Хејримизә олан нәсиһәтләр
Милјонларла инсан һәјатын мүхтәлиф саһәләринә даир Мүгәддәс Китабдакы етибарлы мәсләһәтләрин хејрини ҝөрүб. Ҝәлин бу саһәләрдән дөрдүнә нәзәр салаг.
1. Аилә гурулушу
Инсанлар аилә гурулушу һагда фәргли дүшүнүрләр вә хошбәхт аиләјә саһиб олмағын сиррини мүхтәлиф шејләрдә ҝөрүрләр.
МҮГӘДДӘС КИТАБДА ДЕЈИЛИР: «Һәр кәс арвадыны өзүнү севдији кими севсин, арвад да әринә дәрин һөрмәт бәсләсин» (Ефеслиләрә 5:33).
МӘНАСЫ: Аиләнин баниси Аллаһдыр, буна ҝөрә дә аиләнин хошбәхтлији үчүн нә лазым олдуғуну О даһа јахшы билир (Марк 10:6—9). Әрлә арвад өзүндән чох гаршы тәрәфи дүшүнсә, аиләләри хошбәхт олаҹаг. Әрин арвадына севҝиси онунла рәфтарындан вә онун гејдинә галмасындан ҝөрүнүр. Арвадын әринә һөрмәти исә онун данышығындан вә һәрәкәтләриндән ҝөрүнүр.
МҮГӘДДӘС КИТАБ НӘСИҺӘТЛӘРИ ФАЈДАЛЫДЫР: Вјетнамдан олан Куанла Ти дүшүнүрдү ки, аиләләри һеч вахт хошбәхт олмајаҹаг. Куан кобуд инсан иди. О дејир: «Мән Тинин һиссләрини нәзәрә алмырдым вә чох вахт ону алчалдырдым». Ти бошанмаг истәјирди. О дејир: «Даһа јолдашыма етибар етмирдим, о, ҝөзүмдән дүшмүшдү».
Сонрадан онлар Мүгәддәс Китабы арашдырмаға башладылар вә Ефеслиләрә 5:33 ајәсини аиләләриндә неҹә тәтбиг едәҹәкләрини өјрәндиләр. Куан дејир: «Бу ајәдән мүлајим олмағын нә гәдәр ваҹиб олдуғуну өјрәндим. Мән Тијә севҝими һисс етдирдим, онун мадди, физики вә емосионал тәләбатларынын гејдинә галдым. Бу ҹүр давранмагла Тинин севҝисини вә һөрмәтини газандым». Ти дејир: «Ефеслиләрә 5:33 ајәсини нә гәдәр чох тәтбиг едирәмсә, јолдашыма һөрмәт ҝөстәрирәмсә, јолдашым да мәнә о гәдәр чох севҝи вә гајғы ҝөстәрир, аиләмиздә меһрибанлыг олур».
Аилә гурулушу һагда даһа әтрафлы мәлумат әлдә етмәк үчүн jw.org сајтындан «Уғурлу аиләнин 12 сирри» адлы «Ојанын!» № 2, 2018 нәшрини охујун.
2. Инсанларла мүнасибәт
Адәтән инсанлар иргинә, миллијјәтинә, ҝөрүнүшүнә, дининә вә ҹинси оријентасијасына ҝөрә башгаларына пис јанашыр.
МҮГӘДДӘС КИТАБДА ДЕЈИЛИР: «Һәр ҹүр инсана һөрмәт един» (1 Бутрус 2:17).
МӘНАСЫ: Мүгәддәс Китаб иргчилик, һомофобија (һомосексуал фәрдләрә гаршы мәнфи фикир вә давраныш) вә ксенофобија (башга милләтдән оланлардан узаг дурмаг, онлара нифрәт етмәк) ашыламыр. Әксинә, бу китаб бизи иргиндән, миллијәтиндән вә мадди вәзијјәтиндән асылы олмајараг һәр кәсә һөрмәт ҝөстәрмәјә тәшвиг едир (Һәвариләрин ишләри 10:34). Башгаларынын инанҹ вә давранышлары илә разы олмасаг белә, онларла меһрибан вә һөрмәтҹил даврана биләрик (Мәтта 7:12).
МҮГӘДДӘС КИТАБ НӘСИҺӘТЛӘРИ ФАЈДАЛЫДЫР: Даниелә ашыланмышды ки, Асијадан олан инсанлар онун өлкәси үчүн тәһлүкәдир. О, Асија мәншәли һәр кәсә нифрәт едирди вә чох вахт иҹтимаи јерләрдә онлары тәһгир едирди. Даниел бөлүшүр: «Мән өз давранышымы “вәтәнпәрвәрлик” адландырырдым. Фикирләримин вә һәрәкәтләримин јанлыш олдуғуну дүшүнмүрдүм».
Сонрадан Даниел Мүгәддәс Китабы өјрәнмәјә башлајыр. О дејир: «Мән дүшүнҹә тәрзими тамамилә дәјишмәли олдум. Инсанлара Аллаһын ҝөзү илә бахмалы идим, чүнки мәншәјимиздән асылы олмајараг һамымыз Онун ҝөзүндә ејнијик». Инди Даниел инсанларла гаршылашанда һансы һиссләри кечирдијини белә изаһ едир: «Онларын һаралы олдуғу барәдә һеч фикирләшмирәм дә. Һәр ҹүр инсаны севирәм вә дүнјанын һәр бир јериндә јахын достларым вар».
Әтрафлы мәлумат әлдә етмәк үчүн jw.org сајтындан «Гәрәзә чарә вармы?» адлы «Ојанын!» № 3, 2020 нәшрини охујун.
3. Пул
Бир чох инсан хошбәхт олмаг вә даһа јахшы ҝәләҹәјә саһиб олмаг үчүн вар-дөвләт далынҹа дүшүр.
МҮГӘДДӘС КИТАБДА ДЕЈИЛИР: «Һикмәт дә пул кими инсанын сипәридир. Амма елмин вә һикмәтин үстүнлүјү бундадыр ки, онлар өз саһибинин һәјатыны һифз едир» (Ваиз 7:12).
МӘНАСЫ: Дүздүр, пул лазымдыр, амма о, хошбәхтлијимизә вә ја ҝәләҹәјимизә зәманәт вермир (Мәсәлләр 18:11; 23:4, 5). Әсл хошбәхтлик вә тәһлүкәсиз ҝәләҹәк Мүгәддәс Китабдакы илаһи һикмәтә ујғун давранмагдан асылыдыр (1 Тимутијә 6:17—19).
МҮГӘДДӘС КИТАБ НӘСИҺӘТЛӘРИ ФАЈДАЛЫДЫР: Индонезијада јашајан Кардо адлы бир киши бүтүн диггәтини вар-дөвләт топламаға ҹәмләмишди. О дејир: «Чохларынын хәјалыны гурдуғу шејләри мән артыг дадмышдым. Сәјаһәтләрә чыхырдым, баһалы әшјалар, лүкс автомобилләр, евләр алырдым». Амма онун јағ-бал ичиндәки һәјаты чох чәкмәди. О дејир: «Мәнә кәләк ҝәлдиләр вә илләр әрзиндә ҝеҹә-ҝүндүз чалышыб газандығым пуллары бир ҝөз гырпымында итирдим. Һәјатымы пул газанмаға һәср етмишдим, амма сонда мәнә галан мәнәви бошлуг, дәјәрсизлик һисси вә мәјуслуг олду».
Кардо Мүгәддәс Китабын пула дүзҝүн мүнасибәтлә бағлы мәсләһәтинә әмәл етмәјә башлады. О, артыг бүтүн ҝүҹүнү вар-дөвләт топламаға јох, садә һәјат сүрмәјә ҹәмләјир. Кардо дејир: «Әсл вә әбәди сәрвәт Аллаһла ҝөзәл мүнасибәтә саһиб олмагдыр. Артыг башымы јастыға раһат гојурам вә сөзүн әсл мәнасында хошбәхтәм».
Мүгәддәс Китабын пула даир нөгтеји-нәзәри һагда өјрәнмәк үчүн jw.org сајтында јерләшән «Ҝөзәтчи гүлләси» журналынын № 3, 2021 сајындакы «Тәһсил вә пул хошбәхт ҝәләҹәјә зәманәт верир?» адлы мәгаләни охујун.
4. Ҹинси мүнасибәт
Инсанлар арасында ҹинси мүнасибәтлә бағлы мүхтәлиф фикирләр вар.
МҮГӘДДӘС КИТАБДА ДЕЈИЛИР: «Аллаһ истәјир ки, сиз... әхлагсызлыгдан узаг дурасыныз. Гој һәр кәс өз бәдәнини паклыгла вә шәрәфлә идарә етмәји баҹарсын, Аллаһы танымајан халглара хас олан аҹҝөз шәһвәтин әсири олмасын» (1 Салоникилиләрә 4:3—5).
МӘНАСЫ: Мүгәддәс Китабда ҹинси истәкләрлә бағлы һәдд гојулур. «Әхлагсызлыг» дејиләндә зина, фаһишәлик, никаһда олмајан шәхсләр арасында ҹинси әлагә, һомосексуаллыг вә зоофилија (һејванла ҹинси әлагә) нәзәрдә тутулур (1 Коринфлиләрә 6:9, 10). Аллаһ јалныз никаһда олан әр-арвад арасында ҹинси әлагәјә изин верир (Мәсәлләр 5:18, 19).
МҮГӘДДӘС КИТАБ НӘСИҺӘТЛӘРИ ФАЈДАЛЫДЫР: Австралијада јашајан Кајли адлы гадын дејир: «Субај олдуғум үчүн фикирләширдим ки, ҹинси әлагәдә олсам, севилдијими һисс едәрәм, кимсә мәнә арха-дајаг олар. Амма ҝөзләдијим кими олмады. Әксинә, өзүмү дәјәрсиз һисс етдим вә һәјатдан күсдүм».
Сонралар Кајли Мүгәддәс Китабы өјрәнмәјә башлады вә орада ҹинси мүнасибәтлә бағлы јазылан мәсләһәтләрә әмәл етди. О дејир: «Ҝөрүрәм ки, Аллаһын гојдуғу гајдалар инсаны јанлыш әмәлин нәтиҹәсиндән вә гәлб јарасындан горујур. Һәр шеји Аллаһын бујурдуғу кими едирәм. Инди мәни севән вә мәнә дајаг олан һәјат јолдашым вар. Мүгәддәс Китабдакы нәсиһәтләрә әмәл етмәк дәфәләрлә мәни гәлб ағрысындан горујуб!»
Әтрафлы мәлумат әлдә етмәк үчүн jw.org сајтындан «Мүгәддәс Китабда никаһа дахил олмадан бирҝә јашамагла бағлы нә дејилир?» адлы мәгаләни охујун.
Јараданымыз бизә нәјин дүз, нәјин сәһв олдуғуну ачыглајыр. Бу гајда-ганунлара ујғун давранмаг һәмишә асан олмаса да, онлара әмәл етмәјә дәјәр. Әмин ола биләрик ки, бу ҹүр даврансаг, әбәдијјән хошбәхт олаҹағыг.
