1. Бәзиләринә башгаларына јахынлашыб тәблиғ етмәк неҹә ҝәлир? (Һәмчинин шәклә бахын.)

 БИЗ нәјә ҝөрә тәблиғ едирик? Чүнки Јеһованы севирик вә инсанлара Ону танымаға көмәк етмәк истәјирик. Тәблиғ етмәји чох тәблиғчи хошлајыр. Амма бәзи тәблиғчиләр бу ишдән севинҹ дујмур. Нәјә ҝөрә? Кимиси утанҹагдыр вә өзүнәинам һисси аздыр. Кимиси дәвәт олунмамыш башгасынын евинә ҝетмәјә чәкинир. Еләләри вар ки, инсанларын онлара гулаг асмајаҹағына ҝөрә нараһатдыр. Бир башгаларына исә ушаглыгдан киминләсә мүбаһисә етмәмәји өјрәдибләр, онлар да горхурлар ки, бирдән тәблиғдә белә бир вәзијјәт јаранар. Дүздүр, бу баҹы-гардашлар Јеһованы чох истәјирләр, амма јенә дә танымадығы адама јахынлашыб хош хәбәри тәблиғ етмәк онлара чәтин ҝәлир. Бунунла белә, онлар тәблиғ ишинин ваҹиблијини баша дүшүрләр вә мүнтәзәм олараг бу ишдә иштирак едирләр. Ҝөрүн инди Јеһова неҹә севинир!

2. Әҝәр бәзән хидмәтдән севинҹ дујмурсунузса, нәјә ҝөрә һәвәсдән дүшмәмәлисиниз?

² Бәс сизә дә бу ҹүр сәбәбләрә ҝөрә хидмәтдән севинҹ дујмаг чәтин олур? Әҝәр олурса, һәвәсдән дүшмәјин. Өзүнәинам һиссинин аз олмасы бир тәрәфдән ҝөстәрир ки, сиз тәвазөкарсыныз вә өзүнүзә јерсиз диггәт чәкмәк истәмирсиниз, һәм дә инсанларла мүбаһисә етмәји хошламырсыныз. Һәмчинин инсана јахшылыг етдијин һалда онун сәни сајмамасы һеч кимин хошуна ҝәлмәз. Јеһова сизә чәтин олдуғуну билир вә көмәк етмәк истәјир (Әшј. 41:13). Бу мәгаләдә ҝәтирилән беш мәсләһәт сизә бу һиссләрин өһдәсиндән  ҝәлмәјә вә хидмәтиниздән севинҹ дујмаға көмәк едәҹәк.

ЈЕҺОВАНЫН КӘЛАМЫНДАН ҜҮҸ АЛЫН

3. Әрәмја пејғәмбәрә башгаларына тәблиғ етмәјә нә көмәк етмишди?

³ Әсрләр әрзиндә Јеһованын Өз хидмәтчиләринә дедији сөзләр онлара чәтин тапшырыгларын өһдәсиндән ҝәлмәјә ҝүҹ вериб. Елә ҝөтүрәк Әрәмја пејғәмбәри. Јеһова она тәблиғ етмәји тапшыранда о, чох тәрәддүд едирди. Әрәмја демишди: «Мән ҝәнҹәм, данышмағы баҹармырам» (Әрм. 1:6). Бәс о, тәблиғ етмәк үчүн өзүндә ҹәсарәти һарадан тапды? Она Јеһованын сөзләри ҝүҹ верди. О белә демишди: «Онун сөзү сүмүкләримдә һәбс едилән, үрәјимдә аловланан атәш олду, ону сахламагдан јорулдум» (Әрм. 20:8, 9). Әрәмја онун дедикләринә мәһәл гојмајан, она гаршы чыхан инсанлара тәблиғ едирди, амма бәјан етдији мүждә сајәсиндә о, нә гәдәр чәтин олса да, бу иши ҝөрмәјә ҝүҹ тапырды.

4. Аллаһын Кәламыны дәриндән мүталиә етмәјин нәтиҹәси нә олур? (Колослулара 1:9, 10).

⁴ Мәсиһиләр Аллаһын Кәламында јазыланлардан ҝүҹ алыр. Колослулара јаздығы мәктубунда һәвари Булус демишди ки, дәгиг билијә јијәләнмәк баҹы-гардашлара «һәр бир јахшы ишдә бәһрә» ҝәтирмәјә вә беләҹә, «Јеһованын адына лајиг» јашамаға көмәк едәҹәк. (Колослулара 1:9, 10 ајәләрини охујун.) Һәр бир јахшы ишә хош хәбәрин тәблиғи дахилдир. Демәли, биз Аллаһын Кәламыны дәриндән мүталиә едәндә Јеһоваја иманымыз мөһкәмләнир вә биз Падшаһлыг һагда хәбәри тәблиғ етмәјин ваҹиблијини даһа ајдын баша дүшүрүк.

5. Мүгәддәс Китабын мүталиәсиндән там шәкилдә фајдаланмаг үчүн нә едә биләрик?

⁵ Аллаһын Кәламындан там шәкилдә фајдаланмаг үчүн ону охујанда, арашдыранда вә үзәриндә дүшүнәндә буну тез-тәләсик етмәјин. Баша дүшмәдијиниз ајәјә раст ҝәлсәниз, үстүндән кечиб ҝетмәјин. «Ҝөзәтчи гүлләси нәшрләринин индекси» (түрк.) вә ја «Јеһованын Шаһидләринин нәшрләри үзрә ахтарыш» вәсаитинин көмәји илә һәмин ајәнин изаһыны тапын. Мүталиәни тез-тәләсик јох, раһат-раһат етсәниз, Аллаһын Кәламынын һәгигәт олдуғуна әминлијиниз мөһкәмләнәҹәк (1 Салон. 5:21). Әминлијиниз нә гәдәр мөһкәм олса, инсанларла өјрәндикләриниз барәдә данышмаг сизә бир о гәдәр хош олаҹаг.

 ТӘБЛИҒӘ ЈАХШЫ ҺАЗЫРЛАШЫН

6. Нәјә ҝөрә тәблиғә јахшы һазырлашмалыјыг?

⁶ Тәблиғә јахшы һазырлашсаныз, инсанларла сөһбәт етмәк сизә даһа раһат олаҹаг. Иса шаҝирдләрини тәблиғә ҝөндәрмәздән әввәл онлары һазырламышды (Лука 10:1—11). Онлар да тәблиғдә оланда Исанын өјрәтдикләринә ујғун давранмышдылар. Бунун сајәсиндә јахшы нәтиҹәләр әлдә едиб севинҹ дујмушдулар (Лука 10:17).

7. Хидмәтә неҹә һазырлаша биләрик? (Һәмчинин шәклә бахын.)

⁷ Бәс хидмәтә неҹә һазырлаша биләрик? Әввәлҹә дүшүнүн ҝөрүн нә һагда данышмаг истәјирсиниз вә буну өз сөзүнүзлә неҹә ифадә едә биләрсиниз. Һәмчинин даһа бир шејә габагҹадан һазырлашмаг јахшы оларды. Мәсәлән, әразиниздәки инсанлар адәтән мүждәјә неҹә реаксија верир? Ики-үч вәзијјәти тәсәввүрүнүздә ҹанландырын вә онлара неҹә ҹаваб верәҹәјинизи дүшүнүн. Инсана јахынлашанда раһат олун, ҝүлүмсәјин вә меһрибан данышын.

8. Мәсиһиләр һансы мәнада һәвари Булусун дедији сахсы габлара бәнзәјирләр?

⁸ Һәвари Булус тәблиғ ишиндә һансы ролу ојнадығымызы ҝөстәрмәк үчүн белә демишди: «Хәзинәмиз... сахсы габларда сахланылыр» (2 Кор. 4:7). Сөһбәт һансы хәзинәдән ҝедир? Бу, һәјатлары хилас едән Падшаһлыг һагда хош хәбәрин тәблиғи ишидир (2 Кор. 4:1). Бәс сахсы габлар нәдир? Бу габлар Аллаһын хидмәтчиләрини тәмсил едир. Онлар хош мүждәни инсанлара чатдырырлар. Булусун дөврүндә таҹирләр јемәк, шәраб, пул кими дәјәрли шејләри башга јерә апармаг үчүн сахсы габлардан истифадә едирдиләр. Ејнилә, Јеһова да бизә хош хәбәр кими дәјәрли мүждәни һәвалә едиб. Онун көмәји илә биз бу хәбәри тәблиғ етмәк үчүн өзүмүздә ҝүҹ тапа биләрик.

ҸӘСАРӘТ АЛМАГ ҮЧҮН ДУА ЕДИН

9. Инсан горхусуну неҹә дәф едә биләрик? (Һәмчинин шәклә бахын.)

⁹ Бәзән биздә инсан горхусу олур вә ја инсанларын бизә гулаг асмајаҹағына ҝөрә нараһат олуруг. Бәс бу горхуну неҹә дәф етмәк олар? Һәвариләрин дуасыны јадымыза сала биләрик. Онлара тәблиғ етмәк гадаған олунанда горхуја гапылмадылар. Јеһоваја дуа едиб хаһиш етдиләр ки, Онун сөзүнү бундан сонра да ҹәсарәтлә данышмаг үчүн онлара көмәк етсин. Јеһова  һәвариләрин дуасына дәрһал ҹаваб верди (Һәв. 4:18, 29—31). Әҝәр сиздә дә бәзән инсан горхусу јаранырса, дуа едиб Јеһовадан көмәк истәјин. Ондан хаһиш един ки, инсан севҝиниз инсан горхунуздан ҝүҹлү олсун.

10. Јеһова бизә Онун Шаһиди олмаға неҹә көмәк едир? (Әшија 43:10—12).

¹⁰ Јеһова бизи Өз Шаһиди олараг сечиб вә ҹәсарәтли олмаға көмәк едәҹәјинә сөз верир. (Әшија 43:10—12 ајәләрини охујун.) Ҝәлин Онун бизә көмәк етмәк үчүн истифадә етдији үсуллардан дөрдүнә бахаг. Биринҹиси, хош хәбәри тәблиғ едәндә Иса Мәсиһ һәмишә бизимлә олур (Мәт. 28:18—20). Икинҹиси, Јеһова бизә дәстәк олмаг үчүн мәләкләр тәјин едиб (Вәһј 14:6). Үчүнҹүсү, өјрәндијимиз шејләри јадымыза сала биләк дејә Јеһова бизә мүгәддәс руһуну верир (Јәһ. 14:25, 26). Дөрдүнҹүсү, бизә јолдаш олмаг үчүн баҹы-гардашлар вериб. Јеһованын дајағы вә баҹы-гардашларын дәстәји сајәсиндә биз ҹәсарәтли олуб хидмәтимизи давам етдирә биләрик.

ВӘЗИЈЈӘТӘ УЈҒУНЛАШЫН, МҮСБӘТ ӘҺВАЛЫ ГОРУЈУН

11. Тәблиғдә даһа чох инсана раст ҝәлмәк үчүн нә едә биләрсиниз? (Һәмчинин шәклә бахын.)

¹¹ Саһәдә инсанлары евдә тапа билмәјәндә, ҹәми бир-ики нәфәрлә данышанда руһдан дүшүрсүнүз? Бу заман дүшүнүн: «Һал-һазырда јашадығым әразидәки инсанлар һарададырлар? Ишдәдирләр, јохса алыш-веришдә?» (Һәв. 16:13). Еләдирсә, бәлкә, иҹтимаи шаһидлик едиб даһа чох инсана раст ҝәлә биләрсиниз? Ҹошуа адлы гардаш дејир: «Алыш-вериш мәркәзләринә вә инсанларын чох олдуғу јерләрә ҝедәрәк тәблиғ етмәјә фүрсәт тапырам». Ҹошуа вә јолдашы Бриҹит инсанларын евинә, әсасән, ахшамүстү вә базар ҝүнү ҝүнорта вахтларында ҝедирләр. Онлар фикир верибләр ки, о вахтларда даһа чох инсан евдә олур (Ефес. 5:15, 16).

12. Инсанларын нәјә инандығыны вә ја нәјин онлара мараглы олдуғуну неҹә билмәк олар?

¹² Әҝәр данышдыгларыныз инсанлара мараглы ҝәлмирсә, дүшүнүн, онлар нәјә инаныр, һансы мөвзулар онлары нараһат едир. Ҹошуа илә Бриҹит сөһбәтә башламаг үчүн һансыса буклетин үстүндәки суалы верирләр.  Мәсәлән, «Мүгәддәс Китаб һагда нә фикирләширсиниз?» буклети васитәсилә белә дејирләр: «Бәзи инсанлар Мүгәддәс Китабын Аллаһын Кәламы олдуғуна инаныр. Бир башгалары исә белә дүшүнмүр. Бәс сиз неҹә фикирләширсиниз?» Чох вахт бундан сонра јахшы сөһбәт алыныр.

13. Хидмәтдә инсанлар сизә гулаг асмаса да, нәјә ҝөрә мәгсәдинизә чатмыш олурсунуз? (Мәсәлләр 27:11).

¹³ Инсанлар хидмәтдә сизә гулаг асмаса да, јенә дә мәгсәдинизә чатмыш олурсунуз. Билирсиниз нијә? Чүнки Јеһова илә Исанын истәји одур ки, сиз шаһидлик верәсиниз. Сиз дә әсас буну етдиниз (Һәв. 10:42). Һәтта тәблиғ етмәк үчүн кимәсә раст ҝәлмәсәниз дә вә ја инсанлар сизә гулаг асмаг истәмәсә дә, јенә дә севинә биләрсиниз. Чүнки сиз ҝөјдәки Атанызын гәлбини севиндирдиниз. (Мәсәлләр 27:11 ајәсини охујун.)

14. Һансыса тәблиғчи мараг ҝөстәрән инсана раст ҝәләндә нәјә ҝөрә биз дә севинә биләрик?

¹⁴ Тәблиғчиләрдән кимсә саһәдә мараг ҝөстәрән инсана раст ҝәләндә дә севинә биләрик. «Ҝөзәтчи гүлләси»ндә бизим ишимиз итмиш ушағын ахтарышына бәнзәдилмишди. Ушағын ахтарышына чох адам ҹәлб олунур вә онлар бүтүн әразини бир-бир ахтарырлар. Ушаг тапыланда тәкҹә ону тапан адам јох, һамы севинир. Шаҝирд һазырламаг иши дә команда ишидир. Инсанлары тапыб һәгигәти чатдырмаг ишинә һамымыз ҹәлб олунмушуг вә јени бир кәс јығынҹаға ҝәлмәјә башлајанда һамымыз бирликдә севинирик.

ЈЕҺОВАЈА ВӘ ИНСАНЛАРА ОЛАН СЕВҜИНИЗ БАРӘДӘ ДҮШҮНҮН

15. Мәтта 22:37—39 ајәләрини тәтбиг етмәк тәблиғ ишинә шөвгүмүзү артырмаға неҹә көмәк едә биләр? (Һәмчинин шәклә бахын.)

¹⁵ Тәблиғ ишинә шөвгүнүзү артырмаг үчүн бу иши Јеһоваја вә инсанлара севҝидән ирәли ҝәләрәк етдијинизи унутмајын. (Мәтта 22:37—39 ајәләрини охујун.) Тәсәввүр едирсиниз, Јеһова сизин иш башында олдуғунузу ҝөрәндә неҹә севинир вә инсанлар Мүгәддәс Китабы өјрәнмәјә башлајандан сонра неҹә хошбәхт олаҹаглар?! Бир шеји дә јадда сахлајын: хош хәбәри гәбул едәнләри хилас ҝөзләјир (Јәһ. 6:40; 1 Тим. 4:16).

16. Евдән чөлә чыха билмәјәндә белә, хидмәтдән неҹә севинҹ дуја биләрик? Нүмунә чәкин.

¹⁶ Ола билсин, мүәјјән сәбәбләрә ҝөрә  евдән чыха билмирсиниз. Дүшүнүн, бу вәзијјәтиниздә Јеһоваја вә инсанлара севҝинизи неҹә ҝөстәрә биләрсиниз? Мәсәлән, COVID-19 пандемијасы вахты Самуел вә һәјат јолдашы Данија евдән чөлә чыха билмирдиләр. Бу онлар үчүн чәтин дөвр иди. Амма онлар мүнтәзәм олараг телефон васитәсилә шаһидлик верирдиләр, мәктублар јазырдылар вә «Zoom» програмы илә Мүгәддәс Китаб дәрсләри кечирдиләр. Һәмчинин Самуел хәрчәнҝдән мүалиҹә алдығы хәстәханада растлашдығы инсанлара тәблиғ едирди. О дејир: «Чәтинликләр заманы биз фикир чәкирик, тагәтдән дүшүрүк вә иманымыз сынаныр. Бу заман Јеһоваја хидмәтдән севинҹ дујмаг лазымдыр». Бүтүн бу проблемләр азмыш кими, Данија јыхылыр вә үч ај јатагдан галха билмир. Сонра да алты ај әлил арабасы илә һәрәкәт етмәли олур. Данија баҹы дејир: «Шәраитимин јол вердији гәдәр әлимдән ҝәлән һәр шеји етмәјә чалышырдым. Мән јаныма ҝәлән тибб баҹысына тәблиғ едирдим. Һәмчинин евимизә чатдырылма едән курјерләрлә сөһбәт едирдим. Тибби аваданлыглар сатан мүәссисәсинин әмәкдашы илә дә телефон васитәсилә јахшы сөһбәтләримиз олуб». Самуеллә Данијанын шәраити чох шеј етмәјә имкан вермирди. Амма онлар баҹардыгларыны едирдиләр вә бундан севинҹ дујурдулар.

17. Мәгаләдә ҝәтирилән мәсләһәтләрин хејрини ҝөрмәк үчүн нә едә биләрсиниз?

¹⁷ Мәгаләдә ҝәтирилән беш мәсләһәтин һамысына әмәл етсәк, даһа јахшы нәтиҹәләр әлдә едәҹәјик. Һәр мәсләһәти јемәк ресептиндә олан бир әрзаға бәнзәтмәк олар. Ресептдәки бүтүн әрзаглары бирләшдирәндә ортаја ләззәтли бир јемәк чыхыр. Ејнилә, бу мәсләһәтләрин һамысына әмәл етсәк, мәнфи һиссләрлә даһа јахшы мүбаризә апара биләҹәјик вә хидмәтдән севинҹ дујаҹағыг.