1. Ибраниләрә 12:1 ајәсинә әсасән һәјат уғрунда јарышда финиш хәттинә чатмаг үчүн нә етмәлијик?

 МҮГӘДДӘС КИТАБДА мәсиһинин һәјаты гачыша бәнзәдилир. Финиш хәттини кечәнләр әбәди һәјат мүкафатыны алаҹаг (2 Тим. 4:7, 8). Биз вар ҝүҹүмүзлә гачыб јарышы давам етдирмәлијик. Чүнки финиш хәттинә чатмағымыза чох аз галыб. Һәвари Булусун вердији мәсләһәт бизә көмәк едә биләр. О, һәјат уғрунда јарышы уғурла баша вурмушду. Булус демишди: «Һәр ҹүр јүкү... кәнара атаг вә гаршымыздакы јарышда дөзүмлә гачаг». (Ибраниләрә 12:1 ајәсини охујун.)

2. «Һәр ҹүр јүкү... кәнара атаг» дејиләндә нә нәзәрдә тутулур?

² Һәвари Булус «һәр ҹүр јүкү... кәнара атаг» дејәндә нәји нәзәрдә тутурду? Биз һеч бир јүкү дашымамалыјыг? Хејр. Онун сөзүнүн ҹаны о иди ки, биз лазымсыз јүкләрдән азад олмалыјыг. Чүнки бу ҹүр јүкләр сүрәтимизи зәифләдә вә бизи тагәтдән сала биләр. Биз ҹәлд тәрпәниб онлары ајырд етмәли вә кәнара атмалыјыг. Амма еһтијатлы олмалыјыг ки, дашымалы олдуғумуз јүкләри дә атмајаг. Әкс һалда, гачышдан кәнар олунарыг (2 Тим. 2:5). Бәс биз һансы јүкләри дашымалыјыг?

3. а) Галатијалылара 6:5 ајәсинә әсасән биз нәји дашымалыјыг? б) Мәгаләдә нә һагда данышаҹағыг вә нәјә ҝөрә?

³ Галатијалылара 6:5 ајәсини охујун. Һәвари Булус дашымалы олдуғумуз бир јүклә бағлы белә јазыб: «Һәр кәс  өз мәсулијјәт јүкүнү дашыјаҹаг». О бурада һәр кәсин Аллаһын гаршысында дашыдығы мәсулијјәти нәзәрдә тутурду. Бу јүкү бизим әвәзимизә һеч кәс дашыја билмәз. Мәгаләдә өјрәнәҹәјик ки, бизим мәсулијјәт јүкүмүзә нәләр дахилдир вә онлары неҹә дашыја биләрик. Һәмчинин арашдыраҹағыг ки, дашыдығымыз һансы јүкләр лазымсыздыр вә онлардан неҹә азад ола биләрик. Өз јүкүмүзү дашымаг вә лазымсыз јүкләри кәнара атмаг һәјат уғрунда јарышы уғурла баша вурмаға көмәк едәҹәк.

4. Нәјә әсасән дејә биләрик ки, һәср олунма әһдимизи јеринә јетирмәк ағыр дејил? (Һәмчинин шәклә бахын.)

⁴ Һәср олунма әһдимиз. Өзүмүзү Јеһоваја һәср едәндә сөз вермишдик ки, Она ибадәт едәҹәјик вә ирадәсини јеринә јетирәҹәјик. Биз сөзүмүзүн үстүндә дурмалыјыг. Әһдимизә ујғун јашамаг ҹидди мәсулијјәт олса да, ағыр дејил. Ахы Јеһова бизи јарадыб ки, ирадәсини јеринә јетирәк (Вәһј 4:11). О, дахилимизә Ону танымаг, Она ибадәт етмәк истәји гојуб  вә бизи Өз бәнзәриндә јарадыб. Бунун сајәсиндә Она јахынлаша вә истәјини јеринә јетирмәкдән һәзз ала билирик (Зәб. 40:8). Бундан әлавә, Аллаһын ирадәсини јеринә јетирәндә вә Исанын нүмунәсини изләјәндә ҹанымыз тәравәтләнир (Мәт. 11:28—30).

5. Һәср олунма әһдинизи јеринә јетирмәјә сизә нә көмәк едә биләр? (1 Јәһја 5:3).

⁵ Бу јүкү неҹә дашыја биләрсиниз? Ики шејин көмәји илә. Биринҹиси, Јеһоваја мәһәббәтинизи мөһкәмләндирин. Бунун үчүн Јеһованын сизин үчүн етдији бүтүн јахшылыглар вә ҝәләҹәкдә верәҹәји немәтләр барәдә дүшүнүн. Аллаһа мәһәббәтиниз артдыгҹа Она итаәт етмәк сизә даһа асан олаҹаг. (1 Јәһја 5:3 ајәсини охујун.) Икинҹиси, Исанын нүмунәсини изләјин. О нәјин сајәсиндә Јеһованын ирадәсини јеринә јетирә билди? Иса Јеһовадан көмәк истәјирди вә диггәтини алаҹағы мүкафата ҹәмләјирди (Ибр. 5:7; 12:2). Сиз дә онун кими дуада Јеһовадан ҝүҹ истәјин вә әбәди һәјат үмидинизи даима ағлынызда сахлајын. Јеһоваја мәһәббәтиниз артдыгҹа вә Исанын нүмунәсини изләдикҹә һәср олунма әһдинизи јеринә јетирә биләҹәксиниз.

6. Нәјә ҝөрә биз аилә мәсулијјәтләримизи иҹра етмәлијик? (Һәмчинин шәклә бахын.)

⁶ Аилә мәсулијјәтләри. Һәјат уғрунда јарышда биз Јеһованы вә Исаны аилә үзвләримиздән чох севмәлијик (Мәт. 10:37). Амма бу о демәк дејил ки, биз аилә мәсулијјәтләримизи иҹра етмәмәлијик, санки онлар әлимизи-голумузу бағлајыр, Јеһова илә Исаны разы салмаға мане олур. Әксинә, Јеһованы вә Исаны разы салмаг үчүн биз аиләдә үзәримизә дүшән вәзифәни јеринә јетирмәлијик (1 Тим. 5:4, 8). Буну едәндә даһа хошбәхт олуруг. Ахы Јеһованын нијјәтинә әсасән аиләнин хошбәхт олмасы үчүн әрлә арвад бир-биринә мәһәббәт вә һөрмәт ҝөстәрмәлидир, валидејнләр ушагларыны севмәли вә онлара тәрбијә вермәлидир вә ушаглар ата-аналарынын сөзүнә гулаг асмалыдыр (Ефес. 5:33; 6:1, 4).

7. Аиләдәки ролунузу неҹә иҹра едә биләрсиниз?

⁷ Бу јүкү неҹә дашыја биләрсиниз? Аиләдәки ролунуздан асылы олмајараг Мүгәддәс Китабда јазылан һикмәтли мәсләһәтләрә әмәл един. Өзүнүзүн дүзҝүн билдији, јашадығыныз әразидә гәбул олунан, јахуд да мүтәхәссисләрин дедији фикирләри бу мәсләһәтләрдән үстүн сајмајын (Мәс. 24:3, 4). Мүгәддәс Китаба әсасланан нәшрләрдән јахшыҹа истифадә един. Орада принсипләри тәтбиг етмәјин јоллары изаһ олунур. Мәсәлән, «Аиләләрә көмәк» силсилә мәгаләләриндә бу ҝүн әр-арвадларын, валидејнләрин вә јенијетмәләрин үзләшдији конкрет проблемләр ишыгландырылыр b. Гаршыныза мәгсәд гојун ки, аилә үзвләриниз әмәл етмәсә дә, Мүгәддәс Китабдакы принсипләрә сиз өзүнүз әмәл едәсиниз. Бу бүтүн аиләјә хејир ҝәтирәҹәк. Јеһованын да лүтфү үзәриниздә олаҹаг (1 Бут. 3:1, 2).

8. Вердијимиз гәрарлар бизә неҹә тәсир едир?

⁸ Гәрарларымыза ҝөрә ҹавабдеһлијимиз. Јеһова бизә ирадә азадлығы вериб вә истәјир ки, биз јахшы гәрарлар вериб онларын хејрини ҝөрәк. Амма јанлыш гәрар версәк, Јеһова бизи бунун аҹы нәтиҹәләриндән горумајаҹаг (Гал. 6:7, 8). Буна ҝөрә дә вердијимиз сәһв гәрарын, дүшүнмәдән дедијимиз сөзүн вә ја етдијимиз  һәрәкәтин мәсулијјәтини дашымалыјыг. Бәзән ола биләр ки, етдикләримизә ҝөрә виҹдан әзабы бизи раһат бурахмасын. Амма вердијимиз гәрара ҝөрә ҹавабдеһ олдуғумузу дәрк етсәк, ҝүнаһымызы бојнумуза алаҹағыг, сәһвимизи дүзәлдәҹәјик вә бир дә ону тәкрарламамаға чалышаҹағыг. Бу аддымлары атмаг һәјат уғрунда јарышда галмаға көмәк едәҹәк.

9. Јанлыш гәрар вермисинизсә, нә едә биләрсиниз? (Һәмчинин шәклә бахын.)

⁹ Бу јүкү неҹә дашыја биләрсиниз? Јанлыш гәрар вермисинизсә, нә едә биләрсиниз? Гәбул един ки, олан-олуб, кечән-кечиб. Вахтынызы, ҝүҹүнүзү өзүнүзә бәраәт газандырмаға, јахуд да өзүнүзү вә башгаларыны ҝүнаһландырмаға сәрф етмәјин. Әксинә, сәһвинизи гәбул един вә индики вәзијјәтдә әлиниздән ҝәләни един. Әҝәр сәһвинизә ҝөрә өзүнүзү ҝүнаһкар һисс едирсинизсә, тәвазөкарлыгла Јеһоваја дуа един, сәһвинизи етираф един вә Ондан әфв диләјин (Зәб. 25:11; 51:3, 4). Инҹитдијиниз инсанлардан да үзр истәјин вә лазымдырса, көмәк үчүн ағсаггаллара јахынлашын (Јаг. 5:14, 15). Сәһвләриниздән нәтиҹә чыхарын вә онлары тәкрарламамаға чалышын. Онда архајын ола биләрсиниз ки, Јеһова сизә рәһм едәҹәк вә дајаг олаҹаг (Зәб. 103:8—13).

10. Нәјә ҝөрә өзүмүздән реал олмајан шејләр ҝөзләмәк ағыр јүкдүр? (Галатијалылара 6:4).

¹⁰ Өзүмүздән реал олмајан шејләр ҝөзләмәк. Өзүмүзү башгалары илә мүгајисә етсәк, өзүмүздән чох шеј ҝөзләјәрик вә јүкүмүзү ағырлашдырарыг. (Галатијалылара 6:4 ајәсини охујун.) Бу һәтта башгаларына пахыллыг етмәјимизә, рәгабәт апармағымыза ҝәтириб чыхара биләр (Гал. 5:26). Ола биләр ки, баҹарығымыз вә вәзијјәтимиз јол вермәдији һалда башгасынын наил олдуғу шејә наил олмаг үчүн дәридән габыгдан чыхаг. Бунунла өзүмүзә јалныз зијан вурарыг. Һәмчинин дүшүнүн: Мүгәддәс Китабда дејилир ки, «узун интизар үрәји хәстә салар» (Мәс. 13:12). Инди ҝөрүн һеч вахт јеринә јетмәјәҹәк шејләрин интизарыны чәкмәк адамы һансы һала салар! Бу бизим бүтүн ҝүҹүмүзү әлимиздән алар вә һәјат уғрунда јарышда сүрәтимизи азалдар (Мәс. 24:10).

11. Өзүмүздән реал олмајан шејләр ҝөзләмәмәк үчүн нә етмәлијик?

¹¹ Бу јүкү неҹә ата биләрсиниз? Јеһова сиздән ҝүҹүнүз чатмајан шеји ҝөзләмир. Сиз дә өзүнүздән Јеһованын ҝөзләдијиндән артығыны ҝөзләмәјин (2 Кор. 8:12). Әмин олун ки, Јеһова сизин етдикләринизи башгаларынын етдикләри илә мүгајисә етмир (Мәт. 25:20—23). О сизин үрәкдән етдијиниз хидмәти, сизин сәдагәтинизи, сизин дөзүмүнүзү гијмәтләндирир. Тәвазөкар олун, гәбул един ки, јашыныза, сәһһәтинизә вә вәзијјәтинизә ҝөрә истәдијиниз һәр шеји едә билмәзсиниз. Бәрзиллај кими сәһһәтиниз вә ја јашыныз һансыса тәјинаты иҹра етмәјә јол вермирсә, «јох» демәји баҹарын (2 Ишм. 19:35, 36). Муса пејғәмбәр кими көмәји гәбул един вә јери ҝәләндә мәсулијјәтләринизи башгаларына өтүрүн (Чых. 18:21, 22). Бу ҹүр тәвазөкар оланда биз өзүмүздән реал олмајан шејләр ҝөзләмәјәҹәјик вә һәјат уғрунда јарышда тагәтдән дүшмәјәҹәјик.

12. Башгасынын јанлыш гәрарына ҝөрә биз мәсулијјәт дашыјырыг? Изаһ един.

¹² Башгаларынын сәһв гәрарларына ҝөрә өзүмүзү гынамаг. Биз киминсә јеринә гәрар верә билмәрик. Һеч ону вердији јанлыш гәрарын аҹы нәтиҹәсиндән дә һәмишә горуја билмәрик. Мәсәлән, ола билсин,  киминсә өвлады Јеһоваја хидмәти дајандырмаг гәрарына ҝәлсин. Бу, валидејн үчүн ағыр дәрддир. Өвладынын сәһв гәрарына ҝөрә өзүнү гынајан валидејнләр үзәрләринә ағыр јүк ҝөтүрүр. Јеһова бу ҹүр јүкү дашымағынызы истәмир (Ром. 14:12).

13. Өвлады јанлыш гәрар верәндә валидејн неҹә давранмалыдыр?

¹³ Бу јүкү неҹә ата биләрсиниз? Баша дүшүн ки, Јеһова һәр кәсә ирадә азадлығы вериб. Һәрә өз истәдији гәрары верә биләр. Јеһоваја гуллуг едиб-етмәмәк дә һәр кәсин шәхси сечимидир. Әзиз валидејнләр, Јеһова билир ки, сиз камил дејилсиниз. О садәҹә сиздән әлиниздән ҝәләни етмәјинизи истәјир. Ушағыныз вердији гәрара ҝөрә өзү мәсулијјәт дашыјыр, сиз јох (Мәс. 20:11). Амма ола билсин, јенә дә бир валидејн кими етдијиниз сәһвләрин фикрини чәкирсиниз. Әҝәр еләдирсә, һиссләринизи Јеһоваја данышын вә Ондан әфв диләјин. О билир ки, сиз кечмиши, баш верәнләри дәјишә билмәзсиниз. Ејни заманда Јеһова ҝөзләмир ки, өвладынызы гәрарларынын нәтиҹәсиндән горујасыныз. Унутмајын, өвладыныз Јеһоваја тәрәф ҹүзи дә олса аддым атса, Јеһова гуҹаг ачыб ону гәбул едәҹәк (Лука 15:18—20).

14. Нәјә ҝөрә һәдсиз ҝүнаһкарлыг һиссиндән гуртулмалыјыг?

¹⁴ Һәдсиз ҝүнаһкарлыг һисси. Ҝүнаһ едәндә өзүмүзү ҝүнаһкар һисс етмәјимиз тәбиидир. Амма Јеһова бизим һәдсиз дәрәҹәдә ҝүнаһкарлыг һисси кечирмәјимизи истәмир. Бу јүкү кәнара атмалыјыг. Әҝәр биз ҝүнаһымызы бојнумуза алмышыгса, төвбә етмишиксә вә ону бир дә тәкрарламамаг үчүн әлимиздән ҝәләни едириксә, әмин ола биләрик ки, Јеһова бизи бағышлајыб (Һәв. 3:19). Бу аддымлары атандан сонра Јеһова бизим даһа өзүмүзү ҝүнаһкар һисс етмәјимизи истәмир. О билир ки, инсанын даима өзүнү ҝүнаһкар һисс етмәси ону әлдән сала биләр (Зәб. 31:10). Һәтта инсанын бәдбинлијә гапылмасы онун һәјат уғрунда јарышы  дајандырмасына ҝәтириб чыхара биләр (2 Кор. 2:7).

15. Һәдсиз ҝүнаһкарлыг һиссиндән неҹә јаха гуртара биләрсиниз? (1 Јәһја 3:19, 20). (Һәмчинин шәклә бахын.)

¹⁵ Бу јүкү неҹә ата биләрсиниз? Әҝәр һәдсиз ҝүнаһкарлыг һисси сизә раһатлыг вермирсә, диггәтинизи Јеһованын «һәгигәтән бағышлајан» Аллаһ олдуғуна ҹәмләјин (Зәб. 130:4). О, төвбә едән ҝүнаһкары бағышлајанда белә бир сөз верир: «Ҝүнаһларыны бир дә јада салмајаҹағам» (Әрм. 31:34). Јәни Јеһова кечмиш ҝүнаһларынызы ҝәләҹәкдә сизә гаршы истифадә етмәјәҹәк. Буна ҝөрә дә етдијиниз ҝүнаһын алтыны чәкирсинизсә, дүшүнмәјин ки, бу, Јеһованын сизи бағышламадығынын ҝөстәриҹисидир. Һәмчинин етдијиниз ҝүнаһа ҝөрә јығынҹагда һансыса мәсулијјәтинизи итирмисинизсә, өзүнүзү јејиб битирмәјин. Јеһова ишләтдијиниз ҝүнаһ барәдә даһа дүшүнмүр, сиз дә дүшүнмәјин. (1 Јәһја 3:19, 20 ајәләрини охујун.)

16. Бир гачышчы кими нәјин фәргиндә олмалыјыг?

¹⁶ Һәјат уғрунда јарышда «елә гачын ки, мүкафаты аласыныз» (1 Кор. 9:24). Бунун үчүн дашымалы вә кәнара атмалы олдуғунуз јүкләри ајырд етмәк лазымдыр. Мәгаләдә бу јүкләрин бәзиләриндән данышдыг. Амма һәлә данышмадығымыз башга јүкләр дә вар. Иса Мәсиһ демишди ки, биз үрәјимизи «гарынгулулуг, сәрхошлуг вә һәјатын гајғылары илә» јүкләмәмәлијик (Лука 21:34). Бу вә диҝәр ајәләр сизә көмәк едә биләр ки, нәләри дәјишмәли олдуғунузу мүәјјән едәсиниз вә һәјат уғрунда ҝедән јарышы давам етдирәсиниз.

17. Нәјә ҝөрә һәјат уғрунда јарышда галиб ҝәләҹәјинизә әмин ола биләрсиниз?

¹⁷ Әмин ола биләрик ки, һәјат уғрунда јарышда галиб ҝәләҹәјик, чүнки Јеһова бизә ҝүҹ верәҹәк (Әшј. 40:29—31). Одур ки, сүрәти азалтмајын. Һәвари Булусдан нүмунә ҝөтүрүн. О, гаршыда ону ҝөзләјән мүкафаты алмаг үчүн вар ҝүҹү илә гачырды (Филип. 3:13, 14). Бу јарышда сизин әвәзинизә һеч ким гача билмәз. Амма Јеһованын көмәји илә сиздә һәр шеј алынаҹаг. О сизә өз јүкләринизи дашымаға вә лазымсыз јүкләри кәнара атмаға көмәк едәҹәк (Зәб. 68:19). Јеһова сизинлә олдуғу үчүн бу јарышда дөзүмлә гачыб галиб ҝәлә биләҹәксиниз!