ИЛАҺИ НӘСИҺӘТЛӘРӘ ЕҺТИЈАҸ ДУЈУРУГ

Јеһова a Аллаһ Мүгәддәс Китабда билдирир ки, инсанларын Онун нәсиһәтләринә еһтијаҹы вар вә онлар өз ағылларына ҝүвәниб һәр мәсәләдә доғру гәрар верә билмәзләр (Әрәмја 10:23). Буна ҝөрә дә О, Мүгәддәс Китабда нәјин доғру, нәјин јанлыш олдуғуна даир ҝөстәришләр вериб. О, һәр биримизи севир вә истәмир ки, һәјати ваҹиб гәрарлар верәркән сәһвләрә јол верәк, аҹы тәҹрүбә јашајыб, сонрадан пешман олаг (Ганунун тәкрары 5:29; 1 Јәһја 4:8). Үстәлик, бизә лазым олан ән ҝөзәл өјүд-нәсиһәтләри вермәк үчүн һикмәтә вә билијә саһибдир (Зәбур 100:3; 104:24). Буна бахмајараг, Аллаһ һеч вахт инсанлары Онун гојдуғу гајдалара әмәл етмәјә мәҹбур етмир.

 Јеһова илк киши вә гадыны, Адәмлә Һәвваны әсл хошбәхтлији дадмалары үчүн лазым олан һәр шејлә тәмин етмишди (Јарадылыш 1:28, 29; 2:8, 15). Бундан башга, онлара садә ҝөстәришләр вермишди вә онлардан итаәткарлыг ҝөзләјирди. Амма изин верди ки, бу ҝөстәришләрә әмәл едиб-етмәјәҹәкләринә өзләри гәрар версин (Јарадылыш 2:9, 16, 17). Һејиф ки, Адәмлә Һәвва Аллаһын гојдуғу гајдалара риајәт етмәји јох, өз билдикләри кими јашамағы сечдиләр (Јарадылыш 3:6). Бәс бунун агибәти неҹә олду? Мәҝәр инсанларын нәјин дүз, нәјин сәһв олдуғуна өзләринин гәрар вермәси даһа јахшы олмаз? Тәбии ки, јох. Тарих сүбут едир ки, Аллаһын гајда-ганунларына мәһәл гојмадығымыз тәгдирдә, даими динҹлијә вә хошбәхтлијә наил ола билмәрик (Ваиз 8:9).

Мүгәддәс Китабда боја-баша чатдығымыз мүһитдән вә әразидән асылы олмајараг, бизә һикмәтли гәрарлар вермәјә көмәк едән нәсиһәтләр вар. (2 Тимутијә 3:16, 17; « Һамы үчүн олан китаб» адлы чәрчивәјә бахын.) Ҝәлин бу нәсиһәтләрдән бәзиләри илә таныш олаг.

 ИЛАҺИ НӘСИҺӘТЛӘРЛӘ ДОЛУ БӘЛӘДЧИ

Мүгәддәс Китабда Јеһованын та әзәлдән инсанларла мүнасибәти һаггында дәгиг мәлуматлар јер алыр. Орада јазыланлар бизә Аллаһын доғру вә јанлыша, фајдалы вә зәрәрли шејләрә даир бахышыны анламаға көмәк едир (Зәбур 19:7, 11). Биз орадан ҝүндәлик һәјатда һикмәтли гәрарлар вермәјә көмәк едән вә һәмишә ишә јарајан нәсиһәтләр әлдә едирик.

Мәсәлән, ҝөтүрәк Мәсәлләр 13:20 ајәсиндәки мәсләһәти. Орада дејилир: «Һикмәтли илә отуруб-дуран һикмәтли олар, ахмагларла ајаглашан бәдбәхт олар». Бу нәсиһәт гәдимдә олдуғу кими бу ҝүн дә ишә јарајыр. Мүгәддәс Китаб бу ҹүр фајдалы вә дәјәрли нәсиһәтләрлә долудур. (« Актуаллығыны итирмәјән һикмәтли нәсиһәтләр» адлы чәрчивәјә бахын.)

Бәлкә дә, сиздә белә бир суал јаранды: «Мүгәддәс Китабдакы нәсиһәтләрин бу ҝүн дә ишә јарадығына неҹә әмин ола биләрәм?» Нөвбәти мәгаләдә бунунла бағлы бәзи ҝерчәк әһвалатлар ҝәтирилир.