1, 2. а) Нә үчүн һәвари Булусун дөврүндә гулдарлыг вә азадлыг мөвзусу актуал иди? б) Һәгиги азадлыға наил олмалары үчүн Булус инсанлары кимә јөнәлдирди?

ИЛК мәсиһиләрин јашадығы Рома өлкәсиндә әһали өлкәдә һөкм сүрән әдаләт, азадлыг вә мөвҹуд ганунларла өјүнүрдү. Һалбуки Рома империјасы мәһз гулларын ағыр зәһмәти һесабына мөһкәмләниб чичәкләнмишди. Һәтта Рома әһалисинин 30 фаизинин гуллардан ибарәт олдуғу вахтлар олмушду. Ајдын мәсәләдир ки, һәмин дөврдә гулдарлыг вә азадлыг мөвзусу, бурада јашајан мәсиһиләр дә дахил, бүтүн әһалинин әсас сөһбәт мөвзусу иди.

² Һәвари Булус јаздығы мәктубларда азадлыг мөвзусуна тез-тез тохунурду. Амма мүасирләриндән фәргли олараг, онун мәгсәди иҹтимаи-сијаси ислаһатлар апармаг дејилди. О, үмидини һансыса инсан һөкумәтинин азадлығы бәрпа едәҹәјинә бағламырды, әксинә, бүтүн ҝүҹүнү инсанлара Аллаһын Падшаһлығы һаггында хош хәбәри мүждәләмәјә, Иса Мәсиһин фидјә гурбанлығынын дәјәрини изаһ етмәјә сәфәрбәр едирди. Булус диндашларыны һәгиги азадлығын мәнбәји олан Аллаһа бел бағламаға  сәсләјирди. Коринфлиләрә јаздығы икинҹи мәктубда о демишди: «Јеһова руһдур. Јеһованын руһу һарададырса, орада азадлыг вар» (2 Кор. 3:17).

3, 4. а) Булусу 2 Коринфлиләрә 3:17 ајәсиндәки сөзләри јазмаға нә тәшвиг етмишди? б) Јеһованын бәхш етдији азадлыға наил олмаг үчүн нә етмәлијик?

³ Һәвари Булус коринфлиләрә јаздығы мәктубун әввәлиндә Муса пејғәмбәрдән бәһс едир. О дејир ки, Јеһованын мәләјинин һүзурунда олан Муса пејғәмбәр Сина дағындан енән заман үзү шәфәг сачырды вә халг буну ҝөрүб горхдуғу үчүн пејғәмбәр үзүнү нигабла өртүрдү (Чых. 34:29, 30, 33; 2 Кор. 3:7, 13). Сонра Булус сөзүнә белә давам едир: «Үрәк Јеһоваја сары дөнәндә өртүк галдырылыр» (2 Кор. 3:16). Ҝөрәсән бу сөзләрин мәнасы нәдир?

⁴ Кечән мәгаләдә гејд олундуғу кими, мүтләг вә мәһдудијјәтсиз азадлыға јалныз Јеһова маликдир. Демәли, «Јеһованын руһу һарададырса, орада азадлыг вар». Јеһованын бәхш етдији азадлығын биздә олмасы үчүн Она сары дөнмәлијик, јәни Онунла мөһкәм достлуг мүнасибәтләри гурмалыјыг. Сәһрада долашан исраиллиләр Јеһованын онлар үчүн етдикләринә руһани ҝөзләрлә бахмырдылар. Мисир көләлијиндән гуртулмуш бу халгын үрәји вә зеһни, санки өртүлү иди, онларын фикри-зикри јени әлдә етдикләри азадлыгдан истәдикләри кими истифадә етмәк иди (Ибр. 3:8—10).

5. а) Јеһованын руһу бизә һансы азадлығы бәхш едир? б) Нәјин әсасында демәк олар ки, һәтта физики әсарәт белә, Јеһованын бәхш етдији азадлығы әлимиздән ала билмәз? ҹ) Һансы суалларын үзәриндә дүшүнмәлијик?

⁵ Јеһованын руһунун бәхш етдији азадлыг дејәркән һансыса физики көләликдән гуртулуш нәзәрдә тутулмур. Онун вердији азадлыг инсанларын верә биләҹәји азадлыгдан гат-гат үстүндүр. Чүнки бу азадлыг бизи ҝүнаһ вә өлүмүн, һәмчинин јалан дин вә онун адәт-әнәнәләринин көләлијиндән хилас едир (Ром. 6:23; 8:2). Белә азадлығы ким истәмәз ки?! Һәтта гул вә ја мәһбус олан инсан да бу азадлыға саһиб ола биләр (Јар. 39:20—23). Әгидәсинә ҝөрә илләрлә һәбсдә олан Һаролд Кинг гардашын һәјаты бунун бариз нүмунәсидир. Онун һәјат һекајәсинә JW телевизијасында баха биләрсиниз. (МҮСАҺИБӘ ВӘ ҺӘЈАТ ҺЕКАЈӘЛӘРИ > СЫНАГЛАР бөлмәсинә дахил олун.) Бәс Јеһованын бизә вердији азадлығы гијмәтләндирдијимиз нәдән ҝөрүнәҹәк? Бу азадлыгдан ағылла неҹә истифадә едә биләрик?

6. Исраиллиләрин Јеһованын бәхш етдији азадлығы гијмәтләндирмәдикләри нәдән ҝөрүнүр?

⁶ Кимсә бизә дәјәрли бир һәдијјә верәндә истәјирик она неҹәсә миннәтдарлығымызы билдирәк. Амма исраиллиләр Јеһованын онлара бәхш етдији азадлығы гијмәтләндирмәдиләр. Мисирин көләлијиндән тәзәҹә гуртулмушдулар ки, артыг орда једикләри јемәјин һәсрәтини чәкмәјә, Јеһованын вердији немәтләрә ҝөрә дејинмәјә башладылар; һәтта Мисирә гајытмаг севдасына дүшдүләр. Онлар Мисирдә једикләри балығы, хијары, гарпызы, кәвәри, соған-сарымсағы Јеһоваја сәрбәст ибадәт етмәк азадлығындан үстүн тутдулар. Сөзсүз ки, Јеһова буна ҝөрә онлара чох гәзәбләнди (Сај. 11:5, 6, 10; 14:3, 4). Бу, бизә дә дәрс олмалыдыр.

7. Һәвари Булус 2 Коринфлиләрә 6:1 ајәсиндә јаздығы мәсләһәтә өзү неҹә әмәл едирди? Биз бу мәсләһәтә неҹә әмәл едә биләрик?

⁷ Һәвари Булус мәсиһиләри тәшвиг едирди  ки, Јеһованын Иса Мәсиһ васитәсилә бәхш етдији азадлыға ади јанашмасынлар. (2 Коринфлиләрә 6:1 ајәсини охујун.) О, ҝүнаһ вә өлүмүн әсарәти уҹбатындан әзаб чәксә дә, миннәтдарлыг һисси илә демишди: «[Аллаһа] Ағамыз Иса Мәсиһ васитәсилә шүкүрләр олсун!» Нәјә ҝөрә? Һәвари буну белә изаһ етмишди: «Чүнки Мәсиһ Иса илә вәһдәтдә оланлара һәјат верән руһун гануну [бизи] ҝүнаһ вә өлүм ганунундан азад едиб» (Ром. 7:24, 25; 8:2). Һәвари Булус кими, биз дә Јеһованын бизи ҝүнаһ вә өлүмүн әсарәтиндән азад етмәсинә һеч вахт ади јанашмамалыјыг. Биз мәһз фидјәнин сајәсиндә Аллаһа тәмиз виҹданла ибадәт едир вә бундан әсл севинҹ дујуруг (Зәб. 40:8).

8, 9. а) Азадлығымыздан истифадә илә бағлы һәвари Бутрус һансы хәбәрдарлығы вермишди? б) Бу ҝүн һансы тәһлүкәләрлә үзләширик?

⁸ Саһиб олдуғумуз азадлығы гијмәтләндирмәкдән әлавә, еһтијатлы олмалыјыг ки, ондан суи-истифадә етмәјәк. Һәвари Бутрус хәбәрдарлыг етмишди ки, ҹисмани арзуларымызы тәмин етмәкдән өтрү азадлығымызы әлимиздә бајраг тутмајаг. (1 Бутрус 2:16 ајәсини охујун.) Бу хәбәрдарлыг сәһрада исраиллиләрин башына ҝәләнләри хатырладыр. Бу ҝүн Бутрусун вердији хәбәрдарлыға әмәл етмәк хүсусилә ваҹибдир. Чүнки Шејтан вә онун дүнјасы ҝејим-кеҹим, јејиб-ичмәк, истираһәт, әјләнҹә вә бу кими саһәләрдә гаршымыза чохлу ҹәлбедиҹи сечимләр гојур. Пешәкар рекламчылар инсанларда еһтијаҹ дујмадыглары шејләри әлдә етмәк арзусу ојадыр. Һәгигәтән дә, бу ҝүн белә һијләләрин гурбанына чеврилиб азадлығымыздан суи-истифадә етмәк тәһлүкәси олдугҹа бөјүкдүр!

⁹ Һәвари Бутрусун мәсләһәти һәмчинин иш, карјера, тәһсил вә һәјатын бу кими диҝәр ваҹиб саһәләринә дә аиддир. Мисал үчүн, мәктәбдә охујан ҝәнҹләр нүфузлу университетләрдә тәһсил алмаға тәшвиг олунур. Онлара университет битирмиш инсанларла орта тәһсилли инсанларын алдығы мәваҹиб арасындакы фәрги мисал чәкәрәк әлавә тәһсилин јүксәкмаашлы, престижли ишләрә јол ачдығыны тәлгин едирләр. Верәҹәкләри гәрарын бүтүн һәјатларына тәсир едәҹәјинә ҝөрә ҝәнҹләр үчүн али тәһсил алмаг фикри ағлабатан ҝәлә биләр. Бәс бу ҝәнҹләр вә онларын валидејнләри нәләри нәзәрә алмалыдыр?

10. Шәхси гәрар вермәк азадлығындан неҹә истифадә етмәлијик?

¹⁰ Ола билсин, бәзиләри дүшүнүр ки, бу, шәхси сечим мәсәләсидир вә һәр кәс виҹданынын јол вердији гәдәр истәдији гәрары верә биләр. Һәтта онлар Булусун Коринфдәки мәсиһиләрә гида илә бағлы јаздығы сөзләрлә өзләринә һагг газандыра биләрләр: «Ахы нәјә ҝөрә башгасынын виҹданы мәним азадлығымы мүһакимә етсин?» (1 Кор. 10:29). Дүздүр, бизим тәһсил, карјера кими мәсәләләрдә шәхси гәрар вермәк азадлығымыз вар. Лакин унутмамалыјыг ки, бизим азадлығымыз нисбидир вә вердијимиз һәр бир гәрарын бир нәтиҹәси вар. Мәһз елә бу сәбәбдән һәвари Булус 1 Коринфлиләрә 10:29 ајәсиндә јаздығы сөзләрдән габаг белә бир фикир сөјләмишди: «Һәр шејә изин вар, анҹаг һәр шеј инсана фајда ҝәтирмир. Һәр шејә изин вар, анҹаг һәр шеј инсаны руһән мөһкәмләндирмир» (1 Кор. 10:23). Ајәдән ајдын ҝөрүнүр ки, һәјатымызын истәнилән саһәсиндә азадлығымыздан истифадә едәркән өз истәјимиздән даһа ваҹиб амилләрин олдуғуну унутмамалыјыг.

11. Биз нә үчүн азад олунмушуг?

¹¹ Һәвари Бутрус азадлыгдан суи-истифадә етмәмәклә бағлы мәсләһәт верәркән азад едилмәјимизин сәбәбини дә ҝөстәрмишди. О, азадлығымыздан Аллаһын гуллары олмаг үчүн истифадә етмәјә тәшвиг етмишди. Демәли, Јеһова Мәсиһ васитәсилә бизи ҝүнаһ вә өлүмүн әсарәтиндән она ҝөрә азад едиб ки, һәјатымызы Она һәср едиб Онун гуллары олаг.

12. Нуһ пејғәмбәр вә онун аиләси бизим үчүн һансы нүмунәни гојуб?

¹² Азадлығымыздан суи-истифадә етмәмәјин, ҹисмани арзуларын вә шан-шөһрәтин гулу олмамағын ән ҝөзәл јолу бүтүн диггәтимизи руһани ишләрә көкләмәкдир (Гал. 5:16). Нуһ пејғәмбәр вә онун аиләси бу саһәдә бизим үчүн ҝөзәл өрнәкдир. Онлар азғын, әхлагы позулмуш бир ҹәмијјәтдә јашајырдылар. Бунунла белә, инсанларын дүшүнҹә вә һәјат тәрзинин онлара сирајәт етмәсинә јол вермәдиләр. Бәс буна неҹә наил олдулар? Нуһ пејғәмбәр вә аиләси бүтүн вахтыны Јеһованын онлара тапшырдығы иши иҹра етмәјә сәрф етмишди. Онлар ҝәми тикмәклә, өзләри вә һејванлар үчүн гида тәдарүкү ҝөрмәклә, һәмчинин инсанлары дашгын барәдә хәбәрдар етмәклә мәшғул иди. «Нуһ Аллаһын бүтүн тапшырыгларыны јеринә јетирди. Она неҹә дејилмишдисә, елә дә етди» (Јар. 6:22). Нәтиҹәдә, пејғәмбәр аиләси илә бирҝә дашгындан хилас олду (Ибр. 11:7).

13. Иса Мәсиһ алдығы һансы тапшырығы давамчыларына һәвалә едиб?

¹³ Јеһова бизә һансы иши тапшырыб? Билирик ки, Иса Мәсиһ Јеһованын она вердији тәблиғ етмәк тапшырығыны өз давамчыларына һәвалә едиб. (Лука 4:18, 19 ајәләрини охујун.) Бу дөврүн аллаһы әксәр инсанларын ҝөзләрини, санки кор едиб: онлар динин, маддијјатын вә сијасәтин әсарәтиндәдирләр (2 Кор. 4:4). Иса Мәсиһдән өрнәк алараг биз инсанлара Јеһованы танымаға вә Она ибадәт етмәјә көмәк едирик (Мәт. 28:19, 20). Бу тапшырығы јеринә јетирмәк елә дә  асан дејил. Мәсәлән, бәзи әразиләрдә инсанлар ҝет-ҝедә Аллаһдан узаглашыр, Јараданы танымаг истәмир, һәтта бәзиләри бизә гаршы сәрт мөвгедәдирләр. Амма нәзәрә алсаг ки, Јеһова бизә тәблиғ етмәк тапшырығы вериб, өзүмүздән сорушмалыјыг: «Азадлығымы Јеһоваја даһа чох хидмәт етмәјә сәрф едә биләрәм?»

14, 15. Јеһованын халгы тәблиғ ишинә неҹә јанашыр? (Мәгаләнин әввәлиндәки шәклә бахын.)

¹⁴ Нә хошдур ки, чохлары сонун јахын олдуғуну дәрк едәрәк тамвахтлы хидмәтдә иштирак етмәк үчүн һәјатларыны садәләшдириб (1 Кор. 9:19, 23). Онлардан кимиси јашадығы әразидә, кимиси мүждәчиләрә тәләбат олан әразидә хидмәт едир. Мәсәлән, сон 5 ил әрзиндә 250 000-дән чох тәблиғчи өнҹүл хидмәтинә башлајыб вә һал-һазырда онларын сајы 1 100 000-ни кечиб. Һәгигәтән дә, азадлығымыздан дүзҝүн истифадә едиб Јеһоваја даһа чох хидмәт етмәк мөһтәшәм бәһрәләр ҝәтирир! (Зәб. 110:3).

¹⁵ Бу баҹы-гардашлар нәјин сајәсиндә азадлыгларындан дүзҝүн истифадә едә билибләр? Ҝәлин Ҹон вә Ҹуди адлы ҹүтлүјүн нүмунәсинә бахаг. Онлар өтән 30 ил әрзиндә мүхтәлиф өлкәләрдә хидмәт едибләр. 1977-ҹи илдә Өнҹүл Мәктәби тәсис олунанда мүждәчиләр тәләбат олан әразијә көчүб орада хидмәт етмәјә тәшвиг олунурду. Садә јашамаг вә нәзәрләрини бу мәгсәддән јајындырмамаг үчүн Ҹон гардаш дәфәләрлә ишини дәјишмәли олмушду. Нәһајәтдә онлар тәблиғ етмәк үчүн башга өлкәјә көчә билир. Бурада јени дил өјрәнмәк, јад мәдәнијјәтә вә фәргли иглимә ујғунлашмаг кими чәтинликләрлә үзләшсәләр дә, дуанын вә Јеһоваја ҝүвәнмәјин сајәсиндә бу манеәләри ашырлар. Гардаш бөлүшүр ки, һеч бир шеј Јеһоваја хидмәтдә кечирдији илләрлә мүгајисәјә ҝәлә билмәз. О дејир: «Јеһова мәним үчүн даһа реал, доғма ата гәдәр јахын олмушду. Јагуб 4:8 ајәсиндә јазылмыш “Аллаһа јахынлашын, О да сизә јахынлашаҹаг” сөзләрини инди даһа јахшы дәрк едирәм. Ахтардығымы — әсл мәналы һәјаты тапдым».

16. Бу ҝүн минләрлә мәсиһинин азадлығындан дүзҝүн истифадә етдији нәдән ҝөрүнүр?

¹⁶ Бәзиләринин Ҹон вә Ҹуди кими узун илләр тамвахтлы хидмәт етмәк имканы јохдур. Онларын вәзијјәти бу хидмәтдә јалныз гыса мүддәтлик иштирак етмәјә јол верир. Лакин бу баҹы-гардашларын чоху бүтүн дүнјада апарылан тикинти лајиһәләриндә көнүллү кими хидмәт етмәк фүрсәтини әлдән вермир. Мәсәлән, тәхминән 27 000 баҹы-гардаш ики һәфтәдән тутмуш бир ил вә ја даһа чох мүддәтә Уорвикдәки баш идарәнин тикинтисиндә иштирак етмишди. Чохлары өз шәхси ишләрини мүвәггәти олараг бир кәнара гојуб тикинтијә көмәк етмәјә ҝәлмишди. Јеһованын вердији азадлығы мәһз Ону шәрәфләндирмәк вә Она һәмд етмәк үчүн истифадә едән бу баҹы-гардашлар бизим үчүн бөјүк өрнәкдир!

17. Азадлыгларындан ағылла истифадә едәнләри һансы ҝәләҹәк ҝөзләјир?

¹⁷ Чох хошбәхтик ки, Јеһованы таныјырыг вә һагг ибадәтин бәхш етдији азадлыға саһибик. Ҝәлин вердијимиз гәрарларла бу азадлығы гијмәтләндирдијимизи ҝөстәрәк. Азадлығымыздан суи-истифадә етмәјәк, әксинә, ҝәлин азадлығымызы вә онун ачдығы имканлары Јеһоваја мүмкүн гәдәр чох хидмәт етмәк үчүн истифадә едәк. Белә етсәк, «хилгәт чүрүклүк әсарәтиндән гуртулуб Аллаһын өвладларынын шанлы азадлығына» говушанда Јеһованын вердији немәтләри дадаҹағыг (Ром. 8:21).