1. Бир чох ҝәнҹләр һансы ҝөзәл наилијјәтләр әлдә едибләр?

 ҺӘР ил минләрлә ҝәнҹ вәфтиз олунур. Әҝәр сиз дә тәзәликҹә вәфтиз олунмусунузса, һәм баҹы-гардашлар, һәм дә Јеһова сизә ҝөрә чох севинир! (Мәс. 27:11). Бир анлыг бу вахта гәдәр нәләрә наил олдуғунуз һагда дүшүнүн. Сиз Мүгәддәс Китабы дәриндән арашдырмысыныз, бәлкә дә, буна бир нечә ил сәрф етмисиниз. Нәтиҹәдә, әмин олмусунуз ки, Мүгәддәс Китаб Аллаһын Кәламыдыр. Ән әсасы исә бу китабын мүәллифини танымысыныз вә Ону севмисиниз. Јеһоваја севҝиниз о гәдәр артды ки, өзүнүзү Она һәср едиб вәфтиз олундунуз. Әһсән сизә!

2. Бу мәгаләдә нә һагда данышаҹағыг?

 ² Шүбһәсиз, вәфтизә гәдәр чохлу сынаглардан кечмисиниз. Амма бөјүдүкҹә јени сынагларыныз олаҹаг. Шејтан чалышаҹаг ки, Јеһоваја мәһәббәтинизи сојутсун, даһа Она ибадәт етмәјәсиниз (Ефес. 4:14). Шејтанын буна наил олмасына имкан вермәјин. Бәс Јеһоваја садиг галмаға вә һәср олунанда вердијиниз сөзүн үстүндә дурмаға сизә нә көмәк едәҹәк? Јериниздә дајанмајын, јеткинлијә доғру ирәлиләјин (Ибр. 6:1). Бәс буну неҹә едә биләрсиниз?

3. Вәфтиздән сонра бүтүн мәсиһиләр нә етмәлидир?

³ Һәвари Булус Ефесдәки мәсиһиләрә ҝөзәл мәсләһәт вермишди, вәфтиздән сонра һәр биримиз бу мәсләһәтә әмәл етмәлијик. О, онлары «јеткин» мәсиһи олмаға тәшвиг етмишди (Ефес. 4:13). Башга сөзлә, онлар руһани инкишафларыны давам етдирмәли идиләр. Булус руһани инкишафы көрпә ушағын инкишафына  бәнзәтмишди. Ушаг дүнјаја ҝәләндә валидејнләр севинир, үрәји фәрәһлә долур. Амма ушаг өмүр боју көрпә гала билмәз, вахт кечдикҹә «ушаға хас ҹәһәтләри гыраға» гојмалыдыр (1 Кор. 13:11). Ејни шеји мәсиһиләр һагда да демәк олар. Вәфтиз олунандан сонра биз руһани ҹәһәтдән инкишаф етмәјә давам етмәлијик. Ҝәлин бу саһәдә бизә көмәк едәҹәк бәзи мәсләһәтләрә нәзәр салаг.

4. Һансы хүсусијјәт руһани ҹәһәтдән инкишаф етмәјинизә көмәк едә биләр? Изаһ един (Филиппилиләрә 1:9).

⁴ Јеһоваја мәһәббәтинизи ҝүҹләндирин. Артыг сизин үрәјиниздә Јеһоваја бөјүк мәһәббәт вар. Амма бу мәһәббәтинизи ҝүҹләндирә биләрсиниз. Буну неҹә етмәк олар? Һәвари Булус Филиппилиләрә 1:9 ајәсиндә бунун бир јолуну ҝөстәрмишди. (Ајәни охујун.) О, дуа едирди ки, филиппилиләрин мәһәббәти «артдыгҹа артсын». Демәли, биз дә мәһәббәтимизи артыра биләрик. Буна «дәгиг билик вә там дәрракә» сајәсиндә наил олмаг олар. Јеһова һагда билијимиз артдыгҹа Она мәһәббәтимиз артыр, хүсусијјәтләрини, ҝөрдүјү ишләри даһа да гијмәтләндиририк. Биз бүтүн гәлбимизлә истәјирик ки, Јеһованы разы салаг, Ону мәјус едәҹәк һәрәкәтә јол вермәјәк. Аллаһын ирадәсини дәрк етмәк вә буна ујғун давранмаг үчүн вар ҝүҹүмүзлә чалышырыг.

5, 6. Јеһоваја мәһәббәтимизи неҹә артыра биләрик? Изаһ един.

⁵ Јеһоваја мәһәббәтимизи артырмаг үчүн Онун Оғлуну даһа јахындан танымалыјыг, чүнки Оғул Атасынын хүсусијјәтләрини мүкәммәл сурәтдә әкс етдирир (Ибр. 1:3). Исаны танымағын ән ҝөзәл јолу дөрд Мүждәни арашдырмагдыр. Әҝәр Мүгәддәс Китабы һәр ҝүн охумағы вәрдиш етмәмисинизсә, бәлкә, елә бу ҝүндән башлајасыныз? Иса һаггында охујанда онун кејфијјәтләринә хүсусилә фикир верин. Инсанлара онун јанында олмаг, онунла данышмаг хош иди; о, балаҹа ушаглары гуҹағына алырды (Марк 10:13—16). Шаҝирдләри онун јанында өзләрини раһат һисс едирдиләр, дүшүнҹәләрини дилә ҝәтирмәјә чәкинмирдиләр (Мәт. 16:22). Бунунла Иса Атасынын хүсусијјәтләрини әкс етдирирди. Јеһова да бизимлә елә мүнасибәт јарадыр ки, Она раһат јахынлашырыг. Дуада бүтүн үрәјимизи Она бошалда билирик. Архајыныг ки, О бизи гынамыр, бизи севир вә бизим гајғымызы чәкир (1 Бут. 5:7).

⁶ Иса инсанлара шәфгәтлә јанашырды. Һәвари Мәтта јазмышды: «Иса ҹамааты ҝөрәндә онларын һалына аҹыды, чүнки бу адамлар чобансыз гојунлар кими јазыг вә дағыныг идиләр» (Мәт. 9:36). Бәс Јеһова һагда нә демәк олар? Иса белә демишди: «Мәним ҝөјдәки Атам бу кичикләрдән бирҹәҹијинин белә мәһв олмасыны истәмир» (Мәт. 18:14). Ҝөрүн Јеһова бизи нә гәдәр чох истәјир! Исаны јахындан таныдыгҹа Јеһоваја мәһәббәтимиз даһа да ҝүҹләнир.

7. Јеткин мәсиһиләрлә үнсијјәт сизә неҹә көмәк едә биләр?

⁷ Јығынҹағыныздакы јеткин баҹы-гардашларла вахт кечирмәк, онлары јахындан танымаг сизә мәһәббәтинизи артырмаға вә бир мәсиһи кими јеткинләшмәјә көмәк едә биләр. Онларын үрәјинин неҹә севинҹ долу олдуғуна фикир верин. Онлар Јеһоваја хидмәти сечдикләри үчүн гәтијјән пешман дејилләр. Онлардан Јеһоваја хидмәт етдикләри илләр әрзиндә јашадыглары мараглы һадисәләри данышмаларыны хаһиш един. Ваҹиб гәрар гаршысында оланда онлардан мәсләһәт истәјин. Ахы  «чохлу мәсләһәтчи олан јердә... уғур ҝәләр» (Мәс. 11:14).

8. Мүгәддәс Китабда јазыланларла бағлы үрәјиниздә шүбһә јаранарса, нә едә биләрсиниз?

⁸ Шүбһәләри арадан галдырын.  Икинҹи абзасда гејд олундуғу кими, Шејтан сизин руһани инкишафыныза әнҝәл олмаға чалышаҹаг. Онун әл атдығы үсуллардан бири сиздә Мүгәддәс Китаб тәлимләринә шүбһә ојатмагдыр. Мәсәлән, ола билсин, ҝәләҹәкдә кимләрсә сизи Јараданын вар олдуғуну тәкзиб едән тәкамүл тәлиминә инандырмаға чалышаҹаг. Бәлкә дә, балаҹа оланда бу һагда һеч дүшүнмүрдүнүз. Амма инди бөјүмүсүнүз вә ола билсин, мәктәбдә сизә тәкамүл барәдә дәрс кечирләр. Мүәллимләринизин тәкамүллә бағлы дедији фикирләр сизә инандырыҹы, мәнтигли ҝәлә биләр. Амма, ола билсин, онлар Јараданын варлығына даир сүбутларын дәринлијинә вармајыблар. Мәсәлләр 18:17 ајәсиндәки принсипи унутмајын: «Биринҹи иддиа галдыран һаглы ҝөрүнәр, та гаршы тәрәф ҝәлиб сорғу-суал едәнәдәк». Мәктәбдә ешитдикләринизи кор-коранә гәбул етмәкдәнсә, јахшы олар ки, Мүгәддәс Китабдакы һәгигәтләри диггәтлә арашдырасыныз. Нәшрләримиздә ахтарыш апарын. Әввәлләр тәкамүлә инанмыш баҹы-гардашларла сөһбәт един *. Бизи севән бир Јараданын олдуғуна нәјә ҝөрә әмин олдугларыны сорушун. Бу кими сөһбәтләр сизи тәшвиг едә биләр ки, Јараданын варлығына даир сүбутлары арашдырасыныз.

9. Мелисанын һадисәсиндән нә өјрәндиниз?

⁹ Мелиса * адлы баҹы јарадылышла бағлы арашдырма апармағын бөјүк хејрини ҝөрүб. О дејир: «Мәктәбдә тәкамүл чох инандырыҹы шәкилдә тәдрис олунур. Әввәл-әввәл мәндә јаранан шүбһәләри боғурдум, горхурдум ки, бирдән арашдырма апарсам, тәкамүлүн доғру олдуғу гәнаәтинә ҝәләрәм. Амма сонра дүшүндүм ки, Јеһова бизим Она кор-коранә ибадәт етмәјимизи истәмир. Буна ҝөрә дә суалларыма ҹаваб ахтармаға башладым. “Гајғыкеш Јарадан мөвҹуддурму?” китабыны, һәмчинин “Һәјат неҹә јараныб?” вә “Һәјатын әмәлә ҝәлмәси. Беш ваҹиб суала ҹаваб” адлы брошүрләри охудум.  Мәнә елә бу лазым имиш. Каш лап әввәлдән арашдырма апарардым».

10, 11. Әхлаги тәмизлијинизи горумаға сизә нә көмәк едә биләр? (1 Салоникилиләрә 4:3, 4).

¹⁰ Јанлыш һәрәкәтләрдән узаг дурун. Јенијетмәлик дөврүндә ҹинси истәкләр ҝүҹлү ола биләр. Бәзән дә кимләрсә ҝәнҹләри ҹинси әхлагсызлыг етмәјә тәһрик едир. Шејтанын мәгсәди одур ки, сиз ҹинси истәкләринизә мәғлуб оласыныз. Бәс әхлагынызы тәмиз сахламаға сизә нә көмәк едә биләр? (1 Салоникилиләрә 4:3, 4 ајәләрини охујун.) Дуада үрәјинизи Јеһоваја бошалдын. Кечирдијиниз һиссләри Она данышын, Ондан ҝүҹ истәјин (Мәт. 6:13). Унутмајын ки, Јеһова сизә ҹәза вермәк јох, көмәк етмәк истәјир (Зәб. 103:13, 14). Мүгәддәс Китабын да сизә бөјүк көмәји дәјә биләр. Әввәлки абзасда ады чәкилән Мелисаја натәмиз фикирләри бејниндән говмаг чох чәтин иди. О дејир: «Мүгәддәс Китабы һәр ҝүн охумаг мәнә бу фикирләрлә мүбаризә апармаға көмәк етди. Охудугларым мәнә хатырлатды ки, мән Јеһоваја мәхсусам вә һәјатда Она еһтијаҹым вар» (Зәб. 119:9).

¹¹ Проблемләринизи тәкбашына һәлл етмәјә чалышмајын. Бу һагда валидејнләринизлә данышын. Дүздүр, бу ҹүр шәхси мәсәләләр һагда данышмаг асан дејил, амма бу, чох ваҹибдир. Мелиса дејир: «Мән дуада Јеһовадан ҹәсарәт истәдим, сонра исә атама проблемими данышдым. Бу сөһбәтдән сонра хејли јүнҝүлләшдим. Билирдим ки, Јеһова мәнимлә гүрур дујур».

12. Дүзҝүн гәрар вермәјә сизә нә көмәк едә биләр?

¹² Мүгәддәс Китаб принсипләрини әлдә рәһбәр тутун. Валидејнләриниз тәдриҹән сизә сәрбәст гәрарлар вермәјә иҹазә верәҹәкләр. Амма сизин һәјат тәҹрүбәниз јенә дә чох дејил. Бәс Јеһова илә достлуғунуза мәнфи тәсир едәҹәк һәрәкәтләри етмәмәјә сизә нә көмәк едә биләр? (Мәс. 22:3). Ҝөрүн Кари адлы баҹыја дүзҝүн гәрарлар вермәјә нә көмәк едиб. О баша дүшдү ки, јеткин мәсиһијә һәр аддымы үчүн ганун лазым дејил. Кари дејир: «Анладым ки, мән садәҹә ганунлары јох, Мүгәддәс Китаб принсипләрини баша дүшмәлијәм». Мүгәддәс Китабы охујаркән өзүнүзә нөвбәти суаллары верин: «Бу һадисәдән Јеһова һагда нә өјрәнирәм? Дүзҝүн гәрар вермәјимә көмәк едәҹәк һансыса принсипләр вар? Әҝәр варса, онлары тәтбиг етмәјимин мәнә һансы хејри олаҹаг?» (Зәб. 19:7; Әшј. 48:17, 18). Мүгәддәс Китабы охумағын вә орадакы принсипләрин үзәриндә дүшүнмәјин сајәсиндә Јеһоваја хош ҝедәҹәк гәрарлар вермәк сизә даһа асан олаҹаг. Бир мәсиһи кими јеткинләшдикҹә Јеһованын дүшүнҹә тәрзини дәрк едәҹәксиниз вә ҝөрәҹәксиниз ки, һәр вәзијјәтә даир гануна еһтијаҹ јохдур.

13. Јахшы достларын сизә һансы көмәји дәјә биләр? (Мәсәлләр 13:20).

¹³ Јеһованы севәнләрлә достлуг един. Гејд олундуғу кими, кимләрлә достлуг етмәјиниз мәсиһи кими инкишафынызда бөјүк рол ојнајаҹаг. (Мәсәлләр 13:20 ајәсини охујун.) Сара адлы баҹы хидмәтдә севинҹини итирирди. Ҝөрүн она јенидән Јеһоваја ибадәтдә севинҹ дујмаға нә көмәк етди. Сара дејир: «Мән дүз вахтында ҝөзәл достлар тапдым. Бир ҝәнҹ баҹы илә бирликдә һәр һәфтә “Ҝөзәтчи гүлләси”ни арашдырырдыг. Диҝәр рәфигәмин көмәји илә јығынҹагда шәрһләр вермәјә башладым. Онларын көмәји сајәсиндә мән фәрди  мүталиәјә вә дуаја даһа чох өнәм вердим. Јеһова илә достлуғум мөһкәмләнди вә јенидән севинҹ дујдум».

14. Жүлјен гардаш јахшы достлары неҹә тапды?

¹⁴ Бәс сизә јахшы тәсир едәҹәк достлары неҹә тапа биләрсиниз? Һал-һазырда ағсаггал кими хидмәт едән Жүлјен дејир: «Ҝәнҹ оланда тәблиғ етдијим әмәкдашларымла достлашдым. Онлар чох шөвглү идиләр, мәнә хидмәтин неҹә мәмнунлуг ҝәтирдијини ҝөрмәјә көмәк етдиләр. Мән гаршыма тамвахтлы хидмәт етмәји мәгсәд гојдум. Һәмчинин баша дүшдүм ки, анҹаг өз јашыдларымла отуруб-дурмагла ҝөзәл вә мараглы достлуглардан өзүмү мәһрум едирәм. Сонралар Бејтелдә дә јахшы достлуглар гурдум. Онларын нүмунәси мәнә әјләнҹә сечиминдә даһа диггәтли олмаға көмәк етди. Бунун сајәсиндә Јеһоваја даһа да јахынлашдым».

15. Булус Тимутијә достлугла бағлы һансы мәсләһәти вермишди? (2 Тимутијә 2:20—22).

¹⁵ Ола билсин, ҝөрүрсүнүз ки, јығынҹагда достлуг етмәк истәдијиниз инсан сизә пис тәсир едә биләр. Онда нә едәҹәксиниз? Һәвари Булус билирди ки, биринҹи әсрдә јығынҹагда бәзиләри мәсиһијә ујғун давранмыр. Она ҝөрә дә Тимутијә мәсләһәт ҝөрмүшдү ки, онлардан узаг дурсун. (2 Тимутијә 2:20—22 ајәләрини охујун.) Јеһова илә достлуғумуз чох гијмәтлидир. Бөјүк зәһмәтлә гурдуғумуз бу мүнасибәтләри киминсә зәифләтмәсинә јол вермәмәлијик (Зәб. 26:4).

16. Гаршыныза нә ҹүр мәгсәдләр гојмалысыныз?

¹⁶ Дәјәрли мәгсәдләр гојун. Елә мәгсәдләр гојун ки, иманынызы мөһкәмләндирсин вә јеткинләшмәјинизә көмәк етсин (Ефес. 3:16). Мәсәлән, гәрар верә биләрсиниз ки, фәрди мүталиәјә вә Мүгәддәс Китабы охумаға мүнтәзәм олараг вахт ајырасыныз (Зәб. 1:2, 3). Бәлкә дә, дуаларынызын сајыны артырмаг вә даһа да долғунлашдырмаг лазымдыр. Јахуд да әјләнҹә сечиминдә вә она сәрф етдијиниз вахт мәсәләсиндә өзүнүзә даһа чох һаким олмалысыныз (Ефес. 5:15, 16). Јеткинлијә доғру ҹан атмағыныз Јеһованын гәлбини севиндирәҹәк.

17. Башгаларына көмәк етмәклә өзүнүзә неҹә көмәк етмиш олурсунуз?

 ¹⁷ Башгаларына көмәк етмәк јеткинләшмәјиниздә бөјүк рол ојнајыр. Иса демишди: «Вермәк алмагдан даһа чох хошбәхтлик ҝәтирир» (Һәв. 20:35). Сиз вахтынызы вә ҝәнҹлик ҝүҹүнүзү башгаларына көмәјә сәрф етсәниз, өзүнүз дә хејир ҝөрәҹәксиниз. Мәсәлән, гаршыныза мәгсәд гоја биләрсиниз ки, јығынҹағыныздакы јашлы, хәстә баҹы-гардашлара дајаг оласыныз. Онлара ев ишләриндә көмәк едә биләрсиниз, јахуд електрон ҹиһаздан истифадә етмәји өјрәдә биләрсиниз. Гардашлар диндашларына көмәк етмәк үчүн јығынҹаг хидмәтчиси олмаға ҹан ата биләрләр (Филип. 2:4). Хош мүждәни тәблиғ етмәклә исә јығынҹагдан кәнардакы инсанлара мәһәббәт ҝөстәрмиш олаҹагсыныз (Мәт. 9:36, 37). Мүмкүндүрсә, һансыса тамвахтлы хидмәт нөвүнү мәгсәд гојун.

18. Тамвахтлы хидмәт инкишафыныза неҹә көмәк едә биләр?

¹⁸ Тамвахтлы хидмәтә башласаныз, бир мәсиһи кими јеткинләшмәк үчүн чохлу имканыныз олаҹаг. Өнҹүл хидмәти Падшаһлыг Мүждәчиләри Мәктәбиндә охумаг үчүн гаршынызда гапы ачыр. Һәмчинин Бејтелдә вә ја тикинти лајиһәләриндә хидмәт едә биләрсиниз. Кејтлин адлы ҝәнҹ өнҹүл баҹы дејир: «Тәҹрүбәли баҹы-гардашларла хидмәтдә әмәкдашлыг етмәк вәфтиздән сонра инкишаф етмәјимдә бөјүк рол ојнады. Онларын нүмунәси мәни тәшвиг етди ки, Мүгәддәс Китаб биликләрими дәринләшдирим вә мүәллимлик габилијјәтими артырым».

19. Јеткинлијә доғру ирәлиләмәк сизә һансы немәтләри ҝәтирәҹәк?

¹⁹ Јеткинлијә доғру ирәлиләдикҹә чохлу немәтләр алаҹагсыныз. Бунун сајәсиндә ҝәнҹлијинизи бош мәгсәдләрә һәдәр етмәјәҹәксиниз (1 Јәһ. 2:17). Јанлыш гәрарларын ҝәтирдији гәлб ағрысыны јашамајаҹагсыныз. Әксинә, һәјатда ҝерчәк уғура наил олаҹагсыныз вә әсл хошбәхтлик дујаҹагсыныз (Мәс. 16:3). Сизин ҝөзәл нүмунәниз һәм ҝәнҹ, һәм дә јашлы диндашларынызы руһландыраҹаг (1 Тим. 4:12). Ән әсасы исә Јеһованы разы салдығыныз вә Онунла мөһкәм достлуға саһиб олдуғунуз үчүн гәлбиниз сүлһ вә мәмнунлугла долаҹаг (Мәс. 23:15, 16).