1, 2. а) Ҝүнаһ нәдир вә онунла мүбаризәдә неҹә галиб чыха биләрик? (Һәмчинин «Бәзи ифадәләрин изаһы»на бахын.) б) Бу мәгаләдә вә «Ҝөзәтчи гүлләси»нин бу сајынын диҝәр мәгаләләриндә нә мүзакирә олунаҹаг? (Һәмчинин бу сајда «Охуҹулар үчүн гејд»ә бахын.)

 БИЛМӘК истәјәрдиниз, Јеһова сизи нә гәдәр чох севир? Бу суалын ҹавабыны тапмағын јахшы бир јолу вар. Јеһованын сизи ҝүнаһ вә өлүмдән гуртармаг үчүн нәләр етдији барәдә арашдырын. Ҝүнаһ a амансыз дүшмәндир. Ону тәкбашына мәғлуб едә билмәзсиниз. Биз һәр ҝүн ҝүнаһ ишләјирик, елә ҝүнаһын да уҹбатындан өлүрүк (Ром. 5:12). Амма јахшы хәбәр дә вар. Јеһованын көмәји илә ҝүнаһы тамамилә мәғлуб едә биләрик. Јеһова буна зәманәт верир!

² Јеһова Аллаһ тәхминән 6000 илдир ки, бәшәријјәтә ҝүнаһла мүбаризә апармаға көмәк едир. О буну бизи севдији үчүн едир. Јеһова инсанлары елә јаратдығы ҝүндән севир, буна ҝөрә дә бу мүбаризәдә онлара көмәк етмәк үчүн чох ишләр ҝөрүб. Јеһова ҝүнаһын өлүмә апардығыны билир. Амма О бизим өлмәјимизи истәмир, истәјир ки, биз әбәди јашајаг (Ром. 6:23). Јеһованын шәхсән сизинлә дә бағлы истәји будур. Бу мәгаләдә үч суала ҹаваб тапаҹағыг: 1) Јеһова ҝүнаһлы инсанлара һансы үмиди вериб? 2) Гәдим дөврдә ҝүнаһлы инсанлар Јеһованын рәғбәтини газанмаг үчүн нә едирдиләр? 3) Иса Мәсиһ инсанлары ҝүнаһ вә өлүмдән гуртармаг үчүн нә едиб?

 ЈЕҺОВА ҜҮНАҺЛЫ ИНСАНЛАРА ҺАНСЫ ҮМИДИ ВЕРДИ?

3. Әдән бағында нә баш верди?

³ Јеһова илк кишини вә гадыны јараданда онларын хошбәхт олмасыны истәјирди. Аллаһ онлара јашамаг үчүн ҝөзәл јер, никаһ әнамы вә мәмнунлуг ҝәтирән иш тапшырмышды. Адәмлә Һәвва төрәјиб чохалараг јер үзүнү долдурмалы вә бүтүн дүнјаны Әдән бағы кими ҹәннәтә чевирмәли идиләр. Јеһова онлара јалныз садә бир әмр вермишди. Һәмчинин онлары хәбәрдар етмишди ки, әҝәр гәсдән Она үсјан едиб вердији әмри позсалар, бу ҝүнаһ онлары өлүмә апараҹаг. Һадисәләрин неҹә ҹәрәјан етдијини билирик. Аллаһы вә инсанлары севмәјән бир шәр мәләк Адәмлә Һәвваны бу ҝүнаһы етмәјә сөвг етди. Улу валидејнләримиз Шејтанын фәндинә ујду. Онлар мәһәббәтли Аталарына етибар етмәк әвәзинә ҝүнаһ ишләдиләр. Билдијимиз кими Јеһованын сөзләри ҝерчәк олду. Һәмин ҝүндән бәри онлар әкдикләрини бичдиләр: ҝетдикҹә гоҹалдылар вә ахырда өлдүләр (Јар. 1:28, 29; 2:8, 9, 16—18; 3:1—6, 17—19, 24; 5:5).

4. Нәјә ҝөрә Јеһова ҝүнаһа нифрәт едир? (Ромалылара 8:20, 21).

⁴ Јеһова бу һадисәни биздән өтрү гәләмә алыб. Бунун сајәсиндә Јеһованын ҝүнаһа нәјә ҝөрә бу дәрәҹәдә нифрәт етдијини баша дүшүрүк. Ҝүнаһ бизи Атамыздан ајырыр вә өлүмә апарыр (Әшј. 59:2). Башымыза бүтүн бу бәлалары ачан Шејтан елә буна ҝөрә ҝүнаһы севир вә инсанлары ҝүнаһа сүрүкләјир. Јәгин, о, Әдән бағында бөјүк гәләбә газандығыны дүшүнүрдү, амма Јеһованын мәһәббәтинин бөјүклүјүнүн фәргиндә дејилди. Јеһова Адәмлә Һәвванын өвладлары илә бағлы нијјәтини һеч вахт дәјишмәди. О, бәшәр аиләсини чох севир, буна ҝөрә дә дәрһал һамыја үмид верди. (Ромалылара 8:20, 21 ајәләрини охујун.) Јеһова билирди ки, онларын өвладларынын арасындан Ону севән вә ҝүнаһла мүбаризә апармаг истәјән инсанлар олаҹаг. О бир Јарадан вә Ата кими бу инсанларын Она јахынлашмасы, ҝүнаһ вә өлүмдән гуртулмасы үчүн тәдбир ҝөрдү. О нәләр етди?

5. Јеһова ҝүнаһлы бәшәријјәтә илк үмид гығылҹымыны нә вахт верди? Изаһ един. (Јарадылыш 3:15).

⁵ Јарадылыш 3:15 ајәсини охујун. Јеһова Шејтана һөкм кәсәндә бәшәријјәт үчүн үмид гығылҹымы јаранды. Јеһова «өвладын» ҝәләҹәјини вә бәшәријјәти хилас едәҹәјини вәд етди. Бу «өвлад» сонда Шејтаны мәһв едәҹәк вә онун уҹбатындан јаранан бүтүн писликләрә сон гојаҹаг (1 Јәһ. 3:8). Анҹаг әввәлҹә илан өвладын дабанындан чалмалы иди, башга сөзлә, Шејтан ону өлдүрмәли иди. Бу, Јеһованын гәлбини бәрк јаралајаҹагды. Амма О бу әзаба дөзмәјә разы иди, чүнки нәтиҹәдә сајсыз-һесабсыз инсан ҝүнаһ вә өлүмдән хилас олаҹагды!

ГӘДИМ ДӨВРДӘ ҜҮНАҺЛЫ ИНСАНЛАР ЈЕҺОВАНЫН РӘҒБӘТИНИ ГАЗАНМАГ ҮЧҮН НӘ ЕДИРДИЛӘР?

6. Һабил, Нуһ вә диҝәр иманлы инсанлар Јеһоваја јахынлашмаг үчүн нә едирди?

⁶ Әсрләр өтдүкҹә Јеһова тәдриҹән ҝүнаһлы бәшәријјәтә Она јахынлашмағын јолуну ачыглады. Адәмин икинҹи оғлу Һабил Әдән бағындакы фаҹиәдән сонра Јеһоваја иман ҝәтирән илк инсан олду. Һабил Јеһованы севирди, Ону разы салмаг, Она јахынлашмаг истәјирди. Она ҝөрә дә гурбан ҝәтирди. Һабил чобан олдуғу үчүн сүрүсүндә илк доғулан һејванлардан бир нечәсини ҝөтүрдү вә онлары кәсиб Јеһоваја тәгдим етди. Бәс Јеһова бу гурбаны гәбул етди? О, «Һабилдән вә онун бәхшишиндән разы галды» (Јар. 4:4). Јеһова Ону  севән вә Она етибар едән диҝәр инсанларын да гурбанларындан разы галырды. Бу инсанлардан бири Нуһ пејғәмбәр иди (Јар. 8:20, 21). Бу ҹүр гурбанлары гәбул етмәклә Јеһова ҝөстәрди ки, ҝүнаһлы инсанлар Онун разылығыны газана вә Она јахынлаша биләр b.

7. Ибраһим пејғәмбәрин оғлуну гурбан ҝәтирмәјә һазыр олмасындан нә өјрәнирик?

⁷ Јеһова бөјүк иман саһиби олан Ибраһим пејғәмбәрә сон дәрәҹә чәтин бир тапшырыг верди. Она өз доғма оғлу Исһагы гурбан ҝәтирмәји бујурду. Сөзсүз, Ибраһим пејғәмбәр үчүн бундан әзаблы тапшырыг ола билмәзди. Амма нә гәдәр чәтин олса да, о буну етмәјә һазыр иди. Јеһова сон анда Ибраһими дајандырды. Бу һадисә бүтүн иманлы инсанлара ваҹиб бир һәгигәти өјрәдир: Аллаһ Өз севимли Оғлуну гурбан вермәјә һазыр иди. Бәли, О, инсанлары бах бу гәдәр севир! (Јар. 22:1—18).

8. Ганунун тәләби илә ҝәтирилән һејван гурбанлары нәјә ишарә едирди? (Лавилиләр 4:27—29; 17:11).

⁸ Әсрләр сонра Јеһова Исраил халгына Ганун верди. Гануна әсасән халг ҝүнаһларынын бағышланмасы үчүн һејван гурбанлары ҝәтирмәли иди. (Лавилиләр 4:27—29; 17:11 ајәләрини охујун.) Бу гурбанлар ҝәләҹәкдә бәшәријјәти ҝүнаһдан тамамилә азад едәҹәк даһа бөјүк бир гурбана ишарә едирди. Аллаһын илһамы илә пејғәмбәрләр изаһ етмишди ки, вәд олунмуш өвлад әзаб чәкиб өлдүрүлмәли иди. Сонралар бу өвладын Аллаһын хүсуси Оғлу олдуғу мәлум олду. О, санки кәсилмәјә апарылан гојун кими гурбан ҝәтириләҹәкди (Әшј. 53:1—12). Тәсәввүр едирсиниз, Јеһова тәдбир ҝөрдү ки, бәшәријјәти, о ҹүмләдән сизи ҝүнаһ вә өлүмдән гуртармаг үчүн Өз севимли Оғлу гурбан верилсин!

ИСА МӘСИҺ ХИЛАСЫМЫЗ ҮЧҮН НӘ ЕТДИ?

9. Вәфтизчи Јәһја Иса һаггында нә демишди? (Ибраниләрә 9:22; 10:1—4, 12).

⁹ Ерамызын биринҹи әсриндә Аллаһын хидмәтчиси Вәфтизчи Јәһја Насирәдән олан Исаны ҝөрәндә белә демишди: «Будур бәшәријјәтин ҝүнаһыны јујан Аллаһын Гузусу!» (Јәһ. 1:29). Аллаһдан илһам алмыш бу сөзләр ҝөстәрирди ки, Иса вәд олунмуш һәмин о өвладдыр. Дејилдији кими о өз һәјатыны гурбан ҝәтирәҹәкди. Бәшәријјәтин һәлә һеч вахт бу ҹүр мөһкәм үмиди олмамышды. Бу, ҝүнаһ үзәриндә там гәләбә иди. (Ибраниләрә 9:22; 10:1—4, 12 ајәләрини охујун.)

10. Иса «ҝүнаһлы адамлары чағырмаға» ҝәлдијини неҹә ҝөстәрмишди?

¹⁰ Иса әсас етибары илә ҝүнаһ јүкү алтында әзилән инсанлара көмәк етмәјә чалышырды вә онлары давамчысы олмаға дәвәт едирди. О билирди ки, инсан әзабларынын көкүндә ҝүнаһ дурур. Буна ҝөрә дә о, «ҝүнаһкар» кими танынан киши вә гадынлара хүсусилә көмәк едирди. Иса нүмунә чәкәрәк буну белә изаһ етмишди: «Һәкимә сағлам адамлар јох, хәстәләр мөһтаҹдыр». Сонра о, әлавә етмишди: «Мән салеһләри јох, ҝүнаһлы адамлары чағырмаға ҝәлмишәм» (Мәт. 9:12, 13). О, мәһз белә дә едирди. Иса онун ајагларыны ҝөзүнүн јашы илә јујан гадынын ҝүнаһларыны мүлајимликлә бағышлады (Лука 7:37—50). О, су далынҹа ҝәлән сәмәријјәли гадынын әхлагсыз һәјат тәрзи сүрдүјүнү билсә дә, она ваҹиб һәгигәтләри ачыглады (Јәһ. 4:7, 17—19, 25, 26). Исанын һәтта ҝүнаһын нәтиҹәси олан өлүмү арадан галдырмаг сәлаһијјәти вар иди. О, Аллаһын вердији ҝүҹ сајәсиндә кишиләри,  гадынлары, ушаглары вә бөјүкләри дирилдирди (Мәт. 11:5).

11. Нәјә ҝөрә ҝүнаһлы инсанлар өзләрини Исанын јанында раһат һисс едирди?

¹¹ Баша дүшмәк олар, нәјә ҝөрә ҝүнаһ ҝирдабына гәрг олмуш инсанлар өзләрини Исанын јанында раһат һисс едирдиләр. Иса онларын һалына аҹыјырды, шәфгәт ҝөстәрирди. Буна ҝөрә дә онлар Иса илә раһат даныша билирдиләр (Лука 15:1, 2). Иса она иман етдикләринә ҝөрә бу инсанлары тәрифләјирди (Лука 19:1—10). Бунунла о, Атасынын нә гәдәр мәрһәмәтли олдуғуну мүкәммәл шәкилдә ҝөстәрирди (Јәһ. 14:9). Иса сөзләри вә әмәлләри илә ҝөстәрирди ки, мәрһәмәтли вә рәһмли Атасы инсанлары севир вә онлара ҝүнаһ үзәриндә гәләбә газанмаға көмәк етмәк истәјир. О, өз рәфтары илә ҝүнаһлы инсанларда пис әмәлләриндән дөнүб онун ардынҹа ҝетмәк истәји ојадырды (Лука 5:27, 28).

12. Иса өлүмү илә бағлы нәји ачыгламышды?

¹² Исанын ону гаршыда нәләрин ҝөзләдијиндән хәбәри вар иди. О, бир нечә дәфә шаҝирдләринә демишди ки, әлә вериләҹәк вә дирәкдә едам едиләҹәк (Мәт. 17:22; 20:18, 19). Иса верәҹәји гурбан васитәсилә бәшәријјәтин ҝүнаһыны јујаҹағыны билирди. Бу барәдә Вәфтизчи Јәһја да бәјан етмишди, пејғәмбәрләр дә габагҹадан демишди. Һәмчинин о өјрәдирди ки, һәјатыны гурбан верәндән сонра «һәр ҹүр инсаны» өзүнә ҹәлб едәҹәк (Јәһ. 12:32). Исаја иман ҝәтирән вә онун нүмунәсини изләјән  ҝүнаһлы инсанлар Јеһованын разылығыны газана биләрдиләр. Белә етмәклә онлар «ҝүнаһын әсарәтиндән» гуртулаҹагдылар (Ром. 6:14, 18, 22; Јәһ. 8:32). Буна ҝөрә дә Иса көнүллү шәкилдә ҹаныны гурбан вермәјә разылашараг бу изтираблы өлүмүн үзүнә дик бахды (Јәһ. 10:17, 18).

13. Иса неҹә өлдү вә онун өлүмү бизә Јеһова Аллаһ һагда нә дејир? (Һәмчинин шәклә бахын.)

¹³ Иса әлә верилди, һәбс едилди, тәһгир олунду, она бөһтан атдылар, өлүм һөкмү кәсдиләр, һәтта ишҝәнҹә вердиләр. Әсҝәрләр ону едам јеринә апарыб дирәјә мыхладылар. О, сәдагәтлә бүтүн бу әзаблара таб ҝәтирди. Амма һәмин вахт ондан да чох әзаб чәкән бир Варлыг вар иди. О, Јеһова Аллаһ иди. Сонсуз ҝүҹә малик олан Јеһова Оғлунун әзабларына сон гоја биләрди, амма О буну етмәди. О, әзиз Оғлунун өлүмүнә нәјә ҝөрә изин верди? Мәһәббәтдән ирәли ҝәләрәк. Иса демишди: «Аллаһ дүнјаны о гәдәр севир ки, јеҝанә Оғлуну онун уғрунда фәда етди. Буну она ҝөрә етди ки, она иман едәнләр мәһв олмасын, онларын әбәди һәјаты олсун» (Јәһ. 3:16).

14. Исанын гурбанлығындан нә өјрәнирсиниз?

¹⁴ Фидјә гурбанлығы Јеһованын Адәмлә Һәвванын нәслини севдијинә ҝүҹлү сүбутдур. Бу, Јеһованын сизи дә чох севдијини сүбут едир. О сизи ҝүнаһ вә өлүмдән азад етмәк үчүн Она әзиз олан ән дәјәрли варлығы гурбан верди вә ағла ҝәлән ән шиддәтли әзаблара дөздү (1 Јәһ. 4:9, 10). Бәли, Јеһова һәр биримизә ҝүнаһла мүбаризә апармаға вә онун үзәриндә гәләбә чалмаға көмәк етмәк истәјир!

15. Јеһованын вердији фидјә гурбанлығындан фајдаланмаг үчүн нә етмәлијик?

¹⁵ Јеһованын бәхш етдији бу һәдијјә, јәни илкин Оғлунун фидјә гурбанлығы ҝүнаһларымызын бағышланмасыны мүмкүн едир. Амма Јеһованын бизи бағышламасы үчүн ваҹиб бир шеји етмәлијик. Нәји? Вәфтизчи Јәһја, даһа сонра исә Иса Мәсиһ бу суала ҹаваб вермишди: «Төвбә един, чүнки сәмави Падшаһлыг јахынлашыр» (Мәт. 3:1, 2; 4:17). Демәли, ҝүнаһларымызла мүбаризә апармаг вә Јеһоваја јахынлашмаг үчүн төвбә әсас амилдир. Бәс төвбә етмәк нә демәкдир вә бу, ҝүнаһлы олмағымыза бахмајараг, Јеһованы разы салмағымыза неҹә көмәк едир? Нөвбәти тәлим мәгаләсиндә бу суала ҹаваб вериләҹәк.