1. Хилгәт Јеһованын сәхавәтиндән неҹә хәбәр верир?

ХИЛГӘТИ јаратмаға башламаздан өнҹә Јеһова тамамилә тәк иди. Сонра О, ҝөјдәки вә јердәки бүтүн шүурлу варлыглары јарадараг һәјаты пајлашмаг гәрарына ҝәлди. Хошбәхт Аллаһымыз Јеһованын ҝөзәл бәхшишләр вермәкдән хошу ҝәлир (1 Тим. 1:11; Јаг. 1:17). О истәјир ки, биз дә хошбәхт олаг, буна ҝөрә дә бизә сәхавәтли олмағы өјрәдир (Ром. 1:20).

2, 3. а) Нә үчүн сәхавәт ҝөстәрмәк хошбәхтлик бәхш едир? б) Бу мәгаләдә нәји мүзакирә едәҹәјик?

² Аллаһ инсаны Өз бәнзәриндә јарадыб (Јар. 1:27). Бу о демәкдир ки, Јеһовада олан хүсусијјәтләр биздә дә вар. Одур ки, хошбәхт олмаг үчүн, биз Јеһовадан өрнәк алараг башгаларыны дүшүнмәли вә сәхавәтли олмалыјыг (Филип. 2:3, 4; Јаг. 1:5). Нә үчүн? Ҹаваб садәдир, Аллаһ бизи бу ҹүр јарадыб. Ҝүнаһлы бәндәләр олсаг да, бу саһәдә Она бәнзәјә биләрик.

³ Мүгәддәс Китаб бизә сәхавәтли олмағын јолуну өјрәдир. Ҝәлин бизә бу саһәдә көмәк едәҹәк бәзи фикирләри нәзәрдән кечирәк. Ҝөрәҹәјик ки, сәхавәтли олмагла Јеһованын разылығыны неҹә газанырыг вә бу хүсусијјәти јетишдирмәк Јеһованын  бизә тапшырдығы иши ҝөрмәјә неҹә көмәк едир. Һәмчинин сәхавәт ҝөстәрмәјин хошбәхтликлә неҹә бағлы олдуғуну вә нә үчүн бу хүсусијјәти јетишдирмәјә давам етмәли олдуғумузу арашдыраҹағыг.

4, 5. Јеһова Аллаһ вә Иса Мәсиһ сәхавәтли олмагла бағлы бизә һансы нүмунәни гојуб?

⁴ Јеһова јаратдығы инсанларын Она бәнзәмәсини истәјир, одур ки, Онун кими сәхавәтли оланда Аллаһымыз шад олур (Ефес. 5:1). Бизим неҹә јаранмағымыз, бизи әһатә едән тәбиәтин ҝөзәллији вә зәнҝинлији ҝөстәрир ки, Аллаһ бизим хошбәхт олмағымызы истәјир (Зәб. 104:24; 139:13—16). Буна ҝөрә дә биз башгаларынын көнлүнү шад етмәјә чалышанда Јеһованы шәрәфләндиририк.

⁵ Әсл мәсиһиләр Мәсиһдән өрнәк алыр. О, бәни инсанын неҹә сәхавәтли олмасы илә бағлы камил нүмунә гојуб. Мәсиһ өзү һагда демишди: «Инсан Оғлу... она ҝөрә ҝәлмәјиб ки, она гуллуг етсинләр, әксинә, о, хидмәт етмәк вә бир чохлары уғрунда һәјатыны фидјә кими вермәк үчүн ҝәлиб» (Мәт. 20:28). Буна ҝөрә дә һәвари Булус мәсиһиләри тәшвиг етмишди: «Мәсиһ Иса кими дүшүнүн... О өзүнү һәр шејдән мәһрум етди вә гул сурәтини гәбул едиб инсан олду» (Филип. 2:5, 7). Јахшы оларды ки, һәр биримиз өзүмүзә нөвбәти суалы верәк: «Иса Мәсиһин гојдуғу нүмунәни даһа да дәгигликлә изләјә биләрәм?» (1 Бутрус 2:21 ајәсини охујун.)

6. Иса Мәсиһ сәмәријјәли һагда мәсәл васитәсилә бизә нә өјрәдир? (Мәгаләнин әввәлиндәки шәклә бахын.)

⁶ Јеһованын вә Иса Мәсиһин камил нүмунәсини изләјәндә, башгаларынын рифаһыны дүшүнәндә вә онлара гајғы ҝөстәрмәјә фүрсәт ахтаранда Јеһованын разылығыны газанырыг. Иса Мәсиһ сәмәријјәли һагда чәкдији мәсәлдә бунун нә гәдәр ваҹиб олдуғуну вурғулады. О, давамчыларына кимлијиндән асылы олмајараг һәр кәсә көмәк етмәли олдугларыны өјрәтди. (Лука 10:29—37 ајәләрини охујун.) Исанын бу мәсәли нә үчүн чәкдијини хатырлајырсыныз? Бир јәһуди ондан сорушмушду: «Мән кими севмәлијәм?» Исанын ҹавабындан өјрәнирик ки, Јеһованын лүтфүнү газанмаг истәјириксә, сәмәријјәли кими биз дә һәмишә сәхавәт ҝөстәрмәјә һазыр олмалыјыг.

7. Худбин вә ја сәхавәтли олмағымызын мүбаһисәли мәсәлә илә һансы әлагәси вар?

⁷ Мәсиһиләрин сәхавәт ҝөстәрмәјә чохлу сәбәбләри вар. Мисал үчүн, бу хүсусијјәт Шејтанын Әдән бағында галдырдығы мәсәлә илә бағлыдыр. Неҹә? Шејтан иддиа етди ки, Адәм вә Һәвва, еләҹә дә онларын симасында бүтүн бәшәријјәт өз марагларыны Аллаһын нијјәтиндән үстүн тутса вә диггәтләрини өзләринә ҹәмләсә, даһа хошбәхт олар. Һәвва худбин арзуја гапылараг Аллаһ кими олмаг истәди. Адәм исә Һәвваны разы салмағы даһа үстүн тутмагла худбин давранды (Јар. 3:4—6). Онларын вердији гәрарын аҹы нәтиҹәси ҝөз габағындадыр. Өз мәнфәәтини дүшүнмәк хошбәхтлик јох, бәдбәхтлик ҝәтирир. Сәхавәтли олмагла исә ҝөстәририк ки, Јеһованын һәр шеји даһа јахшы билдијинә инанырыг.

8. Нә үчүн Адәмлә Һәвва башгаларыны дүшүнмәли иди?

⁸ Әдән бағында Адәмлә Һәввадан башга һеч кәс олмаса да, Јеһованын вердији ҝөстәриш онлары башгаларыны дүшүнмәјә тәшвиг етмәли иди. Јеһова Аллаһ Адәмлә Һәвваја хејир-дуа верәрәк,  төрәјиб чохалмағы, бүтүн јер үзүнү долдурмағы вә она саһиб олмағы бујурмушду (Јар. 1:28). Неҹә ки Аллаһ һәр бир кәсин хошбәхт олмасыны истәјирди, еләҹә дә Адәмлә Һәвва һәлә дүнјаја ҝәлмәмиш өвладларынын рифаһыны дүшүнмәли иди. Бүтүн јер үзүнү ҹәннәтә чевирмәк үчүн Адәмин ҝет-ҝедә бөјүјәҹәк аиләси бир-бири илә әмәкдашлыг етмәли олаҹагды. Бу, чох бөјүк лајиһә иди!

9. Јер күрәсини ҹәннәтә чевирмәк инсанлары неҹә хошбәхт едә биләрди?

⁹ Јер үзүнү ҹәннәтә чевирмәк үчүн камил инсанлар Јеһова илә сых әмәкдашлыг етмәли олаҹагды. Онлар бу јолла Аллаһын нијјәтини һәјата кечирәҹәк вә беләҹә, Онун «истираһәт»инә говушаҹагдылар (Ибр. 4:11). Бир тәсәввүр един бу лајиһәни һәјата кечирмәк онлара нә гәдәр бөјүк мәмнунлуг ҝәтирәҹәкди! Башгаларынын рифаһы уғрунда чалышмагла онлар Аллаһдан немәтләр алаҹаг вә сөзлә ифадә олунмајан хошбәхтлик дујаҹагдылар.

10, 11. Тәблиғ етмәк вә шаҝирд һазырламаг тапшырығыны неҹә јеринә јетирә биләрик?

¹⁰ Јеһова Аллаһ халгына тәблиғ етмәк вә шаҝирд һазырламаг ишини һәвалә едиб. Бу тапшырығы јеринә јетирмәк үчүн бизә сәмими гәлбдән башгаларынын рифаһыны дүшүнмәк ҝәрәкдир. Һәгигәтән дә, јалныз Аллаһа вә инсанлара мәһәббәт сајәсиндә тәблиғ ишини давам етдирә биләрик.

¹¹ Ерамызын биринҹи әсриндә јашајан һәвари Булус Падшаһлыг мүждәсини тәблиғ етдикләринә ҝөрә өзүнү вә диҝәр мәсиһиләри «Аллаһын әмәкдашлары» адландырмышды (1 Кор. 3:6, 9). Бу ҝүн биз дә вахтымызы, вәсаитимизи вә ҝүҹүмүзү Аллаһын һәвалә етдији тәблиғ ишинә сәрф етмәклә Онун әмәкдашлары ола биләрик. Бундан бөјүк шәрәф ола биләр?!

12, 13. Шаҝирд һазырламағын мүкафаты барәдә нә дејәрдиниз?

¹² Тәблиғ вә шаҝирд һазырламаг ишиндә вахтымызы вә ҝүҹүмүзү әсирҝәмәмәк бол севинҹ бәхш едир. Мүгәддәс Китаб дәрси кечән баҹы-гардашлар сизи буна әмин едә биләр. Дәрс кечдијимиз шәхсләрин Мүгәддәс Китаб һәгигәтини дәрк едәндә, иманлары артанда, һәјатларында дәјишикликләр едәндә вә өјрәндикләрини башгалары илә бөлүшәндә неҹә фәрәһләндијини ҝөрмәк бизә хошбәхтлик бәхш едир. Иса Мәсиһ дә 70 шаҝирдинин тәблиғдән «севинҹ ичиндә» гајыдыб неҹә ағыздолусу данышдығыны ҝөрәндә севинҹдән ҹуша ҝәлмишди (Лука 10:17—21).

¹³ Бүтүн дүнјадакы баҹы-гардашларымыз хош хәбәрин инсанларын һәјатына неҹә ҝөзәл тәсир етдијини ҝөрәндә чох севинир. Мәсәлән, Шәрги Авропанын тәблиғчиләрә тәләбат олан бир әразисинә көчмүш Анна * адлы субај баҹымыз дејир: «Бурада  Мүгәддәс Китаб дәрсинә башламаг фүрсәти тез-тез јараныр, бу, мәним хошума ҝәлир. Хидмәтимдән бөјүк севинҹ дујурам. Евә ҝәләндә дәрс кечдијим инсанларын үзләшдији чәтинликләр һагда дүшүнмәкдән өз проблемләрим јадыма да дүшмүр. Онлары руһландырмаг, көмәк етмәк үчүн јоллар ахтарырам. Мән әминликлә дејә биләрәм ки, “вермәк алмагдан даһа чох хошбәхтлик ҝәтирир”» (Һәв. 20:35).

14. Хош хәбәрә аз инсанын һај вермәсинә бахмајараг тәблиғдән неҹә севинҹ дуја биләрсиниз?

¹⁴ Ола билсин, инсанлар бизи динләмәк истәмәјәҹәк, амма јенә дә онлара хош хәбәри ешитмәк шансы вермәклә хошбәхтлик дуја биләрик. Јеһова бизә Һизгијал пејғәмбәрә тапшырдығы ишә бәнзәр иш һәвалә едиб. О, пејғәмбәрә демишди: «Гулаг ассалар да, асмасалар да, сөзүмү онлара сөјләмәлисән» (Һизг. 2:7; Әшј. 43:10). Бәзиләри хош хәбәрә мәһәл гојмаса да, Јеһова бизим зәһмәтимизи гијмәтләндирир. (Ибраниләрә 6:10 ајәсини охујун.) Бу саһәдә ҝөзәл әһвал-руһијјәдә олан бир тәблиғчи јазыр: «Биз әкирик, суварырыг вә Јеһованын бу марағы бөјүдәҹәји үмиди илә дуа едирик» (1 Кор. 3:6).

15. Инсанлар ҝөстәрдијимиз сәхавәтә неҹә јанашыр вә бизим сәхавәт ҝөстәриб-ҝөстәрмәмәјимиз онларын мүнасибәтиндән асылы олмалыдыр?

¹⁵ Иса Мәсиһ бизим сәхавәт ҝөстәрәрәк хошбәхтлик дујмағымызы истәјир. Ҝөстәрдијимиз сәхавәти дәјәрләндирән инсанлар аз дејил. Мәсиһ демишди: «Һәмишә верин, онда сизә дә верәҹәкләр. Әтәјинизә силкәләниб-басылмыш, ағзынаҹан долдурулмуш, допдолу бир өлчү илә төкәҹәкләр. Чүнки һансы өлчү илә өлчүрсүнүзсә, һәмин өлчү илә дә сизә өлчәҹәкләр» (Лука 6:38). Дүздүр, сәхавәтимизи һамы гијмәтләндирмир, бунунла белә, миннәтдар оланлар да аз дејил вә ҝөстәрдијимиз сәхавәт онлары да сәхавәтли олмаға тәшвиг едә биләр. Одур ки, инсанларын мүнасибәтиндән асылы олмајараг сәхавәт ҝөстәрмәјә давам етмәлијик. Һәтта бирҹә сәхавәтли әмәлимиз белә, ағлымыза ҝәтирмәдијимиз бәһрәләр верә биләр.

16. Бизи сәхавәтли олмаға нә тәшвиг етмәлидир?

 ¹⁶ Һәгигәтән сәхавәтли олан инсанлар вердикләринин әвәзиндә һеч нә ҝөзләмир. Иса Мәсиһ нөвбәти өјүдү верәркән елә буну нәзәрдә тутурду: «Гонаглыг верәндә евинә касыблары, шикәстләри, чолаглары, корлары чағыр. Бах, онда хошбәхт олаҹагсан, чүнки бу адамларын сәнә вермәјә һеч нәләри јохдур» (Лука 14:13, 14). Мүгәддәс Китабын бир ајәсиндә дејилир: «Әлиачыг адамын рузиси бол олар». Диҝәр бир ајәдә исә јазылыб: «Фағыра нәзәр салан бәхтијардыр» (Мәс. 22:9; Зәб. 41:1). Әслиндә биз көмәк етмәкдән севинҹ дујдуғумуз үчүн инсанлара сәхавәт ҝөстәрмәлијик

17. Һансы саһәләрдә сәхавәт ҝөстәриб хошбәхт ола биләрик?

¹⁷ Һәвари Булус Иса Мәсиһин «вермәк алмагдан даһа чох хошбәхтлик ҝәтирир» сөзләрини ситат ҝәтирәркән јалныз мадди шејләри нәзәрдә тутмур. Бура лазым ҝәләндә, кимәсә үрәк-дирәк вермәк, јол ҝөстәрмәк, көмәк әлимизи узатмаг да дахилдир (Һәв. 20:31—35). Һәвари Булус һәм сөзү, һәм дә әмәли илә вахтымызы, ҝүҹүмүзү, диггәтимизи вә мәһәббәтимизи сәхавәтлә бөлүшмәјин ваҹиблијини өјрәдиб.

18. Сосиологлар сәхавәтлә бағлы һансы гәнаәтә ҝәлибләр?

¹⁸ Сосиологлар да сәхавәтли олмағын хошбәхтлик ҝәтирдијини тәсдигләјир. Бир мәгаләдә инсанларын «башгаларына хејирхаһлыг ҝөстәрәндән сонра өзләрини даһа хошбәхт һисс етдикләрини» сөјләдикләри гејд олунур. Сосиологларын сөзүнә ҝөрә, башгаларына көмәк етмәк инсанын фундаментал тәләбатларыны өдәдији үчүн онун һәјатынын мәналы вә мәгсәдјөнлү олмасында мүһүм рол ојнајыр. Буна ҝөрә дә мүтәхәссисләр чох вахт даһа сағлам вә хошбәхт олмаг үчүн ҹәмијјәти иҹтимаи ишләрдә көнүллү олараг иштирак етмәјә тәшвиг едир. Әлбәттә, бу, мәһәббәтли Јараданымызын Кәламыны охујанлар үчүн јенилик дејил (2 Тим. 3:16, 17).

19, 20. Сизи сәхавәт ҝөстәрмәјә нә тәшвиг едир?

¹⁹ Әтрафымыздакы инсанлар јалныз өзләрини дүшүнүр. Одур ки, сәхавәтлилик руһуну горумаг чәтин ола биләр. Лакин Иса Мәсиһ демишди ки, ики ән бөјүк әмрдән бири Аллаһымыз Јеһованы бүтүн гәлбимизлә, бүтүн варлығымызла, бүтүн ағлымызла вә вар ҝүҹүмүзлә севмәк, диҝәри исә башгасыны өзүмүзү севдијимиз кими севмәкдир (Марк 12:28—31). Мәгаләдә арашдырдыг ки, Јеһованы севәнләр Она бәнзәмәјә чалышыр. Һәм Јеһова, һәм дә Иса Мәсиһ инсанлара сәхавәт ҝөстәрир. Онлар бизи дә буна сәсләјир, чүнки сәхавәтлилик әсл хошбәхтлик ҝәтирир. Биз һәм Јеһованын тапшырдығы ишләрдә, һәм дә башгаларына гаршы мүнасибәтдә сәхавәт ҝөстәрмәјә давам етмәклә Онун адыны уҹалдырыг. Үстәлик, бу, өзүмүзә вә башгаларына фајда ҝәтирир.

²⁰ Әминик ки, сиз башгаларына, әләлхүсус, диндашларыныза гаршы әлиачыг олмаға чалышырсыныз (Гал. 6:10). Бундан сонра да сәхавәтли олсаныз, инсанларын мәһәббәтини газанаҹагсыныз вә әлбәттә ки, бу, сизи хошбәхт едәҹәк. Мәсәлләр 11:25 ајәсиндә јазылыб: «Сәхавәтли боллуға јетишәр, су верәнә су вериләр». Сөзсүз ки, бир мәсиһи кими һәјатымызын вә хидмәтимизин бир чох саһәләриндә гаршылыг ҝүдмәдән сәхавәт вә хејирхаһлыг ҝөстәрә биләрик. Нөвбәти мәгаләдә бу саһәләрдән бәзиләринә нәзәр салаҹағыг.