1, 2. Ибраниләрә 13:4 ајәси бизи нәјә тәшвиг едир?

ШҮБҺӘСИЗ, Јеһова Аллаһа дәрин һөрмәт бәсләјирсиниз! О, һәгигәтән дә, шәрәфә, һөрмәтә лајигдир вә Она ҝөстәрдијимиз һөрмәтин гаршылығында бизә һөрмәт едәҹәјинә сөз верир (1 Ишм. 2:30; Мәс. 3:9; Вәһј 4:11). Јеһова һәмчинин истәјир ки, биз мүәјјән груп инсанлара, мәсәлән, һакимијјәт нүмајәндәләринә һөрмәтлә јанашаг (Ром. 12:10; 13:7). Лакин һөрмәт ҝөстәрмәјимизин хүсусилә ваҹиб олдуғу бир саһә вар — никаһ.

² Һәвари Булус јазыр: «Гој һәр кәс никаһа һөрмәт етсин вә никаһ јатағы ләкәсиз олсун» (Ибр. 13:4). Булус садәҹә олараг никаһ һаггында үмуми фикир сөјләмирди. Бу, никаһа һөрмәтлә јанашмаг, ону дәјәрләндирмәк үчүн мәсиһиләрә үнванланмыш ҝөстәриш иди. Сиз дә никаһа бу ҹүр јанашырсыныз? Бәс өз никаһыныза неҹә?

3. Иса Мәсиһ никаһла бағлы һансы ваҹиб мәсләһәти вермишди? (Мәгаләнин әввәлиндәки шәклә бахын.)

³ Никаһа һөрмәт ҝөстәрмәклә сиз ән ҝөзәл нүмунәни изләмиш олурсунуз. Иса Мәсиһ никаһа һөрмәтлә јанашырды. Фәрисиләр она бошанма илә бағлы суал верәндә о, Аллаһын илк никаһла бағлы сөјләдији сөзләрә истинад едәрәк демишди: «Буна ҝөрә инсан ата-анасыны  тәрк едәҹәк вә икиси бир бәдән олаҹаг». Сонра әлавә етмишди: «Аллаһын бир бојундуругда бирләшдирдијини гој һеч кәс ајырмасын». (Марк 10:2—12 ајәләрини охујун; Јар. 2:24.)

4. Јеһова никаһа даир һансы норманы тәјин едиб?

⁴ Иса Мәсиһ бу сөзләри илә ҝөстәрирди ки, никаһ гурулушуну Аллаһ тәсис едиб вә бу гурулуш даими олмалыдыр. Аллаһ Адәмлә Һәвваја бошанараг никаһларына сон гојмағын мүмкүн олдуғуну демәмишди. Јеһованын Әдәндә никаһа даир тәсис етдији норма моногамија (тәкникаһлылыг), ики нәфәрин әбәди иттифагы иди.

5. Өлүмүн никаһ гурулушу үзәриндә һансы тәсири вар?

⁵ Билдијимиз кими, Адәмин ҝүнаһы мүәјјән дәјишикликләрлә нәтиҹәләнди. Бунлардан бири олан өлүм никаһ гурулушуна да тәсирсиз өтүшмәди. Буну һәвари Булусун Мусанын гануну алтында олмајан мәсиһиләрә јаздығы сөзләрдән дә ҝөрмәк олар. О изаһ етмишди ки, өлүм никаһа сон гојур, она ҝөрә дә һәјатда олан тәрәф јенидән аилә гура биләр (Ром. 7:1—3).

6. Мусанын гануну Аллаһын никаһа даир бахышыны неҹә әкс етдирирди?

⁶ Јеһованын Исраил халгына вердији Ганунда никаһла бағлы тәфсилатлар гејд олунуб. Мәсәлән, Ганунда полигамијаја (чохникаһлылыг) изин верилирди. Исраиллиләр арасында чохарвадлылыг Ганун верилмәздән өнҹә јајылмышды. Лакин Ганун бу адәти тәнзимләјир, гадынлара вә ушаглара гаршы пис рәфтары гадаған едирди. Мисал үчүн, исраилли киши гарабашы илә евләнәндән сонра башга арвад алардыса, биринҹини јемәк, ҝејим вә арвадлыг һаггындан мәһрум етмәмәли иди. Аллаһ тәләб едирди ки, әри онун гајғысына галсын вә горусун (Чых. 21:9, 10). Бу ҝүн Мусанын гануну алтында дејилик, лакин онун васитәсилә никаһын Јеһованын ҝөзүндә дәјәрли олдуғуну өјрәнирик. Мәҝәр бу бизи никаһа һөрмәт етмәјә тәшвиг етмир?

7, 8. а) Ганунун тәкрары 24:1 ајәсинә әсасән, Ганунда бошанма илә бағлы нә дејилирди? б) Јеһова бошанмаја неҹә бахыр?

⁷ Ганунда бошанма илә бағлы нә дејилирди? Јеһова никаһ гурулушуна һәмишә бөјүк еһтирам бәсләсә дә, Ганунда бошанмаға изин вермишди. (Ганунун тәкрары 24:1 ајәсини охујун.) Исраилли киши арвадында «ләјагәтсизлик» ҝөрәрдисә, ону бошаја биләрди. Ганунда ләјагәтсизлик дејиләндә нә нәзәрдә тутулдуғу изаһ олунмурду. Һәр һалда, сөһбәт ади инҹикликдән јох, ҹидди вә ја бијабырчы бир һәрәкәтдән ҝедирди (Ган. 23:14). Әфсус ки, Иса Мәсиһин јашадығы дөврдә јәһудиләрин әксәријјәти артыг «һәр сәбәбә ҝөрә» бошанырды (Мәт. 19:3). Әлбәттә, биз никаһа онлар кими јанашмаг истәмәрик.

⁸ Мәлаки пејғәмбәр Јеһованын никаһа мүнасибәтинә ајдынлыг ҝәтирир. Һәмин дөврдә кишиләрин ҹаванлыгда евләндикләри арвадларыны хаинҹәсинә бошајыб бүтпәрәст милләтдән олан даһа ҹаван гадынла евләнмәси ҝениш јајылмышды. Пејғәмбәр Аллаһын буна неҹә јанашдығы һагда јазыр: «Мән бошанмаја нифрәт едирәм» (Мәл. 2:14—16). Бу, Аллаһын Кәламында илк никаһла бағлы јазыланларла вәһдәт тәшкил едир: «[Киши] арвадына бағланаҹаг вә онлар бир бәдән олаҹаг» (Јар. 2:24). Иса Мәсиһ дә Атасынын никаһа бахышыны әкс етдирирди. О демишди: «Аллаһын бир бојундуругда бирләшдирдијини гој һеч кәс ајырмасын» (Мәт. 19:6).

9. Иса Мәсиһин Марк 10:11, 12 ајәләриндә јазылмыш сөзләрини неҹә баша дүшмәк олар?

⁹ Кимсә суал верә биләр: «Мәсиһинин бошанмаға вә јенидән евләнмәјә һәр һансы әсасы вар?» Иса Мәсиһ бошанмаја  мүнасибәти илә бағлы демишди: «Арвадыны бошајыб башгасы илә евләнән бошадығы арвада гаршы зина едир. Ејнилә дә әриндән бошаныб башгасына әрә ҝедән гадын зина етмиш олур» (Марк 10:11, 12; Лука 16:18). Ҝөрүндүјү кими, Мәсиһ никаһа һөрмәт едирди вә башгаларынын да һөрмәтлә јанашмасыны истәјирди. Һәр һансы бәһанә илә сәдагәтли һәјат јолдашындан бошанан вә башгасы илә аилә гуран әр вә ја арвад зина едир. Бу мәнтиглидир, чүнки бошанмаг өз-өзлүјүндә никаһа сон гојмур. Аллаһын ҝөзүндә онлар јенә дә бир бәдән олараг галыр. Үстәлик, Иса Мәсиһ демишди ки, ҝүнаһсыз арвадыны бошајан киши ону зинаја сүрүкләјир. Һансы мәнада? Һәмин дөврдә бошанмыш гадын бәзән доланышыг үчүн јенидән евләнмәјә мәҹбур олурду. Онун јенидән әрә ҝетмәси исә зинаја бәрабәр сајылырды.

10. Мәсиһи һансы сәбәбә ҝөрә бошана вә јенидән евләнә биләр?

¹⁰ Иса Мәсиһ никаһын позулмасына әсас верән сәбәб барәдә демишди: «Билин вә аҝаһ олун, ким арвадыны әхлагсызлыг [јунанҹа, порнеја] етдијинә ҝөрә дејил, башга сәбәбә ҝөрә бошајыб өзҝәси илә евләнирсә, зина едир» (Мәт. 19:9). О, Дағүстү вәзиндә дә буну вурғуламышды (Мәт. 5:31, 32). Иса Мәсиһ һәр ики вәзијјәтдә әхлагсызлығын адыны чәкмишди. Бу сөз алтында никаһданкәнар һәр нөв ҹинси әлагә нәзәрдә тутулур. Бураја һәјат јолдашына хәјанәт, фаһишәлик, һәмчинин никаһдан хариҹ ҹинси әлагә, ејни ҹинсләр арасында вә ја һејванла ҹинси әлагә дахилдир. Мәсәлән, әҝәр евли киши әхлагсызлыг едәрсә, гадын ондан бошаныб-бошанмамағы гәрарлашдырмагда сәрбәстдир. Әҝәр гадын бошанса, артыг онларын никаһы Аллаһын ҝөзүндә сона чатмыш олур.

11. Нәјә ҝөрә бошанмаға Мүгәддәс Китаб әсасы олан мәсиһи бошанмамаг гәрарына ҝәлә биләр?

¹¹ Гејд етмәк лазымдыр ки, Иса Мәсиһ әр-арвадларын әхлагсызлыға (порнеја) ҝөрә һөкмән бошанмалы олдуғуну демирди. Мисал үчүн, гадын әринин әхлагсызлыг етмәсинә бахмајараг, никаһыны горумаг гәрарына ҝәлә биләр. Ола билсин, о, һәлә дә әрини севир, ону бағышламаға вә әл-әлә вериб никаһларыны мөһкәмләндирмәјә һазырдыр.  Реаллыг ондан ибарәтдир ки, әҝәр гадын бошаныб јенидән аилә гурмаса, мүәјјән чәтинликләрлә үзләшәҹәк. Онун мадди вә ҹинси тәләбатларыны ким өдәјәҹәк? Бәс тәнһалыг һисси? Ушагларын ахыры неҹә олаҹаг? Бошанмаг ушагларыны һәгигәтдә бөјүтмәји чәтинләшдирмәјәҹәк ки? (1 Кор. 7:14). Ајдындыр ки, ҝүнаһсыз тәрәф бошандыгдан сонра ҹидди проблемләрлә үзләшәҹәк.

12, 13. а) Һушәнин никаһында нәләр баш вермишди? б) Нәјә ҝөрә Һушә Ҝүмәри ҝери ҝәтирди вә бундан никаһла бағлы нә өјрәнирик?

¹² Һушә пејғәмбәрин јашадыглары мәсәләјә даһа да ајдынлыг ҝәтирир. Аллаһ она Ҝүмәр адлы гадыны алмағы бујурур вә дејир ки, «о, зинакар олаҹаг вә сәнә биҹ өвладлар доғаҹаг». Ҝүмәр «һамилә галыб [Һушәјә] бир оғул» доғур (Һушә 1:2, 3). Сонра онун бир гызы вә бир оғлу да олур. Ҝөрүнүр, онларын икиси дә зина нәтиҹәсиндә дүнјаја ҝәлмишди. Ҝүмәрин дәфәләрлә зина етмәсинә бахмајараг, Һушә онунла никаһда галыр. Сонра гадын Һушәни тәрк едир вә гул олур. Амма Һушә ҝедиб ону ҝери алыр (Һушә 3:1, 2). Јеһова Һушәнин васитәсилә дәфәләрлә Она хәјанәт едән Исраил халгыны неҹә бағышладығыны ҝөстәрирди. Биз бу һадисәдән нә өјрәнирик?

¹³ Әҝәр мәсиһи әр вә ја арваддан бири әхлагсызлыг едәрсә, ҝүнаһсыз тәрәф гәрар гаршысында галаҹаг. Мәсиһ демишди ки, ҝүнаһсыз тәрәфин бошанмаға әсасы вар вә о, јенидән аилә гура биләр. Диҝәр тәрәфдән, ҝүнаһсыз тәрәф һәјат јолдашыны бағышлаја да биләр, бу, гәбаһәт дејил. Һушә Ҝүмәри ҝери ҝәтирмишди. Ҝүмәр ҝери гајыдандан сонра һеч бир киши илә јахынлыг етмәмәли иди. Һушә бир мүддәт Ҝүмәрлә јахынлыг етмәди (Һушә 3:3). Лакин мүәјјән вахтдан сонра онунла әр-арвадлыг мүнасибәтләрини бәрпа етди. Бу һадисә Јеһованын халгыны ҝери гајтармаға вә онларла мүнасибәтини бәрпа етмәјә һазыр олдуғуну символизә едирди (Һушә 1:11; 3:3—5). Буну буҝүнкү никаһлара неҹә аид етмәк олар? Ҝүнаһсыз тәрәф никаһыны горумаг гәрарына ҝәлиб ҝүнаһлы тәрәфлә ҹинси јахынлыг етсә, гаршы тәрәфи бағышладығыны ҝөстәрәҹәк (1 Кор. 7:3, 5). Беләҹә, бошанмаг үчүн олан әсас гүввәдән дүшәҹәк. Артыг бундан сонра онлар әр-арвад кими Јеһованын никаһа бахышыны әкс етдирмәјә чалышмалыдырлар.

14. 1 Коринфлиләрә 7:10, 11 ајәләринә әсасән, никаһда нәләр баш верә биләр?

¹⁴ Бүтүн мәсиһиләр Јеһова Аллаһ вә Иса Мәсиһдән нүмунә ҝөтүрәрәк никаһа һөрмәт бәсләмәјә чалышмалыдыр. Лакин гејри-камиллик уҹбатындан бәзиләри бу саһәдә чәтинлик чәкир (Ром. 7:18—23). Буна ҝөрә дә биринҹи әсрдә јашајан бәзи мәсиһиләрин никаһда бөјүк проблемләрлә үзләшмәси тәәҹҹүблү дејил. Һәвари Булусун онлара «арвад әриндән ајрылмасын» демәсинә бахмајараг, бәзән белә шејләр баш верирди. (1 Коринфлиләрә 7:10, 11 ајәләрини охујун.)

15, 16. а) Никаһдакы проблемләрә бахмајараг, мәгсәд нә олмалыдыр вә нәјә ҝөрә? б) Һәјат јолдашлары иманда олмајанлар бу мәсләһәти неҹә тәтбиг едә биләр?

¹⁵ Һәвари Булус ајрылмаға ҝәтириб чыхаран сәбәбләри изаһ етмәмишди. Мәсәлә әрин әхлагсызлыг етмәси вә арвадынын бошанмаг вә јенидән аилә гурмаға әсасынын олмасы дејилди. Һәвари Булус јазырды ки, әҝәр гадын әриндән ајрыларса, «онда әрә ҝетмәсин, ја да әри илә барышсын». Чүнки онлар һәлә дә Аллаһын ҝөзүндә бир бәдәндирләр. Һәвари гејд едирди ки, проблемин нәдән гајнагланмасындан асылы олмајараг, әҝәр зина олмајыбса, мәгсәд барышмаг олмалыдыр. Бу заман әр-арвад јығынҹағын ағсаггалларындан көмәк истәјә биләр. Ағсаггаллар да өз нөвбәсиндә тәрәф тутмадан Мүгәддәс Китаба әсасланан мәсләһәт вермәлидир.

 ¹⁶ Лакин иманда олан вә Аллаһын ганунларына ујғун јашамаға чалышан тәкҹә бир тәрәфдирсә, вәзијјәт чәтинләшә биләр. Бәс проблемләр јарананда мәсәләнин һәлли ајрылмаг олмалыдыр? Мүгәддәс Китабда ҹинси әхлагсызлығын бошанмаға әсас вердији гејд олунса да, орада ајрылмаға әсас верән мүхтәлиф сәбәбләр барәдә һеч нә јазылмајыб. Һәвари Булус демишди: «Һәр һансы бир гадынын әри иманда дејилсә, лакин онунла јашамаға разыдырса, гој гадын ондан ајрылмасын» (1 Кор. 7:12, 13). Бу бизим дөврүмүздә дә кечәрлидир.

17, 18. Нәјә ҝөрә бәзи мәсиһиләр проблемләрә бахмајараг, никаһларыны горујурлар?

¹⁷ Бәзән иманда олмајан әрин һәрәкәтләриндән ҝөрүнүр ки, о арвады илә «јашамаға разы» дејил. Мәсәлән, әр она гаршы физики ҝүҹ тәтбиг едир, һәтта иш о јерә чатыр ки, гадынын сағламлығы вә ја һәјаты үчүн тәһлүкә јарадыр. Јахуд арвадыны вә ја аиләсини доландырмагдан имтина едир вә ја онун руһанилији үчүн ҹидди тәһлүкә јарадыр. Белә һалларда әринин нә демәјинә бахмајараг, гадын шәхсән гәрара ҝәлә биләр ки, јолдашы «онунла јашамаға разы» дејил вә ајрылмалары зәруридир. Лакин бәзи мәсиһиләр бу кими чәтин вәзијјәтләрдә ајрылмамаға гәрар верирләр, онлар дөзүм ҝөстәрәрәк вәзијјәти дүзәлтмәк үчүн әлләриндән ҝәләни едирләр. Нәјә ҝөрә?

¹⁸ Бу вәзијјәтдә ајрылан ҹүтлүкләр һәлә дә әр-арвад сајылыр вә онлар ајрыларса, јухарыдакы абзасларда данышдығымыз чәтинликләрлә үзләшәҹәкләр. Һәвари Булус бирҝә јашамаға давам етмәк үчүн башга сәбәб дә вермишди: «Иманда олмајан әр арвады илә иттифагдан бәһрәләнир, ејнилә дә иманда олмајан арвад гардашымызла иттифагдан бәһрәләнир. Белә олмасајды, сизин ушагларыныз натәмиз олардылар, анҹаг бу һалда онлар мүгәддәсдирләр» (1 Кор. 7:14). Бир чох садиг мәсиһиләр никаһларында ҹидди проблемләрин олмасына бахмајараг, иманда олмајан һәјат јолдашларындан ајрылмајыблар. Сонралар һәјат јолдашлары һәгигәтә ҝәләндә онлар вахтилә бу ҹүр гәрар вердикләринә ҝөрә чох севинибләр. (1 Коринфлиләрә 7:16 ајәсини охујун; 1 Бут. 3:1, 2.)

19. Нә үчүн јығынҹагда хошбәхт никаһларын сајы чохдур?

¹⁹ Иса Мәсиһ бошанма илә бағлы, һәвари Булус исә ајры јашамагла бағлы Аллаһдан илһам алараг мәсләһәтләр вермишди. Һәр икиси дә Аллаһын хидмәтчиләринин никаһа һөрмәт етмәсини истәјирди. Бу ҝүн бүтүн дүнјадакы мәсиһи јығынҹагларында уғурлу никаһларын сајы чохдур. Јәгин сизин јығынҹагда да бу ҹүр никаһлар аз дејил. Бир-бирини севән бу вәфалы әр-арвадлар никаһа һөрмәтлә јанашмағын мүмкүн олдуғуна даир ҝөзәл нүмунәдирләр. Нә хош ки, милјонларла инсан Аллаһын Кәламындакы нөвбәти сөзләрин доғрулуғунун ҹанлы сүбутудур: «Буна ҝөрә дә киши өз ата-анасыны тәрк едиб арвадына бағланаҹаг вә икиси бир бәдән олаҹаг» (Ефес. 5:31, 33).