1, 2. Һәјатда мәгсәдләр гојанда нәјә ҝөрә Јараданымызын сөзүнә гулаг асмаг һикмәтли олар? (Мәгаләнин әввәлиндәки шәкилләрә бахын.)

ЈӘГИН КИ, бир ҝәнҹ кими сизә ҝәләҹәјинизлә бағлы чохлу мәсләһәтләр верилир. Ола билсин, мүәллимләр, методистләр, јахуд да башгалары сизи али тәһсил алмаға вә ҝәлирли карјера гурмаға истигамәтләндирир. Лакин Јеһова ҝәнҹләри фәргли истигамәтә јөнәлдир. Әлбәттә, Аллаһ ҝәләҹәкдә өзүнүзү тәмин едә билмәјиниз үчүн мәктәбдә әлиниздән ҝәлән гәдәр јахшы охумағынызы истәјир (Кол. 3:23). Лакин ону да билир ки, һәр бир ҝәнҹ ҝәләҹәјинә тәсир едәҹәк ваҹиб гәрарлар гаршысында галыр. Буна ҝөрә дә истәјир ки, сонун јахынлашдығы бир вахтда һәјатынызы Ону разы салан шәкилдә јашамағыныза көмәк едәҹәк принсипләри рәһбәр тутасыныз (Мәт. 24:14).

² Унутмајын ки, Јеһова вәзијјәти һәртәрәфли ҝөрүр. О, индики дүнјанын ҝәләҹәк агибәтини вә бу системин сонуна нә гәдәр галдығыны дәгиг билир (Әшј. 46:10; Мәт. 24:3, 36). Јеһова бизи дә јахшы таныјыр вә нәјин бизә хошбәхтлик, нәјин бәдбәхтлик ҝәтирәҹәјини билир. Буна ҝөрә дә инсанларын вердији мәсләһәтләр нә гәдәр мәнтигли сәсләнсә дә, әҝәр Аллаһын Кәламына әсасланмырса, онлары мүдрик мәсләһәт һесаб етмәк олмаз (Мәс. 19:21).

3, 4. Адәмлә Һәвванын пис мәсләһәтә гулаг асмасы онларын өзүнә вә ҝәләҹәк нәслинә неҹә тәсир етди?

³ Пис мәсләһәтин көкү лап гәдимә ҝедиб чыхыр. Илк пис мәсләһәт верән исә Шејтан олмушду. Шејтан өзүндәнразы шәкилдә Һәвваја мәсләһәт вермишди ки, һәјатлары илә бағлы гәрары өзләри версәләр, даһа хошбәхт ола биләрләр (Јар. 3:1—6). Һәгигәтдә исә онун нијјәти өз худбин истәкләрини тәмин етмәк иди. Шејтан истәјирди ки, Адәмлә Һәвва вә онларын ҝәләҹәк өвладлары Јеһоваја јох, она гулаг ассынлар, она ибадәт етсинләр. Һәрчәнд ки, онлары бир-биринә бағышлајан, онлар үчүн ҝөзәл бағ салан, әбәди јашамалары үчүн сағлам бәдән верән, үмумијјәтлә онлара һәр шеји верән Јеһова иди. Бәс Шејтан онлара нә вермишди?

⁴ Әфсус ки, Адәмлә Һәвва итаәтсизлик едәрәк Аллаһла бағларыны гопардылар. Фаҹиәви нәтиҹә һәр биримизә мәлумдур. Гопарылан ҝүл јаваш-јаваш солуб гурудуғу кими, онларын да һәјаты тәдриҹән солду вә нәтиҹәдә өлдүләр. Онларын өвладлары, о ҹүмләдән бизләр дә ҝүнаһын аҹы нәтиҹәсини дадырыг (Ром. 5:12). Бу ҝүн дә чохлары Адәмлә Һәвва кими Аллаһа итаәтсизлик едәрәк өз билдикләри кими јашајыр (Ефес. 2:1—3). Амма онларын һәјаты ајдын ҝөстәрир ки, Аллаһа гаршы чыхмаг һикмәтли аддым дејил (Мәс. 21:30).

5. Аллаһ бәшәријјәтлә бағлы нәјә әмин иди вә бу әминлик өзүнү доғрултду?

⁵ Јеһова әмин иди ки, Ону ахтаран, Она хидмәт етмәк истәјән инсанлар чох олаҹаг вә тәбии ки, онларын арасында ҝәнҹләр дә олаҹаг (Зәб. 103:17, 18; 110:3). Бу ҹүр ҝәнҹләр Јеһова үчүн чох дәјәрлидир! Бәс сиз өзүнүзү онларын арасында ҝөрүрсүнүз? Әҝәр беләдирсә, сөзсүз ки, Јеһовадан чохлу «јахшы немәтләр» алмысыныз вә бу немәтләр сизә бөјүк хошбәхтлик ҝәтирир. (Зәбур 103:5 ајәсини охујун; Мәс. 10:22.) Мәгаләдә бу «јахшы немәтләр»ә дахил олан дөрд саһәни мүзакирә едәҹәјик: руһани гида, ән јахшы достлар, дәјәрли мәгсәдләр вә һәгиги азадлыг.

6. Нәјә ҝөрә руһани тәләбаты тәмин етмәк лазымдыр вә Јеһова бу саһәдә сизә неҹә көмәк едир?

⁶ Аллаһ һејванлара Ону танымаг еһтијаҹы вермәјиб. Амма инсанларда белә бир тәләбат вар вә јалныз Аллаһ бу тәләбатымызы тәмин едә биләр (Мәт. 4:4). Јараданымыза гулаг асанда дәрракә, һикмәт вә хошбәхтлик газанырыг. Иса Мәсиһ демишди: «Аллаһа еһтијаҹы олдуғуну дәрк едәнләр хошбәхтдир» (Мәт. 5:3). Јеһова руһани тәләбатымызы Өз Кәламы вә садиг нөкәрин вердији гида васитәсилә тәмин едир (Мәт. 24:45). О бизи бол чешидли руһани гида илә бәсләјир! (Әшј. 65:13, 14).

7. Аллаһын тәгдим етдији руһани гиданы мәнимсәмәјин һансы фајдалары вар?

⁷ Аллаһын вердији руһани гида сајәсиндә газандығыныз һикмәт вә дүшүнҹә өзүнүзү бир чох тәһлүкәләрдән горумаға көмәк едәҹәк. (Мәсәлләр 2:10—14 ајәләрини охујун.) Мәсәлән, бу хүсусијјәтләрин сајәсиндә Јараданын олмамасы, хошбәхтлијин вар-дөвләтдә олмасы кими јаланлара алданмајаҹагсыныз. Һәмчинин бу хүсусијјәтләр сизә нәфсинизә вә пис вәрдишләрә гаршы дурмаға көмәк едәҹәк. Одур ки, илаһи һикмәтә вә дүшүнҹәјә јијәләнмәк үчүн әлиниздән ҝәләни етмәјә давам един. Бу дәјәрли хүсусијјәтләрә саһиб олдугҹа Јеһованын сизи севдијинә вә сизин хејринизи истәдијинә шәхсән әмин олаҹагсыныз (Зәб. 34:8; Әшј. 48:17, 18).

8. Нә үчүн Јеһоваја јахынлашмаг инди даһа ваҹибдир вә бунун ҝәләҹәкдә сизә һансы хејри олаҹаг?

 ⁸ Тезликлә Шејтан дүнјасы тамамилә виран олаҹаг. Онда Јеһовадан башга сығынаҹағымыз олмајаҹаг. Доғрудан да, вахт ола биләр ки, бир гарын јемәјә ҝөрә ҝөзүмүзү Аллаһа дикәк! (Һәб. 3:2, 12—19). Она ҝөрә дә мәһз инди Јеһоваја даһа јахын олмағын вә Она олан етибарымызы мөһкәмләндирмәјин вахтыдыр (2 Бут. 2:9). Белә етсәниз, әтрафынызда баш верәнләрдән асылы олмајараг, мәзмурчу Давудун кечирдији һиссләри кечирәҹәксиниз. О демишди: «Јеһованы даим ҝөзүмүн өнүндә сахлајырам, сағымда дуруб, әсла сарсылмарам!» (Зәб. 16:8).

9. а) Јәһја 6:44 ајәсиндә Јеһова һагда нә дејилир? б) Башга бир диндашыныза раст ҝәлмәјин һансы өзәллији вар?

⁹ Јеһова сәмими-гәлбли инсанлары һәгиги ибадәтә ҹәлб едәрәк руһани аиләсинә гәбул едир. (Јәһја 6:44 ајәсини охујун.) Һәгигәтдә олмајан бир инсанла илк дәфә гаршылашанда онун һаггында нәләри билирсиниз? Јәгин ки, чох аз, узағы ады вә хариҹи ҝөрүнүшү барәдә мәлуматыныз олур. Амма Јеһованы таныјан, Ону севән инсана илк дәфә раст ҝәләндә вәзијјәт дәјишир. Һәтта инсанын башга өлкәдән, башга мәдәнијјәтдән олмасына бахмајараг, сизин бир-бириниз һагда хејли мәлуматыныз олур.

10, 11. Јеһованын халгыны нәләр бирләшдирир вә бу сизә неҹә фајда ҝәтирир?

¹⁰ Мисал үчүн, фәргли дилләрдә данышсаныз да, ортаг данышдығыныз дили, саф дили дәрһал таныјырсыныз (Сәф. 3:9). Нәтиҹәдә, бир-биринизин етигады һагда мәлуматыныз олур, мәсәлән, икиниз дә Аллаһа инанырсыныз, билирсиниз ки, икинизин дә әхлаг дәјәрләри вә ҝәләҹәјә олан үмиди ејнидир. Бунлар инсаны танымаг, она етибар етмәк үчүн лазым олан ән ваҹиб шејләрдир. Үстәлик, бу мәлуматлар сајәсиндә мөһкәм вә сарсылмаз достлуглар гура биләрсиниз.

¹¹ Десәк ки, Јеһованын хидмәтчиси кими сиз дүнјанын дөрд бир јанында јашајан ән јахшы достлара саһибсиниз, шиширтмиш  олмарыг. Һәтта бахмајараг ки, онларын чоху илә һәлә растлашмамысыныз. Јеһованын халгындан башга бу ҹүр дәјәрли һәдијјәјә саһиб олан вар?

12. Гаршыныза һансы руһани мәгсәдләр гоја биләрсиниз?

¹² Ваиз 11:9—12:1 ајәләрини охујун. Һал-һазырда чатмаға чалышдығыныз һансыса руһани мәгсәдләриниз вар? Ола билсин, Мүгәддәс Китабы һәр ҝүн охумағы гаршыныза мәгсәд гојмусунуз. Бәлкә дә, данышыг вә ја тәлим вермәк габилијјәтинизин үзәриндә ишләјирсиниз. Мәгсәдиниздән асылы олмајараг, мүсбәт нәтиҹәләр әлдә едәндә вә ја башгалары буну ҝөрүб сизи тәрифләјәндә һансы һиссләри кечирирсиниз? Чох јәгин ки, нәјәсә наил олмағын севинҹини дујурсунуз. Белә дә олмалыдыр, ахы сиз Иса Мәсиһдән өрнәк алараг Јеһованын ирадәсини өз истәкләриниздән үстүн тутурсунуз (Зәб. 40:8; Мәс. 27:11).

13. Аллаһа хидмәт етмәјин дүнјәви мәгсәдләрә ҹан атмагдан үстүн олдуғуну нә ҝөстәрир?

¹³ Јеһоваја ибадәтлә бағлы мәгсәдләр гојмагла сиз һәјатыныза мәна гатан, хошбәхтлик бәхш едән ишлә мәшғул олурсунуз. Һәвари Булус јазырды: «Мәтин галын, сарсылмаз олун, һәмишә Рәббин ишиндә чох чалышын вә билин ки, Онун јолунда чәкдијиниз зәһмәт һәдәр дејил» (1 Кор. 15:58). Дүнјәви мәгсәдләр үзәриндә гурулмуш һәјат нә гәдәр уғурлу ҝөрүнсә дә, пуч вә мәнасыздыр (Лука 9:25). Сүлејман падшаһын һәјатындан бу саһәдә чох шеј өјрәнә биләрик (Ром. 15:4).

14. Сүлејман падшаһын һәјатындан нә өјрәнирик?

¹⁴ Ағласығмаз дәрәҹәдә вар-дөвләтә вә сәлаһијјәтә саһиб олан Сүлејман пејғәмбәр «зөвг-сәфанын дадына» бахмаг истәјирди (Ваиз 2:1—10). О, евләр тикмиш, бағ-бағчалар салмыш, үрәји истәјән һәр шеји етмишди. Бәс бүтүн бунлар она хошбәхтлик, мәмнунлуг ҝәтирди? О демишди: «Дөнүб әлләримин ҝөрдүјү бүтүн ишләрә, чәкдијим зәһмәтә баханда ҝөрдүм ки, һәр шеј пучдур... Һеч нәјин дәјәри јохдур» (Ваиз 2:11). Неҹә дә ҝөзәл дәрсдир! Бәс сиз ағыллы давраныб бундан нәтиҹә чыхарырсыныз?

15. Иман нә үчүн ваҹибдир вә Зәбур 32:8 ајәсинә әсасән, онун һансы фајдалары вар?

¹⁵ Бәзи инсанлар башлары дашдан-даша дәјәндән сонра һәјатда нәләрсә өјрәнир. Јеһова сизин әзаб чәкмәјинизи истәмир. Бунунла белә, Она итаәт етмәк, Ону һәјатда һәр шејдән үстүн тутмаг үчүн иман ҝәрәкдир. Бу ҹүр иман чох гијмәтлидир вә һеч вахт пешманчылыг ҝәтирмәз. Бәли, Јеһова «Онун адына ҝөстәрдијиниз мәһәббәти» һеч вахт унутмаз (Ибр. 6:10). Одур ки, иманынызы мөһкәмләндирмәк үчүн әлиниздән ҝәләни един. Онда ҝөрәҹәксиниз ки, сәмави Атаныз сизин үчүн һәр шејин ән јахшысыны истәјир. (Зәбур 32:8 ајәсини охујун.)

16. Нәјә ҝөрә саһиб олдуғумуз азадлығы гијмәтләндирмәли вә ондан ағылла истифадә етмәлијик?

¹⁶ Һәвари Булус јазмышды: «Јеһованын руһу һарададырса, орада азадлыг вар» (2 Кор. 3:17). Јеһова азадлығы севир, О бизи дә азадлыг севҝиси илә јарадыб. Бунунла белә, О истәјир ки, бизим үчүн мүдафиә олан азадлығымыздан мәсулијјәтлә истифадә едәк. Ола билсин, сиз порнографијаја бахан, әхлагсызлыг едән, тәһлүкәли идман нөвләри илә мәшғул олан, наркотик гәбул едән, ичкидән суи-истифадә едән ҝәнҹләр таныјырсыныз. Онлар бүтүн бу шејләрдән ани һәзз, зөвг дујсалар да, әксәр һалларда бунун бәдәлини ағыр өдәјирләр. Хәстәлик, асылылыг, һәтта өлүм кими аҹы нәтиҹәләр  бичирләр (Гал. 6:7, 8). Ајдындыр ки, азад олдугларыны дүшүнән бу ҝәнҹләр өзләри өзләрини алдадырлар (Тит. 3:3).

17, 18. а) Јеһоваја итаәт инсаны неҹә азад едир? б) Адәмлә Һәвванын саһиб олдуғу азадлыг бу ҝүн саһиб олдуғумуз азадлыгдан нә илә фәргләнир?

¹⁷ Мүгәддәс Китаб принсипләринә әмәл етдији үчүн хәстәләнән нечә инсан таныјырсыныз? Ајдындыр ки, Јеһоваја итаәткарлыг инсанын һәм хејринәдир, һәм дә она азадлыг верир (Зәб. 19:7—11). Һәмчинин азадлығыныздан ағылла, јәни Аллаһын мүкәммәл ганун вә принсипләри чәрчивәсиндә истифадә етдикдә ҝөстәрирсиниз ки, етибарлы инсансыныз. Онда валидејнләриниз сизә даһа чох азадлыг верәҹәк. Үстәлик, Јеһова да садиг бәндәләринә тезликлә камил азадлыг бәхш едәҹәјини вәд едир. Мүгәддәс Китабда бу азадлыг «Аллаһын өвладларынын шанлы азадлығы» адланыр (Ром. 8:21).

¹⁸ Адәмлә Һәвва бу азадлығы дадмышды. Јеһова онларын азадлыгларыны мәһдудлашдыран нечә ганун вермишди? Ҹәми бир. Онлар бағдакы ағаҹлардан биринин мејвәсиндән јемәмәли идиләр (Јар. 2:9, 17). Сизҹә, Аллаһ бу гануну вермәклә һагсыз вә сәрт давранмышды? Тәбии ки, јох! Инсанлар тәрәфиндән гојулан вә өјрәниб әмәл етмәли олдуғумуз сајсыз-һесабсыз ганунларын јанында бу ганун нә иди ки?!

19. Јеһова вә Иса Мәсиһ азад олмағымыз үчүн бизә нәләр өјрәдир?

¹⁹ Јеһова Аллаһ хидмәтчиләринә гаршы һикмәтлә давраныр. О бизә сајсыз-һесабсыз ганунлар вермәјиб, әксинә, мәһәббәт ганунуна итаәт етмәјимиз үчүн сәбирлә көмәк едир. Јеһова бизә Онун принсипләринә ујғун јашамағы вә пислијә нифрәт етмәји өјрәдир (Ром. 12:9). Иса Мәсиһин Дағүстү вәзи пислијин көкүндә дуран сәбәбләри баша дүшмәјимизә көмәк едир (Мәт. 5:27, 28). Мәсиһ Аллаһын Падшаһлығынын Падшаһы кими јени дүнјада да бизә салеһлијә вә ганунсузлуға онун кими бахмағы өјрәдәҹәк (Ибр. 1:9). О һәмчинин бизи физики вә әгли камиллијә јетишдирәҹәк. Бир дүшүнүн, ҝүнаһлы мејилләр бизи өзүнә чәкмәјәҹәк вә гејри-камиллијин аҹы нәтиҹәләрини дадмајаҹағыг. Нәһајәтдә биз Јеһованын «шанлы азадлығына» говушаҹағыг.

20. а) Јеһова саһиб олдуғу азадлыгдан неҹә истифадә едир? б) Биз Аллаһдан неҹә нүмунә ҝөтүрә биләрик?

²⁰ Тәбии ки, һеч вахт мүтләг азадлыға саһиб олмајаҹағыг. Азадлығымыз Аллаһа вә диндашларымыза бәсләдијимиз мәһәббәтлә тәнзимләнәҹәк. Јеһова Ондан өрнәк ҝөтүрмәјимизи истәјир. О, мәһдудијјәтсиз азадлыға саһибдир, бунунла белә, јаратдығы шүурлу варлыглара гаршы мәһәббәтлә давраныр (1 Јәһ. 4:7, 8). Демәли, биз јалныз Аллаһдан өрнәк ҝөтүрдүјүмүз тәгдирдә һәгиги азадлыға саһиб ола биләрик.

21. а) Давуд пејғәмбәр Јеһоваја һансы мүнасибәти бәсләјирди? б) Нөвбәти мәгаләдә нәји арашдыраҹағыг?

²¹ Јеһовадан алдығыныз бол руһани гида, ҝөзәл достлар, дәјәрли мәгсәдләр, һәгиги азадлыг вә бу кими чохлу «јахшы немәтләр»и дәјәрләндирирсиниз? (Зәб. 103:5). Еләдирсә, јәгин сиз дә Зәбур 16:11 ајәсиндә јазылан сөзләрә гошулурсунуз. Давуд пејғәмбәр демишди: «Мәнә һәјат јолуну өјрәдирсән, һүзурунда севинҹ, шадлыг ашыб-дашыр, сағында олмаг мәнә әбәди сәадәт ҝәтирир». Нөвбәти мәгаләдә мөвзујла бағлы Зәбур 16-ҹы мәзмурда јазылан бәзи инҹиләри арашдыраҹағыг. Бу инҹиләр сизә ән ҝөзәл һәјата неҹә саһиб ола биләҹәјинизи даһа ајдын ҝөрмәјә көмәк едәҹәк.