1. Нәјә ҝөрә Иса Мәсиһ Јеһовадан давамчыларыны горумасыны хаһиш етмишди?

 ӨЛҮМҮНДӘН өнҹәки ҝеҹә Иса Мәсиһ Атасындан хүсуси бир шеј хаһиш етмишди. Ондан давамчыларыны горумасыны диләмишди (Јәһ. 17:15, 20). Әлбәттә, Јеһова һәмишә хидмәтчиләрини горујуб вә онларын гејдинә галыб. Бәс онда Иса нәјә ҝөрә белә бир хаһиш етмишди? О билирди ки, Шејтан онун давамчыларыны ҝөрүнмәмиш дәрәҹәдә тәгиб едәҹәк вә бу һүҹумлара гаршы дурмаг үчүн онларын Јеһованын көмәјинә еһтијаҹы олаҹаг.

2. Зәбур 33:18—20 ајәләринә әсасән, нәјә ҝөрә чәтинликләрлә үзләшәндә тәлаша дүшмәмәлијик?

² Бу ҝүн Шејтан дүнјасы Аллаһын халгына һәдсиз тәзјигләр ҝөстәрир. Башымыза ҝәлән бәлалара ҝөрә мәјуслуға гапыла биләрик, һәтта Јеһоваја сәдагәтимиз сынана биләр. Амма бу мәгаләдән ҝөрәҹәјимиз кими, гәтијјән тәлаша дүшмәјә дәјмәз. Јеһованын ҝөзү бизим үзәримиздәдир. О, үзләшдијимиз һәр чәтинликдән аҝаһдыр вә бизим көмәјимизә чатмаға һәмишә һазырдыр. Ҝәлин Јеһованын ҝөзүнүн Ондан горханларын үзәриндә олдуғуну ҝөстәрән ики нүмунәјә бахаг. (Зәбур 33:18—20 ајәләрини охујун.)

3. Өзүмүзү тәнһа һисс етмәјимизә нәләр сәбәб ола биләр?

³ Јығынҹағымызда чохлу баҹы-гардашларымыз олса да, бәзән өзүмүзү тәнһа һисс едирик. Мәсәлән, бәзи ҝәнҹләр синиф јолдашларынын гаршысында етигадлары һаггында данышанда вә ја јени јығынҹаға кечәндә өзләрини тәнһа һисс едирләр. Бәзиләримизә кәдәр һисси, бәдбин фикирләр аман вермир вә фикирләширик ки, бу ҹүр һиссләрлә тәкбашына чарпышмалыјыг. Ола билсин,  киминләсә бу барәдә данышмаға чәкинирик, бизи баша дүшмәјәҹәкләрини фикирләширик. Бәзән исә бизә елә ҝәлир ки, һеч кимә лазым дејилик. Сәбәбиндән асылы олмајараг тәнһалыг һисси дахилимиздә чарәсизлик, тәлаш һисси јарадыр. Јеһова бизим белә һиссләр кечирмәјимизи гәтијјән истәмир. Буну һарадан билирик?

4. Нәјә ҝөрә Илјас пејғәмбәр «тәкҹә мән галмышам» демишди?

⁴ Ҝәлин Илјас пејғәмбәрлә баш верән һадисәјә нәзәр салаг. Мәликә Изәбил ону өлдүрәҹәјинә анд ичмишди. Буна ҝөрә дә Илјас 40 ҝүндән чох иди ки, ҹаныны гуртармаг үчүн Изәбилин әлиндән гачырды (1 Пад. 19:1—9). Сонра о, мағарада тәк оланда Јеһоваја фәрјад едиб демишди: «[Пејғәмбәрләрдән] тәкҹә мән галмышам» (1 Пад. 19:10). Әслиндә, өлкәдә башга пејғәмбәрләр дә вар иди; Әбдија гатил Изәбилин әлиндән 100 пејғәмбәри ҝизләтмишди (1 Пад. 18:7, 13). Бәс онда нәјә ҝөрә Илјас өзүнү тәк һисс едирди? Јәгин, фикирләширди ки, Әбдијанын ҝизләтдији пејғәмбәрләр артыг өлүб. Бәлкә дә, Кармел дағында Баалын сахта аллаһ олдуғу сүбут олунмасына бахмајараг, һеч кимин пак ибадәтдә она гошулмадығына ҝөрә бу ҹүр һиссләр кечирирди. Јахуд дүшүнүрдү ки, һәјатынын тәһлүкә алтында олмасындан һеч кимин хәбәри јохдур вә ја бу, һеч кимин веҹинә дејил. Мүгәддәс Китабда Илјасын нәјә ҝөрә белә һиссләр кечирдијинин сәбәби дејилмир. Амма ону дәгиг билирик ки, Јеһова Илјасын нәјә ҝөрә өзүнү тәк һисс етдијини вә она көмәк етмәјин јолуну јахшы билирди.

5. Јеһова Илјасы тәк олмадығына неҹә әмин етди?

⁵ Јеһова Илјас пејғәмбәрә бир нечә јолла көмәк етди. Әввәла, Илјас үрәјини бошалтсын дејә она ики дәфә суал верди: «Бурада нә едирсән?» (1 Пад. 19:9, 13). Илјас һәр дәфәсиндә дәрдини дејәндә Јеһова ону диггәтлә динләди вә ҹавабында она Өзүнү вә мөһтәшәм гүдрәтини әјан етди. Һәмчинин Јеһова Илјасы әмин етди ки, онун һәлә дә чохлу диндашы вар (1 Пад. 19:11, 12, 18). Шүбһә јохдур ки, Илјас үрәјини бошалдандан вә Јеһованын дедији сөзләрдән  сонра хејли јүнҝүлләшди. Һәмчинин Јеһова Илјаса бир нечә ваҹиб тапшырыг верди. Она бујурду ки, Һәзаили мәсһ едиб Арама падшаһ гојсун, Јәһуну мәсһ едиб Исраилә падшаһ гојсун, Әлјәсәни исә пејғәмбәр олмаг үчүн мәсһ етсин (1 Пад. 19:15, 16). Бу тапшырыглары вермәклә Јеһова Илјаса диггәтини мүсбәт шејләрә ҹәмләмәјә көмәк етди. Бундан әлавә, Илјасын әмәкдашы олсун дејә Әлјәсәни тәјин етди. Бәс сиз өзүнүзү тәк һисс едәндә Јеһованын көмәјини дујмаг үчүн нә едә биләрсиниз?

6. Өзүнүзү тәнһа һисс едәндә Јеһоваја нә барәдә дуа едә биләрсиниз? (Зәбур 62:8).

⁶ Јеһова сизи Она дуа етмәјә тәшвиг едир. О сизин нәләр јашадығынызы ҝөрүр вә сизи архајын едир ки, дуанызы һәмишә динләмәјә һазырдыр (1 Салон. 5:17). Јеһова хидмәтчиләринин дуасыны динләмәкдән хошланыр (Мәс. 15:8). Бәс өзүнүзү тәнһа һисс едәндә Јеһоваја нә барәдә дуа едә биләрсиниз? Илјас пејғәмбәр кими, үрәјинизи Јеһоваја бошалдын. (Зәбур 62:8 ајәсини охујун.) Она гәлбиниздәки нараһатлығы, кечирдијиниз һиссләри данышын. Хаһиш един ки, бу һиссләрә таб ҝәтирмәјин јолуну сизә ҝөстәрсин. Мәсәлән, мәктәбдә етигадыныз барәдә данышаркән өзүнүзү јалгыз һисс едирсинизсә вә тәлаш кечирирсинизсә, Јеһовадан ҹәсарәт истәјин. Һәм дә нәзакәтли шәкилдә шаһидлик вермәк үчүн Јеһовадан һикмәт дә диләјә биләрсиниз (Лука 21:14, 15). Әҝәр бәдбин фикирләрлә мүбаризә апарырсынызса, бу барәдә јеткин мәсиһи илә данышмаг үчүн Јеһовадан көмәк истәјин. Һәмин мәсиһи үчүн дә дуа едә биләрсиниз ки, сизин һиссләринизи баша дүшсүн. Бүтүн нараһатлығынызы Јеһоваја данышын. Ҝөрүн О, дуаныза неҹә ҹаваб верир. Һәмчинин башгаларынын көмәјини гәбул един. Онда өзүнүзү әввәлки гәдәр тәнһа һисс етмәјәҹәксиниз.

7. Маурисијонун нүмунәсиндән нә өјрәнирсиниз?

⁷ Јеһова һәр биримизә мәналы иш тапшырыб. Әмин олун ки, Јеһова сизин тәблиғә вә јығынҹағын ишләринә ҹан јандырдығынызы ҝөрүр вә буну чох гијмәтләндирир (Зәб. 110:3). Өзүнүзү тәнһа һисс едәндә руһани ишләрлә мәшғул олмаг сизә неҹә көмәк едә биләр? Ҝәлин Маурисијо * адлы ҹаван гардашын нүмунәсинә бахаг. О, вәфтиз олунандан гыса мүддәт сонра ән јахын достларындан бири тәдриҹән һәгигәти тәрк етди. Маурисијо дејир: «Онун Јеһовадан узаглашдығыны ҝөрмәк мәним өзүмә инам һиссими сарсытды. Горхурдум ки, һәср олунаркән вердијим әһдә бағлы галмарам вә даһа Јеһованын аиләсинин ичиндә олмарам. Өзүмү чох тәнһа һисс едирдим вә дүшүнүрдүм ки, һеч ким мәним һиссләрими баша дүшмәз». Маурисијоја нә көмәк  етди? О дејир: «Мән хидмәтими ҝенишләндирдим. Бу мәнә диггәтими өзүмә ҹәмләмәмәјә вә бәдбин фикирләрә гапылмамаға көмәк етди. Хидмәтдә баҹы-гардашларла әмәкдашлыг едәндә хошбәхт олурдум, өзүмү елә дә тәнһа һисс етмирдим». Доғрудан да, диндашларымызла хидмәт едәндә, һәтта онларла ҹанлы јох, мәктуб вә телефон хидмәтиндә әмәкдашлыг едәндә мөһкәмләнирик. Маурисијоја башга нә көмәк етди? О, сөзүнә давам едир: «Һәмчинин чалышырдым ки, јығынҹагда фәал олум. Шаҝирд тапшырыгларыны һазырламаг вә тәгдим етмәк үчүн ҹан гојурдум. Бу тапшырыглар сајәсиндә һәм Јеһова, һәм дә баҹы-гардашлар үчүн дәјәрли олдуғуму һисс едирдим».

8. Шиддәтли сынаглар уҹбатындан биздә һансы һиссләр ола биләр?

⁸ Јашадығымыз ахырзаманда чәтинликләрлә үзләшәҹәјимизи билирик (2 Тим. 3:1). Амма бәзән һеч ҝөзләмәдијимиз бир вахтда вә һеч ағлымыза ҝәлмәјән сынагла үзләшә биләрик. Ола биләр ки, гәфил мадди чәтинлијимиз јарансын, һәким биздә ҹидди хәстәлијин олдуғуну десин, јахуд әзиз адамымыз вәфат етсин. Белә анларда, хүсусилә дә сынаглар бир-биринин ардынҹа вә ја ејни заманда баш верәндә чох сарсылырыг, пәришан олуруг. Амма бу заман унутмамалыјыг ки, Јеһованын ҝөзү бизим үзәримиздәдир. Онун көмәји илә истәнилән сынаг гаршысында мәтин дура биләрик.

9. Әјјуб пејғәмбәр һансы сынагларла үзләшмишди?

⁹ Ҝәлин Јеһованын Әјјуб пејғәмбәрә неҹә дајаг олдуғуну хатырлајаг. Гыса вахтда онун башына дәһшәтли бәлалар ҝәлди. О, бир ҝүнүн ичиндә ард-арда түкүрпәрдиҹи хәбәрләр ешитди. Бүтүн мал-гарасыны итирди, нөкәрләри гәтлә јетирилди, ән бетәри исә әзиз балалары һәлак олду (Әјј. 1:13—19). Башы бу дәрддән ачылмамыш ону ејбәҹәр һала салан, ағрылы хәстәлијә тутулду (Әјј. 2:7). Әјјуб о гәдәр аҹынаҹаглы һалда иди ки, белә демишди: «Безмишәм, даһа јашамаг истәмирәм» (Әјј. 7:16).

10. Јеһова Әјјуба сынаглара дөзмәјә неҹә көмәк етди? (Үз габығындакы шәклә бахын.)

¹⁰ Јеһованын нәзәри бу мөмин инсанын үзәриндә иди. Јеһова Әјјубу севирди вә сынаглардан башыуҹа чыхмасы үчүн она лазыми көмәји ҝөстәрди. Јеһова Әјјубла данышды, бир Јарадан кими саһиб олдуғу мисилсиз һикмәтини, хилгәтинә олан дәрин мәһәббәтини Әјјуба хатырлатды. Она инсаны һејрәтә ҝәтирән һејванлардан данышды (Әјј. 38:1, 2; 39:9, 13, 19, 27; 40:15; 41:1, 2). Һәмчинин Јеһова Әлиһу адлы бир ҹаван хидмәтчиси васитәсилә Әјјубу мөһкәмләндирди, она үрәк-дирәк верди. Әлиһу Әјјуба хатырлатды ки, Јеһова дөзүм ҝөстәрән хидмәтчиләрини һеч вахт мүкафатсыз гојмур. Бундан әлавә, Јеһова Әлиһуну Әјјуба меһрибан шәкилдә мәсләһәт вермәјә тәшвиг етди. Әлиһу она Јеһова илә, Каинатын Јараданы илә мүгајисәдә нә гәдәр кичик олдуғуну вурғулајараг вәзијјәтә ҝениш бахмаға көмәк етди (Әјј. 37:14). Јеһова һәм дә Әјјуба тапшырыг верди: о, ҝүнаһ ишләмиш үч досту үчүн дуа етмәли иди (Әјј. 42:8—10). Бәс Јеһова бизә чәтинликләрә дөзмәјә неҹә көмәк едир?

11. Мүгәддәс Китабдакы һансы фикирләр бизә сынаглара дөзмәјә көмәк едә биләр?

¹¹ Бу ҝүн Јеһова бизимлә Әјјубла олдуғу кими, бирбаша данышмаса да, Кәламы васитәсилә данышыр (Ром. 15:4). Орада бизә ҝәләҹәјә даир ҝөзәл үмид верир. Ҝәлин Мүгәддәс Китабдан сынаглар заманы бизә тәсәлли верәҹәк бәзи фикирләрә нәзәр салаг. Јеһова бизи әмин едир ки, һеч нә бизи Онун «мәһәббәтиндән ајыра билмәз»;  бура үзләшдијимиз шиддәтли сынаглар да дахилдир (Ром. 8:38, 39). Јеһова дуада Ону «сәмими-гәлбдән чағыранлара јахындыр» (Зәб. 145:18). Она ҝүвәнсәк, истәнилән сынаға таб ҝәтирә биләрик, һәтта әзабларла үзләшсәк дә, хошбәхт ола биләрик (1 Кор. 10:13; Јаг. 1:2, 12). Јеһова бизә хатырладыр ки, индики сынагларымыз ҝәләҹәкдәки немәтләрлә мүгајисәдә мүвәггәти вә гысадыр (2 Кор. 4:16—18). Јеһова бүтүн сынагларымыза сәбәб олан кәси, Шејтан Иблиси вә онун кими шәр ишләр ҝөрәнләри тамамилә мәһв едәҹәјинә сөз верир (Зәб. 37:10). Бәс сиз ҝәләҹәк сынаглар заманы сизә дөзмәјә көмәк едәҹәк ајәләри әзбәрләјирсиниз?

12. Јеһова Кәламындан там бәһрәләнмәјимиз үчүн нә етмәјимизи истәјир?

¹² Јеһова истәјир ки, биз вахт ајырыб Мүгәддәс Китабы мүнтәзәм охујаг вә охудугларымыз һагда дәриндән дүшүнәк. Биз өјрәндикләримизә әмәл едәндә иманымыз даһа да мөһкәмләнир вә Јеһоваја даһа јахын олуруг. Беләҹә, сынаглара дөзмәјә ҝүҹүмүз олур. Үстәлик, Јеһова Онун Кәламына үз тутанлара Өз мүгәддәс руһуну верир. Бу руһ исә бизә истәнилән сынаға дөзмәјимиз үчүн «инсан ҝүҹүндән үстүн олан ҝүҹү» верир (2 Кор. 4:7—10).

13. «Садиг вә ағыллы нөкәр»ин вердији руһани гида бизә сынаглара дөзмәјә неҹә көмәк едир?

¹³ Јеһованын көмәји илә «садиг вә ағыллы нөкәр» чохлу нәшрләр, видеолар, мусигиләр һазырлајыр. Бунлар бизә иманымызы мөһкәмләндирмәјә вә руһани ҹәһәтдән ојаг галмаға көмәк едир (Мәт. 24:45). Биз бу руһани тәамларын һамысындан бәһрәләнмәлијик. Бирләшмиш Штатлардан олан бир баҹы бу јахынларда руһани гидаја ҝөрә миннәтдарлығыны билдирмишди. О јазыр: «40 илдир ки, Јеһоваја хидмәт едирәм, бу илләр әрзиндә сәдагәтим дәфәләрлә сынаныб». Баҹы ағыр чәтинликләрлә үзләшиб: сәрхош сүрүҹү уҹбатындан бабасы автомобил гәзасында һәлак олуб, һәр ики валидејни ағыр хәстәликдән һәјатыны итириб, өзү исә ики дәфә хәрчәнҝ хәстәлији илә мүбаризә апарыб. Баҹы бүтүн бунлара неҹә дөзүб? О дејир: «Јеһова һәмишә мәним гејдимә галыб. Онун вердији руһани гида мәнә дөзмәјә көмәк едиб. Бунун сајәсиндә мән дә Әјјуб кими дејирәм: “Сон нәфәсимәдәк садиг галаҹағам!”» (Әјј. 27:5).

14. Јеһова чәтин вахтларымызда баҹы-гардашлар васитәсилә бизә неҹә дајаг олур? (1 Салоникилиләрә 4:9).

¹⁴ Јеһова хидмәтчиләринә чәтин анларында бир-бирини севмәји, бир-биринә тәсәлли  вермәји өјрәдир (2 Кор. 1:3, 4; 1 Салоникилиләрә 4:9 ајәсини охујун). Баҹы-гардашлар Әлиһудан өрнәк алараг чәтинликләр заманы сәдагәтимизи горумаға көмәк едирләр (Һәв. 14:22). Диана адлы баҹынын јолдашынын сәһһәтиндә ҹидди проблем вар иди. Јығынҹағы баҹыја һәјатынын бу ағыр дөнәминдә дајаг олду вә руһани ҹәһәтдән мөһкәм галмаға көмәк етди. О дејир: «Чох ағыр вәзијјәт иди. Амма бу чәтин ајлар әрзиндә Јеһованын ҝүҹлү әлини, севҝисини өз һәјатымызда һисс едирдик. Јығынҹағымыз бизә мүхтәлиф јолларла дајаг олурду. Онларын бизә баш чәкмәси, зәнҝ етмәси, бағрына басыб гуҹагламасы бизә дөзмәјә көмәк етди. Машын сүрә билмәдијим үчүн баҹы-гардашлар әлләриндән ҝәләни едирдиләр ки, шәраитим јол вердикҹә јығынҹагларда вә тәблиғдә иштирак едим». Бу ҹүр мәһәббәтли аиләнин ичиндә олмаг бөјүк хошбәхтликдир!

15. Нәјә ҝөрә әминик ки, башымыза ҝәлән бәлалара дөзә биләрик?

¹⁵ Һәр биримиз истәр-истәмәз һансыса сынагла үзләшәҹәјик. Амма өјрәндијимиз кими, бу сынагларла тәк ҹанымыза мүбаризә апармајаҹағыг. Гајғыкеш бир Ата кими, Јеһованын ҝөзү һәмишә үзәримиздәдир. О, јанымыздадыр, көмәк үчүн етдијимиз јалварышлары динләмәјә вә бизә дајаг олмаға һәмишә һазырдыр (Әшј. 43:2). Әминик ки, башымыза ҝәлән бәлалара таб ҝәтирә биләрик, чүнки дөзмәјимиз үчүн Јеһова бизә нә лазымдырса, һәр шеји вериб. О бизә дуа әнамы, Мүгәддәс Китаб, бол-бол руһани гида вә чәтин ҝүнүмүздә дадымыза чатан баҹы-гардашлар бәхш едиб.

16. Јеһованын һимајәси алтында галмаг үчүн нә едә биләрик?

¹⁶ Шүкүрләр олсун ки, бизи горујан, ҝөзү үзәримиздә олан сәмави Атамыз вар! «Көнлүмүз Онунла севинәр» (Зәб. 33:21). Јеһованын бизә көмәк етмәк үчүн бәхш етдији һәр шејдән бәһрәләнмәклә дәрин мәһәббәтинә вә гајғысына ҝөрә Она миннәтдарлығымызы ҝөстәририк. Аллаһын һимајәси алтында галмаг үчүн биз өһдәмизә дүшәни етмәлијик. Башга сөзлә, әҝәр бундан сонра да Јеһоваја итаәт етмәк, Онун бәјәндији ишләри ҝөрмәк үчүн әлимиздән ҝәләни етсәк, Онун ҝөзү әбәдијјән үстүмүздә олаҹаг (1 Бут. 3:12).