1. Руһани ҹәннәт нәдир вә бизим нијјәтимиз нә олмалыдыр?

 БУ ҜҮН јер үзүндә бир ҹәннәт мөвҹуддур. Бу ҹәннәтин милјонларла сакини вар. Орада һәјат гајнајыр, инсанлар хејирхаһ әмәлләрлә мәшғулдур, бир-бириләринә ҹан дејиб, ҹан ешидирләр. Бу ҹәннәтин сакинләри ораны һеч вахт тәрк етмәмәк нијјәтиндәдирләр. Онлар бу хүсуси мәкана башгаларынын да ҝәлмәсини истәјирләр. Бура һарадыр? Руһани ҹәннәт! a

2. Нәјә ҝөрә руһани ҹәннәтин мөвҹудлуғу мараглы мәгамдыр?

² Шејтан бу ҝүн дүнјаны нифрәтлә, писликлә, тәһлүкәләрлә долу олан бир мәкана чевириб. Мараглыдыр ки, Јеһова белә бир дүнјада сүлһүн, бирлијин һөкм сүрдүјү мәҹази бир јер јарадыб (1 Јәһ. 5:19; Вәһј 12:12). О ҝөрүр ки, бу шәр дүнја инсанлара чох аҹылар јашадыр. Буна ҝөрә дә хидмәтчиләринин Она севинҹлә хидмәт едә билмәси үчүн тәһлүкәсиз бир мүһит јарадыб. Аллаһын Кәламында руһани ҹәннәт «далдаланмаг үчүн чардаг», «јахшы суланан бағ» кими тәсвир едилир (Әшј. 4:6; 58:11). Ахырзаманда јашамаларына бахмајараг, бу руһани ҹәннәтин сакинләри Јеһованын сајәсиндә өзләрини хошбәхт һисс едирләр (Әшј. 54:14; 2 Тим. 3:1).

3. Әшија 65-ҹи фәсилдәки пејғәмбәрлик гәдимдә неҹә јеринә јетди?

³ Јеһова Әшија пејғәмбәр васитәсилә руһани ҹәннәтдә јашајанларын һәјатынын неҹә олаҹағыны тәсвир етмишди. Бу пејғәмбәрлик Әшија 65-ҹи фәсилдә јазылыб. О, илк дәфә ерамыздан әввәл 537-ҹи илдә јеринә јетди. Һәмин вахт төвбә  етмиш јәһудиләр Бабил әсарәтиндән азад олду вә вәтәнләринә гајытды. Јеһова онларын ишини аванд етди. Онлар дармадағын олунмуш Јерусәлим шәһәрини јенидән ҝөзәлләшдирдиләр вә мәбәди бәрпа етдиләр. Ора јенидән Исраилдә һәгиги ибадәтин мәркәзи олду (Әшј. 51:11; Зәк. 8:3).

4. Әшија 65-ҹи фәсилдәки пејғәмбәрлик мүасир дөврдә неҹә јеринә јетир?

⁴ Әшијанын пејғәмбәрлији икинҹи дәфә ерамызын XX әсриндә јеринә јетирмәјә башлады. 1919-ҹу илдә Аллаһын хидмәтчиләри Бөјүк Бабилин әсарәтиндән чыхдылар. Бундан сонра руһани ҹәннәтин сәрһәдләри ҝенишләнәрәк бүтүн дүнјаны бүрүдү. Падшаһлығын шөвглү мүждәчиләри чохлу јығынҹаглар тәсис етдиләр вә мәсиһијә јарашан хүсусијјәтләр тәзаһүр етдирдиләр. Бир заманлар зоракы вә әхлагсыз олмуш кишиләр вә гадынлар «Аллаһын ирадәсинә әсасән... јени шәхсијјәтә [бүрүндүләр]» (Ефес. 4:24). Сөзсүз, Әшијанын пејғәмбәрлији һәрфи мәнада ҝәләҹәкдә јени дүнјада там шәкилдә јеринә јетәҹәк. Амма һәтта индинин өзүндә дә руһани ҹәннәтдә олмағымыз бизә бол немәтләр ҝәтирир. Ҝәлин ҝөрәк бу һансы немәтләрдир вә нәјә ҝөрә ораны һеч вахт тәрк етмәмәлијик.

РУҺАНИ ҸӘННӘТДӘ ЈАШАЈАН ИНСАНЛАРЫН ҺӘЈАТЫ

5. Әшија 65:13 ајәсиндә вәд олундуғу кими биз руһани ҹәннәтдә һансы немәтләри дадырыг?

⁵ Сағлам вә тохуг. Әшија пејғәмбәр руһани ҹәннәтдә оланларла онун чөлүндә оланларын һәјаты арасында бөјүк бир фәрг олдуғуну вурғулајыр. (Әшија 65:13 ајәсини охујун.) Јеһова Өз хидмәтчиләринин руһани тәләбатларыны артыгламасы илә өдәјир. Биз јејәк, ичәк вә севинәк дејә бизә мүгәддәс руһуну, Кәламыны вә диҝәр руһани гидалары верир. (Вәһј 22:17 ајәси илә әлагәләндирин.) Руһани ҹәннәтин чөлүндә оланларын исә вәзијјәти тамам фәрглидир. Онлар аҹдырлар, сусуздурлар, хәҹаләт чәкирләр. Бу инсанларын Аллаһла мүнасибәтләри јохдур (Амс. 8:11).

6. Јуил 2:21—24 ајәләриндә Јеһованын вердији һансы немәтләрдән данышылыр вә онларын бизә һансы хејри вар?

⁶ Јуил сөјләдији пејғәмбәрликдә тахыл, шәраб, јағ кими һәјат үчүн зәрури олан мәһсулларын адыны чәкмишди. Бунунла ҝөстәрмәк истәјирди ки, Јеһова хидмәтчиләринин иманынын мөһкәм олмасы үчүн лазым олан һәр шеји верәҹәк, о ҹүмләдән дә руһани гидаларыны (Јуил 2:21—24). Мәсәлән, О буну Мүгәддәс Китаб, она әсасланан нәшрләр, сајтымыз, јығынҹаг ҝөрүшләри вә топлантылар васитәсилә едир. Биз бу наз-немәтләрдән һәр ҝүн дада биләрик. Нәтиҹәдә, даһа сағлам вә даһа гүввәтли ола биләрик.

7. Нәјин сајәсиндә биз үрәк ҹошгунлуғундан һајгырырыг? (Әшија 65:14).

⁷ Хошбәхт вә мәмнунуг. Аллаһын халгынын үрәји шүкранла ашыб-дашдығы үчүн севинҹдән һајгырыр. (Әшија 65:14 ајәсини охујун.) Мүгәддәс Китабдакы руһландырыҹы һәгигәтләр, тәсәлли верән вәдләр, һәмчинин Иса Мәсиһин фидјә гурбанлығы сајәсиндә олан мөһкәм үмидимиз үрәјимиздә ҹошгунлуг јарадыр. Диндашларымызла бу шејләр барәдә данышмаг бизә бөјүк хошбәхтлик ҝәтирир (Зәб. 34:8; 133:1—3).

8. Руһани ҹәннәтин ики әсас сәҹијјәви ҹәһәти һансыдыр?

⁸ Јеһованын халгы арасында олан мәһәббәт вә бирлик бу ҝүн руһани ҹәннәтин ики әсас сәҹијјәви ҹәһәтидир. Тәсәввүр едирсиниз, ҝәләҹәкдә јени дүнјада арамызда даһа чох мәһәббәт вә бирлик оланда  һәјат неҹә ҝөзәл олаҹаг?! (Кол. 3:14). Ҝөрүн бир баҹы Јеһованын Шаһидләри илә илк дәфә таныш оланда онларда нәјә фикир вермишди: «Хошбәхтлијин нә олдуғуну билмирдим. Һәтта аиләмдә дә буну ҝөрмәмишдим. Әмәлдә севҝини илк дәфә Јеһованын Шаһидләринин арасында ҝөрдүм». Әсл хошбәхтлији вә мәмнунлуғу дујмаг истәјән һәр бир кәс ҝәрәк руһани ҹәннәтимизи дадсын. Бу дүнја Аллаһын хидмәтчиләри һагда чох шеј фикирләшә биләр. Амма әсас одур ки, бизим Јеһованын гаршысында вә Онун халгы арасында чох шәрәфли адымыз вар (Әшј. 65:15).

9. Әшија 65:16, 17 ајәләриндә бизә әзаб, дәрд верән шејләрлә бағлы һансы вәд вар?

⁹ Сакитик вә һүзур ичиндәјик. Әшија 65:14 ајәсиндә дејилир ки, руһани ҹәннәтә ҝирмәк истәмәјәнләр «үрәк ағрысындан гышгыраҹаг», руһлары әзилдијиндән фәған едәҹәк. Бәс Аллаһын халгына әзаб, дәрд верән шејләрлә нә баш верәҹәк? Нәһајәтдә бүтүн бу шејләр «унудулаҹаг» вә Аллаһын ҝөзүнүн габағындан «гејб олаҹаг». (Әшија 65:16, 17 ајәләрини охујун.) Јеһова бүтүн проблемләримизи арадан галдыраҹаг, артыг пис хатирәләр бизә әзаб вермәјәҹәк.

10. Нәјә ҝөрә баҹы-гардашларынызын арасында олмағы бөјүк немәт һесаб едирсиниз? (Һәмчинин шәклә бахын.)

¹⁰ Һәтта ҝүнү бу ҝүн дә биз јығынҹаг ҝөрүшләриндә иштирак едәндә әсәбләримиз сакитләшир, һүзур тапырыг вә бу дүнјанын бүтүн проблемләрини унудуруг. Бәс бу руһани мүһитдәки һүзуру горумаг үчүн өз нөвбәмиздә биз нә едә биләрик? Бунун үчүн өзүмүздә мәһәббәт, севинҹ, сүлһ, јахшылыг вә мүлајимлик кими руһун бәһрәсинә дахил олан хүсусијјәтләри јетишдирмәлијик (Гал. 5:22, 23). Белә бир тәшкилатда олмаг, доғрудан да, бөјүк немәтдир! Руһани ҹәннәтдә галанлар Јеһованын «јени ҝөјләр вә јени јер»лә бағлы вәдинин там шәкилдә јеринә јетмәсинин шаһиди олаҹаглар.

11. Әшија 65:18, 19 ајәләринә әсасән Јеһованын јаратдығы руһани ҹәннәт биздә һансы һиссләри ојатмалыдыр?

¹¹ Севинҹ долујуг вә миннәтдарыг. Әшија пејғәмбәр даһа сонра руһани ҹәннәтдә нәјә ҝөрә севиниб-шадланаҹағымызы изаһ едир. Бу мәҹази ҹәннәти Јеһова јарадыб. (Әшија 65:18, 19 ајәләрини охујун.) Буна ҝөрә дә тәәҹҹүблү дејил ки, Јеһова бизим васитәмизлә инсанлара Аллаһы танымајан бу пис дүнјадан ајрылыб ҝөзәл  руһани ҹәннәтдә јашамаға көмәк едир. Һәгигәтдә олмағын ҝәтирдији немәтләрә ҝөрә чох севинирик вә бу һагда башгаларына да данышмаг истәјирик (Әрм. 31:12).

12. Әшија 65:20—24 ајәләриндәки вәд сиздә һансы һиссләри јарадыр вә нәјә ҝөрә?

¹² Биз һәмчинин руһани ҹәннәтин сакинләри кими саһиб олдуғумуз үмидә ҝөрә чох миннәтдарыг. Аллаһын јени дүнјасында бизи нәләрин ҝөзләдијини, һансы ишләри ҝөрәҹәјимизи бир тәсәввүр един! Мүгәддәс Китабда белә бир вәд верилир: «Даһа... бир нечә ҝүнлүк көрпәләр өлмәјәҹәк, аһылларын өмрү јарыда гырылмајаҹаг». Биз «евләр тикиб ичиндә јашајаҹаг, үзүм бағлары салыб барыны [јејәҹәјик]». Һеч ким «наһаг јерә әлләшмәјәҹәк», чүнки Јеһова бизи мүбарәк едәҹәк. О бизә тәһлүкәсиз, мәмнунлуг ҝәтирән әсл һәјат вәд едир. Халгы «һәлә чағырмамыш» Јеһова һәр бир бәндәсинин нәјә еһтијаҹ дујдуғуну биләҹәк вә һәр бирини өз «истәјинә [чатдыраҹаг]» (Әшј. 65:20—24; Зәб. 145:16).

13. Әшија 65:25 ајәсинә әсасән инсанлар Јеһоваја ибадәт етмәјә башлајанда һәјатларында һансы дәјишикликләри едирләр?

¹³ Сүлһпәрвәрик вә әмин-аманлыг ичиндәјик. Әввәлләр зоракы хүсусијјәтләрә саһиб олан инсанлар Јеһованын мүгәддәс руһунун көмәји илә өзләриндә көклү дәјишиклик едибләр. (Әшија 65:25 ајәсини охујун.) Онлар бу хүсусијјәтләриндән гуртулмаг үчүн чох чалышыб (Ром. 12:2; Ефес. 4:22—24). Сөзсүз ки, Аллаһын халгы һәлә дә гејри-камилдир, она ҝөрә дә мүәјјән сәһвләр едәҹәк. Бунунла белә, Јеһова «һәр ҹүр» инсаны гырылмаз мәһәббәт вә сүлһ телләри илә бирләшдириб (Тит. 2:11). Белә бир мөҹүзәни јалныз һәр шејә гадир Аллаһ Јеһова едә биләрди!

14. Әшија 65:25 ајәсинин доғрулуғуну бир гардашын һадисәсиндән неҹә ҝөрә биләрик?

¹⁴ Инсанын хасијјәти һәгигәтән дә дәјишә биләр? Ҝәлин бир һадисәјә бахаг. Бир ҝәнҹ оғлан 20 јашына гәдәр артыг бир нечә дәфә һәбсә дүшмүшдү. О, чох әхлагсыз, зоракы һәјат тәрзи сүрүрдү, һәмчинин машын оғурламышды, ев гарәт етмишди вә башга ҹидди ҹинајәтләр төрәтмишди. Киминлә ҝәлди далашмаға һазыр иди. Мүгәддәс Китабдан илк дәфә һәгигәти ешидәндә вә Јеһованын Шаһидләринин јығынҹаг ҝөрүшләринә ҝәлмәјә башлајанда әмин олду ки, һәјатда јашамағын бир мәнасы вар. Бу, руһани ҹәннәтдә Јеһоваја ибадәт етмәкдир. О, вәфтиз олундугдан сонра тез-тез Әшија 65:25 ајәсинин она неҹә аид олдуғу барәдә дүшүнүрдү. Бу оғлан шир кими вәһши инсандан гузу кими сүлһсевәр инсана чеврилди.

15. Нәјә ҝөрә башгаларыны руһани ҹәннәтдә јашамаға дәвәт етмәк истәјирик вә буну неҹә едә биләрик?

¹⁵ Әшија 65:13 ајәси бу бәјанатла башлајыр: «Күлли-Ихтијар Јеһова белә дејир». 25-ҹи ајә исә «дејир Јеһова» ифадәси илә битир. Јеһованын сөзләри һәмишә дүз чыхыр (Әшј. 55:10, 11). Руһани ҹәннәт артыг мөвҹуддур. Јеһованын тәсис етдији бу руһани аиләнин тајы-бәрабәри јохдур. Онун халгынын арасында олмагла биз бу зоракы дүнјада сүлһ вә әмин-аманлыг тапа биләрик (Зәб. 72:7). Бу сәбәбләрә ҝөрә биз даһа чох инсанын аиләмизә дахил олмасына көмәк етмәк истәјирик. Буну диггәтимизи шаҝирд һазырламаг ишинә ҹәмләмәклә едә биләрик (Мәт. 28:19, 20).

БАШГАЛАРЫНЫ РУҺАНИ ҸӘННӘТӘ НЕҸӘ ҸӘЛБ ЕДӘ БИЛӘРИК?

16. Инсанлар руһани ҹәннәтә неҹә ҹәлб олунур?

¹⁶ Руһани ҹәннәти инсанлара ҹәлбедиҹи  етмәкдә һәр биримизин әвәзсиз ролу вар. Бу ролумузу Јеһоваја бәнзәмәклә иҹра едә биләрик. Јеһова һеч кими голундан дартыб тәшкилата мәҹбур ҝәтирмир. О, инсанлары еһмалҹа өзүнә ҹәлб едир (Јәһ. 6:44; Әрм. 31:3). Ҝөзәл гәлбли инсанлар Јеһованын мәһәббәти, Онун мөһтәшәм хүсусијјәтләри барәдә өјрәнәндә Она јахынлашмаг үчүн үрәјиндә ҝүҹлү истәк дујур. Бәс биз ҝөзәл хүсусијјәтләримиз вә јахшы давранышымызла инсанлары руһани ҹәннәтә неҹә ҹәлб едә биләрик?

17. Инсанлары руһани ҹәннәтә неҹә ҹәлб едә биләрик?

¹⁷ Бунун бир јолу диндашларымыза мәһәббәт вә хејирхаһлыг ҝөстәрмәкдир. Гәдим Коринфдә имансызлардан кимсә јығынҹаға ҝәләрдисә, белә дејәрди: «Һәгигәтән дә, Аллаһ сизинләдир». Биз ҝөрүшләримизә тәзә ҝәлән инсанларын да бу гәнаәтә ҝәлмәсини истәјирик (1 Кор. 14:24, 25; Зәк. 8:23). Буна ҝөрә дә «бир-биринизлә меһрибан олун» мәсләһәтинә даима әмәл етмәлијик (1 Салон. 5:13).

18. Инсаны Јеһованын халгынын арасында олмаға нә тәшвиг едә биләр?

¹⁸ Биз һәмишә диндашларымыза Јеһованын ҝөзү илә бахмалыјыг. Бунун үчүн диггәтимизи онларын кечиб ҝедәҹәк гејри-камилликләринә јох, јахшы хүсусијјәтләринә ҹәмләмәлијик. Биз бир-биримизә гаршы һәмишә хејирхаһ, шәфгәтли олмагла, бир-биримизи үрәкдән бағышламагла арамызда јаранан анлашылмазлыглары мәһәббәтлә јолуна гоја биләрик (Ефес. 4:32). Онда өзүнә гаршы бу ҹүр мүнасибәт ҝөрмәк истәјән инсанлар руһани ҹәннәтин сакини олмаг истәјәҹәкләр b.

 РУҺАНИ ҸӘННӘТДӘ ГАЛЫН

19. а) « Ҝетдиләр, амма ҝери гајытдылар» чәрчивәсинә әсасән бәзиләри руһани ҹәннәтә ҝери гајыдандан сонра нәләр демишди? б) Нә етмәјә гәтијјәтли олмалыјыг? (Һәмчинин шәклә бахын.)

¹⁹ Руһани ҹәннәтдә олдуғумуза ҝөрә үрәјимиз миннәтдарлыгла долуб-дашыр. О, һәмишәкиндән даһа да ҝөзәлдир, Јеһоваја һәмд едән сакинләри әввәлкиндән даһа да чохдур. Ҝәлин Јеһованын биздән өтрү јаратдығы бу руһани ҹәннәтә ҝөрә миннәтдарлығымызы һеч вахт итирмәјәк. Тәравәт тапмаг, мәмнунлуг, сакитлик, әмин-аманлыг дујмаг истәјән һәр бир кәс руһани ҹәннәтә ҝәлмәли вә бураны һеч вахт тәрк етмәмәлидир! Амма еһтијатлы олун, Шејтан сизи орадан чыхармаг үчүн һәр ҹүр фәндә әл атаҹаг (1 Бут. 5:8; Вәһј 12:9). Гојмајын о, истәјинә наил олсун. Ҝәлин руһани ҹәннәтимизин ҝөзәллијини, паклығыны, һүзуруну горумаг үчүн әлимиздән ҝәлән һәр шеји едәк!