Һәвари Булус Салоникидәки мәсиһиләрә јазмышды: «Кимсә бу мәктубда дедикләримизә итаәт етмирсә, ону нәзәрдә сахлајын» (2 Салон. 3:14). Әввәлләр биз елә дүшүнүрдүк ки, бу, ағсаггаллара верилән ҝөстәришдир. Әҝәр кимсә дәфәләрлә верилән мәсләһәтә мәһәл гојмајыб, Мүгәддәс Китаб принсипләрини позмаға давам едирдисә, ағсаггаллар јығынҹағы хәбәрдар етмәк үчүн нитг сөјләјә биләрдиләр. Бу нитгдән сонра тәблиғчиләр даһа онунла вахт кечирмирдиләр.

Амма бу мәсәләдә дәјишиклик етмәјә еһтијаҹ вар. Инди баша дүшүрүк ки, Булусун бу мәсләһәти һәр бир мәсиһинин шәхсән вермәли олдуғу гәрара аиддир. Буна ҝөрә дә ағсаггалларын јығынҹағы хәбәрдар етмәк үчүн нитг сөјләмәсинә еһтијаҹ јохдур. Бәс белә бир дәјишиклијин едилмәсинә сәбәб нәдир? Ҝәлин Булусун вердији мәсләһәтин контекстинә нәзәр салаг.

Булус гејд етмишди ки, јығынҹагда «бәзиләри низам-интизамы позур». Онлара Мүгәддәс Китаб әсасында мәсләһәт верилсә дә, мәһәл гојмурдулар. О, әввәлки зијарәти заманы белә бир ҝөстәриш вермишди: «Ишләмәк истәмәјән јемәк дә јемәсин». Буна бахмајараг, бәзиләри өзләрини доландырмаг үчүн ишләмәк истәмирдиләр, һалбуки буна мане олан һеч нә јох иди. Бундан әлавә, онлар башгаларынын ишинә гарышырдылар. Јығынҹагдакылар бу ҹүр инсанларла неҹә давранмалы иди? (2 Салон. 3:6, 10—12).

Булус «ону нәзәрдә сахлајын» демишди. Бу јунан ифадәси «һәмин инсанла мүнасибәтдә еһтијаты әлдән вермәмәк» мәнасыны верир. Булус бу ҝөстәриши тәкҹә ағсаггаллара јох, бүтүн јығынҹаға вермишди (2 Салон. 1:1; 3:6). Демәли, диндашынын Мүгәддәс Китабдакы мәсләһәтә итаәтсизлик етдијини ҝөрән һәр бир мәсиһи «онунла јолдашлыг» етмәмәк гәрарыны верәҹәкди.

Бәс бу о демәкдирми ки, һәмин инсанла төвбә етмәјән ҝүнаһкарла даврандығымыз кими давранаҹағыг? Хејр. Булус сөзүнүн давамында белә демишди: «Ону... гардаш сајыб өјүд-нәсиһәт верин». Демәли, мәсиһиләр һәмин инсанла јығынҹагда вә хидмәтдә үнсијјәт едәҹәкди, амма онунла асудә вахт кечирмәјәҹәк, бирликдә истираһәт етмәјәҹәкди. Нәјә ҝөрә? Булус демишди: «Гој о, һәрәкәтинә ҝөрә хәҹаләт чәксин». Ола билсин, низам-интизамы позан мәсиһи башгаларынын онунла вахт кечирмәдијини ҝөрүб һәрәкәтинә ҝөрә хәҹаләт чәкәҹәкди (2 Салон. 3:14, 15).

Бу ҝүн мәсиһиләр бу мәсләһәтә неҹә әмәл едә биләр? Илк нөвбәдә мүәјјән етмәлијик ки, доғруданмы инсанын һәрәкәти Булусун дедији кими «низам-интизамы позан һәрәкәтдир». Булус виҹдан вә ја шәхси сечим мәсәләсиндә биздән фәргли гәрар верән инсанлардан данышмырды. Һәмчинин о, хәтримизә дәјән инсанлары да нәзәрдә тутмурду. Булус бурада Мүгәддәс Китабдан верилмиш конкрет мәсләһәти гулагардына вуруб, өз билдији кими давранан инсанлардан данышырды.

Бу ҝүн диндашымызда бу ҹүр итаәтсизлик руһу ҝөрүрүксә a, гәрар верәҹәјик ки, асудә вахтымызы онунла бирликдә кечирмәјәк. Нәзәрә алсаг ки, бу, шәхси гәрардыр, бу барәдә аилә үзвләримиздән башга һеч кимлә данышмајаҹағыг. Бунунла белә, һәмин инсанла јығынҹаг ҝөрүшләриндә вә хидмәтдә үнсијјәт едәҹәјик. О, әмәлини дүзәлдәндән сонра исә онунла јенидән әввәлки кими јолдашлыг едәҹәјик.