ӨТӘН ИЛ әрзиндә бүтүн дүнјада минләрлә гардаш јығынҹаг хидмәтчиси вә ағсаггал тәјин олунуб. Әҝәр бу гардашлардан бири дә сизсинизсә, сөзсүз ки, бу шәрәфли хидмәтә ҝөрә севинҹ дујурсунуз.

Амма јәгин мүәјјән нараһатлыг, һәјәҹан да кечирирсиниз. Ҹејсон адлы бир ағсаггал бөлүшүр: «Тәзә тәјин олунанда ишин чохлуғу мәни горхутду». Муса вә Әрәмја пејғәмбәр дә Јеһовадан јени тәјинат аланда ишин өһдәсиндән ҝәлә билмәјәҹәкләрини дүшүнүрдүләр (Чых. 4:10; Әрм. 1:6). Әҝәр сиздә дә белә һиссләр варса, ҝәлин ҝөрәк онлары неҹә аша вә инкишаф етмәјә давам едә биләрсиниз. Тимутинин нүмунәси бизә көмәк едәҹәк (Һәв. 16:1—3).

Һәвари Булус Тимутини онунла бирҝә тәблиғ сәјаһәтинә чыхмаға дәвәт едәндә еһтимал ки, Тимутинин һарадаса 20 јашы вар иди. Ҝәнҹ олдуғу үчүн Тимутинин әввәл-әввәл өзүнә әминлији јох иди, о, јени тәјинатыны иҹра етмәјә чәкинирди (1 Тим. 4:11, 12; 2 Тим. 1:1, 2, 7). Лакин тәхминән 10 ил сонра Булус Филиппидәки јығынҹаға онун һаггында нөвбәти сөзләри демишди: «Әҝәр Ағамыз Иса мәсләһәт биләрсә, үмид едирәм, тезликлә Тимутини јаныныза ҝөндәрәҹәјәм... Ахы онун кими ҹан-дилдән сизин гејдинизә галаҹаг башга һеч кимим јохдур» (Филип. 2:19, 20).

Нәјин сајәсиндә Тимути белә јахшы ағсаггал олмушду? Тимутинин нүмунәсиндән 6 ваҹиб дәрс өјрәнә биләрик.

1. О, диндашларынын гејдинә галырды. Һәвари Булус Филиппидәки гардашлара јазмышды: «[Тимути] ҹан-дилдән сизин гејдинизә галаҹаг» (Филип. 2:20). Бәли, Тимути һәгигәтән дә диндашларына ҹан јандырырды. Онларын Јеһова илә мүнасибәтләринин мөһкәм олмасыны истәјирди вә бунун үчүн әлиндән ҝәләни едирди.

Әзиз гардашлар, чалышын сәрнишинләри автобуса миндирмәкдән чох дајанаҹаға вахтында чатмағы дүшүнән автобус сүрүҹүсүнә бәнзәмәјәсиниз. Ијирми илдән чохдур ағсаггал кими хидмәт едән Вилјам јени тәјинат алан гардашлара белә бир мәсләһәт верир: «Баҹы-гардашлары севин. Тәшкилати ишләрдән чох, баҹы-гардашларын еһтијаҹларына хүсуси диггәт јетирин».

2. О, руһани ишләри өн плана гојурду. Тимутинин башгаларындан фәргли олдуғуну ҝөстәрәрәк һәвари Булус демишди: «Башгалары Мәсиһ Исанын јох, өз мәнафеләрини дүшүнүрләр» (Филип. 2:21). Булус бу мәктубу Ромада оланда јазмышды. О, фикир вермишди ки, Ромадакы гардашлар фикирләрини даһа чох шәхси ишләринә ҹәмләјир, руһани ишләрә елә дә ҹан јандырмырлар. Амма Тимути онлар кими дејилди. О, хош мүждәни јајмаг үчүн фүрсәт јарананда «Мән ҝедәрәм! Мәни ҝөндәр!» дејән Әшија пејғәмбәрин әһвал-руһијјәсини тәзаһүр етдирирди (Әшј. 6:8).

Шәхси вә руһани өһдәликләр арасында таразлығы неҹә горумаг олар? Илк нөвбәдә, ишләринизи ваҹиблијинә ҝөрә сыралајын. Булус хәбәрдарлыг едирди: «Даһа ваҹиб шејләри ајырд етмәји» өјрәнин (Филип. 1:10). Гој Аллаһын ваҹиб билдији шејләр сизин үчүн дә ваҹиб олсун. Икинҹиси, јүкүнүзү азалдын. Вахтынызы вә ҝүҹүнүзү алан шејләрдән азад олун. Булус Тимутијә мәсләһәт верәрәк «ҝәнҹлијә  хас истәкләрдән гач,.. салеһлијә, имана, мәһәббәтә вә сүлһә ҹан ат» демишди (2 Тим. 2:22).

3. О, хидмәтә ҹан гојурду. Һәвари Булус филиппилиләрә демишди: «Тимутинин неҹә ад газандығыны јахшы билирсиниз: о, атасы илә бәрабәр нөкәрчилик едән ушаг кими, мүждәнин вүсәт алмасында мәнимлә бирликдә ҹанла-башла хидмәт едиб» (Филип. 2:22). Тимути тәнбәл инсан дејилди. О, Булусла чијин-чијинә чалышырды вә бунун нәтиҹәсиндә араларындакы достлуг мүнасибәтләри даһа да мөһкәмләнирди.

Јеһованын тәшкилатында иш һәмишә вар. Бу иш инсана әсл мәмнунлуг ҝәтирир вә бизи баҹы-гардашлара даһа да јахынлашдырыр. Одур ки, гој сизин дә мәгсәдиниз «һәмишә Рәббин ишиндә» чох чалышмаг олсун (1 Кор. 15:58).

4. О, өјрәндикләринә әмәл едирди. Һәвари Булус Тимутијә јазмышды: «Сән исә мәним тәлимими, һәјат јолуму, амалымы, иманымы, сәбрими, мәһәббәтими, дөзүмүмү изләјирсән» (2 Тим. 3:10). Тимути өјрәндији һәр шејә әмәл етдији үчүн она даһа бөјүк мәсулијјәтләр һәвалә олунурду (1 Кор. 4:17).

Бәс сизә мәсләһәт верә биләҹәк руһән јеткин достунуз вар? Әҝәр јохдурса, нијә дә ахтармајасыныз?! Узун илләрдир ағсаггал кими хидмәт едән Том адлы бир гардаш дејир: «Тәҹрүбәли бир ағсаггал, санки мәни ганадлары алтына алмышды. О мәнә чох шеј өјрәтди. Һәмишә ондан мәсләһәт алыр вә онлара әмәл едирдим. Бунун сајәсиндә өзүнәинам һиссим сүрәтлә артды».

5. О, һәмишә өз үзәриндә ишләјирди. Һәвари Булус Тимутини «мөмин инсан олмаг үчүн» вар ҝүҹү илә чалышмаға сәсләјирди (1 Тим. 4:7). Неҹә ки идманчынын мәшгчиси олса да, онун өзүндән чох шеј асылы олур, ејнилә Тимути дә өз үзәриндә ишләмәли иди. Булус бу саһәдә она ҝөзәл мәсләһәт вермишди: «Өзүнү Мүгәддәс Јазылары ҹамаат гаршысында охумаға, өјүд-нәсиһәт вә тәлим вермәјә һәср ет... Бүтүн бунлар барәсиндә дәриндән дүшүн вә өзүнү бунлара тамамилә һәср ет ки, һамы сәндәки инкишафы ајдын ҝөрсүн» (1 Тим. 4:13—15).

Сиз дә баҹарыгларынызы тәкмилләшдирмәлисиниз. Гојмајын руһанилијиниз ејни сәвијјәдә галсын, чалышын тәшкилатын вердији сон ҝөстәришләрдән дала галмајасыныз. Өзүнәархајынлыг һиссинин јаранмасына јол вермәјин, јәни дүшүнмәјин ки, тәҹрүбәнизин чох олдуғундан истәнилән мәсәләни ахтарыш апармадан һәлл едә биләрсиниз. Тимути кими өзүнүзә вә вердијиниз тәлимләрә һәмишә диггәт јетирин (1 Тим. 4:16).

6. О, Јеһованын ҝүҹүнә архаланырды. Тимутинин хидмәти һагда дүшүнән Булус она белә бир јаддашлыг етмишди: «Дахилимиздә јашајан мүгәддәс руһун көмәји илә бу ҝөзәл әманәти горујуб сахла» (2 Тим. 1:14). Она һәвалә олунан хидмәти горумаг үчүн Тимути Аллаһын мүгәддәс руһуна бел бағламалы иди.

Узун илләрдир ағсаггал олан Доналд дејир: «Мәсулијјәт алмыш гардашлар Јеһова илә мүнасибәтләрини гијмәтләндирмәли вә горумалыдырлар. Белә етсәләр, ҝетдикҹә “ҝүҹләри артар”. Онлар Аллаһдан мүгәддәс руһ истәсәләр вә руһун бәһрәсини өзләриндә јетишдирсәләр, јығынҹаг үчүн әсл һәдијјә олаҹаглар» (Зәб. 84:7; 1 Бут. 4:11).

Бу ҝүн ағсаггал вә јығынҹаг хидмәтчиси тәјин олунан нечә-нечә гардашын руһани ҹәһәтдән инкишаф етдијини ҝөрмәк чох хошдур. Јухарыда ады чәкилән Ҹејсон дејир: «Ағсаггал олдуғум мүддәтдә чох шеј өјрәндим вә өзүмә инамым артды. Инди тәјинатымдан зөвг дујур, ону бөјүк бир шәрәф һесаб едирәм!»

Бәс сиз руһани ҹәһәтдән пүхтәләшмәјә әзмлисиниз? Тимутидән өрнәк алмағы гаршыныза мәгсәд гојун. Онда сиз дә Јеһованын халгы үчүн әсл һәдијјә олаҹагсыныз!