1. Һәгигәтә ҝәлмәјимиз барәдә данышмағын һансы фајдасы вар?

 «ҺӘГИГӘТӘ неҹә ҝәлмисән?» Јәгин, бу суалы сизә чох верибләр. Диндашларымызла таныш оланда адәтән илк вердијимиз суаллардан бири бу олур. Онлар Јеһованы неҹә таныдыгларындан вә севдикләриндән данышырлар, биз дә мәмнунијјәтлә гулаг асырыг; сонра исә өзүмүз бөјүк һәвәслә һәгигәти нә үчүн севдијимиздән данышырыг (Ром. 1:11). Бу кими сөһбәтләр бизә һәгигәтин нә гәдәр дәјәрли олдуғуну хатырладыр. Үстәлик, һәгигәт јолунда јеримәјә, јәни Јеһованын бәјәндији тәрздә јашамаға даһа гәтијјәтли олуруг (3 Јәһ. 4).

2. Бу мәгаләдә нә һагда данышаҹағыг?

² Бу мәгаләдә һәгигәти нәјә ҝөрә севдијимизин бәзи сәбәбләринә бахаҹағыг. Һәмчинин бу дәјәрли һәдијјәни гијмәтләндирдијимизи ҝөстәрмәјин јоллары һагда данышаҹағыг. Әлбәттә ки, бу мүзакирәдән сонра бизи һәгигәт јолуна ҹәлб етдијинә ҝөрә Јеһоваја бир даһа миннәтдар олаҹағыг (Јәһ. 6:44). Үстәлик, һәгигәти башгалары илә бөлүшмәк һәвәсимиз даһа да артаҹаг.

3. Һәгигәти севмәјимизин ән башлыҹа сәбәби һансыдыр?

³ Һәгигәти севмәјимизин сәбәбләри чохдур. Ән әсасы, биз һәгигәтин мәнбәји олан Јеһова Аллаһы севирик. Кәламы олан Мүгәддәс Китабдан өјрәнмишик ки, Јеһова јерин вә ҝөјүн гүдрәтли Јараданы олмагла јанашы, бизи севән, нәвазишлә  гајғымыза галан сәмави Атамыздыр (1 Бут. 5:7). Биз билирик ки, Јеһова «рәһмли вә мәрһәмәтли, сәбирли, мәһәббәти бол, һәгигәти әнҝин олан» Аллаһдыр (Чых. 34:6). О, әдаләти севир (Әшј. 61:8). Бизим әзаб чәкдијимизи ҝөрмәк Она гәлб ағрысы верир вә тәјин етдији вахтда бизим бүтүн изтирабларымыза сон гојмағы сәбирсизликлә ҝөзләјир (Әрм. 29:11). Бу неҹә дә мөһтәшәм олаҹаг! Јеһованы бу гәдәр севмәјимиз әбәс јерә дејил!

4, 5. Нәјә ҝөрә һәвари Булус үмидимизи ҝәми лөвбәринә бәнзәтмишди?

⁴ Һәгигәти севмәјимизин башга һансы сәбәби вар? Һәгигәтин бизә фајдасы чохдур. Ҝәлин бир нүмунәјә бахаг. Мүгәддәс Китабдакы һәгигәтә ҝәләҹәјә олан үмидимиз дахилдир. Һәвари Булус үмидин дәјәрини ҝөстәрмәк үчүн белә демишди: «Биз һәјатымызы бу үмидә бағламышыг. Бу үмид бизим үчүн мөһкәм вә сарсылмаз ҝәми лөвбәри кимидир» (Ибр. 6:19). Лөвбәр ҝәмини сабит сахладығы кими, Мүгәддәс Китаба әсасланан үмидимиз дә чәтинликләр заманы бизә сәндәләмәмәјә көмәк едир.

⁵ Дүздүр, ајәнин контекстиндә Булус мәсһ олунмуш мәсиһиләрин саһиб олдуғу ҝөјләр үмидиндән данышмышды. Амма бу сөзләр јерүзү ҹәннәтдә јашамағы сәбирсизликлә ҝөзләјән мәсиһиләрә дә аиддир (Јәһ. 3:16). Бәли, әбәди һәјат үмиди һагда өјрәнмәјин сајәсиндә һәјатымыз мәналы олуб.

6, 7. Ҝәләҹәјә даир һәгигәти өјрәнмәјин Ивона һансы фајдасы олуб?

⁶ Ҝәлин Ивон адлы баҹынын нүмунәсинә бахаг. О, һәгигәтдә бөјүмәјиб вә ушаг оланда өлүмдән горхурду. Бир дәфә Ивон бир фикир охумушду: «Бир ҝүн ачылан сабаһы ҝөрмәјәҹәксән». Бу фикир һеч ҹүр онун бејниндән чыхмырды. Ивон баҹы дејир: «Һәмин ҝеҹә ҝөзүмә јуху ҝетмәди, ҝәләҹәк барәдә фикирләр мәни раһат бурахмырды: “Ола билмәз, һәјат бунунла битсин. Бәс мән нијә дүнјаја ҝәлмишәм?” Мән өлмәк истәмирдим!»

⁷ Сонра Ивон јенијетмә јашларында Јеһованын Шаһидләри илә таныш олду. Һәгигәти биләндән сонра онун Ҹәннәтдә әбәди јашамаг үмиди јаранды. Һәгигәти билмәсинин баҹыја һансы көмәји дәјди? Ивон сөзүнә давам едир: «Мән артыг ҝәләҹәклә, өлүмлә бағлы нараһатчылыгларыма ҝөрә ҝеҹәләр јухусуз галмырам». Һәгигәтин Ивон үчүн нә гәдәр дәјәрли олдуғуну тәсәввүр етмәк чәтин дејил. О, ҝәләҹәјә үмиди барәдә башгаларына данышмагдан мәмнунлуг дујур (1 Тим. 4:16).

8, 9. а) Исанын бир мәсәлиндәки киши тапдығы хәзинәни гијмәтләндирдијини неҹә ҝөстәрди? б) Һәгигәт сизин үчүн нә дәрәҹәдә гијмәтлидир?

⁸ Мүгәддәс Китабдакы һәгигәтә Аллаһын Падшаһлығы һагда хош хәбәр дә дахилдир. Иса Мәсиһ Падшаһлыг һаггындакы һәгигәти ҝизли хәзинәјә бәнзәтмишди. О, Мәтта 13:44 ајәсиндә демишди: «Сәмави Падшаһлыг чөлдә ҝизләдилмиш хәзинәјә бәнзәјир. Ону бир нәфәр тапыб ҝизләтди. Сонра севинҹиндән ҝедиб һәр шејини сатды вә ораны алды». Мараглы мәгамдыр ки, һәмин адам хәзинә ахтарышына чыхмамышды. Амма хәзинәни тапанда ону әлдә етмәк үчүн бөјүк гурбанлар вермишди. О, саһиб олдуғу һәр шеји сатмышды. Чүнки баша дүшүрдү ки, бу хәзинә чох дәјәрлидир вә ондан өтрү һәр шејиндән кечмәјә дәјәр.

⁹ Сиз дә һәгигәтә бу ҹүр јанашырсыныз? Буна шүбһә јохдур! Биз билирик ки, бу дүнјанын тәклиф етдији һеч бир шеј һал-һазырда Јеһоваја хидмәтдән дујдуғумуз  севинҹлә вә Падшаһлығын һакимијјәти алтында әбәди јашамаг үмиди илә мүгајисәјә ҝәлә билмәз. Бизим Јеһова илә јахын, мөһкәм мүнасибәтимиз вар. Бундан өтрү истәнилән гурбаны вермәјә дәјәр. Ән бөјүк севинҹимиз «Ону там разы» салмагдыр (Кол. 1:10).

10, 11. Мајкл гардашы һәјат тәрзиндә көклү дәјишикликләр етмәјә нә тәшвиг етди?

¹⁰ Чохумуз Јеһованын разылығыны газанмаг үчүн бөјүк гурбанлар вермишик. Бәзиләри престижли карјерадан имтина едиб, вар-дөвләт саһиби олмаға ҹан атанлар бу истәкләриндән ваз кечиб. Бир башгалары исә Јеһованы таныјандан сонра һәјат тәрзләриндә көклү дәјишикликләр едибләр. Бу инсанлардан бири дә Мајкл гардашдыр. О, һәгигәтдә бөјүмәјиб. Ҝәнҹ јашларында о, дөјүш сәнәтини өјрәнмишди. Мајкл дејир: «Јахшы физики формада олмағымла фәхр едирдим. Һәтта јенилмәз олдуғуму дүшүнүрдүм». Амма Мүгәддәс Китабы арашдыранда Мајкл Јеһованын зоракылыға мүнасибәтини өјрәнди (Зәб. 11:5). Она дәрс кечән әр-арвад һагда Мајкл дејир: «Онлар бир дәфә дә олсун мәнә дөјүш сәнәтини атмалы олдуғуму демәдиләр; садәҹә олараг Мүгәддәс Китабдакы һәгигәтләри өјрәтмәјә давам етдиләр».

¹¹ Мајкл Јеһованы таныдыгҹа Она мәһәббәти артырды. Јеһованын Өз хидмәтчиләринә шәфгәт ҝөстәрмәси она дәрин тәсир бағышламышды. Тәдриҹән Мајкл һәјатыны дәјишәҹәк гәрары вермәли олдуғуну анлады. О дејир: «Билирдим ки, мәним үчүн ән чәтин шеј каратени атмаг олаҹаг. Амма бунунла Јеһованын гәлбини севиндирәҹәјими баша дүшүрдүм вә әмин идим ки, Она хидмәт етмәкдән өтрү истәнилән гурбаны вермәјә дәјәр». Мајкл тапдығы һәгигәтин дәјәрли олдуғуну анлады вә бу, ону һәјатында бөјүк дәјишикликләр етмәјә тәшвиг етди (Јаг. 1:25).

12, 13. Мүгәддәс Китаб һәгигәти Мајли баҹыја неҹә көмәк етди?

¹² Мүгәддәс Китабда һәгигәт гаранлыгда ишыг сачан чыраға бәнзәдилир вә бу, онун нә гәдәр дәјәрли олдуғуну ҝөстәрир (Зәб. 119:105; Ефес. 5:8). Азәрбајҹанлы олан Мајли адлы баҹы Аллаһын Кәламынын онун һәјатына нур сачдығына ҝөрә чох миннәтдардыр. О, дини ҹәһәтдән бөлүнмүш аиләдә боја-баша чатыб, атасы мүсәлман, анасы исә јәһуди олуб. Мајли дејир: «Аллаһын варлығына һеч вахт шүбһә еләмирдим. Амма бунунла јанашы, бәзи суаллар мәни нараһат едирди: “Аллаһ нә үчүн инсаны јарадыб? Јарадыб ки, өмүр боју әзаб чәкмәси азмыш кими, ҹәһәннәмдә дә әбәдијјән әзаб чәксин?” Инсанлар дејирдиләр ки, нә олурса, Аллаһын изни илә олур. Мән фикирләширдим: “Неҹә ола биләр ки, Аллаһ инсанларын талејини јазсын, сонра исә кәнарда дуруб онларын неҹә әзаб чәкдикләринә тамаша етсин?”»

¹³ Мајли усанмадан суалларына ҹаваб ахтарырды. Бир мүддәт сонра о, Мүгәддәс Китабы өјрәнмәјә разылашды вә Јеһованын Шаһиди олду. О дејир: «Мүгәддәс Китабдан өјрәндикләрим һәјата бахышымы дәјишди. Орадан тапдығым мәнтигли, ағлабатан изаһатлар мәнә гәлб раһатлығы верди». Мајли кими һамымыз бизи «гаранлыгдан Өз һејрәтамиз нуруна чағыран» Јеһоваја һәмд уҹалдырыг (1 Бут. 2:9).

14. Һәгигәтә севҝимизи неҹә артыра биләрик? (Һәмчинин « Диҝәр бәнзәтмәләр» адлы чәрчивәјә бахын.)

¹⁴ Биз һәгигәтин нә гәдәр дәјәрли олдуғуну ҝөстәрән садәҹә бир нечә бәнзәтмәјә бахдыг. Шүбһәсиз, сиз чохлу белә бәнзәтмәләр билирсиниз. Бәлкә, фәрди  мүталиәниздә һәгигәти севмәјимизин диҝәр сәбәбләрини арашдырасыныз? Бу сизин һәгигәтә севҝинизи артыраҹаг. Һәгигәтә севҝиниз артдыгҹа бу севҝинизи мүхтәлиф јолларла ҝөстәрмәк истәјәҹәксиниз.

15. Һәгигәти севдијимизи ҝөстәрмәјин бир үсулу һансыдыр?

¹⁵ Һәгигәтә севҝимизи Мүгәддәс Китабы вә она әсасланан нәшрләри мүнтәзәм арашдырмагла ҝөстәрә биләрик. Ахы һәгигәтдә нә гәдәр олмағымыздан асылы олмајараг, өјрәнмәли олдуғумуз чох шеј вар. Бу журналын илк сајында белә сөзләр дејилмишди: «Һәгигәт “һәјат” адлы бијабанда от-әләфә бәнзәр јаланлар арасында аз гала боғулан балаҹа бир чичәјә бәнзәјир. Бу чичәји тапмаг истәјирсинизсә, јахшы-јахшы ахтармалысыныз... Ону дәрмәк үчүн ашағы әјилмәлисиниз. Амма бир ҝүл дәриб ҝетмәјин... Јенә ахтарын, дајанмадан арајын». Мүталиә зәһмәт тәләб едир, амма буна дәјәр.

16. Сиз мүталиәни һансы үсулла едирсиниз? (Мәсәлләр 2:4—6).

¹⁶ Һеч дә һамымыз мүталиә етмәји севмирик. Амма һәгигәти даһа дәриндән  баша дүшмәјимиз үчүн Јеһова бизи ахтармаға, арамаға тәшвиг едир. (Мәсәлләр 2:4—6 ајәләрини охујун.) Биз бу ҹүр зәһмәт чәкәндә мүтләг бунун хејрини дә ҝөрүрүк. Кори адлы гардаш Мүгәддәс Китабы охујанда ајәләри бир-бир арашдырыр. О дејир: «Мән һәр һашијәјә, бүтүн чарпаз истинадлара бахырам вә әлавә ахтарышлар апарырам Бу үсулла охумағын сајәсиндә чох шеј өјрәнирәм». Мүталиәни истәр бу үсулла едәк, истәр башга, һәгигәти арашдырмаг үчүн вахт вә ҝүҹ сәрф едәндә ону гијмәтләндирдијимизи ҝөстәририк (Зәб. 1:1—3).

17. Һәгигәтә ујғун јашамаг нә демәкдир? (Јагуб 1:25).

¹⁷ Әлбәттә ки, һәгигәти садәҹә олараг арашдырмаг кифајәт дејил. Биз һәгигәтин хејрини там шәкилдә ҝөрмәк үчүн она ујғун јашамалыјыг, јәни өјрәндикләримизә әмәл етмәлијик. Јалныз бу һалда һәгигәт бизә әсл хошбәхтлик ҝәтирәҹәк. (Јагуб 1:25 ајәсини охујун.) Бәс һәгигәтә ујғун јашадығымызы неҹә билмәк олар? Бир гардаш мәсләһәт ҝөрмүшдү ки, өјрәндикләримиздән нәләрә әмәл етдијимизи вә нәләрә әмәл етмәдијимизи билмәк үчүн өзүмүзү тәһлил едәк. Һәвари Булус бунунла бағлы белә демишди: «Һансы сәвијјәјә чатмышыгса чатаг, ҝәлин бундан сонра да ејни ҹүр ирәлиләјәк» (Филип. 3:16).

18. Нәјә ҝөрә һәгигәт јолунда јеримәк үчүн вар ҝүҹүмүзлә чалышмалыјыг?

¹⁸ Һәгигәт јолунда јеримәк үчүн вар ҝүҹүмүзлә чалышмаг бизә бөјүк немәтләр ҝәтирир! Һәм өз һәјатымыз јахшылыға доғру дәјишир, һәм дә Јеһованын вә диндашларымызын гәлби севинир (Мәс. 27:11; 3 Јәһ. 4). Сизҹә, һәгигәти севмәк вә она ујғун јашамаг үчүн бунлардан ҝөзәл сәбәб ола биләр?