Мән 1934-ҹү илдә Канаданын Онтарио әјаләтиндә мәдән шәһәри олан Тимминсдә анадан олмушам. Валидејнләрим Исвечрәдән мүһаҹир кими бура көчмүшдүләр. Тәхминән 1939-ҹу илдә анам «Ҝөзәтчи гүлләси» нәшрләрини охумаға вә Јеһованын Шаһидләринин ибадәт ҝөрүшләриндә иштирак етмәјә башлады. О мәни вә баҹы-гардашларымы да өзү илә бу ҝөрүшләрә апарырды. Анам гыса заманда Јеһованын Шаһиди олду.

Атам буну јахшы гаршыламады, амма анам һәгигәти севирди вә Јеһоваја садиг галмаға әзмли иди. Һәтта 1940-ҹы илләрин әввәлиндә Канадада Јеһованын Шаһидләринин фәалијјәти гадаған олунанда белә, о, Јеһоваја садиг галды. Атам анамла кобуд данышса да, анам һәмишә онунла меһрибан, һөрмәтҹил давранырды. Анамын ҝөзәл нүмунәси мәнә вә алты баҹы-гардашыма һәгигәти гәбул етмәјә көмәк етди. Хошбәхтликдән, тәдриҹән атамын мүнасибәти јумшалды вә о бизимлә даһа меһрибан олмаға башлады.

Мән 1950-ҹи илин јајында Нју-Јорк шәһәриндә кечирилән «Теократијанын инкишафы» адлы топлантыда иштирак етдим. Орада дүнјанын мүхтәлиф јерләриндән олан баҹы-гардашларла таныш олдум. Һәмчинин Ҝилад мәзунларынын руһландырыҹы мүсаһибәләрини динләдим. Бүтүн бунлар мәни Јеһованын јолунда даһа чох иш ҝөрмәјә тәшвиг етди, тамвахтлы хидмәтә башламаға даһа да һәвәсләндим. Евә гајыдан кими өнҹүл олмаг үчүн әризә долдурдум. Канада филиалындан мәнә мәктуб јазыб билдирдиләр ки, әввәлҹә вәфтиз олунмалыјам. Беләҹә, мән 1950-ҹи ил октјабрын 1-дә вәфтиз олундум вә бир ај сонра өнҹүл хидмәтинә башладым. Илк  тәјинатым Капаскасинг шәһәринә иди. Бу шәһәр һәмин вахт јашадығым әразидән чох узаг иди.

1951-ҹи илин јазында филиал франсыз дилиндә даныша билән Јеһованын Шаһидләрини Квебек әјаләтинә көчмәјә тәшвиг етди. Орада әһали франсызҹа данышыр. Квебекдә тәблиғчиләрә бөјүк тәләбат вар иди. Мән һәм франсыз, һәм дә инҝилисҹә даныша билирдим, она ҝөрә дә бу чағырыша һај вердим. Мән Руенә тәјин олундум. Бу әразидә һеч кәси танымырдым. Әлимдә бирҹә јухарыда һаггында данышдығым үнван вар иди. Амма һәр шеј јахшы олду. Биз Марселлә јахын дост олдуг. Нөвбәти дөрд ил бојунҹа Квебекдә тәблиғ етмәкдән бөјүк севинҹ дујдум. Бу мүддәт әрзиндә хүсуси өнҹүл олдум.

Квебекдә оларкән Нју-Јоркун Саут-Лансинг шәһәриндә кечирилән Ҝилад мәктәбинин 26-ҹы синфинә дәвәт аланда чох севиндим. 1956-ҹы ил февралын 12-си мәзун олдум. Мәни индики Ганаја b (Гәрби Африка) тәјин етдиләр. Амма әввәлҹә сәнәдләрими һазырламаг үчүн “бир нечә һәфтәлик” Канадаја гајытмалы идим.

Амма елә олду ки, сәнәдләр дүзәләнә гәдәр дүз једди ај Торонтода галмалы олдум. Бу вахт әрзиндә Крипс гардашын аиләси мәнә өз евинин гапысыны ачды. Орада онларын гызы Шејла илә таныш олдум. Биз бир-биримизә вурулдуг. Һазырлашырдым ки, она евлилик тәклифи едим мәнә виза вердиләр. Шејла илә дуа едиб гәрара ҝәлдик ки, тәјинат јеринә ҝетмәјим даһа дүзҝүн олар. Амма дедик, әлагәни кәсмәјәк, мәктублашаг ҝөрәк ҝәләҹәкдә биздә евләнмәк алынаҹаг, ја јох. Гәрар вермәк асан дејилди, амма заман ҝөстәрди ки, доғру гәрар вермишдик.

Гатарла, јүк ҝәмиси илә вә тәјјарә илә бир ај сәјаһәт едәндән сонра Гананын пајтахты Аккраја ҝәлиб чатдым. Орада вилајәт нәзарәтчиси тәјин олундум. Мәним тәјинатыма бүтүн Ганаја, гоншулугда јерләшән Фил диши саһилинә (индики Кот-д’Ивуар) вә Тоголанда (индики Того) сәјаһәт етмәк дахил иди. Чох вахт бу әразиләрә филиалын вердији “Ҹип”лә тәкбашына  ҝедирдим. Зијарәтләримин һәр дәгигәсиндән бөјүк зөвг алырдым.

Һәфтәсонлары рајон топлантылары илә бағлы тапшырыгларым олурду. Бизим топланты залымыз јох иди. Буна ҝөрә дә гардашлар гызмар ҝүнәшдән горунмаг үчүн бамбук ағаҹларындан чардаг дүзәлдиб үстүнү палма будаглары илә өртүрдүләр. Јемәкханада сојудуҹу олмадығына ҝөрә гардашлар һејванлары дири-дири сахлајыб, топлантыја ҝәләнләрә јемәк вермәк үчүн кәсирдиләр.

Бу топлантыларда ҝүлмәли һадисәләр дә олурду. Хүсуси тәјинатлы мүждәчи Һерберт Ҹеннингс c гардаш нитглә чыхыш едән вахт јемәкханадан инәк гачды. О, һүркмүш һалда аудиторија илә сәһнә арасында о јана-бу јана гачмаға башлады. Ҹеннингс гардаш нитгинә фасилә верди. Дөрд ҹүссәли гардаш инәји рам едиб аудиторијанын алгышлары илә јемәкханаја гајтарды.

Адәтән һәфтә әрзиндә мән јахынлыгдакы кәндләрдә «Јени дүнја ҹәмијјәтинин фәалијјәти» адлы филми ҝөстәрирдим. Бунун үчүн ики дирәјә вә ја ики ағаҹа ағ кәтан парча бағлајыб, пројекторла филми әкс етдирирдим. Бу, кәндлиләрин јаман хошуна ҝәлирди. Чохлары өмүрләриндә илк дәфә иди киноја бахырдылар. Онлар инсанларын вәфтиз олундуғу сәһнәјә баханда бөјүк шөвглә әл чалырдылар. Бу филмин сајәсиндә онлар баша дүшүрдүләр ки, Јеһованын Шаһидләри бејнәлхалг тәшкилатдыр вә араларында бирлик вар.

Африкада тәхминән ики ил хидмәт едәндән сонра 1958-ҹи илдә Нју-Јорк шәһәриндәки бејнәлхалг топлантыда иштирак едәҹәјим үчүн чох севинирдим. Шејланы орада ҝөрмәк бөјүк хошбәхтлик иди! О, Квебекдән ҝәлмишди. Орада хүсуси өнҹүл кими хидмәт едирди. Биз мәктублашырдыг, амма инди јенидән говушдуг. Мән она евлилик тәклифи еләдим. О да разылашды. Сонра Нејтан Норр гардаша d мәктуб јазыб хаһиш етдим ки, мүмкүндүрсә, Шејла Ҝилад мәктәбини кечиб мәнимлә бирҝә Африкада хидмәт етсин. Гардаш разылашды. Нәһајәт, Шејла Ганаја ҝәлди вә биз 1959-ҹу ил октјабрын 3-ү Аккрада евләндик. Ајдын ҝөрүрдүк ки, хидмәти һәјатымызда биринҹи јерә гојдуғумуз үчүн Јеһова ишләримизи аванд етди.

1961-ҹи илдә бизи Камеруна тәјин етдиләр. Гардашлар мәндән орада јени филиалын јаранмасына көмәк етмәји хаһиш етдиләр. Бунунла әлагәдар чох мәшғул идим. Јени филиал хидмәтчиси кими һәлә өјрәнмәли олдуғум нә гәдәр шеј вар иди. Даһа сонра 1965-ҹи илдә Шејланын һамилә олдуғуну өјрәндик. Етираф едим ки, валидејн олмаг фикринә алышмаг үчүн бизә вахт лазым олду. Амма бир мүддәт сонра бу јени мәсулијјәтә ҝөрә артыг севинмәјә башладыг. Канадаја дөнмәк үчүн планлар да гурмушдуг. Елә бу мәгамда сарсыдыҹы бир хәбәр алдыг.

Өјрәндик ки, ушаг Шејланын бәтниндә өлүб. Һәким бизә доғулмамыш көрпәмизин оғлан олдуғуну деди. Үстүндән 50 илдән чох кечсә дә, һәлә дә бу һадисәни унутмамышыг. Баш верәнләрә ҝөрә һәдсиз кәдәрләнсәк дә, әввәлки тәјинатымызда галдыг. Биз бу тәјинатымызы чох севирдик.

Камерунда гардашлар сијаси битәрәфликләринә ҝөрә тез-тез тәгибләрлә үзләширдиләр. Бу тәгибләр хүсусилә президент сечкиләри әрәфәсиндә даһа да ҝүҹләнирди. 1970-ҹи ил мајын 13-ү горхдуғумуз шеј башымыза ҝәлди: һөкумәт Јеһованын Шаһидләринин фәалијјәтини рәсми шәкилдә гадаған етди вә ҝөзәл филиал бинамызы мүсадирә етди. Ора беш ај иди ки көчмүшдүк. Һөкумәт бир һәфтәнин ичиндә мән вә Шејла да дахил олмагла бүтүн хүсуси тәјинатлы мүждәчиләри өлкәдән депортасија етди. Бурадакы баҹы-гардашлары гојуб ҝетмәк бизим үчүн чох чәтин иди, чүнки онлар бизә чох әзиз иди. Онлара ҝөрә нараһат идик, билмирдик башларына нә ҝәләҹәк.

Нөвбәти алты ај әрзиндә биз Франса филиалында галдыг. Мән бурада да Камерундакы баҹы-гардашларын тәләбатларынын гајғысына галмаг үчүн әлимдән ҝәләни едирдим. Һәмин илин декабрында бизи Ниҝерија филиалына тәјин етдиләр. Бу филиал Камерундакы тәблиғ ишинә нәзарәт етмәјә башламышды. Ниҝеријада баҹы-гардашлар бизи чох исти гаршыладылар. Орада бир нечә ил севинҹ ичиндә хидмәт етдик.

1973-ҹү илдә биз чох чәтин бир гәрар вермәли олдуг. Шејланын сәһһәтиндә ҹидди проблемләр вар иди. Топланты үчүн Нју-Јоркда олдуғумуз вахт о, ҝөз јашлары ичиндә мәнә деди: «Артыг давам едә билмирәм. Ахыр вахтлар елә һеј хәстәјәм, јорғунам». О, 14 илдән чох иди ки, мәнимлә бирҝә Гәрби Африкада хидмәт едирди. Бу илләр әрзиндә сәдагәтлә хидмәт етдијинә ҝөрә онунла фәхр едирдим, амма нәләрисә дәјишмәк лазым иди. Вәзијјәтимизи ҝөтүр-гој етдик. Бу барәдә чохлу, һәрарәтли дуалар етдик. Гәрара ҝәлдик ки, Канадаја ҝери гајыдаг. Орада Шејланын сәһһәтинин гајғысына даһа јахшы гала биләҹәкдик. Хүсуси тәјинатлы мүждәчилик ишимизи вә тамвахтлы хидмәтимизи дајандырмаг индијәдәк вердијимиз ән чәтин вә үрәк ағрыдан гәрар иди.

Канадаја гајыдандан сонра көһнә достумун јанында ишә дүзәлдим. О, Торонтонун шималында јерләшән бир шәһәрдә автосалонда ишләјирди. Биз ев кирајәләдик, икинҹи әл мебел  алдыг. Бунун сајәсиндә јени һәјатымызы борҹа ҝирмәдән башладыг. Истәјирдик, садә јашајаг. Үмид едирдик, нә вахтса тамвахтлы хидмәтә јенидән башлајарыг. Бу үмидимиз ҝөзләдијимиздән дә тез ҝерчәкләшди.

Мән һәр шәнбә Норвалда (Онтарио әјаләти) топланты залынын тикинтисиндә көмәк етмәјә башладым. Бир мүддәт сонра топланты залынын нәзарәтчиси олмаг тәклифини алдым. Шејланын сәһһәти ҝүнү-ҝүндән јахшылашдығы үчүн дүшүндүк ки, бу јени тәјинатын өһдәсиндән ҝәлә биләрик. Беләҹә, 1974-ҹү илин ијун ајында топланты залындакы мәнзилә көчдүк. Јенидән тамвахтлы хидмәтә гајытдығымыза ҝөрә чох севинирдик.

Ики ил сонра сәјјар хидмәтә дәвәт алдыг. Шүкүрләр олсун ки, Шејланын сәһһәти ҝет-ҝедә јахшылашырды. Буна ҝөрә дә бу дәвәти гәбул етдик. Тәјин олундуғумуз рајон Манитобада јерләширди. Канаданын бу әјаләти шахталы гышы илә танынырды. Амма баҹы-гардашларын сәмими мүнасибәти гәлбимизи исидирди. Бир шеји баша дүшдүк: Һарада хидмәт етмәјимиз елә дә өнәмли дејил, өнәмли олан олдуғумуз јердә Јеһоваја хидмәти давам етдирмәкдир.

Бир нечә ил сәјјар хидмәтдә олдугдан сонра 1978-ҹи илдә биз Канада Бејтелинә дәвәт олундуг. Чох кечмәмиш аҹы тәҹрүбәмдән ваҹиб бир шеј өјрәндим. Бу мәним үчүн һәјат дәрси олду. Бир ҝүн Монреалда кечирилән хүсуси ҝөрүшдә франсыз дилиндә бир саат јарымлыг нитг сөјләјирдим. Тәәссүф ки, нитгим динләјиҹиләрә марагсыз ҝәлди. Хидмәт шөбәсиндән олан бир гардаш мәнә нитгимлә бағлы мәсләһәт верди. Дүзүнү десәм, јахшы натиг олмадығымы о вахт һәлә баша дүшмүрдүм. Буна ҝөрә дә мәсләһәтә пис јанашдым. Гардашла сөһбәтимиз чәп ҝәлди. Дүшүнүрдүм, о мәни анҹаг тәнгид етди, һеч тәрифләмәди. Сәһвим онда иди ки, мән фикрими мәсләһәтин верилмә тәрзинә вә ону верән кәсә ҹәмләмишдим.

Бир нечә ҝүн сонра филиал комитәсинин үзвү бу мәсәлә илә бағлы мәнимлә данышды. Мәсләһәтә дүзҝүн јанашмадығымы бојнума алдым вә пешман олдуғуму билдирдим, сонра исә мәнә мәсләһәт верән гардашла данышдым. Сағ олсун, үзрхаһлығымы гәбул етди. Бу һадисә тәвазөкарлыгла бағлы мәним үчүн һәјат дәрси олду вә өмүрлүк јаддашыма һәкк олунду (Мәс. 16:18). Бу барәдә Јеһоваја дәфәләрлә дуа етмишәм вә өзүмә сөз вермишәм ки, бир дә һеч вахт мәсләһәтә пис јанашмајым.

Артыг 40 илдән чохдур ки, Канада Бејтелиндәјәм. 1985-ҹи илдән исә филиал комитәсинин үзвү кими хидмәт едирәм. 2021-ҹи илин феврал ајында мәнә ағыр итки үз верди: өмүр-ҝүн јолдашым Шејла өлүм јухусуна ҝетди. Онун јохлуғуна дөзмәк мәним үчүн чох чәтиндир, үстәлик, сәһһәтимлә бағлы проблемләрим вар. Амма Јеһоваја хидмәтдә о гәдәр мәшғул, о гәдәр хошбәхтәм ки, өмрүмүн неҹә кечиб ҝетдијини һисс етмирәм (Ваиз 5:20). Һәјатым боју нә гәдәр чәтинлијим олса да, севинҹли ҝүнләримин сајы онлардан чох олуб. Јеһованы һәјатымда һәр шејдән үстүн тутмағын вә 70 ил тамвахтлы хидмәтдә олмағын сајәсиндә өмрүм чох мәналы, долғун кечиб. Дуа едирәм ки, ҝәнҹ баҹылар вә гардашлар да даима Јеһованын ишини һәјатларында биринҹи јерә гојсунлар. Онда онларын да һәјаты немәтләрлә долу вә рәнҝарәнҝ олаҹаг. Бу, јалныз Јеһоваја хидмәт етмәјин сајәсиндә мүмкүндүр.