1, 2. а) Јеһова төвбә етмәјән инсанлара неҹә јанашыр? б) Јеһова ҹидди ҝүнаһ ишләјән инсанларын нә етмәсини истәјир?

 ЈЕҺОВА һәр давранышы ҝөтүрмүр. О, ҝүнаһа нифрәт едир (Зәб. 5:4—6). Јеһова истәјир ки, биз Кәламында бизим үчүн гојдуғу нормалара әмәл едәк. Сөзсүз ки, Јеһова гејри-камил инсандан камиллик ҝөзләмир (Зәб. 130:3, 4). Бунунла белә, О, «азғынлыг етмәк үчүн [Онун] лүтфүнү бәһанәјә чевирән» аллаһсыз адамларын һәрәкәтинә ҝөз јуммур (Јһд. 4). Мүгәддәс Китабда дејилдији кими Армаҝеддон мүһарибәсиндә аллаһсызлар мәһв едиләҹәк (2 Бут. 3:7; Вәһј 16:16).

² Бунунла белә, Јеһова һеч кәсин мәһв олмасыны истәмир. Бу силсилә мәгаләләрдән артыг өјрәндијимиз кими Јеһова истәјир ки, «һамы төвбәјә ҝәлсин» (2 Бут. 3:9). Ағсаггаллар Јеһовадан нүмунә ҝөтүрәрәк ҝүнаһ едән инсана сәбирлә көмәк етмәјә чалышырлар. Онун төвбә етмәси вә јенидән Јеһоваја јахынлашмасы үчүн әлләриндән ҝәләни едирләр (Әшј. 6:9). Амма һеч дә бүтүн ҝүнаһ ишләјән инсанлар төвбә етмәк истәмир. Ағсаггаллар дәфәләрлә көмәк етмәјә чалышса да, бәзиләри ҝүнаһлы әмәлләриндән әл чәкмир. Белә вәзијјәтдә ағсаггаллар нә етмәлидир?

 «ПИС АДАМЫ АРАНЫЗДАН ЧЫХАРЫН»

 3. а) Мүгәддәс Китаба әсасән инсан төвбә етмәјәндә ағсаггаллар нә етмәлидир? б) Нәјә ҝөрә демәк олар ки, инсанын артыг Јеһованын Шаһиди олмамасы мүәјјән мәнада онун өз сечимидир?

³ Инсан төвбә етмәјәндә ағсаггалларын 1 Коринфлиләрә 5:13 ајәсиндә јазылана ујғун давранмагдан башга чарәси галмыр. Орада јазылыб: «Пис адамы араныздан чыхарын». Ағсаггаллар гәрар верир ки, белә инсан Јеһованын Шаһиди кими гала билмәз. Мүәјјән мәнада бу, ҝүнаһ ишләјән инсанын өз сечимидир, о өз әкдијини бичир (Гал. 6:7). Нәјә ҝөрә белә демәк олар? Чүнки ағсаггаллар она ҝүнаһындан әл чәкиб төвбә етмәси үчүн дәфәләрлә көмәк етсә дә, о дәјишмәк истәмәјиб (2 Пад. 17:12—15). О өз давранышы илә ҝөстәрир ки, Јеһованын ганунларына ујғун јашамаг истәмир (Ган. 30:19, 20).

 4. Нәјә ҝөрә төвбә етмәјән инсанын артыг Јеһованын Шаһиди олмадығы јығынҹагда елан едилир?

⁴ Инсан ҝүнаһындан төвбә етмирсә, артыг онун Јеһованын Шаһиди олмадығы барәдә јығынҹагда елан едилир. Бу еланын мәгсәди инсаны утандырмаг дејил. Бу онун үчүндүр ки, баҹы-гардашлар Мүгәддәс Китаб мәсләһәтинә ујғун давраныб онунла даһа отуруб-дурмасын вә һәтта бир сүфрәјә дә әјләшмәсин (1 Кор. 5:9—11). Јеһованын бу әмри вермәси әбәс јерә дејил. Һәвари Булус јазмышды: «Азаҹыг маја бүтүн хәмири аҹыдыр» (1 Кор. 5:6). Төвбә етмәјән инсанла бағлы тәдбир ҝөрүлмәсә, кимдәсә елә фикир јаранар ки, Јеһованын ганунларына әмәл етмәјин бир мәнасы јохдур (Мәс. 13:20; 1 Кор. 15:33).

 5. Артыг Јеһованын Шаһиди олмајан инсана неҹә јанашмалыјыг вә нәјә ҝөрә?

⁵ Бәс артыг Јеһованын Шаһиди олмајан диндашымыза неҹә јанашмалыјыг? Биз онунла мүнасибәти кәссәк дә, дүшүнмәјәҹәјик ки, даһа онун дәјишәҹәјинә һеч бир үмид јохдур. Она Јеһованын итмиш гузусу кими јанашаҹағыг. Ахы итмиш гузунун сүрүјә ҝери гајытмасы мүмкүндүр. Унутмајын, һәмин инсан өзүнү Јеһоваја һәср едиб. Әфсуслар олсун ки, о, һал-һазырда һәср олунмасына ујғун давранмыр вә бу вәзијјәт онун үчүн тәһлүкәлидир (Һизг. 18:31). Бунунла белә, нә гәдәр ки Јеһованын мәрһәмәт гапысы ачыгдыр, һәмин инсанын ҝери гајыдаҹағына үмид вар. Ағсаггаллар артыг Јеһованын Шаһиди олмајан инсандан үмидләрини үзмәдикләрини неҹә ҝөстәрә биләрләр?

АҒСАГГАЛЛАРЫН КӨМӘЈИ

 6. Ағсаггаллар инсана јығынҹаға гајытмаға неҹә көмәк едәҹәкләр?

⁶ Инсанын артыг Јеһованын Шаһиди олмамасы о демәкдирми ки, һамы ондан үз дөндәриб вә Јеһоваја ҝери дөнмәк үчүн өзү һансыса бир јол тапмалыдыр? Хејр. Ағсаггаллар комитәси она артыг Јеһованын Шаһиди олмадығыны билдирәндән сонра јенидән јығынҹаға гајытмасы үчүн һансы аддымлары атмалы олдуғуну изаһ едәҹәк. Амма иш бунунла битмәјәҹәк. Әксәр һалларда комитә һәмин инсанын дүшүнҹәсинин дәјишиб-дәјишмәдијини өјрәнмәк үчүн онунла бир нечә ајдан сонра јенидән ҝөрүшмәк истәдијини дејәҹәк. Әҝәр ҝүнаһ едән кәс разылашса, ағсаггаллар һәмин ҝөрүш заманы ону төвбә едиб ҝери гајытмаға тәшвиг едәҹәкләр. Һәтта һәмин вахт онун дүшүнҹәсиндә јахшылыға доғру дәјишиклик олмаса да, ағсаггаллар ҝәләҹәкдә јенә дә онунла ара-сыра ҝөрүшмәјә чалышаҹаглар.

 7. Ағсаггаллар Јеһовадан өрнәк ҝөтүрәрәк артыг Онун Шаһиди олмајан инсанла неҹә давранырлар? (Әрәмја 3:12).

 ⁷ Ағсаггаллар Јеһовадан өрнәк ҝөтүрәрәк артыг Онун Шаһиди олмајан инсанла шәфгәтлә давранырлар. Мәсәлән, Јеһова гәдимдә исраиллиләрә көмәк етмәк үчүн онларын әввәлҹә төвбә етмәсини ҝөзләмирди. Онларда төвбәдән әсәр-әламәт олмадығы һалда, јанларына пејғәмбәрләрини ҝөндәрирди. Бу силсилә мәгаләләрин икинҹисиндә дејилирди ки, Јеһова Һушә пејғәмбәрә арвадыны бағышламағы бујурмушду, һалбуки арвады ҹидди ҝүнаһ етмәјә давам едирди. Бу јолла Јеһова чох шәфгәтли олдуғуну ҝөстәрмишди (Һушә 3:1; Мәл. 3:7). Ағсаггаллар Јеһовадан нүмунә ҝөтүрәрәк ҝүнаһ едән инсанын ҝери гајытмасыны үрәкдән истәјирләр вә буну онлар үчүн чәтинләшдирмирләр. (Әрәмја 3:12 ајәсини охујун.)

 8. Иса Мәсиһин итмиш оғул һагда мәсәли Јеһованын рәһмли вә мәрһәмәтли олдуғуну неҹә ҝөстәрир? (Лука 15:7).

⁸ Бу силсилә мәгаләләрин икинҹисиндә Иса Мәсиһин итмиш оғул һагда чәкдији мәсәлдән данышылырды. Ата евә гајыдан оғлуну ҝөрән кими «габағына гачыб онун бојнуна сарылды вә нәвазишлә өпдү» (Лука 15:20). Фикир вердинизсә, ата оғлунун јалварыб әфв диләмәсини ҝөзләмәди. Әксинә, өвладыны севән һәр бир ата кими илк аддымы өзү атды. Ағсаггаллар Јеһовадан узаглашан инсанлара мәһз бу мүнасибәти ҝөстәрмәјә чалышырлар. Онлар итмиш гузуларын “евә гајытмасыны” истәјир (Лука 15:22—24, 32). Ҝүнаһкар инсан Јеһоваја ҝери дөнәндә һәм ҝөјдә, һәм дә јердә бөјүк севинҹ јашаныр. (Лука 15:7 ајәсини охујун.)

 9. Јеһова ҝүнаһ едән инсанлары меһрибанҹасына нәјә тәшвиг едир?

⁹ Бура гәдәр ҝөрдүк ки, Јеһова төвбә етмәјән инсанын јығынҹагда галмасына ҝөз јуммур. Амма О, һәмин инсандан үз чевирмир, онун ҝери дөнмәсини истәјир. Јеһова төвбә едиб Она ҝери дөнәнләрә гаршы һансы һиссләри кечирир? Ҝөрүн Һушә 14:4 ајәсиндә нә јазылыб: «Мән онлары хәјанәт азарындан сағалдаҹағам. Көнлүм онлары севәҹәк, чүнки онлара гаршы гәзәбим кечди». Ҝөрүн бу, ағсаггаллар үчүн неҹә ҝүҹлү стимулдур! Онлар инсанда төвбәјә ишарә едән һәр һансы әламәти ҝөрмәјә чалышмалыдырлар. Бу, Јеһовадан узаглашан инсанларын да јубанмадан ҝери дөнмәси үчүн ҝүҹлү әсасдыр.

10, 11. Ағсаггаллар артыг узун илләрдир Јеһованын Шаһиди олмајан инсана неҹә көмәк едәҹәк?

¹⁰ Бәс инсанын артыг Јеһованын Шаһиди олмамасынын үстүндән бир нечә ил, һәтта узун илләр кечибсә, онда неҹә? Бәзиләри, бәлкә дә, пис әмәлләриндән чохдан әл чәкибләр, һәтта ола билсин, о вахт һансы ҝүнаһы етдикләрини һеч хатырламырлар. Нә гәдәр вахт кечмәсиндән асылы олмајараг, ағсаггаллар онларла әлагә сахламаға чалышмалы вә онлары зијарәт етмәлидирләр. Бу кими зијарәтләр вахты онлар һәмин инсанла бирҝә дуа едәҹәкләр вә меһрибанлыгла ону јығынҹаға гајытмаға тәшвиг едәҹәкләр. Инсан узун илләрдир јығынҹагдан узаг дүшдүјү үчүн, сөзсүз ки, иманы хејли зәифләјиб. Буна ҝөрә дә әҝәр о, јығынҹаға дөнмәк истәдијини дејирсә, һәтта бәрпа олунмамышдан әввәл ағсаггаллар киминсә онунла дәрс кечмәсини тәшкил едә биләрләр. Һәмин инсанла Мүгәддәс Китаб дәрсини кимин кечәҹәјинә ағсаггаллар гәрар верәҹәкләр.

 ¹¹ Јеһова чох рәһмлидир. Ағсаггаллар Ондан нүмунә ҝөтүрмәјә чалышырлар. Онлар Јеһовадан узаглашан кәсләрин мүмкүн гәдәр һамысыны тапыб Она ҝери дөнмәјә тәшвиг етмәк истәјирләр. Инсан төвбә едиб вә ҝүнаһлы әмәлләринә сон гојубса, ону ҝеҹикдирмәдән бәрпа етмәк олар (2 Кор. 2:6—8).

12. а) Ағсаггаллар һансы мәсәләләрдә хүсусилә еһтијатлы давранмалыдырлар? б) Бәзи инсанларын һеч вахт Јеһованын мәрһәмәтини газана билмәјәҹәкләрини дүшүнмәк нәјә ҝөрә јанлыш оларды? (Һәмчинин һашијәјә бахын.)

¹² Бәзи һалларда ағсаггаллар кимисә бәрпа етмәздән әввәл хүсусилә еһтијатлы давранмалыдыр. Мәсәлән, әҝәр инсан ушаға гаршы зоракылыг едибсә, дөнүк олубса, јахуд  никаһына сон гојмаг үчүн фәнд ишләдибсә (ола билсин, бунун үчүн зина едиб), ағсаггаллар онун һәгигәтән дә төвбә етдијинә әмин олмаг үчүн мәсәләни јахшы-јахшы арашдырмалыдырлар (Мәл. 2:14; 2 Тим. 3:6). Чүнки онлар јығынҹағы горумаг мәсулијјәтини дашыјырлар. Ејни заманда баша дүшмәк лазымдыр ки, Јеһова төвбә едән вә ҝүнаһына сон гојан истәнилән инсаны бағышлајыр. Демәли, ағсаггаллар башгалары илә хаинҹәсинә давранан инсанларын һәгигәтән дә төвбә етдијини билмәк үчүн јүз өлчүб бир бичирләр. Бунунла белә, онлар дүшүнмәмәлидир ки, бу ҹүр инсанлар һеч вахт Јеһованын мәрһәмәтини газана билмәз a (1 Бут. 2:10).

ЈЫҒЫНҸАҒЫН ӨҺДӘСИНӘ НӘ ДҮШҮР?

13. Төһмәт алан инсанла неҹә рәфтар етмәлијик? Артыг Јеһованын Шаһиди олмајан инсанла неҹә рәфтар етмәлијик?

¹³ Әввәлки мәгаләдә арашдырдығымыз кими бәзән инсанын төһмәт алдығы елан едилир. Белә һалда биз онунла данышмаға давам едә биләрик, чүнки о, төвбә едиб вә пис әмәлиндән дөнүб (1 Тим. 5:20). О, һәлә дә јығынҹағын бир парчасыдыр вә диндашлары илә үнсијјәт едиб руһланмаға еһтијаҹы вар (Ибр. 10:24, 25). Амма киминсә артыг Јеһованын Шаһиди олмадығы елан едиләндә башга ҹүр давранырыг. Биз һәмин инсанла даһа отуруб-дурмуруг, беләси илә һәтта бир сүфрәјә дә әјләшмирик (1 Кор. 5:11).

14. Мәсиһи артыг Јеһованын Шаһиди олмајан инсанла Мүгәддәс Китаб әсасында тәрбијә олунмуш виҹданына әсасән неҹә даврана биләр? (Һәмчинин шәклә бахын.)

¹⁴ Бәс бу о демәкдир ки, артыг Јеһованын Шаһиди олмајан инсанла јохмуш кими давранмалыјыг? Хејр. Ајдын мәсәләдир ки, биз онунла сөһбәт етмәјәҹәјик вә вахт кечирмәјәҹәјик. Амма мәсиһи Мүгәддәс Китаб әсасында тәрбијә олунмуш виҹданына әсасән ону јығынҹаға дәвәт етмәк гәрарына ҝәлә биләр. Ола билсин, һәмин инсан онун гоһумудур вә ја әввәлләр достлу олуб. Бәс о, јығынҹаға ҝәләрсә, она һансы мүнасибәти ҝөстәрмәлијик? Әввәлләр белә инсанларла саламлашмырдыг. Һәр бир мәсиһи  бу мәсәләдә дә Мүгәддәс Китаб әсасында тәрбијә олунмуш виҹданына ујғун давранмалыдыр. Бәзиләри белә гәрара ҝәлә биләр ки, онунла саламлашсын вә ја бир-ики хош сөзлә «хош ҝәлдин» десин. Амма биз онунла узун-узады данышмамалы, јахуд бирликдә вахт кечирмәмәлијик.

15. 2 Јәһја 9—11 ајәләриндә һансы ҝүнаһ саһибләриндән сөһбәт ҝедир? (Һәмчинин « Јәһја илә Булус ејни ҹүр ҝүнаһдан данышырды?» адлы чәрчивәјә бахын.)

¹⁵ Бәзиләри соруша биләр: «Бәс Мүгәддәс Китабда јазылмајыб ки, бу инсаны “саламлајан онун пис әмәлләринә шәрик олур”?» (2 Јәһја 9—11 ајәләрини охујун.) Бу ајәнин контекстиндән ҝөрмәк олар ки, бурада сөһбәт дөнүкләрдән вә ҝүнаһлы һәјат тәрзини фәал шәкилдә тәблиғ едән диҝәр инсанлардан ҝедир (Вәһј 2:20). Буна ҝөрә дә әҝәр инсан дөнүк тәлимләри, јахуд ҝүнаһлы әмәлләри фәал шәкилдә тәблиғ едирсә, ағсаггаллар ону зијарәт етмәјәҹәк. Әлбәттә, о инсанын төвбә едәҹәјинә һәлә дә үмид вар, амма о вахта гәдәр мәсиһиләр белә инсаны нә саламлајаҹаг, нә дә ибадәт ҝөрүшүнә дәвәт едәҹәк.

МӘРҺӘМӘТЛИ ВӘ РӘҺМЛИ АЛЛАҺДАН НҮМУНӘ ҜӨТҮРҮН

16, 17. а) Јеһованын ҝүнаһ едән инсанларла бағлы истәји нәдир? (Һизгијал 18:32). б) Ағсаггаллар Јеһова илә әмәкдашлыг етдикләрини неҹә ҝөстәрә биләрләр?

¹⁶ Бу бешһиссәли силсилә мәгаләләрдән нә өјрәндик? Јеһова һеч кәсин мәһв олмасыны истәмир. (Һизгијал 18:32 ајәсини охујун.) О, ҝүнаһ ишләјән инсанларын Онунла барышмасыны истәјир (2 Кор. 5:20). Елә буна ҝөрә дә тарих боју Аллаһ Она аси чыхан хидмәтчиләрини төвбә етмәјә, Она ҝери дөнмәјә сәсләјиб. Ағсаггаллара Јеһова илә әмәкдашлыг етмәк шәрәфи нәсиб олуб: онлар ҝүнаһ едән инсанын төвбә етмәсинә көмәк едирләр (Ром. 2:4; 1 Кор. 3:9).

¹⁷ Ҝүнаһ едән инсан төвбә едәндә ҝөјдә нә гәдәр севинҹ јашандығыны тәсәввүр етмәк олар! Сәмави Атамыз Јеһова јығынҹаға гајыдан һәр итмиш гузуја ҝөрә чох севинир. Јеһованын рәһми, мәрһәмәти вә хејирхаһлығы барәдә дүшүнәндә Она олан севҝимиз даһа да артыр (Лука 1:78).