусдан неҹә өрнәк ала биләрик? Әввәла, биз «әбәди һәјата апаран јолда јеримәјә мејли оланлары» тапмағы сидги-үрәкдән истәмәлијик. Икинҹиси, дуаларымызда Јеһовадан сәмими гәлбли инсанларын үрәјини ачмасыны диләмәлијик (Һәв. 13:48; 16:14). 30 илдир өнҹүл олан Силвана адлы баҹы дејир: «Ев-ев тәблиғә ҝедәндә Јеһоваја дуа едәрәк, ондан мүсбәт әһвал-руһијјә истәјирәм». Биз дә Аллаһа дуа едәндә онун бизи мәләкләр васитәсилә јөнәлтмәсини диләјирик (Мәт. 10:11—13; Вәһј 14:6). 30 ил өнҹүллүк етмиш диҝәр диндашымыз Роберт дејир: «Гапысыны дөјдүјүмүз кәсләрин евиндәки вәзијјәтдән һали олан мәләкләрлә әмәкдашлыг етмәк мөһтәшәмдир». Үчүнҹүсү, биз инсанларын Аллаһын хидмәтчиси олмаға лајиг хүсусијјәтләрини ҝөрмәјә чалышмалыјыг. 50 илдән чохдур вәфтиз олунан бир ағсаггал дејир: «Инсанда сәмимијјәт ҝөстәриҹиси олан хырда мәгамлар ахтарырам, мәсәлән, тәбәссүмү, нәвазишли бахышы, јахуд да сәмими суалы». Бунлары етсәк, биз дә, Булус кими, дөзүмлә бәһрә ҝәтирә биләҹәјик.

16, 17. а) Ваиз 11:6 ајәсиндән нә өјрәнирик? б) Тәблиғимиз бизи мүшаһидә едәнләрдә һансы тәәссүрат ојада биләр?

¹⁶ Инсанларын вәз етдијимиз хәбәрә лагејд јанашдығы ҝөрүнсә дә, унутмамалыјыг ки, тәблиғ ишимизин инсанлара бөјүк тәсири вар. (Ваиз 11:6 ајәсини охујун.) Дүздүр, чох адам бизи динләмир, амма онлар бизи мүшаһидә едирләр. Онлар бизим неҹә сәлигәли ҝејиндијимизә, ҝүләрүз вә меһрибан олдуғумуза фикир верирләр. Бүтүн бунлары ҝөрүб, ола билсин, мүәјјән вахтдан сонра бәзиләри һаггымызда јанлыш дүшүнҹәдә олдугларыны анлаја биләр. Јухарыда бәһс етдијимиз Сержо вә Олинда бу ҹүр вәзијјәтлә үзләшмишди.

¹⁷ Сержо дејир: «Хәстәлик уҹбатындан бир мүддәт шәһәр мејданына ҝедә билмәдик. Ора јенидән ҝәләндә ҹамаат биздән сорушду: “Һаралардасыныз? Сизин үчүн дарыхмышдыг”». Олинда баҹы дејир: «Автобус сүрүҹүләри бизә әл едирди. Бәзиләри узагдан сәсләнәрәк: “Ишиниз аванд олсун!” дејирди. Һәтта нәшрләримизи истәјәнләр дә вар иди». Һәлә бир киши әлиндә ҝүл дәстәси илә онлара јахынлашыб тәшәккүр билдирәндә Сержо вә Олинданын неҹә тәәҹҹүбләндијини тәсәввүр един.

18. Сиз нә үчүн «дөзүмлә бәһрә» ҝәтирмәјә әзмлисиниз?

¹⁸ Падшаһлыг һагда хәбәри тәблиғ едиб, әлинизин «бош дурмасын»а јол вермәсәниз, мүждәнин «халгларын һамысына шәһадәт» олмасында сизин дә пајыныз олаҹаг (Мәт. 24:14). Ән әсасы исә, Јеһованын сиздән разы галдығыны билмәјин севинҹини дујаҹагсыныз. Чүнки әминсиниз ки, О, «дөзүмлә бәһрә» верән һәр кәси севир!