1. Филиппидә јығынҹағын јаранмасына кимләр көмәк етмишди?

РОМА колонијасы Филиппијә ҝәлән Булус, Сила, Лука вә Тимути бурада тәблиғ етмәјә башлајыр. Чох сајда инсан Падшаһлыг һагда хәбәрә мараг ҝөстәрир. Хидмәтә ҹан гојан бу дөрд гардаш бурада јығынҹаг јарадыр. Чох ҝүман ки, јени шаҝирдләр Лидија адлы гонагпәрвәр бир баҹынын евиндә јығышмаға башлајыр (Һәв. 16:40).

2. Чох кечмәмиш Филиппидәки јығынҹаг нә илә үзләшди?

² Јени јаранмыш јығынҹаг чох кечмәмиш чәтинликләрлә үзләшир. Шејтан һәгигәтин дүшмәнләрини бу садиг мәсиһиләрин тәблиғ хидмәтинә гаршы галдырыр. Булус вә Сила һәбс олунур, чубугла дөјүлүб зиндана атылыр. Онлар һәбсдән чыхан кими јени шаҝирдләрә баш чәкиб онлары руһландырырлар. Сонра Булус, Сила вә Тимути шәһәри тәрк едир, Лука исә ҝөрүнүр, бурада галыр. Бәс јени јаранмыш јығынҹаг нә едәҹәк? Имана јени ҝәләнләр мүгәддәс руһунун көмәји илә Јеһоваја хидмәти давам етдирир (Филип. 2:12). Булусун онларла өјүнмәјә там әсасы вар!

3. Филиппилиләрә 1:9—11 ајәләринә әсасән, һәвари Булус нә барәдә дуа едирди?

³ Тәхминән он ил сонра Булус Филиппи јығынҹағына мәктуб јазыр. Мәктубу охујанда Булусун баҹы-гардашлара дујдуғу мәһәббәти ајдын ҝөрмәк олар. О јазмышды: «Һамыныздан өтрү неҹә дарыхдығыма бир Аллаһ шаһиддир, Мәсиһ Иса сизи неҹә севирсә, мән дә сизи елә севирәм» (Филип. 1:8).  Булус онлардан өтрү дуа етдијини гејд едир. О, Јеһовадан диләјирди ки, онлара бир-бириләринә мәһәббәти артырмаға, даһа ваҹиб шејләри ајырд етмәјә, гүсурсуз олмаға, һеч кәси бүдрәтмәмәјә вә салеһ ишләр ҝөрмәјә көмәк етсин. Шүбһәсиз, биз дә Булусун бу сәмими сөзләриндән фајдалана биләрик. (Филиппилиләрә 1:9—11 ајәләрини охујун.) Бу мәгаләдә онун вурғуладығы мәгамлары вә онлары неҹә тәтбиг едә биләҹәјимизи арашдыраҹағыг.

4. а) 1 Јәһја 4:9, 10 ајәләринә әсасән, Јеһова бизә олан мәһәббәтини неҹә изһар едиб? б) Јеһованы нә гәдәр севмәлијик?

⁴ Јеһова Оғлуну јер үзүнә бизим ҝүнаһларымыз уғрунда ҹаныны фәда етмәјә ҝөндәрмәклә Өз дәрин мәһәббәтини изһар едиб. (1 Јәһја 4:9, 10 ајәләрини охујун.) Бу фәдакар мәһәббәтинә ҝөрә үрәјимиздә Она мәһәббәт ојаныр (Ром. 5:8). Јеһованы нә гәдәр севмәлијик? Иса Мәсиһ бир фәриси илә данышанда бу суала ҹаваб вермишди: «Аллаһын Јеһованы бүтүн гәлбинлә, бүтүн варлығынла вә бүтүн ағлынла сев» (Мәт. 22:36, 37). Биз дә Аллаһымызы бүтүн гәлбимизлә севмәк, Она олан мәһәббәтимизи ҝүнбәҝүн мөһкәмләндирмәк истәјирик. Һәвари Булус филиппилиләрә «мәһәббәтиниз дә артдыгҹа артсын» демишди. Бәс биз Аллаһа мәһәббәтимизи артырмаг үчүн нә едә биләрик?

5. Аллаһа мәһәббәтимиз неҹә артыр?

⁵ Аллаһы севмәк үчүн Ону танымалыјыг. Мүгәддәс Китабда јазылыб: «Севмәјән инсан Аллаһы танымамышдыр, чүнки Аллаһ мәһәббәтдир» (1 Јәһ. 4:8). Һәвари Булус вурғуламышды ки, Аллаһа олан мәһәббәтимиз Онун һаггында «дәгиг билик вә там дәрракә» газандыгҹа артаҹаг (Филип. 1:9). Мүгәддәс Китабы өјрәнмәјә башлајанда Јеһоваја мәһәббәтимиз јаранды, һалбуки, Онун мөһтәшәм хүсусијјәтләри һагда билијимиз ҹүзи иди. Лакин Аллаһы јахындан таныдыгҹа мәһәббәтимиз дә артды. Одур ки, Мүгәддәс Китабы мүнтәзәм мүталиә етмәји вә онун дәринлијинә вармағы һәјатымызда ән өнәмли шејләрдән бири һесаб едирик (Филип. 2:15, 16).

6. 1 Јәһја 4:11, 20, 21 ајәләринә әсасән, даһа кимләри севмәлијик?

⁶ Аллаһын бизә дујдуғу бөјүк мәһәббәт баҹы-гардашларымызы севмәјә тәшвиг едир. (1 Јәһја 4:11, 20, 21 ајәләрини охујун.) Ола билсин, баҹы-гардашларымыза мәһәббәтин өз-өзүнә јаранаҹағыны дүшүнүрүк. Ахы биз Јеһоваја ибадәт едиб, Онун ҝөзәл хүсусијјәтләрини тәглид етмәјә чалышырыг. Үстәлик, уғрумузда һәјатыны фәда едәҹәк гәдәр бөјүк мәһәббәт ҝөстәрән Мәсиһдән өрнәк алырыг. Бунунла белә, бәзән бир-биримизи севмәк әмринә итаәт етмәк чәтин олур. Ҝәлин Филиппи јығынҹағындакы бир һадисәјә бахаг.

7. Һәвари Булусун Еводија вә Синтихијә вердији мәсләһәтдән нә өјрәнирик?

⁷ Һәвари Булусла «чијин-чијинә» хидмәт едән фәал баҹылар Еводија вә Синтихинин нүмунәсинә нәзәр салаг. Ҝөрүнүр, онлар хасијјәтләриндәки фәргин мүнасибәтләрини корламасына јол вермишдиләр. Булус Еводија вә Синтихинин хидмәт етдији јығынҹаға јаздығы мәктубда онларын адларыны чәкмиш вә «һәмфикир олсунлар» дејә бирбаша мәсләһәт вермишди (Филип. 4:2, 3). О һәмчинин бүтүн јығынҹаға «һәр шеји шикајәтсиз вә мүбаһисәсиз един» ҝөстәришини вермәји лазым билмишди (Филип. 2:14). Шүбһәсиз, Булусун конкрет мәсләһәтләри  нәинки Еводија вә Синтихијә, үмумиликдә бүтүн јығынҹаға бир-бириләринә гаршы мәһәббәти мөһкәмләндирмәкдә көмәк етмишди.

8. Диндашларымызы севмәјә нә мане ола биләр вә бу манеәни неҹә аша биләрик?

⁸ Еводија вә Синтихи кими, бәзән биз дә баҹы-гардашларымызы севмәјә чәтинлик чәкә биләрик, буна сәбәб диггәтимизи онларын сәһвләринә ҹәмләмәјимиз ола биләр. Һамымыз һәр ҝүн сәһвләр едирик. Әҝәр диггәтимизи башгаларынын гејри-камиллијинә ҹәмләсәк, онлара олан мәһәббәтимиз сојујаҹаг. Мисал үчүн, диндашымызын ибадәт евиндә тәмизлијә көмәк етмәји унутмасы бизи гыҹыгландыра биләр. Дәрһал онун етдији бүтүн сәһвләри дә јадымыза салсаг, даһа чох әсәбиләшәҹәк вә она дујдуғумуз мәһәббәт сојумаға башлајаҹаг. Әҝәр киминләсә аранызда белә бир проблем варса, јахшы олар ки, бир мәгамы нәзәрә аласыныз: Јеһова һәм сизин, һәм дә диндашынызын сәһвләрини ҝөрүр. Буна рәғмән, О, сизи дә севир, диндашынызы да. Одур ки, Јеһованын мәһәббәтини өрнәк алараг диггәтимизи баҹы-гардашларымызын јахшы хүсусијјәтләринә ҹәмләмәлијик. Диндашларымыза мәһәббәт ҝөстәрмәк үчүн әлимиздән ҝәләни едәндә арамыздакы мәһәббәт бағлары мөһкәмләнир (Филип. 2:1, 2).

9. Һәвари Булусун филиппилиләрә мәктубунда бәһс етдији даһа ваҹиб шејләрә нәләр дахилдир?

⁹ Һәвари Булус мүгәддәс руһун илһамы илә Филиппи јығынҹағында оланлара, о ҹүмләдән бүтүн мәсиһиләрә «даһа ваҹиб шејләри ајырд етмәји» мәсләһәт ҝөрмүшдү (Филип. 1:10). Ваҹиб шејләрин сырасына Јеһованын адынын уҹалмасы, нијјәтләринин һәјата кечмәси, јығынҹагда сүлһүн вә бирлијин олмасы дахилдир (Мәт. 6:9, 10; Јәһ. 13:35). Һәјатымызы бу ваҹиб шејләрин үзәриндә гурмагла Јеһованы севдијимизи ҝөстәрәҹәјик.

10. Јеһованын ҝөзүндә гүсурсуз олмаг үчүн нә етмәлијик?

¹⁰ Булус һәмчинин демишди ки, биз «гүсурсуз» олмалыјыг. Тәбии ки, сөһбәт мүтләг камилликдән ҝетмир. Биз Јеһова кими гүсурсуз ола билмәрик. Лакин әлимиздән ҝәләни едәрәк мәһәббәтимизи артырмаға вә даһа ваҹиб шејләри ајырд етмәјә чалышанда Јеһованын ҝөзүндә гүсурсуз олуруг. Мәһәббәт ҝөстәрмәјин јолларындан бири башгаларыны бүдрәтмәмәк үчүн әлимиздән ҝәләни етмәкдир.

11. Нә үчүн башгаларыны бүдрәтмәмәлијик?

¹¹ «Һеч кәси бүдрәтмә» ҝөстәриши олдугҹа ҹиддидир. Биз кимисә неҹә бүдрәдә биләрик? Әјләнҹә, ҝејим, һәтта иш сечимимизлә. Ола билсин, Јеһованын ҝөзүндә сәһв бир шеј етмирик. Лакин сечимимизин киминсә виҹданына тохунмасы, кимисә бүдрәтмәси ҹидди мәсәләдир. Иса Мәсиһ демишди ки, онун гузуларындан бирини бүдрәдән «адамын бојнуна дәјирман дашы асыб дәнизә атсајдылар, даһа јахшы оларды» (Мәт. 18:6).

12. Өнҹүл кими хидмәт едән бир әр-арвадын нүмунәсиндән нә өјрәнирик?

¹² Ҝәлин Иса Мәсиһин бу хәбәрдарлығына әмәл едән бир әр-арвадын нүмунәсинә нәзәр салаг. Бу әр-арвад јығынҹагда өнҹүл кими хидмәт едирди. Һәмин јығынҹагда јени вәфтиз олунмуш башга бир әр-арвад да вар иди. Онлар чохлу гадағаларын олдуғу аиләләрдә бөјүмүшдү вә дүшүнүрдүләр ки, мәсиһиләр һәтта мүнасиб филмләр олса белә, кинотеатра ҝетмәмәлидир. Онлар һәмин өнҹүл әр-арвадын кинотеатра  ҝетдијини биләндә дәһшәтә ҝәлир. Бундан сонра өнҹүл баҹы-гардашымыз кинотеатра ҝетмәмәк гәрарына ҝәлир, та ки тәзә вәфтиз олан бу әр-арвад өз виҹданларыны тәрбијә едиб даһа таразлы бахыша саһиб олана кими (Ибр. 5:14). Бу өнҹүлләр фәдакар давранышлары илә диндашларыны севдикләрини тәкҹә сөзләри илә јох, һәм дә әмәлләри илә ҝөстәрдиләр (Ром. 14:19—21; 1 Јәһ. 3:18).

13. Неҹә ола биләр ки, кимисә ҝүнаһа сүрүкләјәк?

¹³ Кимисә ҝүнаһа сүрүкләјәндә дә ону бүдрәтмиш олуруг. Бу, неҹә ола биләр? Белә бир вәзијјәти тәсәввүр един: Мүгәддәс Китабы өјрәнән бир нәфәр узун сүрән мүбаризәләрдән сонра нәһајәт спиртли ички асылылығына галиб ҝәлир. О баша дүшүр ки, вәрдишинә гајытмамаг үчүн ичкидән тамамилә имтина етмәлидир. Беләҹә, о, һәјатында чохлу дәјишикликләр едир вә вәфтиз олунур. Ҝүнләрин бир ҝүнү гардашы гонаг дәвәт едән бир мәсиһи она спиртли ички тәклиф едәрәк дејир: «Сән артыг мәсиһисән, сәндә мүгәддәс руһ вар. Мүгәддәс руһун бәһрәсинә дахил олан хүсусијјәтләрдән бири исә өзүнә һаким олмагдыр. Демәли, бу хүсусијјәтин сајәсиндә гәдәриндә ичмәји баҹарарсан». Бу гардашын јанлыш мәсләһәтә ујмасынын нә илә нәтиҹәләнәҹәјини дүшүнмәк белә истәмәздик!

14. Ибадәт ҝөрүшләри Филиппилиләрә 1:10 ајәсиндәки мәсләһәти тәтбиг етмәјә неҹә көмәк едир?

¹⁴ Ибадәт ҝөрүшләриндә Филиппилиләрә 1:10 ајәсиндәки мәсләһәти тәтбиг етмәји мүхтәлиф үсулларла өјрәнирик. Биринҹиси, ҝөрүшдә алдығымыз руһани гида бизә Јеһованын нәләри даһа ваҹиб һесаб етдијини ҝөстәрир.  Икинҹиси, гүсурсуз олмаг үчүн алдығымыз тәлими тәтбиг етмәјин јолларыны өјрәнирик. Үчүнҹүсү исә, «мәһәббәтә вә јахшы ишләрә» тәшвиг олунуруг (Ибр. 10:24, 25). Диндашларымыз бизи руһландырдыгҹа, Аллаһа вә онлара мәһәббәтимиз артыр. Үрәјимиз бу мәһәббәтлә долуб дашанда диндашларымызы бүдрәтмәмәк үчүн әлимиздән ҝәләни едирик.

15. «Боллуҹа салеһ ишләр» ҝөрмәк дејиләндә нә нәзәрдә тутулур?

¹⁵ Булус Аллаһа дуа едирди ки, филиппилиләр «боллуҹа салеһ ишләр» ҝөрсүнләр (Филип. 1:11). Сөзсүз ки, бу салеһ ишләрә Јеһованы вә Онун халгыны севмәк дахил иди. Бура һәмчинин Иса Мәсиһә вә ҝөзәл үмидләринә олан иманлары һагда башгалары илә данышмаг да аид иди. Филиппилиләрә 2:15 ајәсиндә бу дүнјада «нур кими парла»јын ифадәси јер алыр. Бу ифадә бизә Мәсиһин шаҝирдләринә дедији сөзләри хатырладыр. О демишди: «Сиз дүнјанын нурусунуз» (Мәт. 5:14—16). Мәсиһ һәмчинин давамчыларына шаҝирд һазырламағы тапшырмышды вә онлара «јерин уҹгарларынадәк мәним шаһидим олаҹагсыныз» демишди (Мәт. 28:18—20; Һәв. 1:8). Биз бу мүһүм ишдә фәал шәкилдә иштирак етмәклә «салеһ ишләр» ҝөрмүш олуруг.

16. Филиппилиләрә 1:12—14 ајәләри һәтта чәтин вәзијјәтдә белә, нур кими парламағын мүмкүн олдуғуну неҹә ҝөстәрир? (Үз габығындакы шәклә бахын.)

¹⁶ Биз истәнилән вәзијјәтдә нур кими парлаја биләрик. Бәзән тәблиғимизә манеә кими ҝөрүнән вәзијјәт, әксинә, тәблиғ етмәк үчүн ҝөзәл фүрсәт ола биләр. Мәсәлән, һәвари Булус филиппилиләрә мәктуб јазанда Ромада ев дустағы иди. Лакин биләјиндәки  гандаллар Булуса ону һәбс едәнләрә вә јанына ҝәләнләрә тәблиғ етмәјә мане олмурду. Онун һәтта белә вәзијјәтдә ҹанла-башла тәблиғ етмәси диндашларына Аллаһын сөзүнү горхмадан тәблиғ етмәјә ҹәсарәт вә әминлик вермишди. (Филиппилиләрә 1:12—14 ајәләрини охујун; 4:22.)

17. Чәтин вәзијјәтләрдә тәблиғ етмәјин мүмкүн олдуғуну ҝөстәрән нүмунә чәкин.

¹⁷ Бу ҝүн дә һәвари Булусун ҹәсарәт нүмунәсини изләјән чохлу баҹы-гардашымыз вар. Јашадыглары өлкәдә фәалијјәтимизә мәһдудијјәт гојулдуғундан, онлар иҹтимаи вә ја ев-ев тәблиғ едә билмирләр, буна ҝөрә дә онлар хош хәбәри башга јолларла бәјан едирләр (Мәт. 10:16—20). Белә өлкәләрин бириндә рајон нәзарәтчиси тәблиғчиләрә мәсләһәт ҝөрмүшдү ки, гоһум-әгрәбаларындан, гоншуларындан, синиф вә иш јолдашларындан, танышларындан ибарәт олан «саһәдә» тәблиғ етсинләр. Ики илин ичиндә һәмин рајондакы јығынҹагларын сајы хејли артды. Ола билсин, јашадығымыз әразидә манеәсиз тәблиғ едә билирик. Бунунла белә, фәрасәтли баҹы-гардашларын нүмунәсиндән дәјәрли бир шеј өјрәнә биләрик: хидмәтдә там шәкилдә иштирак етмәк үчүн даима јоллар ахтармалы вә әмин олмалыјыг ки, Јеһова истәнилән манеәни ашмаға ҝүҹ верәҹәк (Филип. 2:13).

18. Нәјә гәти гәрарлы олмалыјыг?

¹⁸ Ҝәлин бу әламәтдар дөврдә һәвари Булусун филиппилиләрә јаздығы мәсләһәтләри тәтбиг етмәјә гәтијјәтли олаг. Даһа ваҹиб шејләри ајырд едәк, гүсурсуз олаг, һеч кәси бүдрәтмәјәк вә салеһ ишләр ҝөрәк. Онда мәһәббәтимиз артдыгҹа артаҹаг вә мәһәббәтли Атамыз Јеһованын адына шәрәф ҝәтирәҹәјик.