• Аллаһ тәрәфиндән сечилмәли иди. «Мән падшаһымы... әјләшдирмишәм!.. Халглары мирас кими верим сәнә, јер үзү башдан-баша сәнин мүлкүн олсун» (Зәбур 2:6, 8).

• Давуд падшаһын вариси олмалы иди. «Бизим үчүн көрпә доғулду, бизә оғул бәхш едилди... Һакимијјәти уҹгарларадәк јајылаҹаг, сүлһүн сону олмајаҹаг. О, Давудун тахтында, падшаһлығынын башында отураҹаг. Һакимијјәтини... бәргәрар едәҹәк» (Әшија 9:6, 7).

• Бејтләһмдә доғулмалы иди. «Еј Бејтләһм,.. ирадәми иҹра едәҹәк рәһбәр сәндән чыхаҹаг... Онун әзәмәти јерин уҹгарларынадәк чатаҹаг» (Микә 5:2, 4).

• Инсанлар тәрәфиндән рәдд едилмәли вә едам едилмәли иди. «Она һәгарәт едирдиләр, биз ону һеч сајырдыг... Асилијимизә ҝөрә онун бәдәни дешилди, тәгсирләримизә ҝөрә әзаб чәкди» (Әшија 53:3, 5).

• Өлүб дирилмәли вә шәрәфләнмәли иди. «Мәни Мәзарда гојмазсан, гојмазсан вәфалы бәндән гәбир ҝөрсүн... Сағында олмаг мәнә әбәди сәадәт ҝәтирир» (Зәбур 16:10, 11).

Бүтүн бәшәр тарихиндә тәкҹә бир нәфәр мүкәммәл Падшаһа ишарә едән бу амилләрә ујғун ҝәлир. О да Иса Мәсиһдир. Онун анасы Мәрјәмә мәләк демишди: «Јеһова Аллаһ она атасы Давудун тахтыны верәҹәк... Онун Падшаһлығынын сону олмајаҹаг» (Лука 1:31—33).

Иса Мәсиһ јер үзүндә јашајанда һөкмдар олмады. О, Аллаһын тәсис етдији Падшаһлығын Падшаһы кими бәшәријјәти ҝөјдән идарә етмәлидир. Бәс нәјә ҝөрә о, мүкәммәл Һөкмдардыр? Ҝәлин ҝөрәк јер үзүндә јашајанда о нә етмишди.

•   Иса Мәсиһ инсанларын гејдинә галырды. Иса Мәсиһ кимлијиндән, вәзифәсиндән асылы олмајараг, гадынлы-кишили, гоҹалы-ҹаванлы һамыја көмәк едирди (Мәтта 9:36; Марк 10:16). Бир дәфә бир ҹүзамлы она јалварыб демишди: «Әҝәр истәсән, мәни тәмизләјә биләрсән». Исанын она јазығы ҝәлмишди вә она шәфа вермишди (Марк 1:40—42).

• Иса Мәсиһ инсанлара Аллаһы разы салмағы өјрәдирди. О демишди: «Сиз һәм Аллаһын, һәм дә вар-дөвләтин гулу ола билмәзсиниз». Һәмчинин бујурмушду ки, биз өзүмүзә гаршы һансы рәфтары ҝөзләјириксә, башгалары илә дә о ҹүр рәфтар етмәлијик. Бундан башга, билдирмишди ки, Аллаһ тәкҹә бизим әмәлләримизә јох, һәмчинин фикирләримизә вә һиссләримизә дә диггәт јетирир. Буна ҝөрә дә Аллаһы разы салмаг үчүн биз үрәјимизин дәринлијиндәки һиссләри идарә етмәлијик (Мәтта 5:28; 6:24; 7:12). Иса Мәсиһ вурғуламышды ки, хошбәхт олмаг үчүн Аллаһын биздән нә тәләб етдијини өјрәнмәли вә јеринә јетирмәлијик (Лука 11:28).

• Иса Мәсиһ әсл севҝинин нә олдуғуну өјрәдирди. Исанын сөзләри вә әмәлләри бөјүк тәсирә малик иди, динләјиҹиләрин үрәјинә ишләјирди. «Ҹамаат онун неҹә вәз етдијинә һејран галды. Чүнки Иса... ихтијар саһиби кими вәз едирди» (Мәтта 7:28, 29). Иса инсанлара өјрәдирди: «Дүшмәнләринизи һәмишә севин». О, һәтта өлүмүнә ҝөрә мәсулијјәт дашыјан бәзи инсанлар үчүн дуа едиб демишди: «Ата, онлары бағышла, чүнки нә етдикләрини билмирләр» (Мәтта 5:44; Лука 23:34).

Хејирхаһ вә шәфгәтли олан Иса Мәсиһ дүнјанын Һөкмдары олмаға там лајигдир. Бәс онун һакимијјәти нә заман башлајыб?