1. Бизә һансы шәрәф нәсиб олуб?

ЈЫҒЫНҸАГДА олмаг бизим үчүн бөјүк шәрәфдир! Биз сүлһпәрвәр вә хошбәхт инсанларла долу руһани ҹәннәтдәјик. Бәс јығынҹагда сизин һансы јериниз вар?

2. Һәвари Булус бәзи мәктубларында һансы бәнзәтмәни истифадә етмишди?

² Һәвари Булусун истифадә етдији бир бәнзәтмәдән бу һагда чох шеј өјрәнә биләрик. Јаздығы бәзи мәктубларда о, јығынҹағы инсан бәдәнинә, јығынҹагда олан һәр кәси исә бәдәнин үзвләринә бәнзәтмишди (Ром. 12:4—8; 1 Кор. 12:12—27; Ефес. 4:16).

3. Бу мәгаләдә нәји мүзакирә едәҹәјик?

³ Мәгаләдә бу бәнзәтмәдән һансы үч ваҹиб дәрси өјрәнәҹәјимизи мүзакирә едәҹәјик. Биринҹиси, јығынҹагда һәр биримизин өз јери * олдуғуну, икинҹиси, јығынҹагда өз јеримизи неҹә тапа биләҹәјимизи, үчүнҹүсү, һәр биримизин јығынҹагда өз ролуну там шәкилдә неҹә иҹра едә биләҹәјини өјрәнәҹәјик.

4. Ромалылара 12:4, 5 ајәләриндән нә өјрәнирик?

⁴ Һәвари Булусун истифадә етдији бәнзәтмәдән илк нөвбәдә  өјрәнирик ки, Јеһованын аиләсиндә һәр биримиз ваҹиб рол ојнајырыг. Булус демишди: «Неҹә ки бәдәнимиздә чох үзв вар, амма бүтүн үзвләр ејни иши иҹра етмир, еләҹә дә биз, чох олсаг да, Мәсиһлә вәһдәтдә бир бәдән тәшкил едирик, ајры-ајрылыгда исә бир-биримизә бағлы үзвләрик» (Ром. 12:4, 5). Булусун сөзүнүн мәғзи нә иди? Јығынҹагда һәр биримизин фәргли, амма ејни заманда дәјәрли јери вар.

5. Јеһова јығынҹаға һансы «һәдијјәләр» вериб?

⁵ Јәгин бу һагда дүшүнәндә ағлыныза илк нөвбәдә рәһбәрлик едән гардашлар ҝәлир (1 Салон. 5:12; Ибр. 13:17). Әлбәттә ки, Јеһова Иса Мәсиһ васитәсилә јығынҹаға «инсан тимсалында һәдијјәләр» вериб (Ефес. 4:8). Бура Рәһбәрлик Шурасынын үзвләри, онларын көмәкчиләри, филиал комитәсинин үзвләри, рајон нәзарәтчиләри, теократик мәктәбләрдә тәлим верән гардашлар, јығынҹагдакы ағсаггаллар вә јығынҹаг хидмәтчиләри дахилдир. Бүтүн бу гардашлар мүгәддәс руһ васитәсилә тәјин олунуб, онлар Јеһованын дәјәрли хидмәтчиләринин гејдинә галыр вә јығынҹағы мөһкәмләндирирләр (1 Бут. 5:2, 3).

6. 1 Салоникилиләрә 2:6—8 ајәләринә әсасән, мүгәддәс руһла тәјин олунан гардашлар нәјә чалышыр?

⁶ Мүгәддәс руһ тәрәфиндән тәјин олунан бу гардашларын фәргли мәсулијјәтләри вар. Бәдәнин мүхтәлиф үзвләри, мәсәлән, әлләр вә ајаглар бәдәнин фајдасы үчүн чалышыр, ејнилә, мүгәддәс руһ тәрәфиндән тәјин олунан бу гардашлар да бүтүн јығынҹаг үчүн зәһмәт чәкирләр. Онлар башгаларындан тәриф ҝөзләмирләр. Әксинә, баҹы-гардашлары мөһкәмләндирмәјә чалышырлар. (1 Салоникилиләрә 2:6—8 ајәләрини охујун.) Белә руһән јеткин, фәдакар гардашлара ҝөрә Јеһоваја миннәтдарыг!

7. Тамвахтлы хидмәтдә оланлар һансы немәтләри алыр?

⁷ Јығынҹагдакы баҹы-гардашларын бәзиләри хүсуси тәјинатлы мүждәчи, хүсуси өнҹүл вә ја өнҹүл кими хидмәт едир. Бүтүн дүнјадакы бу баҹы-гардашлар һәјатларыны тәблиғ вә шаҝирд һазырламаг ишинә һәср едибләр. Беләҹә, онлар чохларына Мәсиһин шаҝирди олмаға көмәк едибләр. Адәтән бу тамвахтлы мүждәчиләрин мадди имканы о гәдәр дә јахшы олмур, амма онларын һәјаты Јеһованын немәтләри илә зәнҝиндир (Марк 10:29, 30). Биз бу әзиз баҹы-гардашларымызы чох истәјирик вә севинирик ки, јығынҹағымызын бир һиссәсидирләр!

8. Нәјә ҝөрә Јеһова үчүн хош хәбәрин һәр бир мүждәчиси дәјәрлидир?

⁸ Бәс јығынҹагда јалныз тәјин олмуш гардашларын вә тамвахтлы тәблиғчиләрин хүсуси јери вар? Әлбәттә ки, хејр! Аллаһ үчүн вә јығынҹаг үчүн хош хәбәрин һәр бир мүждәчисинин өз дәјәрли јери вар! (Ром. 10:15; 1 Кор. 3:6—9). Чүнки јығынҹағын үмдә вәзифәләриндән бири шаҝирд һазырламагдыр (Мәт. 28:19, 20; 1 Тим. 2:4). Һәр кәс, истәр вәфтиз олунмуш, истәрсә дә вәфтиз олунмамыш тәблиғчи мүждәчилик ишини һәјатында һәр шејдән үстүн тутмаға чалышыр (Мәт. 24:14).

9. Нәјә ҝөрә мәсиһи баҹылар бизим үчүн дәјәрлидир?

⁹ Јығынҹагларымызда баҹылар ләјагәтли јер тутур. Јеһова үчүн Она сәдагәтлә хидмәт едән субај баҹылар, ҝәлинләр, аналар, дуллар чох әзиздир. Мүгәддәс Китабда Јеһованын бәјәндији бир чох фүсункар гадынын ады чәкилир. Онларын һикмәт, иман, әзм, ҹәсарәт, сәхавәт, хејирхаһлыг өрнәкләри олдуғу  дејилир (Лука 8:2, 3; Һәв. 16:14, 15; Ром. 16:3, 6; Филип. 4:3; Ибр. 11:11, 31, 35). Јеһоваја миннәтдарыг ки, јығынҹагларымызда да белә ҝөзәл хүсусијјәтләрә саһиб гадынлар вар!

10. Нәјә ҝөрә јашлы баҹы-гардашлар бизим үчүн дәјәрлидир?

¹⁰ Јығынҹағымызда һәмчинин јашлы баҹы-гардашларын да дәјәрли јери вар. Онларын бәзиләринин бүтүн өмрү Јеһоваја хидмәтдә кечиб, бәзиләри исә һәгигәти тәзәликҹә өјрәниб. Һәр бир һалда, онларын јашла әлагәдар сәһһәтләриндә мүхтәлиф проблемләри ола биләр. Буна ҝөрә бу јашлы баҹы-гардашлар јығынҹагда вә тәблиғ ишиндә истәдикләри гәдәр иштирак едә билмирләр. Буна рәғмән, онлар баҹардыглары гәдәр хидмәт едирләр, һәмчинин бүтүн ҝүҹләрини башгаларыны руһландырмаға вә тәлим вермәјә сәрф едирләр! Биз дә онларын тәҹрүбәсиндән фајдаланырыг. Онлар Јеһова вә бизим үчүн һәм өзәлдир, һәм дә ҝөзәл! (Мәс. 16:31).

11, 12. Јығынҹагдакы ҝәнҹләр сизи неҹә руһландырыр?

¹¹ Инди исә ҝәлин јығынҹагдакы ҝәнҹләр барәдә данышаг. Онлар Шејтан Иблисин вә онун мәнфур фикирләринин тәсири алтында олан дүнјада бөјүјүрләр, она ҝөрә дә чохлу чәтинликләрлә үзләширләр (1 Јәһ. 5:19). Амма буна бахмајараг, онлар јығынҹагда шәрһ верир, тәблиғә ҝедир вә етигадларыны ҹәсарәтлә мүдафиә едирләр. Бизләр буну ҝөрәндә чох руһланырыг. Бәли, јығынҹагда ҝәнҹләрин өнәмли јери вар! (Зәб. 8:2).

¹² Амма бәзи баҹы-гардашлара елә ҝәлир ки, онларын јығынҹаға һеч бир фајдасы јохдур. Бәс јығынҹагда ајры-ајрылыгда һәр биримизин дәјәрли јери олдуғуну ҝөрмәјә бизә нә көмәк едә биләр? Ҝәлин инди бу һагда данышаг.

13, 14. Нәјә ҝөрә бәзиләри јығынҹаг үчүн дәјәрли олдуғуну дүшүнмүр?

¹³ Һәвари Булусун истифадә етдији бәнзәтмәдән даһа бир шеј өјрәнирик. Онун  вурғуладығы мәгам бу ҝүн дә актуалдыр: бәзи баҹы-гардашлар јығынҹагда дәјәрли олдугларына инанмаға чәтинлик чәкир. Булус јазмышды: «Мәҝәр ајаг “мән әл олмадығым үчүн бәдәнин үзвү дејиләм” демәклә артыг бәдәнин үзвү олмур? Мәҝәр гулаг “мән ҝөз олмадығым үчүн бәдәнин үзвү дејиләм” демәклә артыг бәдәнин үзвү олмур?» (1 Кор. 12:15, 16). Һәвари бунунла нәји демәк истәјирди?

¹⁴ Өзүмүзү башга диндашларымызла мүгајисә етсәк, дәјәримизи ҝөрмәјә биләрик. Ола билсин ки, јығынҹагда киминсә ҝөзәл мүәллимлик баҹарығы вар, киминсә ҝөзәл тәшкилатчылыг габилијјәти вар, кимдәсә башгаларыны тәсәлли етмәк вә руһландырмаг јахшы алыныр. Бәлкә дә, дүшүнүрсүнүз ки, сиздә бу баҹарыглар онларынкы гәдәр ҝүҹлү дејил. Бу сизин тәвазөкар олдуғунузу ҝөстәрир (Филип. 2:3). Амма еһтијатлы олун. Даима өзүнүзү ҝөзәл истедадлары оланларла мүгајисә етсәниз, мәјуслуға гапыларсыныз. Һәтта Булусун да вурғуладығы кими, елә дүшүнә биләрсиниз ки, јығынҹагда сизин һеч бир јериниз јохдур. Бу һиссләрә неҹә үстүн ҝәлмәк олар?

15. 1 Коринфлиләрә 12:4—11 ајәләринә әсасән, нәји дәрк етмәлијик?

¹⁵ Ҝәлин бир мәгама нәзәр салаг: Јеһова биринҹи әсрдәки бәзи мәсиһиләрә мүгәддәс руһ васитәсилә мөҹүзәви әнамлар вермишди, амма һамы ејни әнамы алмамышды. (1 Коринфлиләрә 12:4—11 ајәләрини охујун.) Јеһова һәрәјә мүхтәлиф әнамлар вә габилијјәтләр версә дә, һәр бир мәсиһи Онун үчүн дәјәрли иди. Дүздүр, бу ҝүн биз мөҹүзәви әнамлар алмырыг. Амма нөвбәти принсип дәјишмир: бизим баҹарыгларымыз ејни олмаса да, һамымыз Јеһова үчүн гијмәтлијик.

16. Һәвари Булусун һансы мәсләһәтинә әмәл етмәлијик?

¹⁶ Өзүмүзү башга мәсиһиләрлә мүгајисә етмәкдәнсә, һәвари Булусун  нөвбәти мәсләһәтинә әмәк етсәк, даһа јахшы олар: «Гој һәр кәс өз әмәлләрини јохласын, онда өзүнү башгасы илә мүгајисә етмәдән өз әмәлләринә ҝөрә севинә биләҹәк» (Гал. 6:4).

17. Һәвари Булусун мәсләһәтинә әмәл етмәјин һансы хејри вар?

¹⁷ Бу мәсләһәтә әмәл едиб өз әмәлләримизи јохласаг, ҝөрәҹәјик ки, биздә башгаларында олмајан әнамлар вә габилијјәтләр вар. Мисал үчүн, ола билсин, һансыса ағсаггалда сәһнәдән тәлим вермәк елә дә јахшы алынмыр, амма о, шаҝирд һазырламаг ишини чох ҝөзәл баҹарыр. Јахуд онун тәшкилатчылыг габилијјәти јығынҹағындакы диҝәр ағсаггаллардакы гәдәр дејил, амма о, елә меһрибандыр ки, һамы ондан чәкинмәдән мәсләһәт истәјә билир, јахуд о, чох гонагпәрвәрдир (Ибр. 13:2, 16). Биз өзүмүздәки ҝүҹлү јөнләри ҝөрсәк, онда биләҹәјик, јығынҹаға һансы саһәдә фајда верә биләрик вә буна ҝөрә севинәҹәјик. Беләҹә, бизимкиндән фәргли әнамлары олан диндашларымыза пахыллыг етмәјәҹәјик.

18. Габилијјәтләримизи неҹә инкишаф етдирә биләрик?

¹⁸ Јығынҹагда һансы ролумузун олмасындан асылы олмајараг, һәр биримиздә хидмәтимизи пүхтәләшдирмәк вә габилијјәтләримизи инкишаф етдирмәк истәји олмалыдыр. Бунун үчүн Јеһова бизә тәшкилаты васитәсилә мөһтәшәм тәлим верир. Мәсәлән, һәфтәарасы ҝөрүшләрдә хидмәтдә даһа сәриштәли олмаг үчүн тәлим алырыг. Бәс сиз өјрәндикләринизә әмәл етмәјә чалышырсыныз?

19. Падшаһлыг Мүждәчиләри Мәктәбиндә охумаг үчүн нә едә биләрсиниз?

¹⁹ Мөһтәшәм тәлим програмларындан бири дә Падшаһлыг Мүждәчиләри Мәктәбидир. Бу мәктәб тамвахтлы хидмәт едән вә јашы 23—65 арасы олан баҹы-гардашлар үчүн нәзәрдә тутулуб. Бәлкә дә, сизә елә ҝәлир ки, бу мәктәби һеч вахт кечә билмәрсиниз. Амма мәктәби кечмәјинизә мане олаҹаг сәбәбләри дүшүнмәкдәнсә, кечмәк истәдијиниз сәбәбләри дүшүнүн. Сонра тәләбләрә ујғун ҝәлмәјиниз үчүн мүвафиг план гурун. Әлиниздән ҝәләни етсәниз, Јеһованын көмәјилә мүмкүнсүз мүмкүн ола биләр!

20. Ромалылара 12:6—8 ајәләриндән нә өјрәнирик?

²⁰ Булусун истифадә етдији бәнзәтмәдән өјрәндијимиз үчүнҹү дәрс Ромалылара 12:6—8 ајәләриндә јазылыб. (Ајәләри охујун.) Булус бир даһа гејд едир ки, јығынҹагдакы баҹы-гардашларын мүхтәлиф әнамы вар. Бу ајәләрдә исә о вурғулајыр ки, саһиб олдуғумуз әнамлары јығынҹағын инкишафы вә мөһкәмләнмәси үчүн истифадә етмәлијик.

21, 22. Роберт вә Фелисин сөзләриндән һансы нәтиҹәни чыхарырыг?

²¹ Ҝәлин Роберт * гардашын нүмунәсинә нәзәр салаг. Бу гардаш хариҹи өлкәдә хидмәт едирди, амма сонра о өз өлкәсиндә Бејтел хидмәтинә тәјин олунду. Она десәләр дә ки, тәјинаты нәјинсә өһдәсиндән ҝәлә билмәдији үчүн дәјишмәјиб, о јенә дә нараһат иди. Роберт дејир: «Өзүмү гынајырдым, баҹарыгсыз һесаб едирдим. Бу, бир нечә ај давам етди. Елә вахтлар олурду ки, Бејтел хидмәтими дајандырмаг истәјирдим». Бәс о, севинҹини неҹә гајтарды? Бир ағсаггал  она деди ки, Јеһова өтән тәјинатымызда бизә тәлим вериб ки, индики тәјинатымызда Онун үчүн јарарлы олаг. Роберт анлады ки, кечмишә илишиб галмагданса, диггәтини инди едә биләҹәји ишләрә ҹәмләмәлидир.

²² Фелис Ипископо гардаш да буна бәнзәр вәзијјәтлә үзләшмишди. 1956-ҹы илдә о, јолдашы илә бирҝә Ҝилад мәктәбини битирмиш вә Боливијада сәјјар хидмәтдә олмушдулар. 1964-ҹү илдә онларын ушағы олду. Фелис гардаш дејир: «Тәјинатымызы севирдик, ону дајандырмаг бизим үчүн чох чәтин иди. Етираф етмәлијәм ки, һарадаса бир ил өзүмү бош-бошуна јазыгладым. Амма Јеһованын көмәјилә дүшүнҹәми дәјишиб, јени тәјинатыма, валидејнлик тәјинатыма көкләнә билдим». Робертин вә ја Фелисин кечирдији һиссләр сизә танышдыр? Әввәлки мәсулијјәтләрә инди саһиб олмадығыныз үчүн мәјуссунуз? Белә мәгамда диггәтинизи кечмишә јох, инди Јеһова үчүн вә баҹы-гардашлар үчүн едә биләҹәјиниз ишләрә ҹәмләсәниз, даһа чох севинҹ дујаҹагсыныз. Бош дурмајын, әнамларынызы, баҹарыгларынызы башгаларынын рифаһы үчүн истифадә един. Онда јығынҹағы мөһкәмләндирдијиниз үчүн севинҹ дујаҹагсыныз.

23. Вахт ајырыб нә етмәлијик вә нөвбәти мәгаләдә нәји арашдыраҹағыг?

²³ Һәр биримиз Јеһова үчүн дәјәрлијик. О истәјир ки, биз өзүмүзү Онун аиләсинин бир үзвү кими һисс едәк. Әҝәр биз вахт ајырыб баҹы-гардашлары мөһкәмләндирмәк үчүн нә едә биләҹәјимизи дүшүнсәк, сонра исә буну етмәк үчүн әлимиздән ҝәләни етсәк, чәтин ки, јығынҹагда јеримизин олмадығыны дүшүнәк! Бәс башгаларына неҹә јанашмалыјыг? Онлара мәһәббәтимизи вә һөрмәтимизи неҹә ҝөстәрә биләрик? Нөвбәти мәгаләдә бу ваҹиб мөвзуну арашдыраҹағыг.