СӨЗСҮЗ КИ, һәр кәс јахшы инсан кими танынмаг истәјир. Лакин индики зәманәдә белә инсан олмаг о гәдәр дә асан дејил. Бу ҝүн бир чохлары «јахшылығын дүшмәни»дир (2 Тим. 3:3). Онларын јахшылыг вә писликлә бағлы өз стандартлары олдуғундан «писә јахшы, јахшыја пис» дејирләр (Әшј. 5:20). Бундан әлавә, гејри-камиллијин вә кечмишдә јашананларын инсанын үзәриндә тәсири бөјүкдүр. Ола билсин, биз дә бир баҹынын кечирдији һиссләри кечиририк. Узун илләр Јеһоваја хидмәт етмәсинә бахмајараг, о дејир: «Инанмырам, нә вахтса јахшы инсан олум».

Һәр шејә рәғмән, һәр биримиз јахшы инсан ола биләрик. Јахшылыг хүсусијјәти мүгәддәс руһун бәһрәсидир. Мүгәддәс руһ исә бизә мане ола биләҹәк хариҹи вә дахили амилләрдән гат-гат гүдрәтлидир. Ҝәлин јахшылыг хүсусијјәтини даһа әтрафлы арашдыраг вә ону там тәзаһүр етдирмәјин јолларыны өјрәнәк.

Јахшылыг јүксәк мәнәви хүсусијјәтдир вә онда зәррә гәдәр дә пислик јохдур. Бу хүсусијјәт өзүнү башгаларынын рифаһы наминә едилән хејирхаһ әмәлләрдә бүрузә верир.

Јәгин фикир вермисиниз ки, адәтән, инсанлар өз аилә үзвләринә, достларына јахшылыг едир. Лакин һәгигәтән јахшы олмаг тәкҹә бунунла мәһдудлашмыр. Дүздүр, һеч биримиз бу хүсусијјәти мүкәммәл шәкилдә тәзаһүр етдирә билмәрик. Чүнки «дүнјада елә салеһ адам јохдур ки, һеч вахт ҝүнаһ етмәсин, анҹаг јахшылыг етсин» (Ваиз 7:20). Һәвари Булус сәмими шәкилдә етираф етмишди: «Билирәм ки, мәндә, јәни ҹисмимдә јахшы бир шеј јохдур» (Ром. 7:18). Бүтүн бунлары нәзәрә алараг, јахшылыг хүсусијјәтини өзүмүздә јетишдирмәк үчүн јахшылығын Мәнбәјинә үз тутмалыјыг.

Јеһова Аллаһ нәјин јахшы олдуғуна даир нормалар тәјин едир. Онун һаггында јазылыб: «Сән кәрамәт саһибисән, ишләрин дә кәрамәтлидир. Мәнә гајда-ганунуну өјрәт» (Зәб. 119:68). Ајәдә Јеһованын кәрамәт саһиби, башга сөзлә, јахшылығын тәҹәссүмү олдуғу дејилир. Ҝәлин Јеһованын кәрамәтинин ики јөнү һагда данышаг.

Јеһова кәрамәт саһибидир. Кәрамәт Јеһованын варлығынын ајрылмаз һиссәсидир. Онун бүтүн хүсусијјәтләри кәрамәтиндән, јәни јахшылыг хүсусијјәтиндән гајнагланыр. Мәсәлән, Јеһованын Муса пејғәмбәрлә данышдығы вахт баш верәнләри јадымыза салаг. О демишди: «Сәнә Өз кәрамәтими ҝөстәрәҹәјәм вә гаршында Јеһова адыны бәјан едәҹәјәм». Јеһованын ҹалалыны, о ҹүмләдән кәрамәтини ҝөрән пејғәмбәр бу сөзләри ешидир: «Јеһова, Јеһова, рәһмли вә мәрһәмәтли, сәбирли, мәһәббәти бол, һәгигәти әнҝин олан Аллаһ. Минләрҹә нәсилләрә мәһәббәт ҝөстәрән, тәгсири, асилији вә ҝүнаһлары бағышлајан, ҝүнаһкарыса әсла ҹәзасыз гојмајан... Аллаһ» (Чых. 33:19; 34:6, 7). Бу сөзләрдән ајдын ҝөрүнүр ки, Јеһованын бүтүн варлығы Онун кәрамәтини, јахшылығыны әкс етдирир. Бахмајараг ки, Иса Мәсиһ инсанлар арасында јахшылыға даир ән мүкәммәл өрнәк иди, о, Јеһова һагда демишди: «Јалныз бир јахшы Варлыг вар» (Мәт. 19:17).

 Јеһованын ишләри кәрамәтлидир. Јеһованын етдији һәр бир шеј Онун кәрамәтиндән хәбәр верир. «Јеһова һамыја гаршы кәрамәтлидир, бүтүн ишләриндә мәрһәмәти ҝөрүнүр» (Зәб. 145:9). Онун јахшылығы гәрәзсиз олдуғуна ҝөрә бүтүн инсанлара һәјат бәхш едир вә јашамаг үчүн лазым олан шејләрлә тәмин едир (Һәв. 14:17). Јеһованын кәрамәти һәмчинин бизи бағышламасында да әкс олунур. Мәзмурчу јазыр: «Еј Јеһова, кәрамәтлисән, бағышлајансан» (Зәб. 86:5). Әмин ола биләрик ки, «камиллик јолунда јеријәнләрдән Јеһова јахшылығыны әсирҝәмәз» (Зәб. 84:11).

Јеһова Аллаһ бизи Өз бәнзәриндә јаратдығы үчүн биз дә јахшы олуб, јахшы ишләр ҝөрә биләрик (Јар. 1:27). Лакин бунун үчүн Онун Кәламындакы «јахшылыг етмәји өјрәнин» чағырышына һај вермәлијик (Әшј. 1:17). Бәс јахшылыг етмәји неҹә өјрәнә биләрик? Ҝәлин бунун үч јолуну арашдыраг.

Биринҹиси, дуада Јеһовадан мүгәддәс руһ диләјәк. Бу руһ мәсиһиләрә сөзүн әсл мәнасында јахшы инсан олмагда көмәк едир (Гал. 5:22). Бәли, мүгәддәс руһ бизә писликдән икраһ едиб, јахшылыға сарылмаға көмәк едә биләр (Ром. 12:9). Белә ки, Кәлама әсасән, Аллаһымыз Јеһова «һәр ҹүр хејирхаһ сөздә вә әмәлдә» дилимизә тәпәр, голумуза гүввәт вермәјә гадирдир (2 Салон. 2:16, 17).

Икинҹиси, Аллаһдан илһам алмыш Кәламы охумалыјыг. Онда Јеһова бизә «хејрин бүтүн јолларыны» өјрәдәҹәк вә бизи «һәр ҹүр јахшы ишә» һазыр едәҹәк (Мәс. 2:9; 2 Тим. 3:17). Мүгәддәс Китабы охујуб дәринлијинә вармагла үрәјимизи Аллаһа вә Онун ирадәсинә аид шејләрлә долдуруруг. Беләҹә, хәзинәмизә сонра карымыза ҝәләҹәк јахшы шејләр әлавә етмиш олуруг (Лука 6:45; Ефес. 5:9).

Үчүнҹүсү, вар ҝүҹүмүзлә чалышмалыјыг ки, «јахшыдан нүмунә» ҝөтүрәк (3 Јәһ. 11). Дүздүр, бизим үчүн ән ҝөзәл нүмунә Јеһова Аллаһ вә Иса Мәсиһдир. Амма Мүгәддәс Китабда өрнәк ала биләҹәјимиз диҝәр нүмунәләр дә вар. Мәсәлән, јахшы әмәлләри илә јадда галан инсанлар арасында Табитә вә Барнәбанын адыны чәкмәк олар (Һәв. 9:36; 11:22—24). Мүгәддәс Китабдан онларын һаггында арашдырараг өзүнүз үчүн јахшы нүмунә ҝөтүрә биләрсиниз. Мүталиә заманы онларын башгаларына неҹә көмәк етдијинә фикир верин. Һәмчинин аилә үзвләринизә вә диндашларыныза неҹә көмәк едә биләҹәјиниз үзәриндә дүшүнүн. Бундан әлавә, Табитә вә Барнәбанын етдији јахшылыгларын онларын өзүнә һансы фајда ҝәтирдијинә дә диггәт јетирин. Јахшылыг етмәк сизә дә фајда ҝәтирәҹәк.

 Бу ҝүн дә јахшы әмәлләри илә өрнәк олан чохлу баҹы-гардашымыз вар. Мәсәлән, јығынҹағымыздакы зәһмәткеш, јахшылығы севән ағсаггаллардан нүмунә ҝөтүрә биләрик. Һәмчинин јахшы шејләр өјрәдән сәдагәтли баҹыларымыз да ҝөзәл өрнәкдир (Тит. 1:8; 2:3). Розлин адлы бир баҹы дејир: «Рәфигәм јығынҹагдакы баҹы-гардашлара көмәк етмәк, онлары руһландырмаг үчүн әлиндән ҝәләни едир. Онларын вәзијјәтләри барәдә дүшүнүр, тез-тез кичик һәдијјәләр верир вә ја башга јолларла гајғы ҝөстәрир. Мәнимчүн о, сөзүн әсл мәнасында, јахшы инсандыр».

Јеһова халгыны јахшылығы ахтармаға сәсләјир (Амс. 5:14). Белә етсәк, Јеһованын гајда-ганунларыны севмәклә јанашы, Онун ҝөзүндә јахшы олан ишләри ҝөрмәк истәјимиз дә артаҹаг.

Јахшылыг етмәк башгалары үчүн һансыса гејри-ади бир шеј етмәк, баһалы һәдијјә алмаг демәк дејил. Мәсәлән, рәссамын портрет јаратмасы үчүн фырча илә бир-ики бөјүк хәтт чәкмәси кифајәт дејил, портрет онун ҹыздығы чохлу кичик ҹизҝиләр нәтиҹәсиндә әрсәјә ҝәлир. Ејнилә, бизим дә јахшы инсан олдуғумуз етдијимиз чохлу кичик хејирхаһлыглардан ҝөрүнәҹәк.

Мүгәддәс Китаб бизи јахшы ишә һазыр олмаға сәсләјир (2 Тим. 2:21; Тит. 3:1). Инсанларын үзләшдикләри вәзијјәтләрә диггәт јетирсәк, онларын «хејри вә гүввәтләнмәси үчүн» мүхтәлиф үсуллар тапаҹағыг (Ром. 15:2). Мәсәлән, ола билсин, онларла нәјисә пајлашаҹағыг (Мәс. 3:27). Јахуд садә сүфрә ачыб онлары гонаг дәвәт етмәк вә ја бирҝә вахт кечирмәји тәклиф етмәк олар. Киминсә хәстәләндијини биләндә она баш чәкә, зәнҝ едә, јахуд месаж јаза биләрик. Бәли, бир чох јолларла «иманы мөһкәмләндирмәк үчүн јахшы сөз» сөјләјиб бизи динләјәнләрә фајда ҝәтирә биләрик (Ефес. 4:29).

Јеһовадан өрнәк алараг биз инсанлара фәрг гојмур вә һамыја јахшылыг етмәјә чалышырыг. Бунун ән ҝөзәл јолу Падшаһлыг һагда хош хәбәри һамы илә бөлүшмәкдир. Иса Мәсиһин бујурдуғу кими, һәтта бизә нифрәт едәнләрә дә јахшылыг етмәјин јолларыны ахтармалыјыг (Лука 6:27). Хејирхаһ олмаг, јахшылыг етмәк һеч вахт сәһв дејил, чүнки «бунлара гаршы чыхан ганун јохдур» (Гал. 5:22, 23). Һәтта сынагларла вә ја тәгибләрлә үзләшәндә дә јахшылыг етмәкдән галмасаг, инсанларда һәгигәтә гаршы мараг ојада вә беләҹә, Јеһованын адыны уҹалда биләрик (1 Бут. 3:16, 17).

«Јахшы адам әмәлләринин мүкафатыны алар» (Мәс. 14:14). Сөһбәт һансы мүкафатлардан ҝедир? Инсанлара јахшылыг етсәк, чох еһтимал ки, онлар да бизимлә јахшы рәфтар едәҹәкләр (Мәс. 14:22). Һәтта белә олмаса да, јахшылыг етмәјә давам етмәлијик. Нәтиҹәдә, бизим хејирхаһ ишләримиз инсанын үрәјини јумшалда вә гәлбиндәки бузлары әридә биләр (Ром. 12:20, һаш.).

Писликдән дөнүб јахшылыг етмәјин өзүмүзә дә фајдасы вар. Буну бир чох диндашымыз тәсдиг едир. Мәсәлән, Ненси адлы бир баҹынын нүмунәсинә нәзәр салаг. О дејир: «Чох веҹсиз, әдәбсиз, сајмазјана инсан идим. Амма Аллаһын јахшылыға даир гајда-ганунларыны өјрәниб тәтбиг етдикҹә өзүмү даһа хошбәхт һисс етмәјә башладым. Инди шәхси ләјагәт вә өзүмә һөрмәт һиссим вар».

Јахшылыг хүсусијјәтини өзүмүздә јетишдирмәјә чалышмағымызын ән әсас сәбәби одур ки, биз Јеһова Аллаһын гәлбини севиндирмәк истәјирик. Һәтта етдијимиз јахшылыглары башгалары ҝөрмәсә дә, Јеһова ҝөрүр. О бизим һәр бир јахшы әмәл вә фикирләримиздән аҝаһдыр (Ефес. 6:7, 8). Бунун мүкафаты нәдир? Мүгәддәс Китабда јазылыб: «Јеһова јахшы адамдан разы галар» (Мәс. 12:2). Буна ҝөрә дә ҝәлин јахшылыг хүсусијјәтинә јијәләнмәјә давам едәк. Јеһова вәд верир ки, «јахшы иш ҝөрән һәр кәсә... шәрәф, һөрмәт вә сүлһ» бәхш едәҹәк (Ром. 2:10).