1. Пејғәмбәрликләри арашдырмағы неҹә севә биләрик?

 ПЕЈҒӘМБӘРЛИКЛӘР. Онлары арашдырмаг хошунуза ҝәлир? Бен адлы ҝәнҹ гардаш дејир: «Пејғәмбәрликләри арашдырмағы чох хошлајырам». Онунла разысыныз? Јохса бунун чәтин олдуғуну дүшүнүрсүнүз? Бәлкә, бу сизә ҹансыхыҹы ҝәлир? Билсәниз ки, Јеһова Мүгәддәс Китаба пејғәмбәрликләри нәјә ҝөрә јаздырыб, фикриниз дәјишәр.

2. Бу мәгаләдә нә һагда данышаҹағыг?

² Бу мәгаләдә өјрәнәҹәјик ки, пејғәмбәрликләри нәјә ҝөрә вә неҹә арашдырмаг лазымдыр. Даһа сонра Дәнјалын јаздығы ики пејғәмбәрлијә нәзәр салаҹағыг вә ҝөрәҹәјик ки, онлары баша дүшмәк бизә нәдә көмәк едә биләр.

3. Мүгәддәс Китабдакы пејғәмбәрликләри баша дүшмәк үчүн нә етмәлијик?

³ Пејғәмбәрликләри баша дүшмәк үчүн көмәјә еһтијаҹымыз вар. Белә бир нүмунәјә бахаг: Тутаг ки, сиз һеч вахт олмадығыныз бир јерә ҝетмисиниз. Амма јаныныздакы достунуз һәмин әразиләри јахшы таныјыр. О билир ки, сиз инди һарадасыныз вә һансы јол һара апарыр. Јәгин, онунла јола чыхдығыныза ҝөрә севинәрсиниз. Јеһова да белә бир достдур. О, һансы заман кәсијиндә јашадығымызы вә гаршыда бизи нәләрин ҝөзләдијини јахшы билир. Буна ҝөрә дә пејғәмбәрликләри баша дүшмәк үчүн Ондан көмәк истәмәлијик (Дән. 2:28; 2 Бут. 1:19, 20).

4. Нәјә ҝөрә Јеһова Өз Кәламына пејғәмбәрликләр јаздырыб? (Әрәмја 29:11). (Һәмчинин шәклә бахын.)

⁴ Һәр бир валидејн истәјәр ки, ушагларынын ҝөзәл ҝәләҹәји олсун. Јеһова да буну истәјир. (Әрәмја 29:11 ајәсини охујун.) Амма инсанлардан фәргли олараг, Јеһова ҝәләҹәјимизин  неҹә олаҹағыны дәгигликлә дејә биләр. Баш верәҹәк ваҹиб һадисәләри бизим дә билмәјимиз үчүн Јеһова Кәламына пејғәмбәрликләр јаздырыб (Әшј. 46:10). Онлар Јеһованын бизә севәрәк вердији бир һәдијјәдир. Бәс Мүгәддәс Китабдакы пејғәмбәрликләрин доғрудан да ҝерчәкләшәҹәјинә неҹә әмин ола биләрик?

5. Ҝәнҹләр Максдан нә өјрәнә биләр?

⁵ Мәктәбдә ҝәнҹ мәсиһиләрин әтрафындакы әксәр ушаглар Мүгәддәс Китаба мәһәл гојмур. Онларын дедикләри вә һәрәкәтләри бу ҝәнҹләрин үрәјинә шүбһә сала биләр. Белә бир шеј Макс адлы гардашла да баш вермишди. О дејир: «Мәктәбдә охујан вахт валидејнләримин мәнә һәгиги дини өјрәтдијинә вә Мүгәддәс Китабын Аллаһдан олдуғуна шүбһә етмәјә башладым». Бәс валидејнләри буна неҹә јанашды? «Онлар буну сакит гаршылады, һалбуки билирдим ки, чох нараһатдырлар»,— дејә Макс бөлүшүр. Валидејнләри онун суалларына Мүгәддәс Китабдан ҹаваб вердиләр. Макс да өз тәрәфиндән бәзи шејләр етди. О дејир: «Мүгәддәс Китабдакы пејғәмбәрликләри өзүм дә арашдырмаға башладым вә өјрәндикләрими јығынҹагдакы ҝәнҹләрлә мүзакирә етдим. Бундан сонра әмин олдум ки, Мүгәддәс Китабда јазыланлар Аллаһдандыр».

6. Шүбһәләриниз варса, нә етмәлисиниз вә нәјә ҝөрә?

⁶ Әҝәр сиз дә Макс кими Мүгәддәс Китабда јазыланларын һәгигәт олдуғуна шүбһә едирсинизсә, өзүнүзү гынамајын. Амма шүбһәләрин гаршысыны алмаг үчүн дәрһал тәдбир ҝөрүн. Шүбһә пас кимидир. Әҝәр пасланмағын гаршысыны алмасаг, о, дәјәрли бир шеји јарарсыз һала сала биләр. Иманынызы пасландыран шүбһәләри арадан галдырмаг үчүн бу суал үзәриндә дүшүнмәлисиниз: «Мүгәддәс Китабда ҝәләҹәклә бағлы дејиләнләрә инанырам?» Әҝәр буна там әмин дејилсинизсә, јахшы олар ки, јеринә јетмиш пејғәмбәрликләри арашдырасыныз. Бәс буну неҹә едә биләрсиниз?

7. Дәнјал пејғәмбәрликләри неҹә арашдырырды? (Дәнјал 12:10). (Һәмчинин шәклә бахын.)

⁷ Мүгәддәс Китабда јазылан пејғәмбәрликләри неҹә арашдырмаг лазымдыр? Бу саһәдә Дәнјал ҝөзәл нүмунәдир. О, пејғәмбәрликләри дүзҝүн нијјәтлә — һәгигәти билмәк мәгсәди илә арашдырырды. Һәмчинин Дәнјал тәвазөкар иди, баша дүшүрдү ки, Јеһова Она јахын олан вә Она итаәт едән инсанлара пејғәмбәрликләри дәрк етмәјә көмәк едәҹәк (Дән. 2:27, 28; Дәнјал 12:10 ајәсини охујун). О, көмәк үчүн Јеһоваја үз тутмагла тәвазөкар олдуғуну ҝөстәрмишди (Дән. 2:18). Бундан әлавә, Дәнјал охудугларынын дәринлијинә варырды. О, Мүгәддәс Китабын һәмин вахт мөвҹуд олан һиссәләрини арашдырырды (Әрм. 25:11, 12; Дән. 9:2). Сиз онун нүмунәсини неҹә изләјә биләрсиниз?

8. Нәјә ҝөрә бәзиләри пејғәмбәрликләрин јеринә јетдијинә инанмаг истәмир? Бәс биз нә етмәлијик?

⁸ Нијјәтинизи јохлајын. Пејғәмбәрликләри һәгигәти билмәк истәдијиниз үчүн  арашдырырсыныз? Әҝәр беләдирсә, Јеһова сизә көмәк едәҹәк (Јәһ. 4:23, 24; 14:16, 17). Амма әфсуслар олсун ки, бәзиләри Мүгәддәс Китабдакы пејғәмбәрликләри башга нијјәтлә арашдырыр. Онлар үмид едирләр ки, Мүгәддәс Китабын Аллаһдан олмадығыны ҝөстәрән дәлилләр тапаҹаглар, бунунла да нәјин јахшы, нәјин пис олдуғуна өзләринин гәрар вермәсинә һагг газандыра биләҹәкләр. Лакин арашдырманы дүзҝүн нијјәтлә етмәк лазымдыр. Бундан әлавә, пејғәмбәрликләри баша дүшмәк үчүн биздә бир ваҹиб хүсусијјәт олмалыдыр.

9. Пејғәмбәрликләри баша дүшмәк үчүн һансы хүсусијјәт лазымдыр? Изаһ един.

⁹ Тәвазөкар олун. Јеһова тәвазөкар инсанлара көмәк едәҹәјинә сөз верир (Јаг. 4:6). Она ҝөрә дә пејғәмбәрликләри баша дүшмәк үчүн Ондан көмәк истәмәлијик. Һәмчинин тәвазөкарыгса, гәбул едәҹәјик ки, садиг нөкәрин көмәјинә дә еһтијаҹымыз вар. Ахы Јеһова онлары бизә вахтлы-вахтында руһани гида вермәк үчүн тәјин едиб (Лука 12:42). Јеһова низам-интизам Аллаһыдыр. Она ҝөрә дә мәнтиглидир ки, Кәламдакы һәгигәтләри баша дүшмәјимиз үчүн бир мәнбәдән истифадә едәр (1 Кор. 14:33; Ефес. 4:4—6).

10. Естерин нүмунәсиндән нә өјрәнирсиниз?

¹⁰ Дәринлијә варын. Сизә мараглы ҝәлән пејғәмбәрлији арашдырмагдан башлаја биләрсиниз. Естер баҹы белә дә етмишди. Онун үчүн Мәсиһин ҝәлиши илә бағлы пејғәмбәрликләр мараглы иди. Естер дејир: «15 јашымда бу пејғәмбәрликләрин һәгигәтән дә Исадан әввәл јазылдығыны ҝөстәрән сүбутлары ахтармаға башладым». Өлү дәниз әлјазмалары һагда охудуглары ону буна әмин етди. Естер гејд едир: «Онлардан бәзиләри Исанын јашадығы дөврдән әввәл јазылмышды. Демәли, орада јазылан пејғәмбәрликләр Аллаһдандыр». Естер билдирир ки, онлары баша дүшмәк үчүн дәфәләрлә охумалы олса да, бу әзијјәти чәкмәјә дәјди. О, Мүгәддәс Китабдакы бир сыра пејғәмбәрликләри арашдырдыгдан сонра белә демишди: «Инди Мүгәддәс Китабда јазыланларын һәгигәт олдуғу мәнә ҝүн кими ајдындыр».

11. Мүгәддәс Китабын һәгигәт олдуғуна әмин олмаг бизә нәдә көмәк едир?

¹¹ Артыг бәзи пејғәмбәрликләрин неҹә јеринә јетдијини ҝөрәндә Јеһоваја вә Ондан алдығымыз ҝөстәришләрә етибарымыз мөһкәмләнир. Мүгәддәс Китабда ҝәләҹәјә даир дә пејғәмбәрликләр вар. Онлар көмәк едир ки, проблемләримизә бахмајараг, үмидимизи итирмәјәк. Ҝәлин Дәнјалын јаздығы ики пејғәмбәрлијә гысаҹа нәзәр салаг. Онлар һал-һазырда јеринә јетир. Бу пејғәмбәрликләри баша дүшмәк бизә һикмәтли гәрарлар вермәјә көмәк едәҹәк.

12. Дәмирлә ҝилин гарышығындан олан ајаглар нәји тәмсил едир? (Дәнјал 2:41—43).

¹² Дәнјал 2:41—43 ајәләрини охујун. Навуходоносор падшаһын јухуда ҝөрдүјү  һејкәлин ајаглары дәмирлә јумшаг ҝилин гарышығындан иди. Бу пејғәмбәрлији «Дәнјал» вә «Вәһј» китабындакы диҝәр пејғәмбәрликләрлә тутушдуранда белә гәнаәтә ҝәлирик ки, ајаглар дүнјанын апарыҹы дөвләтләри олан Бөјүк Британија илә Бирләшмиш Штатлары тәмсил едир. Дәнјал пејғәмбәр бу иттифаг барәдә демишди ки, о, «гисмән мөһкәм, гисмән көврәк» олаҹаг. Бәс нәјә ҝөрә гисмән көврәк? Чүнки о, садә халга (јумшаг ҝилә) ҝөрә там ҝүҹү илә фәалијјәт ҝөстәрә билмир b.

13. Дәнјалын пејғәмбәрлији бизә һансы ваҹиб һәгигәтләри ачыглајыр?

¹³ Нәһәнҝ һејкәлдән, әсас да онун ајаг һиссәсиндән ваҹиб дәрсләр өјрәнирик. Биринҹиси, Бөјүк Британија илә Бирләшмиш Штатлар гүдрәтли бир иттифаг олдуғуну сүбут едиб. Мәсәлән, Биринҹи вә Икинҹи Дүнја мүһарибәсиндә онлар галиб ҝәлән дөвләтләрин сырасында иди. Лакин вәтәндашлары арасында ҝедән дахили чәкишмәләрә ҝөрә бу дөвләтләр зәифләјиб вә зәифләмәјә давам едир. Икинҹиси, Аллаһын Падшаһлығы бүтүн инсан һөкумәтләринә сон гојмаздан әввәл Бөјүк Британија илә Бирләшмиш Штатлар һакимијјәт сүрән сон гүдрәтли дөвләтләр олаҹаг. Һәтта ара-сыра башга дөвләтләр бу иттифага гаршы чыхса да, ону әвәз етмәјә мүвәффәг олмајаҹаг. Буну һарадан билирик? Чүнки Аллаһын Падшаһлығыны тәмсил едән «даш» һејкәлин ајаг һиссәсини мәһв едәҹәк. Ајаглар исә гејд олундуғу кими, Бөјүк Британија илә Бирләшмиш Штатлары тәмсил едир (Дән. 2:34, 35, 44, 45).

14. Дәмир вә ҝил ајагларла бағлы пејғәмбәрлији баша дүшмәк гәрарларымыза неҹә тәсир едәҹәк?

¹⁴ Дәнјалын дәмирлә ҝил ајаглар барәдә олан пејғәмбәрлијинин һәгигәт олдуғуна әминсиниз? Бу сизин һәјат тәрзиниздән ҝөрүнәҹәк. Сиз тезликлә мәһв олаҹаг бу дүнјада маддијјат далынҹа гачмајаҹагсыныз (Лука 12:16—21; 1 Јәһ. 2:15—17). Тәблиғ етмәјин, шаҝирд һазырламағын ваҹиблијини јадда сахлајаҹагсыныз (Мәт. 6:33; 28:18—20). Гысаҹа олараг Дәнјалын бу пејғәмбәрлијини арашдырдыг. Инди исә нөвбәти суаллар васитәсилә өзүнүзү јохлајын: «Аллаһын Падшаһлығынын тезликлә бүтүн инсан һөкумәтләринә сон гојаҹағына әминәм? Бу, вердијим гәрарлардан ҝөрүнүр?»

15. Бу ҝүн «шимал падшаһы» вә «ҹәнуб падшаһы» кимдир? (Дәнјал 11:40).

¹⁵ Дәнјал 11:40 ајәсини охујун. «Дәнјал» китабынын 11-ҹи фәслиндә ики падшаһдан, јахуд сијаси гүввәдән данышылыр. Онлар дүнјаја һөкмранлыг етмәк уғрунда бир-бири илә чарпышыр. Бу пејғәмбәрлији Мүгәддәс Китабдакы диҝәр пејғәмбәрликләрлә тутушдуранда белә гәнаәтә ҝәлирик ки, «шимал падшаһы» Русија вә онун мүттәфигләри, «ҹәнуб падшаһы» исә Бөјүк Британија илә Бирләшмиш Штатлардыр c.

16. «Шимал падшаһы» Аллаһын халгы илә неҹә рәфтар едир?

¹⁶ «Шимал падшаһы» онун һакимијјәти алтында јашајан Аллаһын халгыны тәгиб едир. Јеһованын Шаһидләриндән бәзиләри иманларына ҝөрә дөјүлүр вә һәбсә атылыр. Амма «шимал падшаһы»нын етдикләри онлары горхуја салмыр, әксинә, иманларыны мөһкәмләндирир. Чүнки онлар  билир ки, Дәнјал бу тәгибләрин олаҹағыны пејғәмбәрлик етмишди d (Дан. 11:41). Буну билмәк бизә көмәк едир ки, үмидимизи мөһкәм сахлајаг вә Јеһоваја садиг галаг.

17. «Ҹәнуб падшаһы»нын һакимијјәти алтында јашајан Аллаһын хидмәтчиләринин үзләшдији сынаглар һансылардыр?

¹⁷ Кечмишдә «ҹәнуб падшаһы» да Јеһованын халгыны тәгиб едиб. Мәсәлән, Биринҹи вә Икинҹи Дүнја мүһарибәси заманы хејли гардашымыз мүһарибәјә ҝетмәкдән имтина етдијинә ҝөрә һәбс олунмушду, һәмчинин бәзи ушаглар бајраға тәзим етмәдикләринә ҝөрә мәктәбдән говулмушду. Сон он илликләр әрзиндә исә бу падшаһын һакимијјәти алтында јашајан Јеһованын хидмәтчиләри ҝизли бир тәһлүкә илә үзләшир. Мәсәлән, ола биләр ки, сечкиләр заманы мәсиһи һансыса сијаси партијанын вә ја намизәдин тәрәфини тутмаг истәсин. О, сәсвермәдә иштирак етмәсә дә, ола билсин, үрәјиндә һансынынса галиб ҝәлмәсини  арзуласын. Доғрудан да, тәкҹә әмәлдә јох, фикримиздә вә үрәјимиздә дә битәрәф галмаг чох ваҹибдир! (Јәһ. 15:18, 19; 18:36).

18. «Шимал падшаһы» илә онун рәгиби арасындакы чәкишмәјә неҹә јанашмалыјыг? (Һәмчинин шәклә бахын.)

¹⁸ Мүгәддәс Китабдакы пејғәмбәрликләрә инанмајан инсанлар «ҹәнуб падшаһы» илә «шимал падшаһы»нын чәкишдијини ҝөрәндә бәрк нараһат олурлар (Дән. 11:40). Һәр ики падшаһ дүнјаны мәһв етмәк үчүн јетәринҹә нүвә силаһына саһибдир. Амма билирик ки, Јеһова һеч вахт гојмаз ки, белә бир шеј баш версин (Әшј. 45:18). Буна ҝөрә дә бу ики падшаһ арасындакы дүшмәнчилик бизи горхуја салмыр, әксинә иманымызы мөһкәмләндирир. Бу, сүбут едир ки, Шејтан дүнјасынын сонуна аз галыб.

19. Пејғәмбәрликләрлә бағлы нәји дәрк етмәлијик?

¹⁹ Биз бәзи пејғәмбәрликләрин неҹә јеринә јетәҹәјини билмирик. Һеч Дәнјал пејғәмбәр дә јаздығы һәр шејин мәнасыны там баша дүшмүрдү (Дән. 12:8, 9). Бунунла белә, пејғәмбәрлијин неҹә јеринә јетәҹәјини билмириксә, бу о демәк дејил ки, о, јеринә јетмәјәҹәк. Әмин ола биләрик ки, кечмишдә олдуғу кими инди дә Јеһова мәсләһәт билдији вахтда лазым олан һәр шеји бизә ачыглајаҹаг (Амс. 3:7).

20. Тезликлә һансы пејғәмбәрликләр јеринә јетәҹәк вә биз нә етмәлијик?

²⁰ Гаршыда һансы пејғәмбәрликләр јеринә јетәҹәк? «Сүлһ вә тәһлүкәсизлик» бәјанаты вериләҹәк (1 Салон. 5:3). Даһа сонра дүнјанын сијаси гүввәләри јалан динә һүҹум едиб ону мәһв едәҹәк (Вәһј 17:16, 17). Бундан сонра онлар Аллаһын халгына һүҹум едәҹәк (Һизг. 38:18, 19). Бу һадисәләр Армаҝеддон адланан сонунҹу мүһарибәјә ҝәтириб чыхараҹаг (Вәһј 16:14, 16). Әминликлә дејә биләрик ки, бүтүн бунлар јахын заманларда баш верәҹәк. О вахта гәдәр исә ҝәлин Мүгәддәс Китабдакы пејғәмбәрликләрә диггәт кәсиләк вә башгаларына да бу саһәдә көмәк едәк. Бунунла сәмави Атамыза миннәтдар олдуғумузу ҝөстәрәҹәјик.