Бәзи инсанлар Мүгәддәс Китабын * дәјишдирилдијини дүшүнүр. Әшија пејғәмбәр демишди: «Аллаһымызын сөзү әбәди галар» (Әшија 40:8). Аллаһын вәдләринин тәһриф олунмадығына неҹә әмин ола биләрик?

Аллаһ Өз Кәламыны тәһриф олунмагдан горумаға гадирдир. Гәдимдә китабларын үзүнү әллә көчүрүрдүләр. Көчүрүҹүләр һәрфләрин һамысынын јазылдығыны, һеч биринин бурахылмадығыны вә ја башга һәрфлә әвәз олунмадығыны јохламаг үчүн мәтндәки бүтүн һәрфләри сајырдылар. Бунунла белә, сәһвсиз инсан јохдур. Буна ҝөрә дә бәзи көчүрүҹүләр мәтндә хырда сәһвләрә јол вермишдиләр.

Мүгәддәс Китабын минләрлә гәдим әлјазмасы вар. Онлардан бириндә ҹүзи фәрг варса, дүзҝүн мәтни мүәјјән етмәк үчүн ону башга әлјазмаларла мүгајисә етмәк олар. (Әлавә мәлумат алмаг үчүн jw.org сајтында јерләшән «Мүгәддәс Китаб тәһриф олунуб?» адлы мәгаләјә бахын.)

Ҝөтүрәк гәдим «Өлү дәниз әлјазмалары»ны. 1947-ҹи илдә бәдәвиләрин Өлү дәниз јахынлығында јерләшән мағараларда тапдығы бу әлјазмалара Мүгәддәс Китабдан парчалар да дахилдир. Онларын ики мин илдән чох јашы вар. Мүтәхәссисләр Мүгәддәс Китабын бу гәдим әлјазмаларыны әлимиздә олан Мүгәддәс Китабла мүгајисә етмишдиләр. Бу мүгајисәдән нә мәлум олмушду?

Мүтәхәссисләр гәдим әлјазмалары диггәтлә арашдырандан сонра тәсдиг етмишләр ки, бу ҝүн әлимиздә олан Мүгәддәс Китаб орижинал мәтнлә ејнидир *. Әмин ола биләрик ки, Аллаһ Мүгәддәс Китабы тәһриф олунмагдан горујуб вә бу китаб дәјишилмәдән бизә ҝәлиб чатыб.

Буна ҝөрә дә Мүгәддәс Китабы дәгиглијинә шүбһә етмәдән, архајынлыгла охуја биләрсиниз. Инди исә ҝәлин ҝөрәк пејғәмбәрләримиз Аллаһ һаггында нә данышыблар.