1. Јеһованын инсанларла бағлы истәји нәдир?

 ЈЕҺОВА инсанлары јараданда онлара ирадә азадлығы бәхш етмишди. Сиз һәр дәфә гәрарлар верәндә бу әнамдан истифадә етмиш олурсунуз. Инсанын һәјатда вердији ән мүһүм гәрар өзүнү Јеһоваја һәср етмәк вә Онун хидмәтчиләринин сырасына гошулмагдыр. Јеһова һәр кәсин бу гәрары вермәсини истәјир, чүнки О, инсанлары севир вә онларын хејрини дүшүнүр. О, инсанларын Онунла дост олмасыны вә әбәди јашамасыны истәјир (Ган. 30:19, 20; Гал. 6:7, 8).

 2. Јеһова төвбә етмәјән инсана неҹә јанашыр? (1 Јәһја 2:1).

² Бунунла белә, Јеһова кимисә Она хидмәт етмәјә мәҹбур етмир. О неҹә давранмағы һәр кәсин өз өһдәсинә бурахыр. Тутаг ки, вәфтиз олунмуш мәсиһи Аллаһын ганунуну позараг ҹидди ҝүнаһ ишләјиб. Әҝәр о, төвбә етмәсә, јығынҹагдакыларын арасындан чыхарылмалыдыр a (1 Кор. 5:13). Һәтта бу һалда да Јеһова һәмин инсанын Она ҝери гајыдаҹағыны һәсрәтлә ҝөзләјир. Әслиндә, Јеһованын фидјәни вермәсинин әсас сәбәбләриндән бири елә будур: О бунун әсасында ҝүнаһларындан төвбә едән инсаны бағышлајыр. (1 Јәһја 2:1 ајәсини охујун.) Јеһова чох мәһәббәтли  Аллаһдыр. О, ҹидди ҝүнаһ ишләјән инсаны төвбәјә сәсләјир (Зәк. 1:3; Ром. 2:4; Јаг. 4:8).

 3. Бу мәгаләдә нәләри арашдыраҹағыг?

³ Јеһова ҝүнаһа вә ҝүнаһ ишләјән инсанлара Онун кими јанашмағымызы истәјир. Бу мәгалә бизә бу саһәдә көмәк едәҹәк. Мәгаләни охујаркән нөвбәти амилләрә фикир верин: 1) Биринҹи әсрдә Коринф јығынҹағында ҹидди ҝүнаһ ишләмиш бир мәсиһи илә бағлы һансы тәдбир ҝөрүлдү? 2) Һәмин инсан төвбә едәндә һәвари Булус јығынҹаға һансы ҝөстәриши верди? 3) Бу һадисәдән Јеһованын ҹидди ҝүнаһ ишләмиш мәсиһиләрә мүнасибәти барәдә нә өјрәнирик?

БИРИНҸИ ӘСРДӘ ҸИДДИ ҜҮНАҺ ИШЛӘЈӘН ИНСАНЛА БАҒЛЫ ҺАНСЫ ТӘДБИР ҜӨРҮЛДҮ?

 4. Биринҹи әсрдә Коринф јығынҹағында һансы вәзијјәт јаранмышды? (1 Коринфлиләрә 5:1, 2).

⁴ 1 Коринфлиләрә 5:1, 2 ајәләрини охујун. Булус үчүнҹү тәблиғ сәјаһәти заманы Коринфдә јаранмыш јени јығынҹагла бағлы дәһшәтли бир хәбәр алды. Һәмин јығынҹагда бир гардаш өҝеј анасы илә әхлагсызлыг едирди. Бу, чох биабырчы һәрәкәт иди вә «беләси һеч имансызларын арасында да јох» иди! Јығынҹагдакылар онун һәрәкәтинә нәинки ҝөз јумурду, һәтта бунунла өјүнүрдүләр. Ҝөрүнүр, бәзиләри дүшүнүрдү ки, бу, Јеһованын ҝүнаһлы инсанлара гаршы нә гәдәр мәрһәмәтли, анлајышлы олдуғуну ҝөстәрир. Амма Јеһова халгындан киминсә ҹидди ҝүнаһ ишләмәсинә өтәри јанашмыр. Һәмин инсан азғын давранышы илә јығынҹағын тәмиз адына ләкә ҝәтирирди. Онун бу һәрәкәти отуруб-дурдуғу мәсиһиләрә дә мәнфи тәсир ҝөстәрә биләрди. Ҝөрәсән, Булус мәсәлә илә бағлы јығынҹаға һансы ҝөстәриши верди?

 5. Булус јығынҹаға нә етмәји бујурмушду вә онун сөзләринин мәнасы нә иди? (1 Коринфлиләрә 5:13; һәмчинин шәклә бахын.)

⁵ 1 Коринфлиләрә 5:13 ајәсини охујун. Булус Аллаһын илһамы илә мәктуб јазыб билдирмишди ки, төвбә етмәјән кәси араларындан чыхармалыдырлар. Садиг мәсиһиләр һәмин инсана неҹә мүнасибәт ҝөстәрмәли иди? Булус демишди ки, даһа онунла отуруб-дурмасынлар. Һәтта сөзүнә әлавә едиб демишди ки, һәмин инсанла «бир сүфрәјә дә әјләшмә»синләр (1 Кор. 5:11). Нәјә ҝөрә? Чүнки киминләсә бир сүфрә архасында әјләшәндә онунла сөһбәт едирик, арамызда мүнасибәт јараныр. Булусун нә демәк истәдији ајдындыр: јығынҹаг һәмин инсанла асудә вахт кечирмәмәли  иди. Бу, баҹы-гардашлары онун пис тәсириндән горујаҹагды (1 Кор. 5:5—7). Үстәлик, бунун сајәсиндә, ола билсин, ҝүнаһ едән инсан Аллаһын ганунларындан нә гәдәр узаглашдығыны баша дүшәҹәкди, һәрәкәтинә ҝөрә утанаҹагды вә төвбә едәҹәкди.

 6. Булусун јаздығы мәктуб јығынҹағы вә ҝүнаһ ишләјән инсаны нәјә тәшвиг етди?

⁶ Булус Коринфдәки мәсиһиләрин онун мәктубуна неҹә јанашаҹагларыны билмәк истәјирди. Титус Булусун үрәјини ачан хәбәр ҝәтирир. Јығынҹаг онун мәктубуну јахшы гаршыламышды (2 Кор. 7:6, 7). Онлар Булусун дедији кими давранмышды. Бундан әлавә, ҹидди ҝүнаһ ишләјән инсан Булусун мәктубундан чох кечмәмиш төвбә етмишди! О, әмәлләриндән әл чәкмишди, дүшүнҹә тәрзини дәјишмишди вә Јеһованын салеһ нормаларына ујғун јашамаға башламышды (2 Кор. 7:8—11). Бәс Булус бундан сонра јығынҹаға һансы ҝөстәриши вермишди?

 ЈЫҒЫНҸАГ ТӨВБӘ ЕДӘН ИНСАНЛА НЕҸӘ РӘФТАР ЕТМИШДИ?

 7. Ҹидди ҝүнаһ ишләјән инсаны јығынҹагдакыларын арасындан чыхармағын нәтиҹәси нә олду? (2 Коринфлиләрә 2:5—8).

⁷ 2 Коринфлиләрә 2:5—8 ајәләрини охујун. Булус гејд етмишди ки, «әксәријјәтин мәзәммәти белә адама кифајәт» етди. Башга сөзлә, верилән ҹәза өз мәгсәдинә чатды. Бәс мәгсәд нә иди? Ону төвбәјә тәшвиг етмәк (Ибр. 12:11).

 8. Булус јығынҹаға даһа нә етмәји бујурду?

⁸ Буна ҝөрә дә Булус јығынҹаға белә бир ҝөстәриш верир: ҝүнаһ ишләјән гардашы «мәрһәмәт ҝөстәриб бағышлајын вә она тәсәлли верин», «ону севдијинизә инандырын». Булусун сөзләриндән ҝөрүндүјү кими һәмин инсаны Аллаһын халгынын арасына гәбул етмәк кифајәт дејилди. Булус истәјирди ки, јығынҹаг сөзү, давранышы вә һәрәкәти илә төвбә едән инсаны үрәкдән бағышладығыны вә ону севдијини ҝөстәрсин. Белә олан һалда һәмин инсан һисс едәҹәкди ки, јығынҹаг онун ҝери гајытмасына севинир.

 9. Нәјә ҝөрә бәзиләринә төвбә едән гардашы бағышламаг чәтин ола биләрди?

⁹ Бәлкә дә, төвбә едән инсан јығынҹагда бәрпа олунанда бәзиләри үчүн ону гәбул етмәк асан дејилди. Дүздүр, бунунла бағлы һеч нә јазылмаса да, белә бир шејин олдуғуну еһтимал етмәк олар. Чүнки һәмин инсанын һәрәкәтләри бүтүн јығынҹагда мүәјјән проблемләр јаратмышды вә бәлкә дә, кимләрисә башгаларынын јанында башыашағы етмишди. Бәзиләри исә, ола билсин, ону јенидән јығынҹаға гәбул етмәји әдаләтсизлик һесаб едирди. Чүнки онлар әхлагларыны тәмиз сахламаг үчүн әлләшиб-вурушдуглары һалда, һәмин инсан ҹидди ҝүнаһлар ишләмишди. (Лука 15:28—30 ајәләри илә әлагәләндирин.) Бүтүн бунлара бахмајараг, нәјә ҝөрә јығынҹагдакыларын төвбә едән гардаша севҝи ҝөстәрмәси ваҹиб иди?

10, 11. Јығынҹаг төвбә едән инсаны бағышламаг истәмәсәјди, нә баш верә биләрди?

¹⁰ Тәсәввүр едирсиниз, әҝәр ағсаггаллар үрәкдән төвбә едән инсанын јенидән јығынҹаға гајытмасына разы олмасајдылар, јахуд да о, ҝери гајыдандан сонра баҹы-гардашлар она мәһәббәт ҝөстәрмәсәјдиләр, бу она неҹә тәсир едәрди? Һәмин инсан «һәдсиз кәдәрә» гәрг оларды. Дүшүнәрди ки, нә етсә дә хејри јохдур. Һәтта, ола билсин, о, Јеһова илә мүнасибәтләрини бәрпа етмәк үчүн даһа һеч бир ҹәһд ҝөстәрмәјәҹәкди.

¹¹ Ән бетәри исә о иди ки, баҹы-гардашлар төвбә едән инсаны бағышламасајдылар, Јеһова илә өз мүнасибәтләрини тәһлүкә алтына атмыш олардылар. Чүнки бунунла онлар ҝүнаһкары бағышламаға һазыр олан Јеһоваја јох, гәддар вә рәһмсиз олан Шејтана бәнзәмиш олардылар. Бир нөв Иблисин әлиндә бир аләт олуб, һәмин инсанын руһани ҹәһәтдән јыхылмасына баис ола биләрдиләр (2 Кор. 2:10, 11; Ефес. 4:27).

12. Коринфдәки јығынҹаг Јеһованын нүмунәсини неҹә изләјә биләрди?

¹² Бәс онда Коринфдәки јығынҹаг Шејтана јох, Јеһоваја бәнзәмәк үчүн нә етмәли иди? Онлар Јеһовадан нүмунә ҝөтүрүб төвбә едән инсаны бағышламалы идиләр. Ҝәлин ҝөрәк Мүгәддәс Китабын бәзи јазарлары Јеһова барәдә нә демишди. Давуд Јеһованын кәрамәтли, бағышлајан олдуғуну гејд етмишди (Зәб. 86:5). Микә јазмышды: «[Инсанын] ҝүнаһыны бағышлајан, асилијини әфв едән Сәнин кими Аллаһ вармы?» (Мик. 7:18). Әшија исә белә демишди: «Гој пис адам пис  јолуну, шәр адам шәр фикирләрини атсын. Гој Јеһоваја тәрәф дөнсүн, она мәрһәмәт ҝөстәрәр. Аллаһымыза тәрәф гајытсын, ону ҹомәрдликлә әфв едәр» (Әшј. 55:7).

13. Нәјә ҝөрә Коринфдәки адамы јығынҹагда бәрпа етмәк дүзҝүн иди? (« Коринф јығынҹағындакы киши нечә мүддәтдән сонра бәрпа олунду?» адлы чәрчивәјә бахын.)

¹³ Коринфдәки јығынҹаг Јеһовадан нүмунә ҝөтүрәрәк төвбә едән инсаны бағышламалы вә ону севдијини ҝөстәрмәли иди. Онлар Булусун сөзүнә әмәл едиб төвбә едән инсаны гәбул етмәклә «һәр мәсәләдә итаәткар» олдугларыны ҝөстәрәҹәкдиләр (2 Кор. 2:9). Дүздүр, онунла бағлы ҝөрүлән тәдбирин үстүндән ҹәми бир нечә ај кечмишди, амма алдығы ҹәза ишә јарамышды, о, төвбә етмишди. Она ҝөрә дә бу инсаны бәрпа етмәји ҝеҹикдирмәјин бир мәнасы јох иди.

ЈЕҺОВАНЫН ӘДАЛӘТИНДӘН ВӘ МӘРҺӘМӘТИНДӘН ӨРНӘК АЛЫН

14, 15. Коринфдәки јығынҹагда баш верәнләрдән нә өјрәнирик? (2 Бутрус 3:9; һәмчинин шәклә бахын.)

¹⁴ Коринф јығынҹағындакы һадисә вә онун неҹә һәлл олунмасы «бизә нәсиһәт олараг јазылыб» (Ром. 15:4). Бу һадисәдән өјрәнирик ки, Јеһова хидмәтчиләринин ҹидди ҝүнаһ ишләмәсинә ҝөз јуммур. О, бәзиләри кими дүшүнмүр ки, төвбә етмәјән инсана «мәрһәмәт» ҝөстәрилмәли вә јығынҹагда галмасына изин верилмәлидир.  Дүздүр, Јеһова мәрһәмәтлидир, амма инсанын истәдијини етмәсинә ҝөз јуммур, О Өз нормаларыны ашағы салмыр (Јһд. 4). Јеһова төвбә етмәјән инсанын јығынҹагда галмасына изин версә иди, бу һеч дә мәрһәмәтли һәрәкәт олмајаҹагды. Чүнки бунунла јығынҹагда оланларын һамысыны тәһлүкәјә атмыш оларды (Мәс. 13:20; 1 Кор. 15:33).

¹⁵ Бунунла белә, билирик ки, Јеһова һеч кәсин өлмәсини истәмир. О, мүмкүн олдуғу гәдәр инсанлары хилас етмәк истәјир. Јеһова инсанын јахшылыға доғру дәјишдијини вә Онунла мүнасибәтини бәрпа етмәк истәдијини ҝөрәндә она мәрһәмәт ҝөстәрир (Һизг. 33:11; 2 Бутрус 3:9 ајәсини охујун). Буна ҝөрә дә Коринфдәки киши төвбә едәндә вә ҝүнаһлы әмәлләринә сон гојанда Јеһова Булус васитәсилә јығынҹаға изаһ етди ки, ону бағышламаг вә гәбул етмәк лазымдыр.

16. Коринф јығынҹағындакы мәсәлә барәдә өјрәндикләриниз сизә неҹә тәсир бағышлады?

¹⁶ Биз Коринф јығынҹағындакы мәсәләнин неҹә һәлл олундуғуну нәзәрдән кечирдик. Бу һадисәдән Јеһованын мәһәббәтли олдуғуну, салеһлији, әдаләти севдијини ҝөрдүк (Зәб. 33:5). Адамын үрәјиндән Јеһоваја мәдһләр сөјләмәк кечир! Ахы һамымыз ҝүнаһлыјыг вә Онун әфвинә мөһтаҹыг. Јеһованын вердији фидјә гурбанлығына ҝөрә һәр биримиз миннәтдар олмалыјыг, чүнки ҝүнаһларымыз онун сајәсиндә бағышланыр. Јеһованын Өз халгыны севдијини вә онларын рифаһыны дүшүндүјүнү билмәк гәлбимизә раһатлыг, тәсәлли верир!

17. Нөвбәти мәгаләдә һансы суаллары арашдыраҹағыг?

¹⁷ Бәс бу ҝүн ҹидди ҝүнаһ ишләмиш мәсиһинин мәсәләсинә неҹә бахылыр? Ағсаггаллар Јеһованын мәһәббәтини өрнәк алыб ҝүнаһ ишләјән инсаны төвбәјә неҹә тәшвиг едә биләр? Киминсә артыг Јеһованын Шаһиди олмадығы вә ја јығынҹагда бәрпа олундуғу елан олунанда баҹы-гардашлар буна неҹә јанашмалыдыр? Нөвбәти мәгаләдә бу суалларын ҹавабыны өјрәнәҹәјик.