Марија, Раул вә Илһам кими, бир чох инсан дуаја хүсуси бир немәт кими јанашыр. Онлар дуа едәндә Аллаһа үрәкләрини ачыр, Она шүкүр едир вә имдад диләјирләр. Онлар Мүгәддәс Китабда дуа илә бағлы јазыланлара сидги-үрәкдән инанырлар. Орада јазылыб: «Аллаһын өнүндә әминлијимиз будур: Онун ирадәсинә мүвафиг нә диләјириксә, О ешидир» (1 Јәһја 5:14).

Елә инсанлар да вар ки, онлара Мүгәддәс Китабда дуа һагда јазыланлара инанмаг чәтиндир. Стив бу барәдә әввәлләр нә фикирләшдијини билдирәрәк дејир: «17 јашым оланда үч достум вәфат етди. Бири автомобил гәзасында һәлак олду, икиси исә дәниздә боғулду. Аллаһа дуа едиб бунларын сәбәбини сорушурдум. Амма дуаларыма ҹаваб алмырдым. Онда дүшүндүм ки,  дуа етмәјә дәјмәз». Чохлары дүшүнүр ки, дуалары ҹавабсыз галыр. Буна ҝөрә дә дуа етмәјин мәнасыз олдуғу гәнаәтинә ҝәлирләр.

Инсанлар һәмчинин башга сәбәбләрә ҝөрә дә дуанын өнәмсиз олдуғуну дүшүнүрләр. Бәзиләри дејир ки, Аллаһ онсуз да һәр шеји билир, еһтијаҹларымыздан, проблемләримиздән аҝаһдыр. Она ҝөрә дә бунлары Она данышмағын мәнасы јохдур.

Бир башгалары фикирләшир ки, Аллаһ әввәлләр етдикләри сәһвләрә ҝөрә онларын дуасына гулаг асмыр. Ҹени дејир: «Мәним ән бөјүк проблемим одур ки, өзүмү дәјәрсиз һисс едирәм. Бир вахтлар етдијим шејләрә ҝөрә пешманчылыг чәкирәм. Она ҝөрә дә дүшүнүрәм ки, Аллаһ мәним дуаларыма гулаг асмаз. Мән буна лајиг дејиләм».

Бәс сиз дуа барәдә нә дүшүнүрсүнүз? Әҝәр сиз дә дуанызын ешидилдијинә шүбһә едирсинизсә, Мүгәддәс Китаб сизә тәсәлли верә биләр. Орада дуа илә бағлы бүтүн суалларыныза ҹаваб тапа биләрсиниз *. Мүгәддәс Китаб етибара лајигдир. Орадан нөвбәти суаллара ҹаваб тапа биләрсиниз:

• Аллаһ дуалары ешидир?

• Нәјә ҝөрә Аллаһ бәзи дуалары гәбул етмир?

• Неҹә дуа етмәлијик ки, дуаларымыз гәбул олунсун?

• Дуа бизә неҹә көмәк едир?