• «Мәндә елә һисс јаранырды ки, әрим һәр дәфә мәнә хәјанәт едир».

• «Өзүмү алчалмыш, чиркин, дәјәрсиз һисс едирдим».

• «Бу барәдә һеч кимлә даныша билмирдим. Сакитҹә әзаб чәкирдим».

• «Мәнә елә ҝәлирди ки, Јеһованын веҹинә дејиләм».

Бу сөзләр ҝөстәрир ки, әр порнографијаја баханда гадын нә гәдәр әзаб чәкир. Үстәлик, әҝәр әр буну хәлвәтдә ајларла, һәтта илләрлә едибсә, гадына бундан сонра әринә етибар етмәк чәтин ола биләр. Бир гадын демишди: «Мәнә елә ҝәлирди ки, индијә кими әрими танымамышам. Бәлкә, мәндән ҝизләтдији башга шејләр дә вар?»

Бу мәгалә порнографијаја бахан кишиләрин арвадлары үчүн һазырланыб a. Мәгаләдә онлара тәскинлик верәҹәк Мүгәддәс Китаб принсипләри јер алыр. Һәмчинин бу мәгалә онлары Јеһованын мәһәббәтинә, дәстәјинә әмин едәҹәк, онлара емосионал вә руһани ҹәһәтдән дирчәлмәјә көмәк едәҹәк b.

Сиз әринизин һәр аддымыны нәзарәт алтында сахлаја билмәзсиниз. Амма бәзи мәсләһәтләр сизә нараһатлығынызы азалтмаға вә гәлб раһатлығы дујмаға көмәк едә биләр. Ҝәлин бу мәсләһәтләрин бәзиләринә нәзәр салаг.

Өзүнүзү ҝүнаһландырмајын. Әри порнографијаја бахырса, гадын сәһви өзүндә ҝөрә биләр. Алисә c елә ҝәлирди ки, бир гадын кими ҝөзәҝәлимли дејил. О белә фикирләширди: «Јохса әрим нијә мәни гојуб башга гадынлара бахсын?» Бәзи гадынлар исә өзләрини вердикләри реаксијаја ҝөрә ҝүнаһландырырлар, дүшүнүрләр ки, бунунла вәзијјәти даһа да гәлизләшдирирләр. Данјела дејир: «Өзүмү гәзәби илә аиләсини дағыдан аҹыглы бир гадын кими ҝөрүрдүм».

Әҝәр сиз дә ејни һиссләри кечирирсинизсә, билин ки, Јеһова әринизин һәрәкәтинә ҝөрә сизин ҹавабдеһ олдуғунузу дүшүнмүр. Јагуб 1:14 ајәсиндә дејилир: «Һәр кәс өз нәфси илә товланыб алданараг сынаныр» (Ром. 14:12; Филип. 2:12). Јеһова сизи ҝүнаһландырмыр,  әксинә, Она сәдагәтинизи гијмәтләндирир (2 Салн. 16:9).

Бир шеји баша дүшмәк лазымдыр ки, әҝәр әр порнографијаја бахырса, бу о демәк дејил ки, арвады бир гадын кими јарарсыздыр. Бу мөвзу илә бағлы мүтәхәссисләр гејд едир ки, порнографијанын јаратдығы шәһвәт һиссини һеч бир гадын тәмин едә билмәз.

Һәдсиз нараһатлыг кечирмәјин. Катерина дејир ки, ҝеҹә-ҝүндүз әринин порнографијаја бахмасы һагда дүшүнүрдү. Франчес дә буна охшар фикирләр дејир: «Әримин һарада олдуғуну билмәјәндә фикир мәни ҝөтүрүр. Бүтүн ҝүнү әсәб кечирирәм». Бәзи баҹылар мүәјјән диндашларынын јанында сыхылыр, чүнки ола билсин, бу диндашлары јолдашынын проблемини билир. Башга баҹылар исә өзләрини тәнһа һисс едирләр. Онлара елә ҝәлир ки, һеч ким онларын вәзијјәтини баша дүшмүр.

Бу ҹүр һиссләр кечирмәк тәбиидир. Амма бүтүн ҝүнү бу барәдә дүшүнмәклә өзүнүзү даһа да тәлаша салаҹагсыныз. Онданса фикринизи Јеһова илә мүнасибәтинизә ҹәмләјин. Бу сизи ҝүҹлү едәҹәк (Зәб. 62:2; Ефес. 6:10).

Сизә бир шеј дә көмәк едә биләр: Мүгәддәс Китабдакы нүмунәләри охуја биләрсиниз. Орада дәрдли гадынларын Јеһоваја дуа едиб тәскинлик тапмасы барәдә јазылыб. Јеһова онларын проблемини һәмишә арадан галдырмаса да, үрәкләринә тохтаглыг верирди. Мәсәлән, «Һәннә чох кәдәрли иди». Амма «о, Јеһоваја хејли дуа етди» вә бундан сонра гәлб раһатлығы тапды. Һалбуки вәзијјәтинин бундан сонра неҹә олаҹағыны билмирди (1 Ишм. 1:10, 12, 18; 2 Кор. 1:3, 4).

Һәмчинин ағсаггаллардан көмәк истәјин. Онлар сизин үчүн «күләкдән далдаланаҹаг, лејсандан сығынаҹаг» олаҹаг (Әшј. 32:2). Бәлкә дә онлар сизә һансыса етибарлы баҹыны мәсләһәт ҝөрәҹәк. Она дәрдинизи данышыб тәсәлли тапа биләрсиниз (Мәс. 17:17).

Әринизә порнографија вәрдишинә үстүн ҝәлмәјә көмәк етмәк сиздә алынар? Бәлкә дә алынар. Мүгәддәс Китабда дејилир ки, һансыса проблеми һәлл етмәк вә ја ҝүҹлү дүшмәнә үстүн ҝәлмәк үчүн «ики нәфәр бир нәфәрдән јахшыдыр» (Ваиз 4:9—12). Арашдырмалар ҝөстәрир ки, јолдашынын бу асылылыгдан гуртулмасы үчүн әр-арвадын бирҝә чалышмасы чох вахт јахшы нәтиҹәләр верир вә аиләдә јенидән етибар јараныр.

 Әлбәттә ки, чох шеј јолдашынызын өзүндән асылыдыр. О бу вәрдиши тәрҝитмәк истәјир? Бунун үчүн әлиндән ҝәләни етмәјә һазырдыр? Јеһоваја јалварыб Ондан ҝүҹ диләјир? Көмәк үчүн ағсаггаллара јахынлашыр? (2 Кор. 4:7; Јаг. 5:14, 15). Порнографијаја бахмамаг үчүн һансыса тәдбирләр ҝөрүб? Мәсәлән, електрон ҹиһазлардан истифадәсинә мәһдудијјәт гојур? Ону порнографијаја бахмаға ширникләндирән вәзијјәтләрдән узаг олур? (Мәс. 27:12). Көмәјинизи гәбул етмәјә, сизә гаршы тамамилә дүрүст олмаға һазырдыр? Әҝәр еләдирсә, она көмәк едә биләрсиниз.

Неҹә? Бир нүмунәјә бахаг. Фелиша адлы баҹынын әри Итан ушаглыгдан порнографија алудәчисидир. Фелиша елә шәраит јарадыр ки, әриндә порнографијаја бахмаг истәји јарананда өз һиссләрини Фелишаја раһат дејә билир. Итан бөлүшүр: «Јолдашымла ачыг данышырам. Сағ олсун, мәнә көмәк едир ки, өзүмә мүәјјән сәрһәдләр гојум вә тез-тез мәнимлә марагланыр. Һәмчинин мәнә интернетдән нә гәдәр, һарада истифадә едәҹәјимә нәзарәт етмәјә көмәк едир». Әлбәттә ки, әринин порнографија асылылығы Фелишанын гәлбини јаралајыр, амма о дејир: «Һирсләнмәјимин, пис олмағымын нә мәнасы? Бу ки әримә бу бәладан гуртулмаға көмәк етмәјәҹәк. Јолдашымла онун чәтинлији һагда данышырыг, бундан сонра она өз һиссләрими раһат дејә билирәм, о да өз һәрәкәти илә мәни инҹитмәмәјә даһа гәтијјәтли олур».

Бу ҹүр сөһбәтләр әрә порнографијадан узаг олмаға көмәк етмәклә јанашы, гадына да јенидән әринә етибар етмәјә көмәк едир. Чүнки әр өз зәифлији, һара ҝетдији, нә ишлә мәшғул олдуғу һагда арвады илә ачыг данышанда арада ҝизли бир шеј дә галмыр вә арвадын она етибары јараныр.

Бәс сиз дә ејни тәрздә јолдашыныза көмәк едә биләрсиниз? Онда, бәлкә, бу мәгаләни бирликдә охујуб мүзакирә едәсиниз? Јолдашыныз мәгсәд гојаҹаг ки, порнографијадан гуртулсун вә сизин етибарынызы јенидән газансын. Онун проблеми барәдә данышмаг истәдијинизә ҝөрә јолдашыныз сизә гәзәбләнмәмәлидир, әксинә, бу вәрдишинин сизә неҹә тәсир етдијини баша дүшмәјә чалышмалыдыр. Сиз дә өз нөвбәниздә она дәстәк олун ки, бу ҹәһдләри боша чыхмасын вә етибарынызы јенидән газана билмәси үчүн она шанс верин. Һәр икиниз дә билмәлисиниз ки, инсаны порнографијаја бахмаға нә сөвг едир вә бунун өһдәсиндән неҹә ҝәлмәк олар d.   

Ола билсин, горхурсунуз ки, јолдашынызла бу барәдә данышсаныз, аранызда мүнагишә јаранаҹаг. Бәлкә, икинизин дә үрәјинә јатан ағсаггалдан көмәк истәјәсиниз? Ондан хаһиш едә биләрсиниз ки,  мәсәләни мүзакирә едән заман бир мүддәт јанынызда отуруб сөһбәтинизә истигамәт версин. Бир шеји билмәјиниз лазымдыр: јолдашыныз порнографијаја бахмаг асылылығындан гуртулса да, ола билсин, она јенидән етибар едә билмәјиниз үчүн сизә хејли вахт лазым олаҹаг. Амма тәслим олмајын. Мүнасибәтиниздәки кичик ирәлиләјиши белә ҝөрмәјә чалышын. Вахт вә сәбир сајәсиндә никаһынызын јенидән мөһкәм олаҹағына үмидинизи итирмәјин (Ваиз 7:8; 1 Кор. 13:4).

Ола билсин, јолдашыныз бу вәрдишини тәрҝитдикдән бир мүддәт сонра јенидән порнографијаја бахмаға башлајыб. Бәс бу о демәкдир ки, о, етдији һәрәкәтә ҝөрә пешман дејил, јахуд да һеч вахт дүзәлмәјәҹәк? Әслиндә јох. Әҝәр онда асылылыг јараныбса о, бүтүн өмрү боју бу вәрдишлә мүбаризә апармалы олаҹаг. Һәтта узун илләр сонра да бу вәрдиши јенидән ҝери гајыда биләр. Бунун баш вермәмәси үчүн о өзүнә даһа сәрт мәһдудијјәтләр гојмалыдыр. Бу вәрдиши илә мүбаризәдә галиб ҝәлдијини дүшүнсә дә, ола билсин, ҝөрдүјү тәдбирләри давам етдирмәлидир (Мәс. 28:14; Мәт. 5:29; 1 Кор. 10:12). О, дүшүнҹә тәрзини јениләшдирмәлидир вә пислијә, јәни һәм порнографијаја, һәм дә бунунла бағлы олан мастурбасија кими диҝәр натәмиз әмәлләрә нифрәт етмәји өјрәнмәлидир (Ефес. 4:23; Зәб. 97:10; Ром. 12:9). Јолдашыныз бүтүн бунлары етмәјә һазырдыр? Онда вәзијјәт һеч дә үмидсиз дејил e.

Әҝәр јолдашыныз бу проблемдән гуртулмаға ҹан атмырса, онда неҹә? Ајдындыр ки, вахташыры дахилиниздә мәјуслуг вә гәзәб олаҹаг, хәјанәт һиссини јашајаҹагсыныз. Мәсәләни Јеһованын өһдәсинә бурахын, бу сизә сакитләшмәјә көмәк едәҹәк (1 Бут. 5:7). Мүталиә вә дуа васитәсилә Јеһоваја јахынлашмаға давам един. Әмин олун ки, О да сизә јахынлашаҹаг. Әшија 57:15 ајәсиндә јазылдығы кими Јеһова «мәзлум, фағыр адамларын арасында» мәскән салыб онларын руһуну дирчәлдир. Баҹардығыныз гәдәр јахшы мәсиһи олмаға чалышын. Ағсаггаллардан көмәк истәјин. Һәмчинин бир ҝүн јолдашынызын дәјишәҹәјинә үмидинизи итирмәјин (Ром. 2:4; 2 Бут. 3:9).