1. Һансы саһәләрдә Јеһова илә әмәкдашлыг едә биләрик?

ЈЕҺОВА АЛЛАҺ истәјирди ки, јаратдығы инсанлар Онунла әмәкдашлыг едәрәк нијјәтини һәјата кечирсинләр. Һал-һазырда инсанлар гејри-камил олса да, мөмин бәндәләр јенә дә Јеһова илә һәр ҝүн әмәкдашлыг едә биләр. Мәсәлән, Падшаһлыг һагда хош хәбәри тәблиғ едиб шаҝирд һазырлајаркән «Аллаһын әмәкдашлары» олуруг (1 Кор. 3:5—9). Каинатын Һөкмдары илә мүһүм бир ишдә әмәкдашлыг етмәјә лајиг ҝөрүлмәк неҹә дә бөјүк шәрәфдир! Лакин бизим Јеһова илә әмәкдашлығымыз јалныз тәблиғ етмәк вә шаҝирд һазырламаг ишиндән ибарәт дејил. Бу мәгаләдә аиләмизә вә диндашларымыза көмәк етмәклә, гонагпәрвәрлик ҝөстәрмәклә, теократик лајиһәләрдә көнүллү кими иштирак етмәклә вә хидмәтимизи ҝенишләндирмәклә Јеһова илә неҹә әмәкдашлыг едә биләҹәјимизи арашдыраҹағыг (Кол. 3:23).

2. Нә үчүн Јеһованын јолунда ҝөрдүјүнүз ишләри башгаларынын ҝөрдүјү ишләрлә мүгајисә етмәк дүзҝүн олмаз?

² Бу мәгаләни арашдыраркән, чалышын Јеһованын јолунда етдикләринизи башгаларынын ҝөрдүјү ишләрлә мүгајисә етмәјәсиниз. Унутмајын ки, һәр кәсин јашы, сағламлығы, вәзијјәти вә баҹарығы фәрглидир. Һәвари Булус Аллаһдан илһам алараг јазырды: «Гој  һәр кәс өз әмәлләрини јохласын, онда өзүнү башгасы илә мүгајисә етмәдән өз әмәлләринә ҝөрә севинә биләҹәк» (Гал. 6:4).

3. Нәјин әсасында демәк олар ки, аиләсинин гејдинә галан һәр бир кәс Јеһова илә әмәкдашлыг едир?

³ Јеһова Аллаһ хидмәтчиләриндән аиләләринин гајғысына галмаларыны ҝөзләјир. Мәсәлән, ола билсин, кимсә аилә үзвләрини доландырмаг үчүн ишләмәлидир. Бир чох аналар көрпәләринин гајғысына галмаг үчүн евдә галмалы олур. Бәзиләри исә хәстә валидејнләринә бахмалыдыр. Бүтүн бунлары етмәк чох ваҹибдир. Аллаһын Кәламында јазылыб: «Әҝәр кимсә өз јахынларынын, әләлхүсус да, аиләсинин гејдинә галмырса, о, иманы инкар едиб вә имансыздан да бетәрдир» (1 Тим. 5:8). Әҝәр сизин дә белә бир өһдәчилијиниз варса, чох ҝүман ки, Јеһованын јолунда көнлүнүз истәјән гәдәр чох иш ҝөрә билмирсиниз. Лакин үрәјинизи сыхмајын! Сиз аиләнизин гајғысына галмагла Јеһованы мәмнун едирсиниз (1 Кор. 10:31).

4. Валидејнләр Падшаһлығын марагларыны өз марагларындан неҹә үстүн тута биләр вә бу, һансы бәһрәләр верир?

⁴ Мәсиһи валидејнләр ушагларына руһани мәгсәдләр гојмаға көмәк етмәклә Јеһова илә әмәкдашлыг етмиш олур. Буну едән бир чох валидејнин өвладлары сонрадан Јеһоваја тамвахтлы хидмәт етмәк гәрары верибләр. Һәтта онларын арасында аиләләриндән узагда хидмәт едәнләр дә вар. Бәзиләри хүсуси тәјинатлы мүждәчидир, диҝәрләри тәблиғчиләрә тәләбат олан әразиләрдә өнҹүл кими хидмәт едир, бир башгалары исә Бејтелдә чалышыр. Өвладларынын аиләдән узагда олмасы о демәкдир ки, валидејнләр онларла истәдикләри гәдәр вахт кечирә билмир. Бунунла белә, фәдакар валидејнләр өвладларыны тәјинатларыны давам етдирмәјә тәшвиг едирләр. Нәјә ҝөрә? Чүнки онлар хошбәхтдирләр ки, өвладлары Јеһоваја ибадәти һәјатларында һәр шејдән үстүн тутур (3 Јәһ. 4). Белә валидејнләр «[оғлуму] Јеһоваја верирәм» дејән Һәннәнин кечирдији һиссләри кечирирләр. Онлар Јеһова илә бу ҹүр әмәкдашлығы өзләринә әсл шәрәф билир вә өвладларынын Јеһоваја хидмәт етмәләриндән там мәмнундурлар (1 Ишм. 1:28).

5. Јығынҹағыныздакы баҹы-гардашлара неҹә көмәк едә биләрсиниз? (Мәгаләнин әввәлиндәки шәклә бахын.)

⁵ Әҝәр үзәриниздәки аилә мәсулијјәтләри сизә мане олмурса, јығынҹағыныздакы јашлылара, хәстәләрә, онларын гејдинә галан инсанлара, ја да диҝәр еһтијаҹы оланлара көмәк едә биләрсиниз? Јығынҹагда кимләрин көмәјә еһтијаҹ дујдуғуна диггәт јетирмәјә чалышын. Мәсәлән, јашлы валидејнләринә бахан баҹы башга ишләрини ҝөрә билсин дејә, онун валидејнләри илә вахт кечирә биләрсиниз. Һәмчинин хәстәханада јатан бирини зијарәт етмәклә, кимисә јығынҹаға ҝәтирмәклә вә ја кимәсә базарлыг етмәклә көмәклик ҝөстәрә биләрсиниз. Бу јолла сиз дуалара ҹаваб верән Јеһованын әмәкдашы ола биләрсиниз. (1 Коринфлиләрә 10:24 ајәсини охујун.)

6. Гонагпәрвәрлик ҝөстәрмәк нә демәкдир?

⁶ Аллаһын әмәкдашлары гонагпәрвәрликләри илә сечилир. Инҹилдә «гонагпәрвәрлик» кими тәрҹүмә олунмуш сөз һәрфән «јадлара хејирхаһлыг» мәнасыны дашыјыр (Ибр. 13:2). Аллаһын Кәламында бизи бу ҹүр мәһәббәт ҝөстәрмәјә сәсләјән чохлу нүмунәләр вар (Јар. 18:1—5). Нә гәдәр ки әлимиздә имкан вар, диндашымыз олуб-олмамасындан асылы олмајараг, инсанлара көмәк етмәк үчүн фүрсәт ахтармалыјыг (Гал. 6:10).

7. Јығынҹағынызы зијарәт едән тамвахтлы хидмәтчиләрә гонагпәрвәрлик ҝөстәрмәк һансы бәһрәни верир?

 ⁷ Јығынҹағымызы зијарәт едән тамвахтлы хидмәтчиләрә гонагпәрвәрлик ҝөстәрмәклә Јеһова илә әмәкдашлыг едә биләрик. (3 Јәһја 5, 8 ајәләрини охујун.) Бунун сајәсиндә «бир-биримизи руһландыра»ҹағыг (Ром. 1:11, 12). Олаф адлы бир гардашын нүмунәсинә нәзәр салаг. Узун илләр өнҹә онларын јығынҹагларыны зијарәт едән субај рајон нәзарәтчисинә галмаға јер лазым иди, лакин јығынҹаг үзвләри гардашы евләринә дәвәт едә билмир. Олаф рајон нәзарәтчисинин онларын евиндә галмасы үчүн Јеһованын Шаһиди олмајан валидејнләриндән иҹазә истәјир. Валидејнләри разылыг верир, амма бир шәртлә ки, Олаф диванда јатаҹагды. О, разылашыр вә буна ҝөрә һеч дә пешман олмур. Олаф рајон нәзарәтчиси илә ҝөзәл бир һәфтә кечирир! О дејир: «Рајон нәзарәтчимиз вә мән һәр ҝүн тездән ојаныб сүфрә архасында чохлу мараглы сөһбәтләр едирдик. О, мәни о гәдәр руһландырды ки, мән дә тамвахтлы хидмәт етмәк истәдим». Өтән 40 ил әрзиндә Олаф гардаш бир чох өлкәдә хүсуси тәјинатлы мүждәчи кими хидмәт едиб.

8. Нә үчүн инсанлар дәјәрләндирмәсә белә, јахшылыг етмәлијик? Нүмунә чәкин.

⁸ Ола билсин инсанлар етдикләримизи әввәл-әввәл гијмәтләндирмәсинләр, бунунла белә онлара мүхтәлиф јолларла мәһәббәт ҝөстәрә биләрик. Ҝәлин бир нүмунәјә бахаг. Испанијадан олан бир баҹы Мүгәддәс Китаб дәрси кечдији Јесиканын ағладығыны ҝөрүб сәбәбини сорушур. Јесика Еквадордан Испанијаја көчмәздән өнҹә баш верән бир һадисәни данышыр. О дејир ки, чох касыб шәраитдә јашајырды вә бир ҝүн гызына вермәјә судан башга һеч нәји галмамышды. О, ушағы јелләдәрәк јатыздырмаға чалышыр вә көмәк үчүн дуа едир. Чох кечмәмиш ики Јеһованын Шаһиди онун гапысыны дөјүр. Јесика онларла кобуд данышыр вә баҹыларын вердији журналы ҹырыг-ҹырыг едиб дејир: «Гызыма буну једиздирим?» Баҹылар Јесикаја тәсәлли вермәјә чалышсалар да, о динләмәк истәмир. Сонра баҹылар онун гапысынын ағзына бир сәбәтин ичиндә әрзаг гојур. Онларын бу ҹүр гајғысы Јесикаја тәсир едир. Баҹы илә дәрс кечәндә Јесика анлајыр ки, о вахт Јеһованын онун дуасына вердији ҹавабы гәбул етмәјиб вә инди буна ҝөрә ағлајыр. Һал-һазырда Јесика Јеһоваја хидмәт етмәјә гәти гәрарлыдыр. Ҝөрүн бу баҹыларын сәхавәти неҹә ҝөзәл нәтиҹә верди! (Ваиз 11:1, 6).

9, 10. а) Исраиллиләрин һансы ишләрдә көнүллү иштирак етмәк имканы вар иди? б) Гардашлар јығынҹағын һансы ишләриндә көмәк едә биләр?

⁹ Гәдимдә Исраилдә мүхтәлиф ишләри ҝөрмәк үчүн көнүллүләрә еһтијаҹ олурду (Чых. 36:2; 1 Салн. 29:5; Нәһ. 11:2). Бу ҝүн дә вахтымыздан, мадди вәсаитләримиздән вә баҹарығымыздан көнүллү олараг баҹы-гардашларымыза көмәк етмәк үчүн истифадә етмәк имканымыз вар. Белә етсәк, бөјүк севинҹ дујаҹаг вә бол-бол немәтләр алаҹағыг.

¹⁰ Аллаһын Кәламында гардашлар јығынҹаг хидмәтчиси вә ағсаггал кими хидмәт етмәклә Јеһова илә әмәкдашлыг етмәјә тәшвиг олунур (1 Тим. 3:1, 8, 9; 1 Бут. 5:2, 3). Белә гардашлар башгаларына һәм практики көмәклик ҝөстәрир, һәм дә ибадәтлә бағлы мәсәләләрдә јардым әлләрини узадыр (Һәв. 6:1—4). Ағсаггаллар сиздән хидмәтчи олмағы, әдәбијјатлара, саһәләрә, тәмир вә диҝәр ишләрә көмәк етмәјинизи хаһиш едибләрми? Бу кими ишләри ҝөрәнләр сизә башгаларына хидмәт етмәјин нә гәдәр севинҹ ҝәтирдији барәдә даныша биләр.

11. Бир баҹы теократик лајиһәләрдә иштирак етмәклә һансы фајданы әлдә етмишди?

¹¹ Теократик ишләрлә мәшғул олан көнүллүләр јени достлар газаныр. 18 ил әрзиндә  ибадәт евләринин тикинти лајиһәсиндә чалышан Марҝи баҹынын нүмунәсинә нәзәр салаг. Бу илләр әрзиндә о, чохлу ҝәнҹ баҹылара гајғы илә тәлим вериб. О дејир ки, бу лајиһәләр бир-биримизи руһландырмаг үчүн әла имкан јарадыр (Ром. 1:12). Һәјатынын чәтин анларында тикинти лајиһәләриндә газандығы достлары Марҝи баҹыја чох дәстәк олуб. Бәс сиз нә вахтса тикинти лајиһәсиндә иштирак етмисиниз? Һәр һансы баҹарығынызын олуб-олмамасындан асылы олмајараг теократик ишләрдә көмәк едә биләрсиниз.

12. Тәбии фәлакәтләрдән зәрәр чәкәнләрә неҹә јардым ҝөстәрә биләрсиниз?

¹² Тәбии фәлакәтләр баш верән заман Аллаһын халгынын Онунла әмәкдашлыг едәрәк диндашларына көмәк етмәк имканы олур. Мисал үчүн, онлар зәрәрчәкмишләрә мадди дәстәк ҝөстәрир (Јәһ. 13:34, 35; Һәв. 11:27—30). Һәмчинин фәлакәтдән сонра тәмизлик вә тәмир ишләриндә көмәк едирләр. Полшадан олан Габриела адлы баҹымызын еви дашгындан сонра тамамилә јарарсыз һала дүшмүшдү. Јахынлыгдакы јығынҹаглардан олан баҹы-гардашларын она көмәк етмәјә ҝәлдијини ҝөрәндә онун севинҹи јерә-ҝөјә сығмырды. Габриела баҹы дејир: «Нәләр итирдијим һагда данышмаг истәмирәм, онлар мадди шејләрдир. Сизә нәләр газандығымы демәк истәјирәм. Бу һадисә мәни әмин етди ки, мәсиһи јығынҹағынын бир һиссәси олмаг бөјүк шәрәфдир, инсана хошбәхтлик вә севинҹ бәхш едир». Тәбии фәлакәтләрдән сонра јардым алан бир чох баҹы-гардашымыз да буна бәнзәр һиссләр кечирир. Јеһова илә әмәкдашлыг едәрәк онлара көмәк едәнләрин өзләри дә бөјүк мәмнунлуг дујур. (Һәвариләрин ишләри 20:35; 2 Коринфлиләрә 9:6, 7 ајәләрини охујун.)

13. Көнүллү кими хидмәт Јеһова илә мүнасибәтләримизи неҹә мөһкәмләндирир? Нүмунә чәкин.

¹³ Стефани адлы баҹымызын вә диҝәр тәблиғчиләрин башга саһәдә Јеһованын әмәкдашы олмаг имканы олуб. Онлар өлкәләриндәки мүһарибәјә ҝөрә Бирләшмиш Штатларда мәскунлашмыш Јеһованын Шаһидләринә көмәк етмәк севинҹини дујублар. Онлар бу аиләләрә ев вә лазыми мебел тапмаға көмәк едиб. О дејир: «Онларын үмумдүнја гардашлыг мәһәббәтини ҝөрүб неҹә севиндикләринә,  неҹә миннәтдар олдугларына шаһид олмаг үрәјимизи риггәтә ҝәтирирди. Бу баҹы-гардашлар дејир ки, биз онлара көмәк етмишик, әслиндә исә онларын бизә даһа чох көмәји дәјиб. Шаһиди олдуғумуз мәһәббәт, бирлик, иман, Јеһоваја етибар Аллаһымыза мәһәббәтимизи даһа да мөһкәмләндирди вә Онун тәшкилаты васитәсилә алдығымыз һәр бир шејә ҝөрә миннәтдарлығымызы бирә-беш артырды».

14, 15. а) Әшија пејғәмбәр һансы әһвал-руһијјәдә иди? б) Мәсиһиләр Әшија пејғәмбәрин әһвал-руһијјәсини неҹә әкс етдирә биләр?

¹⁴ Јеһова илә әмәкдашлығынызы даһа да ҝенишләндирмәк истәјәрдиниз? Мәсәлән, Јеһованын тәшкилатында көнүллүләрә даһа чох тәләбат олан јердә хидмәт едә биләрсиниз? Әлбәттә, Јеһоваја хидмәт етмәк үчүн һараса көчмәк мүтләг дејил. Лакин бәзи баҹы-гардашларын шәраити буна јол верир. Онлар Әшија пејғәмбәрин әһвал-руһијјәсини әкс етдирирләр. Јеһова: «Кими ҝөндәрим? Бизим үчүн ким ҝедәр?» — дејә сорушанда пејғәмбәр демишди: «Мән ҝедәрәм! Мәни ҝөндәр!» (Әшј. 6:8). Бәс сизин көнүллүләрә тәләбат олан јерләрдә көмәк етмәк истәјиниз вә имканыныз вар? Һансы саһәләрдә көмәк едә биләрсиниз?

¹⁵ Иса Мәсиһ тәблиғ етмәк вә шаҝирд һазырламаг иши илә бағлы демишди: «Мәһсул бол, бичинчи исә аздыр. Буна ҝөрә дә бичин Саһибинә јалварын ки, мәһсулу јығмаға бичинчи ҝөндәрсин» (Мәт. 9:37, 38). Тәблиғчиләрә тәләбат олан әразидә өнҹүллүк едә биләрсиниз? Бәлкә, башгасына бу саһәдә јардым етмәк имканыныз вар? Бир чох баҹы-гардашымыз Јеһоваја вә инсанлара мәһәббәт ҝөстәрмәјин ән ҝөзәл јолунун «бичинчиләрә» тәләбат олан әразиләрдә өнҹүллүк етмәк олдуғуну дејир. Хидмәтинизи ҝенишләндирмәјин башга һансы јоллары вар? Әмин олун ки, бундан бөјүк севинҹ әлдә едәҹәксиниз.

16, 17. Јеһоваја хидмәти ҝенишләндирмәк истәјәнләр үчүн даһа һансы имканлар вар?

¹⁶ Бејтелдә, јахуд теократик биналарын иншасында ја мүвәггәти олараг, ја да һәфтәнин бир нечә ҝүнү көмәк етмәк истәјәрдиниз? Истәнилән јердә хидмәт етмәјә вә истәнилән тапшырығы јеринә јетирмәјә һазыр олан шәхсләрә Јеһованын тәшкилатында һәмишә еһтијаҹ вар. Бу заман онлара тәҹрүбәләринин вә баҹарыгларынын олдуғу саһәдән тамам фәргли иш тапшырыла биләр. Јеһова көнүллүләрә тәләбат олан јердә хидмәт едән шәхсләрин фәдакарлығыны чох гијмәтләндирир (Зәб. 110:3).

¹⁷ Мүгәддәс хидмәтинизи даһа јахшы иҹра етмәк үчүн әлавә тәлим алмаг истәјәрдиниз? Бунун үчүн Падшаһлыг Мүждәчиләри Мәктәбинә әризә долдура биләрсиниз. Бу мәктәб тамвахтлы хидмәтдә олан јеткин баҹы-гардашлара тәшкилатда даһа чох ишләр ҝөрә билмәләри үчүн тәлим верир. Падшаһлыг Мүждәчиләри Мәктәбиндә охумаг үчүн әризә верән шәхсләр мәзун олдугдан сонра истәнилән тәјинаты гәбул етмәјә һазыр олмалыдыр. Бәс сиз бу имкандан јарарланараг Јеһованын тәшкилаты үчүн даһа чох ишләр ҝөрмәк истәјәрдиниз? (1 Кор. 9:23).

18. Јеһова илә һәр ҝүн әмәкдашлыг етмәк сизә һансы фајданы ҝәтирир?

¹⁸ Јеһованын халгынын бир үзвү олараг биз хејирхаһлығын, јахшылығын, мәһәббәтин тәзаһүрү олан сәхавәт хүсусијјәтини өзүмүздә јетишдириб һәр ҝүн бир-биримизин гајғысына галмаға тәшвиг олунуруг. Белә давранмаг бизә севинҹ, гәлб раһатлығы вә хошбәхтлик бәхш едир (Гал. 5:22, 23). Шәраитинизин неҹә олмасындан асылы олмајараг Јеһованын сәхавәтини тәглид едәрәк севинҹ дуја вә Онун дәјәрли әмәкдашы ола биләрсиниз! (Мәс. 3:9, 10).